អតីតមេដឹកនាំបក្សប្រឆាំងលោក សម រង្ស៊ី លើកឡើងថា ក្នុងរយៈពេលដ៏ខ្លីខាងមុខនេះ មុននឹងការបោះឆ្នោតជាតិមកដល់ មេដឹកនាំបក្សកាន់អំណាចលោក ហ៊ុន សែន នឹងប្រើតុលាការ ព្រមទាំងគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យរារាំងអនុប្រធានគណបក្សភ្លើងទៀនលោក រ៉ុង ឈុន មិនឲ្យឈរឈ្មោះជាបេក្ខជនតំណាងរាស្ត្រដើម្បីចូលរួមការបោះឆ្នោតខាងមុខនេះជាមិនខាន។
អតីតមេដឹកនាំបក្សប្រឆាំងលោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី៧ ខែឧសភា ឆ្នាំ២០២៣ នេះថា លោក ហ៊ុន សែន នឹងកម្ចាត់អនុប្រធានគណបក្សភ្លើងទៀនលោក រ៉ុង ឈុន ចេញពីបញ្ជីបេក្ខជនតំណាងរាស្ត្រគណបក្សភ្លើងទៀន ក្រោមលេសថា លោក រ៉ុង ឈុន ជាទណ្ឌិតដែលមិនទាន់បានទទួលនីតិសម្បទាពេញលេញឡើងវិញ ដូច្នេះគាត់នឹងមិនអាចឈរឈ្មោះជាបេក្ខជនតំណាងរាស្ត្របានទេ។
អតីតមេដឹកនាំបក្សប្រឆាំងរូបនេះអះអាងថា ការធ្វើបែបនេះគឺដោយសារតែលោក ហ៊ុន សែន ខ្លាចលោក រ៉ុង ឈុន ឈរឈ្មោះនៅខេត្តកណ្តាល ដូចគាត់ដែរ សម្រាប់ការបោះឆ្នោតជាតិក្នុងឆ្នាំ២០២៣ ស្របពេលលោក រ៉ុង ឈុន មានប្រជាប្រិយភាពខ្ពស់ជាងលោក ហ៊ុន សែន ឆ្ងាយណាស់ ជាពិសេសក្នុងចំណោមកម្មករ មន្ត្រីរាជការ និងគ្រូបង្រៀន។ ជាងនេះទៀត លោក រ៉ុង ឈុន ក៏ធ្លាប់ធ្វើជាប្រធានសហព័ន្ធសហជីពកម្ពុជា ហើយបានចេញមុខការពារបូរណភាពទឹកដីនៃប្រទេសកម្ពុជាថែមទៀត។
លោក សម រង្ស៊ី បញ្ជាក់ថា ទាំងប្រជារាស្ត្រខ្មែរ ទាំងសហគមន៍អន្តរជាតិ មិនអាចទទួលយកលេសរបស់លោក ហ៊ុន សែន បានទេ ត្បិតជាល្បិចមួយដ៏ស្មោកគ្រោកមួយដែលលោក ហ៊ុន សែន ត្រូវតែធ្វើដើម្បីចៀសវាងការប្រកួតប្រជែងដោយសេរី សេរី និងយុត្តិធម៌ក្នុងការបោះឆ្នោតខាងមុខនេះ។
មេដឹកនាំបក្សប្រឆាំងរូបនេះគូសបញ្ជាក់ថា ផ្អែកលើប្រជាប្រិយភាពរបស់លោក រ៉ុង ឈុន គាត់អាចឈរជាបេក្ខជននាយករដ្ឋមន្ត្រីតំណាងឲ្យកម្លាំងប្រជាធិបតេយ្យដែលប្រឆាំងនឹងការដឹកនាំផ្ដាច់ការរបស់លោក ហ៊ុន សែន ក្នុងពេលនេះ។
កាលពីថ្ងៃទី៤ ខែឧសភា ឆ្នាំ២០២៣ សាលាដំបូងរាជធានីភ្នំពេញ ព្រមានថា អនុប្រធានគណបក្សភ្លើងទៀន លោក រ៉ុង ឈុន នៅពេលនេះកំពុងស្ថិតក្នុងដំណាក់កាលអនុវត្តទោសតាមរយៈសាលដីការបស់តុលាការកំពូល ដែលបានចេញកាលពីខែវិច្ឆិកា ឆ្នាំ២០២១ កន្លងទៅ។
ប្រភពដដែលបញ្ជាក់ថា ក្នុងកាលៈទេសៈនេះ លោក រ៉ុង ឈុន អាចនឹងត្រូវចាប់ខ្លួន ប្រសិនបើគាត់មិនអនុវត្តតាមដីការបស់តុលាការកំពូលដែលចេញកន្លងមក ហើយគាត់ក៏មិនអាចឈរឈ្មោះឲ្យគេបោះឆ្នោតបានដែរ ប្រសិនបើគាត់មិនទាន់បានស្ដារនីតិសម្បទារបស់ខ្លួនឡើងវិញឲ្យបានទាន់ពេលនៅមុនការបោះឆ្នោតខាងមុខនេះទេនោះ។
យ៉ាងណាក៏ដោយ អនុប្រធានគណបក្សភ្លើងទៀន លោក រ៉ុង ឈុន បានឆ្លើយតបទៅនឹងការព្រមាននោះថា លោកមិនបានប្រព្រឹត្តផ្ទុយពីសាលដីការបស់តុលាការឡើយ ព្រោះក្នុងសាលដីកានោះមិនបានចែងពីការហាមប្រាមមិនឲ្យលោកចូលរួមសកម្មភាពនយោបាយជាមួយនឹងគណបក្សនយោបាយណាមួយនោះទេ។
លោក រ៉ុង ឈុន លើកឡើងថា ប្រសិនបើលោកពិតជាមិនមាននីតិសម្បទាគ្រប់គ្រាន់សម្រាប់ចូលរួមក្នុងសកម្មភាពនយោបាយ ម្ល៉េះសមតែក្រសួងយុត្តិធម៌ចេញលិខិតទៅគណៈកម្មាធិការជាតិរៀបចំការបោះឆ្នោតបដិសេធឈ្មោះរបស់លោកពីបញ្ជីឈ្មោះបោះឆ្នោតបាត់ទៅហើយ។
ជុំវិញបញ្ហានេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានអះអាងកាលពីពេលថ្មីៗនេះថា លោកមិនដឹងថាតុលាការព្រមានលោក រ៉ុង ឈុន នូវកំហុសត្រង់ចំណុចណានោះទេ ព្រោះបើតាមពិនិត្យលើបម្រាមដីការបស់តុលាការផ្ទៀងផ្ទាត់ជាមួយសកម្មភាពរបស់លោក រ៉ុង ឈុន កន្លងមក លោកមើលមិនឃើញថាមន្ត្រីបក្សភ្លើងទៀនរូបនេះបានបំពានដីការបស់តុលាការត្រង់ចំណុចណានោះទេ។
ទាក់ទិននឹងបញ្ហានេះ អនុប្រធានគណបក្សភ្លើងទៀន លោក រ៉ុង ឈុន បានអះអាងកាលពីថ្ងៃទី៧ ឧសភា ថា លោកបានយកបញ្ជីបេក្ខជនតំណាងរាស្ត្រគណបក្សភ្លើងទៀនទៅដាក់ជូនគណៈកម្មាធិការជាតិរៀបចំការបោះឆ្នោតរួចរាល់ហើយ ក្នុងនោះលោកគឺជាបេក្ខជនតំណាងរាស្ត្រឈរឈ្មោះឲ្យគណបក្សភ្លើងទៀននៅមណ្ឌលខេត្តកណ្តាល។
លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីថ្ងៃទី៣១ ខែកក្កដា ឆ្នាំ២០២០ កន្លងទៅ បន្ទាប់ពីរងនូវការចោទប្រកាន់ពីបទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ក្រោយពីលោកចុះទៅពិនិត្យព្រំដែនកម្ពុជា-វៀតណាម នៅខេត្តត្បូងឃ្មុំ។
ក្រោយពីជាប់ពន្ធនាគារប្រមាណជាង ១ឆ្នាំ លោក រ៉ុង ឈុន ត្រូវបានដោះលែងឲ្យនៅក្រៅឃុំបណ្ដោះអាសន្ននៅថ្ងៃទី១២ ខែវិច្ឆិកា ឆ្នាំ២០២១ កន្លងទៅ ខណៈទោសដែលនៅសល់ត្រូវបានសាលាកំពូលសម្រេចឱ្យព្យួរសាកល្បងចំនួន ៣ឆ្នាំឯណោះ ដូច្នេះបើគិតមកទល់នឹងពេលនេះ លោកកំពុងស្ថិតនៅក្រោមការតាមដានរបស់តុលាការនៅឡើយ៕