សមាគមគ្រូបង្រៀនកម្ពុជាឯករាជ្យ គ្រោងនឹងហែធម្មយាត្រានៅថ្ងៃទី០១ ខែកុម្ភៈ ចាប់ពីរូបសំណាកលោកយាយពេញ នៅរាជធានីនៅភ្នំពេញឆ្ពោះទៅកាន់បូជនីយដ្ឋានប្រវត្តិសាស្ត្រលោកឧកញ៉ា ឃ្លាំង មឿង ខេត្តពោធិ៍សាត់ ដោយឆ្លងកាត់ខេត្តចំនួន៤ ខណៈលោក ហ៊ុន សែន ប្រកាសជាសាធារណៈថាជាមេដឹកនាំបែបហិង្សា។
សេចក្តីប្រកាសព័ត៌មានរបស់សមាគមគ្រូបង្រៀនកម្ពុជាឯករាជ្យ ចុះថ្ងៃទី២០ ខែមករា ឆ្នាំ២០២៣ បានឲ្យដឹងថា ការហែធម្មយាត្រាដែលប្រព្រឹត្តទៅនៅថ្ងៃទី០១ ខែកុម្ភៈ ឆ្នាំ២០២៣ ខាងមុខនេះ ដឹកនាំដោយលោក រ៉ុង ឈុន ប្រធានសហភាពសហជីពកម្ពុជា។
ប្រភពដដែលថា ការហែធម្មយាត្រានឹងជួបជុំគ្នានៅរូបសំណាកលោកយាយពេញ នៅរាជធានីភ្នំពេញទៅតាមផ្លូវជាតិលេខ៦ ដោយឆ្លងកាត់ខេត្តកណ្ដាល និងខេត្តកំពង់ឆ្នាំង បន្ទាប់មកឆ្ពោះទៅកាន់បូជនីយដ្ឋានប្រវត្តិសាស្ត្រលោកឧកញ៉ា ឃ្លាំង មឿង ខេត្តពោធិ៍សាត់ ដើម្បីរៀបចំពិធីសាសនា រួចបញ្ចប់កម្មវិធីតែម្ដង។
សមាគមគ្រូបង្រៀនកម្ពុជាឯករាជ្យបញ្ជាក់ថា ការហែធម្មយាត្រានេះក្នុងគោលបំណងលើកកម្ពស់សីលធម៌សង្គមដែលបានឆ្លាក់ចុះខ្លាំងនាពេលបច្ចុប្បន្ន។ ជាក់ស្ដែង ការថ្លែងសន្ទរកថារបស់មេដឹកនាំម្ដងៗ បានប្រើពាក្យអសុរោះ ធ្វើទុក្ខបុកម្នេញ ចាប់សកម្មជននយោបាយ សង្គម សហជីព និងអ្នកនយោបាយដាក់គុកតាមអំពើចិត្ត។
ការលើកឡើងរបស់សមាគមគ្រូបង្រៀនកម្ពុជាឯករាជ្យ ធ្វើឡើងស្របពេលដែលថ្មីៗនេះ លោក ហ៊ុន សែន បានប្រកាសប្រើប្រព័ន្ធតុលាការ និងដំបងលើសកម្មជន ព្រមទាំងជេរប្រមាថធ្ងន់ធ្ងរលើមេដឹកនាំបក្សប្រឆាំង រួមទាំងអ្នកដែលមានមតិ និងទស្សនៈនយោបាយផ្ទុយពីគណបក្សប្រជាជនកម្ពុជាផងដែរ។
ថ្លែងនៅក្នុងវេទិកាដែលស្ថិតក្នុងសង្កាត់ព្រែកព្នៅ រាជធានីភ្នំពេញ កាលពីថ្ងៃទី១៩ ខែមករា ឆ្នាំ២០២៣ នេះ លោក ហ៊ុន សែន បានព្រមានចាប់ខ្លួនអ្នករិះគន់ដាក់ពន្ធនាគារដោយមិនរុញរាទៀតឡើយ រាប់ចាប់តាំងពីថ្នាក់មូលដ្ឋានដល់ថ្នាក់ជាតិ នៅពេលរកឃើញថានៅបន្តសាបព្រោះវប្បធម៌រិះគន់គណបក្សប្រជាជនកម្ពុជា។
ក្រៅពីព្រមាន មេដឹកនាំកាន់អំណាច ៣៨ឆ្នាំនៅកម្ពុជារូបនេះក៏បានទទួលស្គាល់ថា លោកគឺជាមេដឹកនាំបែបហិង្សាផងដែរ។
សារព័ត៌មាន The Cambodia Daily មិនទាន់អាចសុំការឆ្លើយពីអ្នកនាំពាក្យក្រសួងមហាផ្ទៃ លោក ខៀវ សុភ័គ បាននៅឡើយ ស្របពេលដែលសមាគមគ្រូបង្រៀនកម្ពុជាឯករាជ្យបានដាក់លិខិតជូនដំណឹងទៅឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ លោក ស ខេង ចុះថ្ងៃទី១៦ ខែមករា ឆ្នាំ២០២៣ ជុំវិញរឿងនេះ៕