32 C
Phnom Penh

ប៉ូលិស​សិង្ហបុរី​ចាប់​ខ្លួន​ជនជាតិ​ចិន​សញ្ជាតិ​ខ្មែរ​៣​នាក់​និង​មនុស្ស​៧​នាក់​ទៀត​ពាក់ព័ន្ធ​លាង​លុយ​ជាង​៧០០​លាន​ដុល្លារ

ដោយ ឌឹ ខេមបូឌា ដេលី

បទវិភាគ

ក្រុម​ប៉ូលិស​សិង្ហបុរី ចាប់​ខ្លួន​ជនជាតិ​ចិន​សញ្ជាតិ​ខ្មែរ ៣​នាក់ និង​មនុស្ស ៧​នាក់​ទៀត​ពាក់ព័ន្ធ​នឹង​ករណី​លាង​លុយ​កខ្វក់​ជាង ៧០០​លាន​ដុល្លារ ខណៈ​សកម្មជន​សង្គម​ស្នើ​រដ្ឋាភិបាល​ពិនិត្យ​មើល​ឲ្យ​បាន​ច្បាស់ មុន​ផ្ដល់​សញ្ជាតិ​ខ្មែរ​ទៅ​ជនបរទេស​ដើម្បី​កុំ​ឲ្យ​ខ្មែរ​រងគ្រោះ។

បើ​តាម​ការ​ចុះផ្សាយ Singapore police Force ឲ្យ​ដឹង​កាលពី​ថ្ងៃទី​១៦ ខែ​សីហា ថា ជនជាតិ​ចិន​សញ្ជាតិ​ខ្មែរ​ទាំង ៣​នាក់​ក្នុង​នោះ​ឈ្មោះ Su Baolin ឈ្មោះ Chen Qingyuan និង​ឈ្មោះ Su Wenqiang ដែល​ត្រូវ​បាន​ប៉ូលិស​សិង្ហបុរី ចាប់​ខ្លួន​នៅ​ក្នុង​ខុនដូ​ពួកគេ​ក្នុង​ប្រទេស​សិង្ហបុរី។

សេចក្តី​រាយការណ៍​ដដែល​បាន​ឲ្យ​ដឹង​ថា ក្រៅពី​ចាប់​ខ្លួន​ហើយ ប៉ូលិស​សិង្ហបុរី​បាន​ដក​យក​លិខិត​ឆ្លងដែន​បរទេស​ផ្សេងៗ រឹបអូស​លុយ​សុទ្ធ​បាន​យ៉ាង​តិច​ជាង ២​លាន​ដុល្លារ​សិង្ហបុរី ព្រមទាំង​ឧបករណ៍​អេឡិចត្រូនិក កាបូប​នាឡិកា​ទំនើប គ្រឿង​អលង្ការ​ជាច្រើន។

លើស​ពី​នោះ នគរបាល​សិង្ហបុរី ក៏​បាន​សម្រេច​ចេញ​លិខិត​បង្កក​ទ្រព្យសម្បត្តិ​បុរស​ទាំង ៣​នាក់​នេះ​ដែល​មាន​តម្លៃ​ជាង ៨៩​លាន​ដុល្លារ​សិង្ហបុរី ព្រមទាំង​បាន​បង្កក​គណនី​ធនាគារ​ដែល​មាន​សមតុល្យ​ទឹកប្រាក់​ជាង ១២​លាន​ដុល្លារ​សិង្ហបុរី។

ចំណែក​មនុស្ស ៧​នាក់​ទៀត​នោះ ប៉ូលិស​សិង្ហបុរី បាន​ចេញ​សេចក្ដី​សម្រេច​មួយ​ដោយ​បង្កក​ទ្រព្យសម្បត្តិ​ដែល​មាន​តម្លៃ​ជាង ៨១៥​លាន​ដុល្លារ​សិង្ហបុរី ហើយ​រឹបអូស​គណនី​ធនាគារ​ចំនួន ៣៥​គណនី ដែល​មាន​ទឹកប្រាក់​ជាង ១១០​លាន​ដុល្លារ​សិង្ហបុរី និង​រឹបអូស​លុយ​សុទ្ធ​បាន​ជាង ២៣​លាន​ដុល្លារ​សិង្ហបុរី រួម​ទាំង​កាបូប និង​នាឡិកា​ទំនើប ហើយ​គ្រឿង​អលង្ការ​ជា​មាស​សុទ្ធ និង​គ្រឿង​ឧបករណ៍​អេឡិចត្រូនិក ជាដើម។

សារព័ត៌មាន ស្ត្រេតថែមស៍ (Straitstimes) ចុះផ្សាយ​នៅ​ថ្ងៃទី​១៧ ខែ​សីហា ឲ្យ​ដឹង​ថា ប៉ូលិស​សិង្ហបុរី ប្រមាណ​ជាង ៤០០​នាក់​បាន​ព័ទ្ធ​ស្ទាក់​នៅ​តំបន់​មួយ​ចំនួន​ដើម្បី​ចូល​វាយឆ្មក់​ចាប់​ឃាត់​ខ្លួន​ជន​សង្ស័យ​ទាំង ១០​នាក់​នោះ ដែល​មាន​អាយុ​ចន្លោះ​ពី ៣១​ឆ្នាំ​ដល់ ៤៤​ឆ្នាំ កាលពី​ថ្ងៃទី​១៥ ខែ​សីហា។ ប៉ូលិស​បាន​បង្ហាញ​ឈ្មោះ​ជនសង្ស័យ​ទាំងនោះ​ក្រោយពី​បាន​ស៊ើបអង្កេត​ដ៏​យូរ និង​ស្វិតស្វាញ​តាមរយៈ​ការ​ផ្ទេរ​ទឹកប្រាក់​របស់​ជនសង្ស័យ​នៅ​តាម​ធនាគារ​មួយ​ចំនួន។

ប៉ូលិស​ឲ្យ​ដឹង​ដែរ​ថា ជនបរទេស​មួយ​ក្រុម​នេះ​រង​ការ​ចោទប្រកាន់​ពី​បទ​លាង​លុយ​កខ្វក់ និង​មាន​ជាប់​ពាក់ព័ន្ធ​ជាមួយ​ក្រុម​ឧក្រិដ្ឋជន​នៅ​ក្រៅ​ប្រទេស ដែល​ជាប់​ពាក់ព័ន្ធ​នឹង​ការ​ជួញដូរ​មនុស្ស ការ​បោកប្រាស់ និង​ការ​បើក​ល្បែង​តាម​ប្រព័ន្ធ​អនឡាញ (Online) ខុស​ច្បាប់។ ប៉ូលិស​កំពុង​តាម​ចាប់​ជន​សង្ស័យ ៨​នាក់​ទៀត​ដែល​កំពុង​រត់​គេច​ខ្លួន។

សកម្មជន​បរិស្ថាន លោក ម៉ា ចិត្រា បាន​សរសេរ​លើ​ហ្វេសប៊ុក​ដោយ​ស្នើ​រដ្ឋាភិបាល​ពិនិត្យ​មើល​ឲ្យ​បាន​ច្បាស់ មុន​នឹង​ផ្តល់​សញ្ជាតិ​ខ្មែរ​ឱ្យ​បរទេស​នោះ ដោយ​កុំ​មើល​ឃើញ​តែ​ថវិកា​ដែល​ពួកគេ​ឱ្យ។

ក្រៅពី​រឿង​ឲ្យ​សញ្ជាតិ​ជនបរទេស​នោះ លោក​ថា​ការ​ផ្តល់​ងារ​ជា​ឧកញ៉ា​ក៏​គួរតែ​ពិនិត្យ​មើល​ដែរ ជាពិសេស​ប្រភព​ថវិកា​របស់​ពួកគេ​ដែល​ផ្ដល់​ជូន​រដ្ឋ។ លោក​ថា ការ​ស្នើ​ដូច្នេះ ដើម្បី​កុំ​ឲ្យ​ខ្មែរ​រងគ្រោះ​ដោយសារ​លុយ​ដុំ ឬ​ដុំ​លុយ។

លោក ម៉ា ចិត្រា ចោទ​ជា​សំណួរ​ថា តើ​ថវិកា​ដែល​គេ​ផ្តល់​ជូន​រដ្ឋ​នោះ គេ​បាន​មក​ពីណា? សូម​ឱ្យ​មាន​គណៈកម្មការ​មួយ​ច្បាស់លាស់ ដើម្បី​សិក្សា​ពី​ជន​ណា​ដែល​ចង់បាន​ងារ​ជា​ឧកញ៉ា និង​ពិនិត្យ​ឲ្យ​បាន​ហ្មត់ចត់ មុន​នឹង​ផ្តល់​ឈ្មោះ​ជន​ណា​ដែល​ចង់បាន​សញ្ជាតិ​ខ្មែរ មុន​នឹង​ថ្វាយ​ទៅ​ព្រះមហាក្សត្រ​ចេញ​ព្រះរាជក្រឹត្យ។

បើ​តាម​នគរបាល​សិង្ហបុរី ថា​ជនជាតិ​ចិន​សញ្ជាតិ​ខ្មែរ​ទាំង ៣​នាក់​នេះ ត្រូវ​ប្រឈម​ជាប់​ពន្ធនាគារ​រហូត​ដល់ ១០​ឆ្នាំ និង​ពិន័យ​ជា​ទឹកប្រាក់​រហូត​ដល់ ៥០​ម៉ឺន​ដុល្លារ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស