30 C
Phnom Penh

តុលាការ​ព្រមាន​ចាប់​ខ្លួន​លោក រ៉ុង ឈុន ប្រសិន​បើ​មិន​អនុវត្ត​តាម​ដីកា​របស់​តុលាការ​ទេ​នោះ

ដោយ ឌឹ ខេមបូឌា ដេលី

បទវិភាគ

តុលាការ​ក្រុង​ភ្នំពេញ​ព្រមាន​ថា អនុប្រធាន​គណបក្ស​ភ្លើង​ទៀន លោក រ៉ុង ឈុន អាច​នឹង​ត្រូវ​ចាប់​ខ្លួន ប្រសិនបើ​មិន​អនុវត្ត​តាម​ដីកា​របស់​សាលាដំបូង​រាជធានី​ភ្នំពេញ​ទេ​នោះ បន្ទាប់ពី​រូប​គាត់​ធ្វើ​សកម្មភាព​នយោបាយ​ក្នុង​នាម​ជា​មន្ត្រី​ជាន់ខ្ពស់​គណបក្ស​ភ្លើង​ទៀន។

អ្នក​នាំពាក្យ​សាលាដំបូង​រាជធានី​ភ្នំពេញ កាលពី​ថ្ងៃទី​៤ ខែ​ឧសភា ឆ្នាំ​២០២៣ ត្រូវ​សារព័ត៌មាន​ដែល​ស្និទ្ធ​នឹង​បក្ស​កាន់​អំណាច Fresh News ស្រង់​សម្ដី​ថា លោក រ៉ុង ឈុន បច្ចុប្បន្ន​ស្ថិត​ក្នុង​ដំណាក់កាល​អនុវត្ត​ទោស​តាម​សាលដីកា​របស់​តុលាការ​កំពូល ដែល​បាន​ចេញ​កាលពី​ខែ​វិច្ឆិកា ឆ្នាំ​២០២១ ដោយ​លោក និល ណុន ជា​ប្រធាន​ក្រុមប្រឹក្សា​ជំនុំជម្រះ​លើ​សំណុំរឿង​នោះ។

អ្នក​នាំពាក្យ​ខាងលើ​លើកឡើង​ថា ក្នុង​កាលៈទេសៈ​នេះ លោក រ៉ុង ឈុន អាច​នឹង​ត្រូវ​ចាប់​ខ្លួន ប្រសិនបើ​គាត់​មិន​អនុវត្ត​តាម​ដីកា​របស់​តុលាការ​កំពូល​ដែល​ចេញ​កន្លងមក ហើយ​គាត់​ក៏​មិន​អាច​ឈរ​ឈ្មោះ​ឲ្យ​គេ​បោះឆ្នោត​បាន​ដែរ ប្រសិនបើ​គាត់​មិនទាន់​បាន​ស្ដារ​នីតិសម្បទា​របស់​ខ្លួន​ឡើងវិញ​ឲ្យ​បាន​ទាន់​ពេល​នៅ​មុន​ការ​បោះឆ្នោត​ខាងមុខ​នេះ​ទេ​នោះ។

ការ​អះអាង​នេះ ធ្វើឡើង​បន្ទាប់ពី​លោក រ៉ុង ឈុន កំពុង​ធ្វើ​សកម្មភាព​នយោបាយ​ក្នុង​នាម​ជា​មន្ត្រី​ជាន់ខ្ពស់​គណបក្ស​ភ្លើង​ទៀន បន្ទាប់ពី​លោក​ត្រូវ​បាន​តុលាការ​ដាក់​ឲ្យ​នៅ​ក្រៅ​ឃុំ​បណ្ដោះអាសន្ន​កាលពី​ឆ្នាំ​២០២១ កន្លងទៅ។

កាលពី​ថ្ងៃទី​១២ ខែ​វិច្ឆិកា ឆ្នាំ​២០២១ តុលាការ​កំពូល​បាន​តម្កល់​សាលដីកា​ព្រហ្មទណ្ឌ​របស់​សាលា​ឧទ្ធរណ៍​ដែល​បាន​កំណត់​ផ្ដន្ទាទោស​លោក រ៉ុង ឈុន ដាក់​ពន្ធនាគារ​រយៈពេល ២​ឆ្នាំ ប៉ុន្តែ​ត្រូវ​អនុវត្ត​ក្នុង​ពន្ធនាគារ​រយៈពេល ១​ឆ្នាំ ៣​ខែ ១១​ថ្ងៃ ខណៈ​ទោស​ដែល​នៅ​សល់​ត្រូវ​ព្យួរ​សាកល្បង​រយៈពេល ៣​ឆ្នាំ។

សាលដីកា​ខាងលើ​បញ្ជាក់​ថា ក្នុង​ដំណាក់កាល​នេះ លោក រ៉ុង ឈុន ត្រូវ​អនុវត្ត​វិធានការ​ត្រួតពិនិត្យ​របស់​តុលាការ​ដាច់ខាត ដូចជា​ត្រូវតែ​គោរព​តាម​ដីកា​កោះ​របស់​ព្រះរាជអាជ្ញា ឬ​របស់​បុគ្គល​ដែល​ព្រះរាជអាជ្ញា​បាន​ប្រគល់​អំណាច​ឲ្យ ត្រូវ​មក​ទទួល​នូវ​ការ​មក​ពិនិត្យ​មើល​របស់​បុគ្គល​ដែល​ព្រះរាជអាជ្ញា​បាន​ប្រគល់​អំណាច​ឲ្យ ត្រូវ​ជូនដំណឹង​ដល់​ព្រះរាជអាជ្ញា​អំពី​ការ​ផ្លាស់ប្ដូរ​អាសយដ្ឋាន និង​មុខរបរ​របស់​ខ្លួន និង​ត្រូវតែ​មាន​ការ​អនុញ្ញាត​ពី​ព្រះរាជអាជ្ញា​មុន​ពេល​ធ្វើ​ដំណើរ​ទៅ​បរទេស ព្រមទាំង​វិធានការ​មួយ​ចំនួន​ទៀត។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​៥ ឧសភា នេះ​ថា លោក រ៉ុង ឈន អាច​មាន​ហេតុផល​គ្រប់គ្រាន់​ក្នុង​ការ​ឆ្លើយតប​ទៅ​នឹង​ការ​ព្រមាន​របស់​តុលាការ​ក្នុង​ការ​ចាប់​ខ្លួន​លោក ព្រោះ​ថា​ក្រសួង​មហាផ្ទៃ​មិន​បាន​ជំទាស់​ទៅ​នឹង​គណបក្ស​ភ្លើង​ទៀន​ដែល​បាន​តែងតាំង​លោក​ជា​អនុប្រធាន​របស់​គណបក្ស​នោះ​ឡើយ។

លោក មាជ សុវណ្ណារ៉ា លើកឡើង​ថា លោក​មិន​យល់​ពី​នីតិវិធី​របស់​តុលាការ​ទេ ព្រោះ​ក្រសួង​មហាផ្ទៃ និង​ក្រសួង​យុត្តិធម៌​មិន​បាន​ហាមប្រាម​សកម្មភាព​របស់​លោក រ៉ុង ឈុន ក្នុង​ការ​ចូលរួម​កិច្ចការ​នយោបាយ​ជាមួយ​គណបក្ស​ភ្លើង​ទៀន​នោះ​ឡើយ ដែល​បញ្ហា​នេះ​បង្ហាញ​ឱ្យ​ឃើញ​ពី​ការ​អនុវត្ត​នូវ​ប្រព័ន្ធ​យុត្តិធម៌​មិន​ស្រប​ទិស​គ្នា​ចំពោះ​ស្ថាប័ន​អនុវត្ត​ច្បាប់​ទាំងនេះ។

ចំណែក​អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​៥ ឧសភា នេះ​ថា លោក​មិន​ដឹង​ថា​តុលាការ​ព្រមាន​លោក រ៉ុង ឈុន នូវ​កំហុស​ត្រង់​ចំណុច​ណា​នោះ​ទេ ព្រោះ​បើ​តាម​ពិនិត្យ​លើ​បម្រាម​ដីកា​របស់​តុលាការ​ផ្ទៀងផ្ទាត់​ជាមួយ​សកម្មភាព​របស់​លោក រ៉ុង ឈុន កន្លងមក លោក​មើល​មិន​ឃើញ​ថា មន្ត្រី​បក្ស​ភ្លើង​ទៀន​រូប​នេះ​បាន​បំពាន​ដីកា​របស់​តុលាការ​ត្រង់​ចំណុច​ណា​នោះ​ទេ។

លោក ស៊ឹង សែនករុណា បញ្ជាក់​ថា ប្រសិនបើ​សកម្មភាព​របស់​លោក រ៉ុង ឈុន កន្លងមក​បាន​ជួយ​ដល់​ផល​ប្រយោជន៍​ជាតិ គួរតែ​មាន​ការ​បើក​ចំហ​ឱ្យ​កាន់តែ​ទូលំទូលាយ ដើម្បី​ឱ្យ​លោក​អាច​ធ្វើ​កិច្ចការ​ទាំងនោះ​ឱ្យ​បាន​កាន់តែ​ច្រើន ចៀសវាង​នូវ​ការ​រឹត​បន្តឹង​សិទ្ធិ​សេរីភាព​ស្រប​ច្បាប់​ដែល​លោក​បាន​អនុវត្ត នាំ​ឱ្យ​ប៉ះពាល់​ដល់​ប្រយោជន៍​ជាតិ​ទៅ​ថ្ងៃ​មុខ។

លោក រ៉ុង ឈុន ត្រូវ​បាន​សមត្ថកិច្ច​ចាប់​ខ្លួន​កាលពី​ថ្ងៃទី​៣១ ខែ​កក្កដា ឆ្នាំ​២០២០ កន្លងទៅ បន្ទាប់ពី​រង​នូវ​ការ​ចោទប្រកាន់​ពី​បទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ក្រោយពី​លោក​ចុះ​ទៅ​ពិនិត្យ​ព្រំដែន​កម្ពុជា-វៀតណាម នៅ​ខេត្ត​ត្បូងឃ្មុំ និង​បាន​ចេញ​សេចក្តី​ថ្លែងការណ៍​អំពី​ភាព​មិន​ប្រក្រតី​អំពី​ការ​បោះ​បង្គោល​ព្រំដែន​ថ្មី​រវាង​កម្ពុជា-វៀតណាម នៅ​ពេល​នោះ។

ក្រោយពី​ជាប់​ពន្ធនាគារ​ប្រមាណ​ជាង ១​ឆ្នាំ លោក រ៉ុង ឈុន ត្រូវ​បាន​ដោះលែង​ឲ្យ​នៅ​ក្រៅ​ឃុំ​បណ្ដោះអាសន្ន​នៅ​ថ្ងៃទី​១២ ខែ​វិច្ឆិកា ឆ្នាំ​២០២១ កន្លងទៅ ខណៈ​ទោស​ដែល​នៅ​សល់​ត្រូវ​បាន​តុលាការ​កំពូល​សម្រេច​ឱ្យ​ព្យួរ​សាកល្បង​ចំនួន ៣​ឆ្នាំ​ឯណោះ។

ទាក់ទិន​នឹង​បញ្ហា​នេះ កាលពី​ចុង​ខែ​វិច្ឆិកា ឆ្នាំ​២០២១ អនុប្រធាន​គណបក្ស​ភ្លើង​ទៀន លោក រ៉ុង ឈុន បាន​អះអាង​ថា លោក​បាន​សង្កេត​ឃើញ​ថា ប្រព័ន្ធ​ច្បាប់​នៅ​កម្ពុជា​គ្រាន់តែ​ជា​ទីផ្សារ​ទិញ​លក់​រឿង​ក្តី​យ៉ាង​អនាធិបតេយ្យ​ប៉ុណ្ណោះ អំឡុង​ពេល​ដែល​លោក​ត្រូវ​បាន​តុលាការ​ឃុំ​ខ្លួន​អស់​រយៈពេល​ជាង ១​ឆ្នាំ​កាលពី​ពេល​កន្លង​ទៅ​នោះ។

ទាក់ទិន​នឹង​បញ្ហា​នេះ សារព័ត៌មាន The Cambodia Daily នៅ​មិនទាន់​អាច​ទាក់ទង​លោក រ៉ុង ឈុន ដើម្បី​សុំ​ការ​បំភ្លឺ​ជុំវិញ​ករណី​នេះ​បាន​នៅឡើយ​ទេ​រហូត​ដល់​ម៉ោង​ផ្សាយ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស