34 C
Phnom Penh

សិង្ហបុរី​ចាប់​ខ្លួន​ជនជាតិ​ចិន​និង​ជនជាតិ​ដទៃ​ទៀត​ករណី​លាង​លុយ​ប្រើ​លិខិត​ឆ្លងដែន​កម្ពុជា Cyprus និង​វ៉ាននូអាទូ

ដោយ ឌឹ ខេមបូឌា ដេលី

បទវិភាគ

រដ្ឋអាជ្ញា និង​សមត្ថកិច្ច​ប៉ូលិស​ប្រទេស​សិង្ហបុរី ចាប់​ខ្លួន​ជន​សង្ស័យ​ជនជាតិ​ចិន និង​ជនជាតិ​ដទៃ​ទៀត​ជាច្រើន​នាក់ ដែល​ពួកគេ​មាន​មុខរបរ​ទុច្ចរិត គឺ​ការ​លាង​លុយ​កខ្វក់។

តាម​ការ​ចុះផ្សាយ​របស់​គេហទំព័រ​នៃ​សារព័ត៌មាន The Week in Asia និង​សារព័ត៌មាន South China Morning Post បាន​ឲ្យ​ដឹង​ថា ជនជាតិ​ចិន និង​ជនបរទេស​ទាំងនោះ​បាន​ប្រើ​លិខិត​ឆ្លងដែន​បរទេស ហើយ​ដើម្បី​បាន​លិខិត​ឆ្លងដែន ពួកគេ​ត្រូវ​ចំណាយ​ប្រាក់​ប្រមាណ ១​សែន ៣​ម៉ឺន​ដុល្លារ។ ប្រទេស​ដែល​ពួកគេ​ចំណាយ​ប្រាក់​ទិញ​សញ្ជាតិ​ដូច្នេះ រួម​មាន​កម្ពុជា ប្រទេស Cyprus និង​ប្រទេស​វ៉ាននូអាទូ (Vanuatu)។

ជនបរទេស​ដែល​អាជ្ញាធរ​នៃ​ប្រទេស​សិង្ហបុរី ចាប់​ខ្លួន ពួកគេ​ភាគច្រើន​ជា​ជនជាតិ​ចិន ហើយ​ជនបរទេស​ទាំងនោះ​ត្រូវការ​សញ្ជាតិ​ថ្មី​ដើម្បី​បាន​លិខិត​ឆ្លងដែន​របស់​ប្រទេស​នោះ ក្នុង​គោលដៅ​ដើម្បី​ប្រកប​មុខរបរ​ខុស​ច្បាប់​ផ្សេងៗ មាន​ដូចជា​ការ​លាង​លុយ​កខ្វក់ ឬ​ការ​ចាប់​ជំរិត ដែល​ពួកគេ​អាច​រក​ប្រាក់​ពី​មុខរបរ​ទាំងនោះ​រាប់​សិប​លាន​ដុល្លារ។ ករណី​ត្រូវ​បាន​អាជ្ញាធរ​ប្រទេស​ទាំងនោះ​ចាប់​ខ្លួន គឺ​ពួកគេ​តែងតែ​រក​មធ្យោបាយ​ដើម្បី​គេច​ខ្លួន និង​គេច​ចេញពី​ការ​ជាប់​ទោស​ក្នុង​ពន្ធនាគារ​ដោយ​ចំណាយ​ប្រាក់​ជាច្រើន​ម៉ឺន​ដុល្លារ។

កាលពី​ថ្ងៃទី​១៥ សីហា អាជ្ញាធរ​នៃ​ប្រទេស​សិង្ហបុរី បាន​រឹបអូស​ទ្រព្យសម្បត្តិ​របស់​ជនជាតិ​ចិន និង​ជនបរទេស​ទាំងនោះ​នូវ​សាច់ប្រាក់​ទំហំ ១៣០០​លាន​ដុល្លារ​អាមេរិក។

ការ​រឹបអូស​ទ្រព្យសម្បត្តិ​មហាសាល​របស់​ជនជាតិ​ចិន និង​ជនបរទេស​ទាំងនោះ ធ្វើឡើង​ក្រោយពី​មាន​ការ​ស៊ើប​អង្កេត​រក​ឃើញ​ជនសង្ស័យ​ទាំងនោះ​បាន​ប្រព្រឹត្ត​បទឧក្រិដ្ឋ ករណី​ពាក់ព័ន្ធ​នឹង​ការ​លាង​លុយ​កខ្វក់។ ទ្រព្យសម្បត្តិ​ហិរញ្ញវត្ថុ​ដ៏​មហាសាល​ដែល​ជន​ទាំងនោះ​ប្រើប្រាស់ គឺ​ដើម្បី​បង្កើត​ទីក្រុង​នៃ​ឋាន​សួគ៌ា​ឧក្រិដ្ឋ​មួយ។

ប្រភព​ព័ត៌មាន​ដដែល​នេះ ឲ្យ​ដឹង​ថា ជនសង្ស័យ ៧​នាក់​ដែល​ត្រូវ​បាន​ចាប់​ខ្លួន​នៅ​ក្នុង​ប្រទេស​សិង្ហបុរី គឺ ២​នាក់​ប្រើ​លិខិត​ឆ្លងដែន​របស់​ប្រទេស Cyprus បី​នាក់​ប្រើ​លិខិត​ឆ្លងដែន​របស់​ប្រទេស​កម្ពុជា ម្នាក់​កាន់​លិខិត​ឆ្លងដែន​របស់​ប្រទេស​តួកគី និង​ម្នាក់​ទៀត​កាន់​លិខិត​ឆ្លងដែន​របស់​ប្រទេស​វ៉ាននូអាទូ ជា​កោះ​មួយ​នៃ​ជ្រោយ​សមុទ្រ​ប៉ាស៊ីហ្វិក​ខាងត្បូង។

អាជ្ញាធរ​នៃ​ប្រទេស​សិង្ហបុរី អះអាង​ថា ក្រៅពី​រូបិយវត្ថុ ឯកសារ​ធ្វើ​ដំណើរ ក៏​មាន​នាឡិកា​ម៉ាក Rolex គ្រឿង​អលង្ការ​ផ្សេងៗ និង​រថយន្ត​ទំនើបៗ​ជាច្រើន​គ្រឿង។

តាម​អ្នកជំនាញ​របស់​អង្គការ​សហប្រជាជាតិ​មកពី​ការិយាល័យ​ប្រឆាំង​គ្រឿងញៀន និង​ឧក្រិដ្ឋកម្ម UNODC ប្រចាំ​តំបន់​អាស៊ី លោក Jeremy Douglas បាន​ប្រាប់​សារព័ត៌មាន The Week in Asia ថា ជា​ការ​ងាយស្រួល​បំផុត បើ​ត្រឹមតែ​ត្រូវការ​សញ្ជាតិ និង​លិខិត​ឆ្លងដែន ឱ្យ​តែ​បុគ្គល​នោះ​ទៅ​រស់នៅ​ក្នុង​ប្រទេស​មួយ​ចំនួន​នៅ​អាស៊ី។

អ្នកជំនាញ​រូប​នេះ​អះអាង​ថា ជន​ខិលខូច​ទាំងនោះ​ភាគច្រើន​ក្រោយពី​បាន​សញ្ជាតិ​ហើយ ពួកគេ​តែងតែ​ដូរ​ឈ្មោះ និង​ថ្ងៃ​ខែ​កំណើត ដែល​ធ្វើ​ដូចនេះ ងាយ​ឱ្យ​ពួកគេ​ធ្វើ​ដំណើរ​ឆ្លងដែន ហើយ​ជួយ​សម្រួល​ការ​បង្កើត​មុខរបរ​ដែល​ខុស​ច្បាប់​របស់​ពួកគេ​ទៀត​ផង។

រដ្ឋអាជ្ញា​នៃ​ប្រទេស​សិង្ហបុរី បាន​ប្រាប់​សារព័ត៌មាន The Week In Asia ថា ក្នុង​ចំណោម​ជនសង្ស័យ​ទាំងនោះ​មាន​អ្នក​ខ្លះ​ប្រើ​លិខិត​ឆ្លងដែន​ដល់​ទៅ​ប្រាំ​ប្រទេស មាន​ដូចជា​លិខិត​ឆ្លងដែន​ប្រទេស​កម្ពុជា តួកគី Cyprus, St Lucia និង​ប្រទេស​ចិន។ រដ្ឋអាជ្ញា​រង​នៃ​ប្រទេស​សិង្ហបុរី លោក Eric Hu បាន​ប្រាប់​តុលាការ​ថា ជនសង្ស័យ​ម្នាក់​ឈ្មោះ Su Haijin មាន​លិខិត​ឆ្លងដែន​ប្រទេស​កម្ពុជា​ផង និង​ប្រទេស​តួកគី ផង ដែល​លិខិត​ឆ្លងដែន​របស់​គាត់​ត្រូវ​បាន​រឹបអូស។

លោក Eric Hu អះអាង​ថា ជនសង្ស័យ​រូប​នេះ​មាន​ក្រុមហ៊ុន​ជាច្រើន​នៅ​ប្រទេស​ដែល​គាត់​ទទួល​បាន​សិទ្ធិ​ជា​ពលរដ្ឋ​របស់​ប្រទេស​នោះ។ លោក​បាន​ប្រាប់​សារព័ត៌មាន The Strait Times នៃ​ប្រទេស​សិង្ហបុរី ថា លោក​បាន​ជំទាស់​ជា​ខ្លាំង​មិន​ឱ្យ​ជនសង្ស័យ​ទាំងនោះ​បាន​នៅ​ក្រៅ​ឃុំ​ដាច់ខាត ទោះ​ជា​មាន​ការ​តម្កល់​ប្រាក់​ធានា​ខ្លួន​ក៏ដោយ។

ប្រភព​ព័ត៌មាន​ទាំងនេះ បាន​ឲ្យ​ដឹង​ថា នៅ​ប្រទេស​កម្ពុជា គេ​ត្រូវ​ចំណាយ​ប្រាក់ ៣០​ម៉ឺន​ដុល្លារ​អាច​ទទួល​បាន​សញ្ជាតិ​ពលរដ្ឋ​កម្ពុជា ចំណែក​នៅ​ប្រទេស Cyprus ត្រូវ​ចំណាយ​ដល់ ២​លាន ៥​សែន​ដុល្លារ​ឯណោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស