ពលរដ្ឋរងគ្រោះដីធ្លីម្នាក់បានស្លាប់ និង ៤នាក់ទៀតសន្លប់ នៅអំឡុងពេលរង់ចាំជួបអភិបាលខេត្តកោះកុង ដើម្បីស្នើសុំឲ្យអភិបាលខេត្តនេះជួយពន្លឿនការដោះស្រាយវិវាទដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់ សមាជិកព្រឹទ្ធសភាពីខាងបក្សកាន់អំណាច ខណៈវិវាទដីធ្លីនេះអូសបន្លាយរយៈពេលជាង ១០ឆ្នាំហើយ។
បើតាមប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន បានបង្ហោះសារភ្ជាប់ជាមួយរូបភាពរបស់ពលរដ្ឋរងគ្រោះដែលបាននាំគ្នាទៅប្រមូលផ្ដុំនៅខាងមុខសាលាខេត្តកោះកុង កាលពីថ្ងៃទី១៥ ខែមីនា ឆ្នាំ២០២៣។ ពលរដ្ឋ ៤នាក់សន្លប់ ក្នុងនោះមានម្នាក់បានស្លាប់នៅមន្ទីរពេទ្យបង្អែកខេត្តកោះកុង អំឡុងពេលដែលរង់ចាំជួបអភិបាលខេត្តកោះកុង អ្នកស្រី មិថុនា ភូថង បន្ទាប់ពីពួកគេបានដាក់ញត្តិទៅអភិបាលខេត្តរូបនេះឲ្យជួយអន្តរាគមន៍ដោះស្រាយវិវាទដីធ្លីរបស់ពួកគេ ប៉ុន្តែមកដល់ពេលបច្ចុប្បន្ន អ្នកស្រី មិថុនា ភូថង មិនទាន់ឆ្លើយតបញត្តិរបស់ពលរដ្ឋដែលបានដាក់នៅឡើយ។
កត្តាដែលនាំឲ្យពលរដ្ឋសន្លប់ និងស្លាប់ ដោយសារតែពួកគេឈរនៅមុខសាលាខេត្តចំនួន ៩ម៉ោងចាប់ពីម៉ោង ៧ព្រឹករហូតដល់ម៉ោង ៤រសៀលនៅពីក្រោមកម្ដៅថ្ងៃក្តៅយ៉ាងខ្លាំង និងបន្តសម្រាកនៅខាងមុខខេត្តកោះកុង ទោះបីយប់ក្ដី ទាំងហាលវាល ឬហាលទឹកសន្សើមយ៉ាងណាក៏ដោយនោះ។
ពលរដ្ឋរងគ្រោះដីធ្លីដែលបានស្លាប់នោះមានឈ្មោះ អូក ឆេក ភេទប្រុស អាយុជាង ៥០ឆ្នាំ ជាជនពិកាជើងម្ខាង និងមានជីវភាពក្រីក្រ ដោយបច្ចុប្បន្ន ជនរងគ្រោះរូបនេះរស់ក្នុងភូមិកណ្ដោល ឃុំកណ្ដោល ស្រុកបុទុមសាគរ ខេត្តកោះកុង។
ទោះបីជាពួកគេរង់ចាំទាំងកណ្ដាលថ្ងៃក្ដៅខ្លាំង និងទាំងយប់ រហូតធ្វើឲ្យពលរដ្ឋសន្លប់ និងស្លាប់ក្ដី អភិបាលខេត្តកោះកុង អ្នកស្រី មិថុនា ភូថង មិនបានអើពើយកចិត្តទុកដាក់លើពលរដ្ឋរងគ្រោះដីធ្លីឡើយ ដោយអ្នកស្រីបានពន្យារពេលក្នុងការអនុញ្ញាតឲ្យតំណាងពលរដ្ឋចូលជួប។
យ៉ាងណាក៏ដោយ ការឡើងមកតាមដានញត្តិដោយមានទាំងសម្ភារៈកន្ទេល ខ្នើយ និងតង់មកប្រមូលផ្ដុំខាងមុខសាលាខេត្តនេះ ដោយរង់ចាំជួបអភិបាលខេត្តកោះកុង ដើម្បីស្នើសុំឲ្យជួយរកកិច្ចអន្តរាគមន៍ដោះស្រាយបញ្ហាវិវាទដីធ្លីរវាងក្រុមហ៊ុនស្ករអំពៅឧកញ៉ា លី យ៉ុងផាត់ ដែលជម្លោះដីធ្លីនេះបានអូសបន្លាយរយៈពេលជាង ១០ឆ្នាំមកហើយនោះ។
តំណាងពលរដ្ឋមួយរូប គឺអ្នកស្រី ភាព តេង អះអាងថា ពលរដ្ឋចំនួន ២៤៣គ្រួសារនៅសហគមន៍ព្រលានក្នុងឃុំកណ្ដោល ស្រុកបុទុមសាគរ ត្រូវបានក្រុមហ៊ុន Koh Kong Sugar និង Koh Kong Plantation Industry របស់លោកឧកញ៉ា លី យ៉ុងផាត់ បានដាក់គ្រឿងចក្រឈូសឆាយដី និងផលដំណាំរបស់គាត់អស់ជាច្រើនហិកតារកាលពីឆ្នាំ២០០៦ ហើយអាជ្ញាធរបានគំរាមកំហែងមិនឲ្យពលរដ្ឋចេញតវ៉ាប្រឆាំង និងបានគំរាមចាប់ខ្លួនពួកគាត់ដាក់ពន្ធនាគារផងដែរ បើទោះបីជាដីនោះពួកគាត់បានចូលទៅអាស្រ័យផលតាំងពីឆ្នាំ១៩៩៥។
ក្រៅពីបាត់បង់ដីធ្លីដោយក្រុមហ៊ុនរបស់ឧកញ៉ា លី យ៉ុងផាត់ រំលោភយកហើយ ចៅក្រមស៊ើបសួរសាលាដំបូងខេត្តកោះកុង លោក ឡោ ក្រឹម កាលពីថ្ងៃទី២៩ ខែមិថុនា ឆ្នាំ២០២២ បានសម្រេចដាក់ឲ្យតំណាងពលរដ្ឋ ៧នាក់ស្ថិតក្រោមការត្រួតពិនិត្យតាមផ្លូវតុលាការ ក្រោយឆ្លើយបំភ្លឺពាក់ព័ន្ធបទចោទ «អំពើញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងអំពើប៉ះពាល់កម្មសិទ្ធិនៃទ្រព្យសម្បត្តិឯកជនរបស់រដ្ឋ»។
តំណាងពលរដ្ឋ ៧នាក់ ក្នុងនោះអ្នកស្រី ភាព តេង អ្នកស្រី ណុយ សុខ អ្នកស្រី ទន់ ឡាយ លោក តូច ង៉ាន់ លោក ឃង់ រុច និងតំណាងពលរដ្ឋផ្សេងទៀត៕