ក្រសួងអប់រំ យុវជន និងកីឡា ប្រកាសឲ្យគ្រឹះស្ថានឧត្ដមសិក្សាសាធារណៈ និងឯកជនឈប់សម្រាកជិត ១ខែ ដើម្បីរដ្ឋាភិបាលរៀបចំព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
ក្នុងសេចក្ដីប្រកាសរបស់ក្រសួងអប់រំ យុវជន និងកីឡា ចុះថ្ងៃទី២២ ខែមីនា ឆ្នាំ២០២៣ ឲ្យដឹងថា គ្រឹះស្ថានអប់រំកុមារតូច និងសេវាអប់រំកុមារតូច គ្រឹះស្ថានបឋមសិក្សា គ្រឹះស្ថានមធ្យមសិក្សាចំណេះទូទៅ គ្រឹះស្ថានមធ្យមសិក្សាចំណេះទូទៅ និងអប់រំបច្ចេកទេសផ្នែកសាធារណៈទាំងអស់ ត្រូវអនុវត្តវិស្សមកាលធំចាប់ពីថ្ងៃទី២០ ខែមេសា ដល់ថ្ងៃទី១៨ ខែឧសភា ឆ្នាំ២០២៣។
ចំណែកគ្រឹះស្ថានអប់រំកុមារតូច និងសេវាអប់រំកុមារតូច គ្រឹះស្ថានបឋមសិក្សា គ្រឹះស្ថានមធ្យមសិក្សាចំណេះទូទៅផ្នែកឯកជនទាំងអស់ ត្រូវឈប់សម្រាកចាប់ពីថ្ងៃទី២០ ខែមេសា ដល់ថ្ងៃទី១៨ ខែឧសភា ឆ្នាំ២០២៣ តាមការគួរ។
សម្រាប់គ្រឹះស្ថានឧត្ដមសិក្សាទាំងសាធារណៈ និងឯកជន ត្រូវឈប់សម្រាកចាប់ពីថ្ងៃទី២០ ខែមេសា ដល់ថ្ងៃទី១៨ ខែឧសភា ឆ្នាំ២០២៣។
ការសម្រេចបែបនេះ ក្រសួងអប់រំថាដើម្បីចូលរួមរក្សាសណ្ដាប់ធ្នាប់សុវត្ថិភាពអំឡុងពេលកម្ពុជានឹងធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលនឹងប្រព្រឹត្តទៅចាប់ពីថ្ងៃទី០៥ ខែឧសភា ដល់ថ្ងៃទី១៧ ខែឧសភា ឆ្នាំ២០២៣។
កាលពីថ្ងៃទី២១ ខែមីនា នេះ ព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី បានយាងប្រទានភ្លើងជ័យកីឡានៅបរិវេណខាងមុខប្រាសាទអង្គរវត្ត ដើម្បីបើកការប្រកួតកីឡាស៊ីហ្គេម និងប៉ារ៉ាហ្គេម (SEA Games-ASEAN Para Games) នៅខែឧសភា ខាងមុខនេះ៕