សាលាដំបូងរាជធានីភ្នំពេញ បដិសេធសំណើរបស់អនុប្រធានបក្សភ្លើងទៀន លោក រ៉ុង ឈុន ដែលស្នើសុំចូលសួរសុខទុក្ខមន្ត្រីជាន់ខ្ពស់បក្សនេះចំនួន ៤នាក់ដែលកំពុងជាប់ឃុំក្នុងពន្ធនាគារ ដោយសារពួកគេកំពុងស្ថិតក្នុងចំណាត់ការស៊ើបសួរ និងស្រាវជ្រាវភស្តុតាងនានា។
ក្នុងលិខិតរបស់ចៅក្រមស៊ើបសួរសាលាដំបូងរាជធានីភ្នំពេញ លោក យី សុខវួច ចុះថ្ងៃទី២១ ខែសីហា ឆ្នាំ២០២៣ ផ្ញើទៅកាន់លោក សំ សុគង់ ឲ្យដឹងថា សំណើសុំចូលសួរសុខទុក្ខជនត្រូវចោទឈ្មោះ លី រី ឈ្មោះ ប៊ុន ខេត និងឈ្មោះ អេង ស្រូយ ហើយឈ្មោះ វង រុន្នី ដែលកំពុងឃុំខ្លួនបណ្ដោះអាសន្ននៅពន្ធនាគារភ្នំពេញ PJ របស់អនុប្រធានគណបក្សភ្លើងទៀន លោក រ៉ុង ឈុន មិនត្រូវបានអនុញ្ញាតឡើយ។
ចៅក្រមរូបនេះថា ការមិនអនុញ្ញាតតាមការស្នើសុំនេះ ដោយតុលាការលើកហេតុផលថា សំណុំរឿងមន្ត្រីគណបក្សភ្លើងទៀនទាំង ៤នាក់កំពុងស្ថិតក្នុងចំណាត់ការស៊ើបសួរ និងស្រាវជ្រាវភស្តុតាងនានា។
សម្រាប់មេធាវីការពារក្ដី និងក្រុមគ្រួសារ គឺអាចចូលជួបសួរសុខទុក្ខបាន លើកលែងតែអ្នកពាក់ព័ន្ធនឹងសំណុំរឿងនេះ តុលាការមិនអនុញ្ញាតឡើយ។ ប៉ុន្តែប្រសិនជាអ្នកផ្សេងទៀតអាចអនុញ្ញាតឲ្យចូលសួរសុខទុក្ខបានក្រោយពីចៅក្រមបានបំពេញកិច្ចមួយចំនួនសិន។
កាលពីថ្ងៃទី១៥ ខែសីហា ឆ្នាំ២០២៣ លោក រ៉ុង ឈុន បានដាក់ពាក្យទៅសាលាដំបូងរាជធានីភ្នំពេញតាមរយៈលោក សំ សុគង់ មេធាវីការពារក្ដីឲ្យមន្ត្រីបក្សភ្លើងទៀនទាំង ៤នាក់។
លោក លី រី ជាសមាជិកគណៈកម្មាធិការនាយក និងលោក ប៊ុន ខេត ប្រធានស្តីទីប្រតិបត្តិមកពីគណបក្សភ្លើងទៀននៅរាជធានីភ្នំពេញ កាលពីរសៀលថ្ងៃទី១៤ ខែកក្កដា ឆ្នាំ២០២៣ ត្រូវកម្លាំងសមត្ថកិច្ចចាប់ខ្លួន និងបញ្ជូនខ្លួនចូលរថយន្តភ្លាមៗ។
ចំណែកមន្ត្រីជាន់ខ្ពស់បក្សភ្លើងទៀន ២នាក់ គឺអ្នកស្រី វង រុន្នី ប្រធានចលនាស្ត្រីថ្នាក់ជាតិរបស់បក្សនេះ និងលោក អេង ស្រូយ ប្រធានគណៈកម្មាធិការប្រតិបត្តិខេត្តត្បូងឃ្មុំ ត្រូវបានសាលាដំបូងរាជធានីភ្នំពេញចេញដីកាចាប់ខ្លួនកាលពីថ្ងៃទី១៧ ខែកក្កដា ក្រោមបទចោទប្រកាន់បង្កចលាចលដល់ការបោះឆ្នោត។
គួរបញ្ជាក់ផងដែរថា ការចេញដីកាចាប់ខ្លួនមន្ត្រីជាន់ខ្ពស់បក្សភ្លើងទៀននេះ បន្ទាប់ពីពួកគេបានរងនូវការចោទប្រកាន់ថា កំពុងផ្សព្វផ្សាយពីយុទ្ធនាការបំផ្លាញសន្លឹកឆ្នោតដែលផ្ទុយពីច្បាប់បោះឆ្នោតដែលបក្សកាន់អំណាចទើបនឹងកែប្រែកាលពីពេលថ្មីៗនេះ៕