ប្រភពគួរឱ្យទុកចិត្តបានក្នុងជួររាជរដ្ឋាភិបាលកម្ពុជា ទម្លាយពីទីតាំងកណ្តាលក្រុងភ្នំពេញដែលស្ថិតក្នុងសង្កាត់ស្ទឹងមានជ័យ ថាកំពុងតែក្លាយជាទីតាំងជួញដូរមនុស្សខុសច្បាប់ ដើម្បីប្រព្រឹត្តអំពើចាប់ជំរិតឆបោកតាមប្រព័ន្ធអនឡាញនៅកម្ពុជា។
មន្ត្រីជាន់ខ្ពស់ខាងអង្គភាពប្រយុទ្ធប្រឆាំងអំពើជួញដូរមនុស្សទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ ដើម្បីរក្សាសុវត្ថិភាពផ្ទាល់ខ្លួននៅថ្ងៃទី៣ កក្កដា នេះថា ទីតាំងមួយកន្លែងដែលគ្រប់គ្រងដោយជនជាតិចិន ស្ថិតនៅផ្លូវ៤៩CC ភូមិដំណាក់ធំ សង្កាត់ស្ទឹងមានជ័យ ខណ្ឌពោធិ៍សែនជ័យ រាជធានីភ្នំពេញ កំពុងក្លាយជាទីតាំងប្រព្រឹត្តអំពើឆបោកតាមអនឡាញដ៏ធំបំផុតនៅកណ្តាលក្រុងភ្នំពេញ ដែលមានការការពារពីមន្ត្រីរដ្ឋាភិបាលគ្រាក់ៗយ៉ាងតឹងរ៉ឹងសព្វថ្ងៃនេះ។
មន្ត្រីខាងលើអះអាងថា ទីតាំងខាងលើនេះតែងជួញដូរមនុស្សខុសច្បាប់ជាញឹកញាប់ ដូចជាជនជាតិខ្មែរ ថៃ វៀតណាម និងចិន ក្នុងនោះជនជាតិចិនក្នុង ១នាក់តម្លៃ ៥ពាន់ដុល្លារ ជនជាតិវៀតណាមក្នុង ១នាក់តម្លៃ ៣ពាន់ដុល្លារ ជនជាតិថៃក្នុង ១នាក់តម្លៃ ៣ពាន់ដុល្លារ និងជនជាតិខ្មែរក្នុង ១នាក់តម្លៃចន្លោះ ១ពាន់ទៅ ២ពាន់ដុល្លារ ដែលមានមេខ្យល់នាំយកមកលក់នៅទីតាំងខាងលើនេះជាហូរហែ។
ប្រភពដដែលបញ្ជាក់ថា ទីតាំងខាងលើនេះដំណើរការជាង ១ឆ្នាំហើយ ដែលមានបុគ្គលិកធ្វើការប្រហែលជា ៦០០នាក់ ហើយបុគ្គលិកទាំងនោះមិនត្រូវបានអនុញ្ញាតឲ្យចេញមកខាងក្រៅទេ ប៉ុន្តែរាល់ការចេញចូលរបស់អ្នកគ្រប់គ្រងនៅទីតាំងនេះ គឺមានការប្រុងប្រយ័ត្នខ្ពស់ជាទីបំផុត។ ជាងនេះទៀត បុគ្គលិកដែលបម្រើការនៅទីនោះ តែងទទួលរងនូវទារុណកម្មធ្ងន់ធ្ងរ ប្រសិនបើពួកគេមិនអាចប្រើវិធីឆបោកតាមប្រព័ន្ធអនឡាញគ្រប់តាមផែនការកំណត់ទេនោះ។
ក្រសួងការបរទេសអាមេរិក កាលពីថ្ងៃទី១៩ ខែកក្កដា បានបញ្ចេញរបាយការណ៍ប្រចាំឆ្នាំ២០២២ ស្ដីពីការជួញដូរមនុស្សថា កម្ពុជា វៀតណាម តំបន់ម៉ាកាវ និងប្រទេសផ្សេងទៀតត្រូវបានដាក់ក្នុងបញ្ជីខ្មៅស្ថិតក្រោមការឃ្លាំមើលពីកម្រិតពីរ (Tier 2) មកកម្រិតបី (Tier 3) ដែលជាចំណាត់ថ្នាក់ទាបបំផុតមួយ និងមានន័យថា រដ្ឋាភិបាលកម្ពុជាមិនបានខិតខំប្រឹងប្រែងដើម្បីកែលំអនូវស្ថានភាពនៃការជួញដូរមនុស្សនេះឡើយ។
ទាក់ទិននឹងបញ្ហានេះ កាលពីថ្ងៃទី៥ ខែធ្នូ ឆ្នាំ២០២២ លោកនាយករដ្ឋមន្ត្រី ហ៊ុន សែន បានបង្កើតគណៈកម្មាធិការអន្តរក្រសួងមួយដើម្បីទប់ស្កាត់អំពើជួញដូរមនុស្ស និងបទល្មើសសម្អាតប្រាក់តាមសហគ្រាស និងក្លឹបកម្សាន្តនៅទូទាំងប្រទេស ប៉ុន្តែរហូតមកទល់នឹងពេលនេះ អំពើជួញដូរមនុស្សនៅតែបន្តកើតមាននៅក្នុងប្រទេសកម្ពុជាដដែល។
គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង បានលើកឡើងក្នុងពិធីអបអរទិវាជាតិ ១២ធ្នូ ប្រឆាំងការជួញដូរមនុស្សកាលពីថ្ងៃទី១២ ខែធ្នូ ឆ្នាំ២០២២ ថា ក្រុមឧក្រិដ្ឋជនដែលកំពុងសម្ងំលាក់ខ្លួននៅកម្ពុជាសព្វថ្ងៃនេះបានបង្កើតវិធីជួញដូរមនុស្សតាមរបៀបថ្មីៗដែលប្រឆាំងនឹងសិទ្ធិមនុស្សយ៉ាងធ្ងន់ធ្ងរ ដោយប្រើប្រាស់អាជីវកម្មបន្លំភ្នែកក្នុងពេលដែលរាជរដ្ឋាភិបាលកម្ពុជាផ្តល់ការវិនិយោគសម្រាប់ការអភិវឌ្ឍនៅក្នុងតំបន់សេដ្ឋកិច្ចពិសេសធំៗ ដូចជាខេត្តព្រះសីហនុ និងរាជធានីភ្នំពេញ ជាដើម។
ទាក់ទិននឹងបញ្ហានេះ កាលពីថ្ងៃទី១៤ ខែកក្កដា ឆ្នាំ២០២២ សារព័ត៌មានអន្តរជាតិ អាល់ចាហ្ស៊ីរ៉ា (Aljazeera) បានចេញផ្សាយអំពីការជួញដូរមនុស្សនៅកម្ពុជាថា អំពើជួញដូរមនុស្សទាំងនោះបានជាប់ពាក់ព័ន្ធយ៉ាងខ្លាំងទៅនឹងថ្នាក់ដឹកនាំកំពូលៗនៅកម្ពុជា ដូចជាលោកនាយករដ្ឋមន្ត្រី ហ៊ុន សែន ឧបនាយករដ្ឋមន្ត្រី ម៉ែន សំអន អគ្គមេបញ្ជាការរងនៃកងយោធពលខេមរភូមិន្ទ លោក ហ៊ីង ប៊ុនហៀង និងបុគ្គលមានតួនាទីខ្ពស់ៗក្នុងជួររដ្ឋាភិបាលមួយចំនួនទៀត។
ជាងនេះទៀត សារព័ត៌មាន The Australian បានចេញផ្សាយកាលពីពេលថ្មីៗនេះថា កម្ពុជាកំពុងរងនូវការសង្ស័យថាបានប្រព្រឹត្តអំពើជួញដូរមនុស្សយ៉ាងធំដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន ដោយជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់មេដឹកនាំផ្ដាច់ការនៅកម្ពុជា លោក ហ៊ុន សែន គឺលោក ហ៊ុន តូ។
អ្នកប្រឹក្សាយោបល់ផ្នែកអភិវឌ្ឍន៍គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣ កក្កដា នេះថា ដើម្បីឱ្យកម្ពុជាចេញផុតពីបញ្ជីនៃក្រុមប្រទេសជួញដូរមនុស្ស រដ្ឋាភិបាលត្រូវតែអនុវត្តការប្រយុទ្ធប្រឆាំងអំពើជួញដូរមនុស្សប្រកបដោយតម្លាភាព ចៀសវាងនូវការអនុវត្តតែទៅលើឈ្មួញតូចតាចដែលជាជនរងគ្រោះ ខណៈឧក្រិដ្ឋជនដែលជាម្ចាស់នៃបទល្មើសនេះនៅតែរួចផុតពីទោសទណ្ឌ ប្រព្រឹត្តអំពើទុច្ចរិតសេរីក្រៅច្បាប់ដដែល។
លោក សេក សុជាតិ លើកឡើងថា ការសង្ស័យអំពីការឃុបឃិតរវាងឈ្មួញធំៗដែលគ្រប់គ្រងលើបណ្ដាញនៃការជួញដូរមនុស្សជាមួយនឹងមន្ត្រីរដ្ឋាភិបាលកម្ពុជា មិនទាន់ត្រូវបានចាប់ខ្លួនយកមកផ្ដន្ទាទោសនៅឡើយទេ ខណៈជនល្មើសទាំងនោះបានប្រើមន្ត្រីដែលឃុបឃិតជាមួយខ្លួនធ្វើជាខ្នងបង្អែកសម្រាប់ការពារខ្លួនពួកគេពីផ្លូវច្បាប់ថែមទៀត៕