ពីប្រទេសភូមា ឯណោះវិញ អ្នកស្រី អ៊ុងសាន ស៊ូជី អាយុ ៧៧ឆ្នាំ អាចនឹងត្រូវជាប់ទោសព្រហ្មទណ្ឌសរុបទាំងអស់ជាង ១០០ឆ្នាំក្នុងសំណុំរឿង ១០ករណី។
តាមការចុះផ្សាយរបស់សារព័ត៌មានភូមា Myanmar Now នៅថ្ងៃទី៣០ ធ្នូ តុលាការនៃរបបសឹកភូមានឹងប្រកាសសាលក្រមផ្ដន្ទាទោសអ្នកស្រី។ តាមប្រភពដដែលនេះ សាលក្រមនៃការជំនុំជម្រះក្តីអ្នកស្រី អ៊ុងសាន ស៊ូជី ទៅលើបទចោទចំនួន ៥សំណុំរឿងចុងក្រោយនេះ នឹងត្រូវប្រកាសនៅថ្ងៃសុក្រក្នុងសប្ដាហ៍នេះ។
បទចោទចំនួន ៥ នេះតម្រូវឲ្យអ្នកស្រី អ៊ុងសាន ស៊ូជី មានទោសជាប់ពន្ធនាគារ ៧៥ឆ្នាំជាការបន្ថែមទៅលើទោសដែលមានស្រាប់ ២៦ឆ្នាំហើយនោះ។
អ្នកវិភាគស្ថានការណ៍នយោបាយភូមាមួយចំនួនយល់ឃើញបែបនេះថា ទោសជាប់ពន្ធនាគារទាំងឡាយដែលចោទប្រកាន់ប្រឆាំងនឹងអ្នកស្រី អ៊ុងសាន ស៊ូជី គឺទំនងអាចនឹងលើកលែងចោលទៅវិញនៅឆ្នាំក្រោយ គឺនៅមុនតែប៉ុន្មានខែប៉ុណ្ណោះដែលរបបសឹករៀបចំបោះឆ្នោតនៅអំឡុងខែសីហា។
តែយ៉ាងណា របបសឹកភូមា ប្រញាប់ប្រកាសសាលក្រមនេះក្រោយពីក្រុមប្រឹក្សាសន្តិសុខអង្គការសហប្រជាជាតិ បានចេញដំណោះស្រាយជាលើកដំបូងបន្ទាប់ពីខកខានជិត ២ឆ្នាំដោយបង្គាប់ទៅរបបសឹកភូមាឱ្យបញ្ចប់ហិង្សា និងដោះលែងអ្នកទោសនយោបាយទាំងអស់ រួមទាំងត្រូវដោះលែងអ្នកស្រី អ៊ុងសាន ស៊ូជី និងប្រធានាធិបតី មីន វិយីន។
ដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ កាលពីសប្ដាហ៍មុន ធ្វើឡើងដោយការជំរុញរបស់អង់គ្លេស និងសហរដ្ឋអាមេរិក ហើយការក្លាយជាដំណោះស្រាយតាមផ្លូវច្បាប់បាន ព្រោះតែចិន និងរុស្ស៊ី សម្រេចដូរចិត្តមកបោះឆ្នោតអនុប្បវាទ ដែលជាសន្លឹកឆ្នោតមិនត្រូវបានគេរាប់ថាមានសុពលភាពឡើយ។
ការបោះឆ្នោតរបស់ក្រុមប្រឹក្សាសន្តិសុខមានសំឡេង ១២ ទល់នឹង ៣ ដែលឥណ្ឌាក៏បោះឆ្នោតអនុប្បវាទដែរ តែឥណ្ឌាពុំមែនជាសមាជិកអចិន្ត្រៃយ៍ដែលមានអំណាចវេតូនោះទេ៕