ក្រុមសិទ្ធិមនុស្សក្នុងស្រុក ព្រមានថា ការសម្រេចរបស់សាលាឧទ្ធរណ៍លើសំណុំរឿង «បរិហារកេរ្តិ៍» របស់អនុប្រធានបក្សភ្លើងទៀន លោក សុន ឆ័យ ដែលបង្កើនប្រាក់សំណងជំងឺចិត្តចំនួន ១លានដុល្លារអាមេរិក គឺបង្ហាញពីឆន្ទៈរបស់តុលាការក្នុងការបង្កើនការរឹតត្បិតលើបរិយាកាសនយោបាយនៅកម្ពុជាកាន់តែខ្លាំងបន្ថែមទៀត។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៥ ធ្នូ នេះថា ការប្រើប្រព័ន្ធតុលាការដើម្បីធ្វើទុក្ខបុកម្នេញទៅលើក្រុមជំទាស់នៅតែស្ថិតក្នុងរបៀបវារៈក្តៅនៅឡើយ ស្របពេលដែលមជ្ឈដ្ឋានជាតិ និងអន្តរជាតិក៏បានបង្កើនការរិះគន់ពីបញ្ហានេះជាបន្តបន្ទាប់។
លោកអំពាវនាវទៅកាន់រដ្ឋាភិបាលកម្ពុជាឲ្យបញ្ឈប់នូវការរឹតត្បិតទៅលើក្រុមមន្ត្រីបក្សជំទាស់ ដើម្បីបើកលំហសេរីភាពបញ្ចេញមតិ ការធានានូវការអនុវត្តសិទ្ធិមូលដ្ឋាន និងស្ដារលទ្ធិប្រជាធិបតេយ្យឡើងវិញក្នុងការឈានទៅរកការអភិវឌ្ឍជាតិ ស្របតាមខ្លឹមសារនៃរដ្ឋធម្មនុញ្ញ និងដើម្បីបញ្ចប់នូវវិបត្តិនយោបាយដែលធ្វើឲ្យប៉ះពាល់ដល់ផលប្រយោជន៍ជាតិ និងពលរដ្ឋដូចសព្វថ្ងៃនេះ។
កាលពីថ្ងៃទី១៤ ខែធ្នូ ឆ្នាំ២០២២ សាលាឧទ្ធរណ៍រាជធានីភ្នំពេញ បានតម្កល់សេចក្ដីសម្រេចក្នុងសំណុំរឿង «បរិហារកេរ្តិ៍» របស់មន្ត្រីជាន់ខ្ពស់បក្សភ្លើងទៀន លោក សុន ឆ័យ ទុកជាបានការដដែល និងសម្រេចបង្កើនប្រាក់សំណងជំងឺចិត្តឲ្យទៅឲ្យគណបក្សប្រជាជនកម្ពុជាចំនួន ២៥ម៉ឺនដុល្លារអាមេរិកបន្ថែមទៀត។
លោក កែត ឃី ដែលជាមេធាវីការពារសិទ្ធិមួយរូបរបស់លោក សុន ឆ័យ បានថ្លែងប្រាប់អ្នកសារព័ត៌មានថា ការសម្រេចនេះ គឺជារឿងដែលអយុត្តិធម៌ខ្លាំងណាស់សម្រាប់កូនក្ដីរបស់លោក ហើយថាលោកនឹងរៀបចំពាក្យបណ្ដឹងបន្តទៀតទៅកាន់តុលាការកំពូល។
កាលពីថ្ងៃទី៥ ខែមិថុនា ឆ្នាំ២០២២ គណៈកម្មាធិការជាតិរៀបចំការបោះឆ្នោត (គ.ជ.ប) និងគណបក្សប្រជាជនកម្ពុជា បាននាំគ្នាប្ដឹងលោក សុន ឆ័យ ពីបទបរិហារកេរ្តិ៍ ដែលពាក់ព័ន្ធនឹងករណីដែលលោកបានរិះគន់ពីការបោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីដើមខែមិថុនា ឆ្នាំ២០២២ ថាជាលទ្ធផលដែលមិនបានឆ្លុះបញ្ចាំងពីឆន្ទៈរបស់ពលរដ្ឋ ដោយមានការបំភិតបំភ័យ ការទិញ និងមានការលួចសន្លឹកឆ្នោត ជាដើម។
កាលពីអំឡុងខែតុលា ឆ្នាំ២០២២ កន្លងទៅ សាលាដំបូងរាជធានីភ្នំពេញ បានប្រកាសសាលក្រមឱ្យលោក សុន ឆ័យ ចាញ់ក្ដីក្នុងសំណុំរឿងបរិហារកេរ្តិ៍នេះ ដោយសម្រេចឱ្យរូបលោកផ្ដល់សំណងជំងឺចិត្តដល់គណបក្សកាន់អំណាចចំនួន ៣ពាន់លានរៀល ឬស្មើនឹងប្រមាណ ៧៥ម៉ឺនដុល្លារអាមេរិក និងតម្រូវឲ្យបង់ប្រាក់ពិន័យចំនួន ៨លានរៀលចូលជាថវិការដ្ឋថែមទៀត។ បន្ថែមពីនេះ លោកក៏ត្រូវបានតុលាការតម្រូវឱ្យបង់ប្រាក់ពិន័យចំនួន ៩លានរៀលចូលថវិការដ្ឋដែរ ក្នុងបណ្ដឹងបរិហារកេរ្តិ៍របស់ គ.ជ.ប ខណៈ គ.ជ.ប បានទាមទារឲ្យលោកចេញមុខសុំទោសជាសាធារណៈលើករណីនេះ។ ជាងនេះទៀត តុលាការក្រុងភ្នំពេញក៏បានចេញដីកាកាលពីថ្ងៃទី១១ ខែវិច្ឆិកា ឆ្នាំ២០២២ ដោយរឹបអូសជាបណ្ដោះអាសន្ននូវផ្ទះ ២កន្លែងរបស់លោក សុន ឆ័យ នៅរាជធានីភ្នំពេញ និងខេត្តសៀមរាប ផងដែរ។
ជុំវិញបញ្ហានេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងកាលពីពេលថ្មីៗនេះថា មានភ្លើងទើបមានផ្សែង។ លោកបន្ថែមថា លោក សុន ឆ័យ ជាអ្នកដុតភ្លើង ទើបបានជាមានផ្សែង ហើយថាបើលោក សុន ឆ័យ មិនចោទប្រកាន់បក្សកាន់អំណាច ក៏គ្មានអ្នកណាទៅប្តឹងគាត់ដែរ៕