33 C
Phnom Penh

ភាពយន្ត​ចិន​ដែល​លាតត្រដាង​អំពើ​ជួញដូរ​មនុស្ស ១​សែន​ករណី​នៅ​កម្ពុជា កំពុង​បង្អាក់​ទេសចរ​មិន​ឱ្យ​ចូល​ទៅ​លេង​កម្ពុជា

ដោយ ឌឹ ខេមបូឌា ដេលី

បទវិភាគ

ឧស្សាហកម្ម​ភាពយន្ត​ចិន កំពុង​កើប​លុយ​ខ្ទង់​ពាន់​លាន​ដុល្លារ​អាមេរិក នៅ​ដើម​ខែ​សីហា ក្នុង​ឆ្នាំ​២០២៣ បន្ទាប់ពី​ការ​ចាក់​បញ្ចាំង​រឿង No More Bets ដែល​បាន​លាតត្រដាង​ពី​ការពិត​នៃ​អំពើ​ជួញដូរ​មនុស្ស​ប្រមាណ ១​សែន​ករណី​នៅ​កម្ពុជា ប៉ុន្តែ​ខ្សែភាពយន្ត​នេះ​បែរ​ជា​ធ្វើ​ឱ្យ​ភ្ញៀវ​ទេសចរ​ចិន និង​ភ្ញៀវ​ទេសចរ​តាម​បណ្តា​ប្រទេស​ផ្សេងៗ​ដែល​បាន​ទស្សនា​រួច បាន​បដិសេធ​ដូចៗ​គ្នា​អំពី​ភាព​ខ្លាចរអា​ក្នុង​ការ​ទៅ​លេង​ប្រទេស​កម្ពុជា។

ខ្សែភាពយន្ត​ខ្នាត​ធំ​របស់​ចិន ឈ្មោះ «No More Bets» ដែល​មាន​ន័យ​ថា «សូម​បញ្ឈប់​ការ​ភ្នាល់​បន្ត​ទៀត» ត្រូវ​បាន​ចាក់​បញ្ចាំង​ជា​ផ្លូវការ​កាលពី​ដើម​ខែ​សីហា ឆ្នាំ​២០២៣ ដែល​អាច​រក​ចំណូល​បាន​ពី​ការ​ចាក់​បញ្ចាំង​នៅ​ក្នុង​ប្រទេស​ចិន ប្រមាណ ៥០០​លាន​ដុល្លារ​អាមេរិក ខណៈ​រដ្ឋាភិបាល​ចិន​ក៏​កំពុង​ធ្វើ​យុទ្ធនាការ​ផ្សព្វផ្សាយ​ឱ្យ​មាន​ការ​យល់ដឹង​ជា​សាធារណៈ​អំពី​ការ​ឆបោក ដែល​បាន​រៀបរាប់​ក្នុង​ខ្សែភាពយន្ត​នេះ។

ខ្សែភាពយន្ត​នេះ​កំពុង​ផ្ទុះ​កក្រើក​ពេញ​ប្រទេស​ចិន និង​ប្រទេស​ដទៃ​ទៀត​ដែល​ទាក់ទាញ​អ្នក​ទស្សនា​រាប់​លាន​នាក់ ប៉ុន្តែ​លទ្ធផល​នៃ​ការ​ទស្សនា បាន​ធ្វើ​ឱ្យ​ពួកគេ​មាន​ការ​ភ័យ​ខ្លាច និង​មិន​ហ៊ាន​ទៅ​លេង​ប្រទេស​កម្ពុជា ព្រោះតែ​ខ្សែភាពយន្ត​មួយ​នេះ​បាន​បញ្ជាក់​ជា​ភាសា​អង់គ្លេស​ថា «Base On Real Case» ដែល​មាន​ន័យ​ថា «ផ្អែក​តាម​រឿង​ពិត» ប្រមាណ ១​សែន​ករណី​នៃ​អំពើ​ជួញដូរ​មនុស្ស។

ខ្សែភាពយន្ត​ខ្នាត​ធំ No More Bets បាន​ពណ៌នា​ពី​ខ្សែជីវិត​អ្នក​សរសេរ​កម្មវិធី​ម្នាក់ ឬ​ហៅ​ថា Programmer និង​តារា​ស្រី​បង្ហាញ​ម៉ូត​ម្នាក់​ជា​ជនជាតិ​ចិន ដែល​បាន​ចាញ់​បោក​ក្រុម​ឧក្រិដ្ឋជន​ពី​ការ​ប្រកាស​ស្វែងរក​ការងារ​តាម​អនឡាញ ដោយ​ការ​សន្យា​ទទួល​បាន​ប្រាក់ខែ​ខ្ពស់។

ទីបំផុត ពួកគេ​ត្រូវ​បាន​បោកប្រាស់​យក​ទៅ​ធ្វើការ​ខុស​ច្បាប់ ដើម្បី​ឆបោក​តាម​ប្រព័ន្ធ​អ៊ីនធឺណិត ហើយ​ពួកគេ​ត្រូវ​បាន​ក្រុម​ឧក្រិដ្ឋជន​លក់​ពី​កន្លែង​មួយ​ទៅ​កន្លែង​មួយ ខណៈ​ជនរងគ្រោះ​ដែល​ជា​បុរស​ត្រូវ​បាន​បង្ខំ​ឱ្យ​ធ្វើការ​ឆបោក​តាម​ប្រព័ន្ធ​អនឡាញ ដូចជា​ការ​បណ្ដាក់ទុន Investments in Stock, BitCoin, Mining, Online Games, E-Commerce ឬ​ការ​ជំរិត​ទារប្រាក់​តាម​វិធី​ផ្សេងៗ ជាដើម។

ខ្សែភាពយន្ត​នេះ បាន​តម្រូវ​ឱ្យ​តួអង្គ​ពាក់​អាវ​ដែល​មាន​អក្សរ​ខ្មែរ និង​រថយន្ត​ក្នុង​សាច់រឿង​នេះ​ក៏​មាន​បិទ​អក្សរ​ខ្មែរ​ផង​ដែរ ដែល​ទំនង​ជា​មាន​បំណង​លាតត្រដាង​អំពី​ការ​ជួញដូរ​មនុស្ស​នៅ​ក្នុង​ប្រទេស​កម្ពុជា ហើយ​សាច់រឿង​នេះ​ក៏​បាន​បង្ហាញ​ពី​ការ​ធ្វើ​ទារុណកម្ម​របស់​ក្រុម​ឧក្រិដ្ឋជន​ទៅ​លើ​ជនរងគ្រោះ​យ៉ាង​ព្រៃផ្សៃ​ថែម​ទៀត ដូចជា​ការ​លក់​មនុស្ស​ឱ្យ​បម្រើ​សេវាកម្ម​ផ្លូវភេទ ការ​ចាក់​បញ្ចូល​ថ្នាំញៀន​ឱ្យ​ទទួល​ភ្ញៀវ ការ​បាញ់​សម្លាប់​ជនរងគ្រោះ​ដែល​មាន​បំណង​លួច​រត់ ការ​ដក​ក្រចក ការ​យក​ស្គុត​រុំ​ច្រមុះ​ឱ្យ​ថប់​ដង្ហើម កាត់​ស្លឹកត្រចៀក ការ​ច្រាន​ជនរងគ្រោះ​ទម្លាក់​ពី​លើ​អគារ និង​ការ​វះ​យក​គ្រឿង​ក្នុង​របស់​ជនរងគ្រោះ​ទៅ​លក់​ក្នុង​ទីផ្សារ​ងងឹត ជាដើម ដែល​ធ្វើ​ឱ្យ​អ្នក​ទស្សនា​ភ័យ​ខ្លាច និង​ព្រឺព្រួច​ជា​ខ្លាំង។

ទាក់ទិន​នឹង​ខ្សែភាពយន្ត​នេះ ក៏​មាន​សារព័ត៌មាន​បរទេស NIKEI ASIA ធ្លាប់​បាន​ចុះផ្សាយ​ជុំវិញ​ករណី​នេះ​កាលពី​សប្តាហ៍​កន្លងទៅ​ថា ខ្សែភាពយន្ត​នេះ​បាន​បង្ហាញ​អំពី​រឿងរ៉ាវ​របស់​អ្នក​សរសេរ​កម្មវិធី និង​តារា​បង្ហាញ​ម៉ូដ​ជនជាតិ​ចិន​ម្នាក់ ដែល​ត្រូវ​បាន​ទាក់ទាញ​ដោយ​ការ​សន្យា​ផ្តល់​ការងារ​មាន​ប្រាក់ខែ​ខ្ពស់។ ការ​ថត​ខ្សែភាពយន្ត​នេះ មិន​បាន​បញ្ជាក់​ពី​ឈ្មោះ​របស់​ប្រទេស​ណា​មួយ​នោះ​ឡើយ បើ​ទោះបីជា​ឈុត​មួយ​ក្នុង​ឈុត​ខ្លះ​ទៀត​បាន​បង្ហាញ​ពី​តួអង្គ​ពាក់​អាវ​យឺត​ដែល​មាន​អក្សរ​ខ្មែរ​ក៏ដោយ។

សារព័ត៌មាន​បរទេស​ឈ្មោះ NIKEI ASIA បាន​ចុះផ្សាយ​ថា បន្ទាប់ពី​ការ​ចេញ​ផ្សាយ​ខ្សែភាពយន្ត​នេះ ការ​ស្ទង់មតិ​មួយ​ដែល​ធ្វើឡើង​តាម​ប្រព័ន្ធ​ផ្សព្វផ្សាយ​សង្គម​របស់​ចិន ឈ្មោះ Sina Weibo បាន​សួរ​អ្នក​ដែល​បាន​ទស្សនា​ខ្សែភាពយន្ត​នេះ​ថា តើ​ពួកគេ​ហ៊ាន​ធ្វើ​ដំណើរ​ទៅ​កាន់​ប្រទេស​កម្ពុជា និង​ប្រទេស​ភូមា ដែរ​ឬ​ទេ? ក្នុង​នោះ មាន​តែ​មនុស្ស​ជាង ៣​ពាន់​នាក់​ប៉ុណ្ណោះ (៣៧៧៨​នាក់) ដែល​បាន​និយាយ​ថា ពួកគេ​ហ៊ាន​ទៅ ប៉ុន្តែ​មនុស្ស​ប្រមាណ​ជិត ២​សែន​នាក់​ផ្សេង​ទៀត (១៨១០០០​នាក់) បាន​ឆ្លើយ​ថា ពួកគេ​មិន​ហ៊ាន​ទៅ​ទេ ក្រោម​ហេតុផល​ថា វា​ជា​រឿង​គ្រោះថ្នាក់​បំផុត។

កាលពី​អំឡុង​ខែ​កក្កដា ឆ្នាំ​២០២៣ អង្គការ​សហប្រជាជាតិ​បាន​បង្ហាញ​របាយការណ៍​របស់​ខ្លួន​ថា អំពើ​ឆបោក​តាម​ប្រព័ន្ធ​អ៊ីនធឺណិត​នៅ​ក្នុង​តំបន់​អាស៊ី​អាគ្នេយ៍​កំពុង​បង្កើត​ប្រាក់ចំណូល​រាប់​ពាន់​លាន​ដុល្លារ​អាមេរិក ដោយ​មាន​ជនរងគ្រោះ​ប្រមាណ ១​សែន​នាក់​ត្រូវ​បាន​ជួញដូរ​ចូល​ទៅ​ក្នុង​ប្រទេស​កម្ពុជា និង​ជាង ១​សែន​នាក់​ផ្សេង​ទៀត (១២០០០០​នាក់) ចូល​ទៅ​កាន់​ប្រទេស​ភូមា ផង​ដែរ ប៉ុន្តែ​តួលេខ​នេះ​ត្រូវ​បាន​រដ្ឋាភិបាល​កម្ពុជា​បដិសេធ​ចោល​ទាំងស្រុង។

ទាក់ទិន​នឹង​បញ្ហា​នេះ កាលពី​ថ្ងៃទី​១៤ ខែ​កក្កដា ឆ្នាំ​២០២២ សារព័ត៌មាន​អន្តរជាតិ អាល់ចាហ្ស៊ីរ៉ា (Aljazeera) បាន​ចេញ​ផ្សាយ​សេចក្តី​រាយការណ៍​ជា​វីដេអូ​រយៈពេល​ជាង ៤០​នាទី ដែល​មាន​ចំណងជើង​ថា «Forced to Scam: Cambodia’s Cyber Slaves» «ទាសករ​តាម​អ៊ីនធឺណិត​នៅ​កម្ពុជា» ដោយ​ក្នុង​វីដេអូ​នោះ​បាន​រៀបរាប់​យ៉ាង​ច្រើន​ពី​ការ​ស៊ើបអង្កេត​នៃ​អំពើ​ជួញដូរ​មនុស្ស និង​ការ​ធ្វើ​ទាសភាព​ដោយ​ប្រតិបត្តិការ​បោកប្រាស់​តាម​អ៊ីនធឺណិត​របស់​ជនជាតិ​ចិន នៅ​កម្ពុជា និង​បណ្ដាញ​របស់​ពួកគេ​ដែល​ពាក់ព័ន្ធ​ជាមួយ​មន្ត្រី​ជាន់ខ្ពស់​នៃ​រដ្ឋាភិបាល​កម្ពុជា ដែល​ធ្វើ​ឡើង​ជា​ប្រព័ន្ធ ជាពិសេស​គឺ​មេដឹកនាំ​បក្ស​កាន់​អំណាច​លោក ហ៊ុន សែន តែម្តង។

ក្រសួង​ការបរទេស​អាមេរិក កាលពី​ចុង​ឆ្នាំ​២០២២ បាន​បញ្ចេញ​របាយការណ៍​របស់​ខ្លួន​ស្ដីពី​ការ​ជួញដូរ​មនុស្ស ដោយ​បាន​ដាក់​ប្រទេស​កម្ពុជា​ចូល​ក្នុង​បញ្ជីខ្មៅ​ស្ថិត​ក្រោម​ការ​ឃ្លាំមើល​កម្រិត​៣ (Tier 3 Watch List) ដែល​បញ្ជាក់​ថា កម្ពុជា​ស្ថិត​នៅ​ក្នុង​បញ្ជីខ្មៅ​នៃ​ការ​ជួញដូរ​មនុស្ស​ធ្ងន់ធ្ងរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស