28 C
Phnom Penh

រដ្ឋាភិបាល​អនុញ្ញាត​ឱ្យ​ក្រុមហ៊ុន​ភរិយា​ឧកញ៉ា លី យ៉ុងផាត់ បង្កើត​រោងចក្រ​ផលិត​ស្ករស​នៅ​កំពង់ស្ពឺ

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​អនុញ្ញាត​ឲ្យ​ក្រុមហ៊ុន កំពង់ស្ពឺ ស៊ូហ្គើរ របស់​អ្នកស្រី គីម ហ៊ាង ភរិយា​របស់​អ្នកឧកញ៉ា លី យ៉ុងផាត់ បង្កើត​រោងចក្រ​ផលិត​ស្ករស ជី​អេតាណុល និង​អាកុល នៅ​ស្រុក​ឱរ៉ាល់ ខេត្ត​កំពង់ស្ពឺ ខណៈ​ជម្លោះ​ដីធ្លី​រវាង​ពលរដ្ឋ និង​ក្រុមហ៊ុន​មិន​ទាន់​ដោះស្រាយ​ចប់​នៅឡើយ។

លោក លី យ៉ុងផាត់ ជា​សមាជិក​ព្រឹទ្ធសភា​របស់​បក្ស​កាន់​អំណាច​ផង ជា​ប្រធាន​ក្រុមហ៊ុន គ្លូប៊ល ហៅស៍ ខេមបូឌា និង​ជា​ប្រធាន​ក្រុមហ៊ុន​ជាច្រើន​ទៀត​ដែល​ជាប់​ពាក់ព័ន្ធ​នឹង​ការ​បណ្ដេញ​ពលរដ្ឋ​ចេញពី​លំនៅឋាន​ដោយ​បង្ខំ​នៅ​ខេត្ត​កោះកុង និង​ខេត្ត​កំពង់ស្ពឺ។

ក្នុង​សេចក្ដី​ប្រកាស​មួយ​ដែល​ចុះហត្ថលេខា​ដោយ​រដ្ឋលេខាធិការ​នៃ​ក្រសួង​ឧស្សាហកម្ម វិទ្យាសាស្ត្រ និង​នវានុវត្តន៍ លោក មាន សុភា កាលពី​ថ្ងៃទី​៦ ខែ​មិថុនា ឆ្នាំ​២០២២ បាន​អនុញ្ញាត​ឲ្យ​ក្រុមហ៊ុន កំពង់ស្ពឺ ស៊ូហ្គើរ (Kampong Speu Sugar) របស់​អ្នកស្រី គីម ហ៊ាង បង្កើត​រោងចក្រ​ផលិត​ស្ករស ជី​អេតាណុល និង​អាកុល ដែល​មាន​ទីតាំង​ស្ថិត​ភូមិ​ផ្លោច ឃុំ​ត្រពាំងជោ ស្រុក​ឱរ៉ាល់ ខេត្ត​កំពង់ស្ពឺ ចាប់ពី​ថ្ងៃ​ចុះហត្ថលេខា​តទៅ។

បើ​តាម​ឯកសារ​របស់​ក្រសួង​ពាណិជ្ជកម្ម អ្នកស្រី គីម ហ៊ាង ជា​អ្នក​ដឹកនាំ​ក្រុមហ៊ុន​ស្ករស​កំពង់ស្ពឺ​ជាមួយ​លោក សេង ណាក់ ដែល​រៀបការ​ជាមួយ​កូនស្រី​របស់​លោក លី យ៉ុងផាត់ និង​អ្នកស្រី គីម ហ៊ាង ឈ្មោះ លី អាផន។

ក្រុមហ៊ុន ភ្នំពេញ ស៊ូហ្គើរ (Phnom Penh Sugar) និង​ក្រុមហ៊ុន កំពង់ស្ពឺ ស៊ូហ្គើរ (Kampong Speu Sugar) ជា​របស់​ឧកញ៉ា លី យ៉ុងផាត់ បាន​បណ្ដេញ​ប្រជាពលរដ្ឋ​ចេញពី​លំនៅឋាន​ទាំង​បង្ខំ​បន្ទាប់ពី​រដ្ឋាភិបាល​បាន​ផ្ដល់​ដី​សម្បទាន​សេដ្ឋកិច្ច​ឲ្យ​ក្រុមហ៊ុន​នេះ​ក្រោម​គម្រោង​អភិវឌ្ឍន៍។

បើ​តាម​ប្រជាពលរដ្ឋ​តវ៉ា​ធ្លាប់​អះអាង​ថា ពួកគេ​មិនទាន់​ទទួល​បាន​សំណង​ពី​ការ​បណ្តេញ​ចេញ​ដោយ​បង្ខំ​នៅឡើយ​ទេ។

កាលពី​ខែ​កុម្ភៈ ឆ្នាំ​២០២០ ធនាគារ ANZ អូស្ត្រាលី​បាន​យល់ព្រម​ផ្តល់​កញ្ចប់​ហិរញ្ញវត្ថុ​ដល់​គ្រួសារ​នៅ​ខេត្ត​កំពង់ស្ពឺ ដែល​ត្រូវ​គេ​បណ្តេញ​ចេញពី​លំនៅឋាន​ទាំង​បង្ខំ​ដោយ​ក្រុមហ៊ុន​ស្ករស (Phnom Penh Sugar) របស់​លោក​ឧកញ៉ា លី យ៉ុងផាត់ សមាជិក​ព្រឹទ្ធសភា​គណបក្ស​ប្រជាជន​កម្ពុជា។ ក្រុមហ៊ុន​នេះ​ត្រូវ​បាន​ផ្ដល់​ប្រាក់កម្ចី ៤០​លាន​ដុល្លារ​ពី​ធនាគារ​កាលពី​ឆ្នាំ​២០១១។

កិច្ចព្រមព្រៀង​នេះ​កើតឡើង​រយៈពេល ៥​ឆ្នាំ ក្រោយពី​អង្គការ​សមធម៌​កម្ពុជា (EC) និង​អង្គការ​អភិវឌ្ឍន៍​ប្រកប​ដោយ​បរិយាប័ន្ន​អន្តរជាតិ (Inclusive Development International) ដែល​មាន​មូលដ្ឋាន​នៅ​សហរដ្ឋ​អាមេរិក​បាន​ដាក់​បណ្តឹង​មួយ​ក្នុង​នាម​ជា​តំណាង​របស់​គ្រួសារ​ដែល​ទទួល​រង​ផល​ប៉ះពាល់​ចំនួន​យ៉ាងតិច ១២០០​គ្រួសារ ទៅ​កាន់​ស្ថាប័ន​ទំនាក់ទំនង​ជាតិ​ប្រទេស​អូស្ត្រាលី សម្រាប់​គោលការណ៍​ណែនាំ​សម្រាប់​សហគ្រាស​ពហុ​ជាតិ​នៃ​អង្គការ អូអ៊ីស៊ីឌី (OECD)។

ធនាគារ ANZ ក៏​ព្រមព្រៀង​ក្នុង​ការ​ត្រួតពិនិត្យ​ឡើងវិញ និង​ពង្រឹង​គោលនយោបាយ​សិទ្ធិមនុស្ស​របស់​ខ្លួន រួម​ទាំង​ដំណើរការ​ពិនិត្យ​ផ្នែក​សង្គម និង​បរិស្ថាន​របស់​អតិថិជន​ខ្លួន និង​យន្តការ​ដោះស្រាយ​បណ្តឹង​ផង​ដែរ។

ភរិយា​ឧកញ៉ា លី យ៉ុងផាត់ គឺ​អ្នកស្រី គីម ហ៊ាង ក៏​ទទួល​បាន​ដី​បឹង​តាមោក​ចំនួន ៣០​ហិកតារ​ក្នុង​ចំណោម​ភរិយា និង​ឧកញ៉ា​ផ្សេងៗ​ទៀត​ដែល​បាន​ដី​បឹង​ធម្មជាតិ​ចុងក្រោយ​នៅ​ជាយ​រាជធានី​ភ្នំពេញ​នេះ​ផង​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស