ពលរដ្ឋខ្មែរនិងថៃ ដែលឆ្លងកាត់ព្រំដែនកម្ពុជា-ថៃ ដើម្បីទៅធ្វើការចិញ្ចឹមជីវិត ចោទសមត្ថកិច្ចនគរបាលអន្តោប្រវេសន៍ប្រចាំការនៅច្រកទ្វារព្រំដែនអន្តរជាតិប៉ោយប៉ែត លោក អ៊ី ចំរើន ដែលត្រូវជាក្មួយប្រុសបង្កើតរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ថាបង្ខំឲ្យពួកគេបង់ប្រាក់ក្រៅផ្លូវការចន្លោះពី ១០០បាតទៅជាង ២០០បាត ជាថ្នូរនៃការបោះត្រាលើឯកសារចេញចូលព្រំដែនស្របច្បាប់។
ក្រុមពលរដ្ឋខ្មែរភាគច្រើនដែលចេញចូលធ្វើការងារក្នុងទឹកដីថៃ ឆ្លងកាត់ច្រកព្រំដែនអន្តរជាតិប៉ោយប៉ែត សូមមិនបញ្ចេញឈ្មោះ បានឲ្យដឹងថា សកម្មភាពរបស់លោក អ៊ី ចំរើន បានប្រើបក្ខពួក និងកូនចៅក្រោមបង្គាប់ឲ្យបង្ខំជំរិតយកលុយពីកម្មករជនជាតិថៃ និងពលរដ្ឋខ្មែរ ថាប្រើតួនាទីខុសច្បាប់ និងបង្កើតឲ្យមានអំពើពុករលួយ នាំឲ្យប៉ះពាល់ដល់កិត្តិយសរបស់កម្លាំងនគរបាលជាតិ និងជាពិសេស ប៉ះពាល់ដល់កិត្តិយសជាតិធ្ងន់ធ្ងរ។
ក្រុមកម្មករខ្មែរអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ លោក ស ខេង រដ្ឋមន្ត្រីក្រសួងមហាផ្ទៃ ជាពិសេសលោកនាយករដ្ឋមន្ត្រី ហ៊ុន សែន ដើម្បីឈានដល់ប្រើកណ្ដាប់ដៃដែកចាត់វិធានការទៅលើសមត្ថកិច្ចមួយចំនួនប្រចាំការនៅច្រកទ្វារអន្តរជាតិប៉ោយប៉ែត ដែលដឹកនាំដោយលោក អ៊ី ចំរើន លោក ឃុន ឫទ្ធិ និងលោក ជួន សារី ជានាយរងប៉ុស្តិ៍ ឲ្យបានឆាប់ ដើម្បីសម្រួលដល់ការធ្វើដំណើរ និងកាត់បន្ថយភាពក្រីក្ររបស់ពលរដ្ឋ។
ក្រុមប្រជាពលរដ្ឋអះអាងបន្តថា រាល់ថ្ងៃនេះ សមត្ថកិច្ចនគរបាលដែលប្រចាំការនៅច្រកទ្វារព្រំដែនអន្តរជាតិប៉ោយប៉ែត តែងជំរិតយកប្រាក់ក្រៅផ្លូវការពីពួកគាត់ក្នុងម្នាក់ ១០០បាត ឬស្មើប្រមាណ ៣ដុល្លារអាមេរិក ទើបមន្ត្រីនោះបោះត្រាលើឯកសារឆ្លងកាត់ព្រំដែនជូនពួកគាត់។ បើមិនបង់លុយជូនតាមការទាមទារទេ មន្ត្រីទាំងនោះមិនបោះត្រាលើឯកសារឆ្លងកាត់ព្រំដែនឲ្យឡើយ។
ទាក់ទិនភាពមិនប្រក្រតីនេះ កាលពីថ្ងៃទី៧ ខែមិថុនា ឆ្នាំ២០២២ កាសែតថៃ ឈ្មោះ កៅ ដែត (Kaoded) បានចុះផ្សាយថា មានពលរដ្ឋថៃមួយក្រុមបានប្រមូលផ្ដុំគ្នាតវ៉ានៅពីមុខស្ថានកុងស៊ុលខ្មែរប្រចាំខេត្តស្រះកែវ (Sa Kaeo) ដើម្បីតវ៉ាទៅលើករណីសមត្ថកិច្ចកម្ពុជានៅច្រកទ្វារព្រំដែនប៉ោយប៉ែត តម្រូវឲ្យពួកគាត់បង់ប្រាប់បន្ថែម ១០០បាតទៅឲ្យមន្ត្រីកម្ពុជានៅច្រកព្រំដែន។ ជាធម្មតា ការឆ្លងព្រំដែនរបស់ពួកគាត់ ច្បាប់កំណត់ត្រូវបង់ប្រាក់ត្រឹម ២០បាត និងចំណាយលើផ្នែកវេជ្ជសាស្ត្រ ២០បាតតែប៉ុណ្ណោះ។
ប៉ុន្តែនៅពេលពួកគាត់ប្រគល់ឯកសារឆ្លងដែនជូនសមត្ថកិច្ចកម្ពុជា បែរជាតម្រូវឲ្យពួកគាត់បង់ប្រាក់បន្ថែម ១០០បាត ឬច្រើនជាងនេះ ទាំងមិនដឹងថាត្រូវចំណាយទៅលើអ្វី ហើយប្រសិនបើពួកគាត់មិនព្រមបង់ជូនគ្រប់ចំនួនតាមការទាមទារទេ គឺភ្នាក់ងារប្រចាំការតាមច្រកព្រំដែននេះ នឹងមិនបោះត្រាលើឯកសារឆ្លងដែនជូនពួកគាត់ទេ។
ប្រភពពីពលរដ្ឋថៃ បានអះអាងនៅថ្ងៃទី២១ ខែវិច្ឆិកា នេះថា រាល់ថ្ងៃនេះនៅច្រកទ្វារព្រំដែនអន្តរជាតិប៉ោយប៉ែត សម្រាប់ពលរដ្ឋថៃម្នាក់ត្រូវចំណាយប្រាក់ចន្លោះពី ២០០បាតទៅ ២៤០បាតសម្រាប់ការឆ្លងព្រំដែនទៅមកក្នុងមួយថ្ងៃៗ។
ដោយឡែកសម្រាប់ក្រុមអ្នករត់ម៉ូតូកង់បី ផាសអាប់ និងអ្នករត់ម៉ូតូឌុបជាដើម ក៏បានត្អូញត្អែរដែរថា ចាប់តាំងពីច្រកទ្វារព្រំដែនអន្តរជាតិប៉ោយប៉ែត បានបើកឲ្យដំណើរការឡើងវិញក្រោយស្ងប់ការរាតត្បាតជំងឺកូវីដ-១៩ រួចមក លោក អ៊ី ចំរើន និងគូកនបានបង្កើតឲ្យមានអំពើពុករលួយ ជាពិសេសគំរាមបង្ខំគាបយកលុយពីពួកគាត់ ដោយក្នុងម៉ូតូដឹកភ្ញៀវជនបរទេស ១គ្រឿង ត្រូវតែបង់លុយថ្លៃប្រថាប់ត្រាឆ្លងដែនក្នុងម្នាក់ ២០០បាតជាដាច់ខាត ហើយក្នុងនោះក៏មានករណីមន្ត្រីច្រកទ្វារព្រំដែននេះតម្រូវឲ្យពួកគាត់បង់លុយចាប់ពី ១៥០០បាតទៅ ២០០០បាតជាប្រចាំខែថែមទៀតផង។
កម្មករប្រើកម្លាំងអូសរទេះ លីសែង ក្រុមអ្នករត់ម៉ូតូកង់បី និងក្រុមអ្នករត់ម៉ូតូឌុប អះអាងថា សមត្ថកិច្ចនគរបាលអន្តោប្រវេសន៍នៅក្រោមឱវាទលោក អ៊ី ចំរើន បានប្រើកាយវិការ និងពាក្យសម្ដីមិនសមរម្យមកលើប្រជាពលរដ្ឋ។
ជុំវិញការចោទប្រកាន់នេះ The Cambodia Daily នៅមិនទាន់អាចទាក់ទងលោក អ៊ី ចំរើន ដើម្បីបំភ្លឺជុំវិញការចោទប្រកាន់បាននៅឡើយទេ ខណៈលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ក៏មិនទាន់អាចទាក់ទងសុំការបំភ្លឺបានដែរនៅល្ងាចថ្ងៃទី២១ ខែវិច្ឆិកា ឆ្នាំ២០២២ នេះ។
នៅក្នុងរបាយការណ៍របស់អង្គការតម្លាភាពអន្តរជាតិ (TI) ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ ចេញផ្សាយកាលពីខែមករា កន្លងមក បានឲ្យដឹងថា កម្ពុជាទទួលបាន ២៣ពិន្ទុនៅក្នុងសន្ទស្សន៍នៃការយល់ឃើញពីអំពើពុករលួយប្រចាំឆ្នាំ២០២១ ដោយស្ថិតនៅចំណាត់ថ្នាក់ទី១៥៧ លើ ១៨០ប្រទេសនិងដែនដី ខណៈពិន្ទុនេះបង្ហាញថាកម្រិតអំពើពុករលួយក្នុងប្រទេសក្រីក្រមួយនេះមានភាពប្រសើរតិចតួចប៉ុណ្ណោះបើធៀបឆ្នាំមុន៕