អ្នកឃ្លាំមើលព្រមានថា ការប្រើទូរសព្ទរបស់លោក សុខ សុវណ្ណវឌ្ឍនាសាប៊ុង ហៅ William Guang ដើម្បីបញ្ចេញសារនយោបាយចេញពីពន្ធនាគារ គឺជាប់ពាក់ព័ន្ធនឹងអំពើពុករលួយរបស់ពួកមន្ត្រីដែលកំពុងគ្រប់គ្រងនៅក្នុងពន្ធនាគារ។
ការលើកឡើងនេះ បន្ទាប់ពីលោក សុខ សុវណ្ណវឌ្ឍនាសាប៊ុង ហៅ William Guang កាលពីថ្ងៃទី១៦ ខែតុលា ឆ្នាំ២០២៣ និយាយជាសារសំឡេងជិត ៤នាទីចេញពីពន្ធនាគារ ផ្ញើទៅសមាជិកសមាជិការបស់ខ្លួន ជុំវិញរឿងទំនាស់ផ្ទៃក្នុងនៅគណបក្សខ្មែរក្រោក។
សារសំឡេងនោះ លោកក៏បានទម្លាយឈ្មោះបុគ្គលម្នាក់ដែលកំពុងដឹកនាំគណបក្សខ្មែរក្រោក ថាបានកិបកេងថវិការដ្ឋអំឡុងពេលបំពេញការងារនៅលេខាធិការឧត្ដមក្រុមប្រឹក្សាពិគ្រោះ និងផ្ដល់យោបល់ផងដែរ។
កាលពីថ្ងៃទី១៧ ខែតុលា ឆ្នាំ២០២៣ អគ្គនាយកដ្ឋានពន្ធនាគារប្រកាសប្ដឹងលោក សុខ សុវណ្ណវឌ្ឍនាសាប៊ុង ហៅ William Guang ករណីដែលលួចប្រើទូរសព្ទ និងបញ្ចេញសារនយោបាយពីក្នុងពន្ធនាគារកាលពីថ្ងៃទី១៦ ខែតុលា ឆ្នាំ២០២៣ លើបណ្ដាញសង្គម TikTok។
អគ្គនាយកដ្ឋានពន្ធនាគារអះអាងថា ខ្លួននឹងដាក់ពិន័យលើលោក សុខ សុវណ្ណវឌ្ឍនាសាប៊ុង ដែលជាប្រធានស្តីទីគណបក្សខ្មែរក្រោក ឲ្យនៅក្នុងបន្ទប់ដាក់វិន័យ ដោយហាមប្រើប្រាស់ទូរសព្ទ និងមិនអនុញ្ញាតឲ្យជួបសួរសុខទុក្ខជាមួយញាតិមិត្តខាងក្រៅរយៈពេល ២សប្ដាហ៍។
អនុប្រធានវេទិកាពលរដ្ឋ លោក ម៉ែន ណាត យល់ថា លោក សុខ សុវណ្ណវឌ្ឍនាសាប៊ុង ហៅ William Guang បានប្រព្រឹត្តបទល្មើស «ប្លន់» និងចាប់ជំរិតជាក់ស្ដែង ដែលត្រូវបានតុលាការកាត់ទោសរួចហើយ ដូច្នេះអ្នកទោសរូបនេះមិនអាចធ្វើជាប្រធានគណបក្សបានឡើយ លើកលែងតែអ្នកទោសមនសិការដែលត្រូវបានតុលាការចោទប្រកាន់ទាំងអយុត្តិធម៌ក្នុងសំណុំរឿងនយោបាយ និងការបញ្ចេញមតិពីបញ្ហាសង្គមតែប៉ុណ្ណោះ។
លោកថា ការប្រើប្រាស់ទូរសព្ទ និងបញ្ចេញសារនយោបាយចេញពីពន្ធនាគារនេះ ពាក់ព័ន្ធនឹងអំពើពុករលួយរបស់ពួកមន្ត្រីដែលគ្រប់គ្រងនៅក្នុងពន្ធនាគារ ខណៈកន្លងមក ឧកញ៉ាធំៗមួយចំនួនដែលជាប់ពន្ធនាគារ គឺជាប់ទោសតែឈ្មោះប៉ុណ្ណោះ ប៉ុន្តែពួកគេមិនបានជាប់គុក ឬរស់នៅក្នុងគុកដូចអ្នកទោសដទៃទេ ផ្ទុយទៅវិញ ពួកគេមកស្នាក់នៅក្នុងបន្ទប់ VIP ក្នុងមន្ទីរពេទ្យរាជធានីភ្នំពេញយ៉ាងសប្បាយចិត្ត។
លោក ម៉ែន ណាត ស្នើទៅរដ្ឋាភិបាលឲ្យដាក់ពិន័យលើមន្ត្រីពន្ធនាគារទាំងឡាយណាដែលបើកដៃឲ្យឧក្រិដ្ឋជនទាំងនោះប្រើទូរសព្ទ ធ្វើសកម្មភាពខុសច្បាប់ទាំងនៅក្នុងពន្ធនាគារ និងក្រៅពន្ធនាគារ ដើម្បីបង្ហាញពីការអនុវត្តច្បាប់មិនមានស្តង់ដារពីរ។
លោក សុខ សុវណ្ណវឌ្ឍនាសាប៊ុង ហៅ William Guang និងបក្ខពួក ត្រូវបានសមត្ថកិច្ចចុះបង្ក្រាប និងឃាត់ខ្លួនបន្ទាប់ពីប្លន់ផ្ទះឧកញ៉ា អ៊ាន សៀវម៉ី កាលពីថ្ងៃទី១៩ ខែធ្នូ ឆ្នាំ២០២១។
នៅថ្ងៃទី២ ខែសីហា ឆ្នាំ២០២២ សាលាដំបូងរាជធានីភ្នំពេញបានផ្ដន្ទាទោសប្រធានគណបក្សខ្មែរក្រោក លោក សុខ សុវណ្ណវឌ្ឍនាសាប៊ុង ហៅ William Guang និងបក្ខពួកដាក់ពន្ធនាគារចន្លោះពី ៦ឆ្នាំទៅ ៩ឆ្នាំ ពាក់ព័ន្ធនឹងករណីប្លន់៕