28 C
Phnom Penh

គណបក្ស​ភ្លើង​ទៀន​ប្រកាស​ធ្វើ​សន្និសីទ​សារព័ត៌មាន​ស្ដីពី​ជំហរ​នយោបាយ​នៅ​ថ្ងៃទី​៩ វិច្ឆិកា នេះ

ដោយ ឌឹ ខេមបូឌា ដេលី

បទវិភាគ

អនុប្រធាន​គណបក្ស​ភ្លើង​ទៀន​លោក រ៉ុង ឈុន ប្រកាស​ធ្វើ​សន្និសីទ​សារព័ត៌មាន​នៅ​ថ្ងៃទី​៩ វិច្ឆិកា ដើម្បី​បញ្ជាក់​ពី​ជំហរ​នយោបាយ​ចុងក្រោយ​របស់​គណបក្ស​ខ្លួន ជុំវិញ​ការ​រាំង​ស្ទះ​ដែល​ក្រសួង​មហាផ្ទៃ មិន​អាច​ចេញ​ឯកសារ​ចុះបញ្ជី​ច្បាប់ដើម​ជា​ថ្មី​ជូន ដើម្បី​ឱ្យ​គណបក្ស​នេះ​អាច​ចូលរួម​សកម្មភាព​នយោបាយ​ដោយ​ស្រប​ច្បាប់។

ក្នុង​សេចក្តី​ប្រកាស​ព័ត៌មាន​នៅ​ថ្ងៃទី​៨ ខែ​វិច្ឆិកា ឆ្នាំ​២០២៣ នេះ លោក រ៉ុង ឈុន ថា គណបក្ស​ភ្លើង​ទៀន​នឹង​ធ្វើ​សន្និសីទ​សារព័ត៌មាន​នៅ​ថ្ងៃទី​៩ ខែ​វិច្ឆិកា នេះ នៅ​ទីស្នាក់ការ​សមាគម​គ្រូបង្រៀន​ឯករាជ្យ វេលា​ម៉ោង ៩​ព្រឹក ក្នុង​ខណ្ឌ​មានជ័យ រាជធានី​ភ្នំពេញ ដើម្បី​ប្រកាស​ជំហរ​របស់​ខ្លួន​បន្ទាប់ពី​ក្រសួង​មហាផ្ទៃ មិន​ចេញ​ឯកសារ​ចុះបញ្ជី​ច្បាប់ដើម​ជា​ថ្មី​ដល់​ខ្លួន ដែល​ជា​ហេតុ​ធ្វើ​ឱ្យ​រាំង​ស្ទះ​ដល់​សកម្មភាព​នយោបាយ​របស់​ខ្លួន​សព្វថ្ងៃ​នេះ។

ការ​ប្រកាស​ធ្វើ​សន្និសីទ​នេះ ធ្វើឡើង​បន្ទាប់ពី​គណបក្ស​ភ្លើង​ទៀន​ត្រូវ​បាន​ហាមប្រាម​ពី​គណៈកម្មាធិការ​ជាតិ​រៀបចំ​កា​បោះឆ្នោត​កាលពី​អំឡុង​ខែ​ឧសភា ឆ្នាំ​២០២៣ កន្លង​ទៅ ក្រោម​ហេតុផល​ថា គណបក្ស​នេះ​គ្មាន​សំបុត្រ​កំណើត​ច្បាប់ដើម​ដែល​ចេញ​ដោយ​ក្រសួង​មហាផ្ទៃ។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​៨ វិច្ឆិកា នេះ​ថា គណបក្ស​ភ្លើង​ទៀន គ្មាន​ពន្លឺ​ក្នុង​ការ​តស៊ូ​តាម​ផ្លូវ​ច្បាប់​ដើម្បី​ជំរុញ​ឱ្យ​ក្រសួង​មហាផ្ទៃ ចេញ​លិខិត​សំបុត្រ​កំណើត​ច្បាប់ដើម​សាជាថ្មី​ឱ្យ​ខ្លួន ដើម្បី​ឱ្យ​គណបក្ស​នេះ​អាច​ដំណើរការ​សកម្មភាព​នយោបាយ​ឡើងវិញ​បាន​ទេ។

លោក មាជ សុវណ្ណារ៉ា អះអាង​ថា បញ្ហា​របស់​គណបក្ស​ភ្លើង​ទៀន​ទាក់ទិន​នឹង​សំបុត្រ​កំណើត​របស់​គណបក្ស​នេះ គឺ​ពាក់ព័ន្ធ​នឹង​បញ្ហា​បច្ចេកទេស​ផង ហើយ​ក៏​ពាក់ព័ន្ធ​នឹង​រឿង​នយោបាយ​រវាង​គណបក្ស​នេះ​ជាមួយ​នឹង​គណបក្ស​កាន់​អំណាច​ផង​ដែរ ដូច្នេះ​ក្តី​សង្ឃឹម​ថា​នឹង​ទទួល​បាន​សំបុត្រ​កំណើត​សាជាថ្មី​ឡើងវិញ​ពី​ក្រសួង​មហាផ្ទៃ គឺជា​រឿង​ដែល​មើល​មិន​ឃើញ​ទាល់តែសោះ។

ប្រភព​ដដែល​បញ្ជាក់​ថា ជម្រើស​ល្អ​បំផុត​សម្រាប់​គណបក្ស​ភ្លើង​ទៀន​នៅ​ពេលនេះ គឺ​មាន​តែ​ទៅ​ចុះចូល​ជាមួយ​គណបក្ស​នយោបាយ​ក្នុង​សម្ព័ន្ធ​របស់​ខ្លួន​ណា​មួយ​ប៉ុណ្ណោះ ដើម្បី​រក្សា​កម្លាំង​នយោបាយ​ខ្លួនឯង​ត​ទៅ​មុខ​ទៀត ព្រោះ​ថា​ក្រៅពី​ជម្រើស​ដ៏​តូច​ចង្អៀត​មួយ​នេះ គឺ​មាន​គ្មាន​វិធី​ណា​ផ្សេង​ឡើយ ខណៈ​នីតិវិធី​សុំ​ច្បាប់​បង្កើត​បក្ស​ថ្មី ក៏​ហាក់ដូចជា​ទៅ​មិន​រួច​ដែរ។

មុន​ការ​បោះឆ្នោត​ជ្រើសតាំង​តំណាងរាស្ត្រ​ក្នុង​ខែ​កក្កដា ឆ្នាំ​២០២៣ មក​ដល់ គណៈកម្មាធិការ​ជាតិ​រៀបចំ​ការ​បោះឆ្នោត បាន​ចេញ​សេចក្តី​សម្រេច​កាលពី​ថ្ងៃទី​១៥ ខែ​ឧសភា ឆ្នាំ​២០២៣ បដិសេធ​ការ​ចុះបញ្ជី​គណបក្ស​នយោបាយ​ឈរឈ្មោះ​បោះឆ្នោត​ជ្រើសតាំង​តំណាងរាស្ត្រ​របស់​គណបក្ស​ភ្លើង​ទៀន ក្រោម​ហេតុផល​ថា គណបក្ស​នេះ​មិន​បាន​ភ្ជាប់​មក​ជាមួយ​នូវ​ប្រកាស​ស្ដីពី​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ ដែល​មាន​បញ្ជាក់​នីត្យានុកូលកម្ម​ដោយ​រដ្ឋបាល​រាជធានី​ខេត្ត ក្រុង ស្រុក​ខណ្ឌ នៅ​ច្រក​ចេញ​ចូល​តែ​មួយ។

បែប​នេះ​ក្តី កាលពី​ថ្ងៃទី​៥ ខែ​ឧសភា ឆ្នាំ​២០២៣ ក្រសួង​មហាផ្ទៃ បាន​ចេញ​លិខិត​មួយ​ឱ្យ​គណបក្ស​ភ្លើង​ទៀន ដោយ​បញ្ជាក់​ថា គណបក្ស​ភ្លើង​ទៀន​បាន​ចុះឈ្មោះ​ក្នុង​បញ្ជី​គណបក្ស​នយោបាយ​នៅ​ក្រសួង​មហាផ្ទៃ​រួច​ហើយ ដូច្នេះ​គណបក្ស​នេះ​អាច​ប្រើប្រាស់​លិខិត​ដែល​ខ្លួន​បាន​បញ្ជាក់​នេះ​ស្រប​តាម​ច្បាប់​ជា​ធរមាន ប៉ុន្តែ​ទោះជា​បែប​នេះ​ក្តី គ.ជ.ប នៅតែ​ទាមទារ​រក​សំបុត្រ​កំណើត​ច្បាប់ដើម​របស់​គណបក្ស​ភ្លើង​ទៀន​ដដែល ខណៈ​ក្រសួង​មហាផ្ទៃ​ក៏​មិន​បាន​ចេញ​សំបុត្រ​កំណើត​ច្បាប់ដើម​ឱ្យ​គណបក្ស​នេះ​សាជាថ្មី​ដែរ​រហូត​ដល់​ពេលនេះ។

ច្បាប់​ស្ដីពី​ការ​បោះឆ្នោត​ជ្រើសរើស​តំណាងរាស្ត្រ មាត្រា​២៧ ចែង​ថា ដើម្បី​ចុះបញ្ជី​គណបក្ស​នយោបាយ​ឈរឈ្មោះ​តំណាងរាស្ត្រ​ជា​ផ្លូវការ គណបក្ស​នយោបាយ​ត្រូវ​ភ្ជាប់​មក​ជាមួយ​នូវ​សេចក្តី​ចម្លង​លិខិត​បញ្ជាក់​ការ​ចុះបញ្ជី​គណបក្ស​នយោបាយ​នៅ​ក្រសួង​មហាផ្ទៃ ១​ច្បាប់។ ក្នុង​ច្បាប់​នេះ មិន​បាន​តម្រូវ​ឲ្យ​គណបក្ស​នយោបាយ​បញ្ជាក់​នីត្យានុកូលកម្ម​ទេ ប៉ុន្តែ​សេចក្តី​ជូនដំណឹង​របស់ គ.ជ.ប លេខ​០២៧ ចុះ​ថ្ងៃទី​៥ ខែ​មេសា ឆ្នាំ​២០២៣ បែរ​ជា​តម្រូវ​ឲ្យ​គណបក្ស​នយោបាយ​ត្រូវតែ​បញ្ជាក់​នីត្យានុកូលកម្ម​នៅ​រាជធានី​ខេត្ត ក្រុង​ស្រុក ខណ្ឌ ទៅវិញ ដែល​សេចក្តី​ជូនដំណឹង​នេះ​មាន​ខ្លឹមសារ​ផ្ទុយ​ពី​ច្បាប់​ស្ដីពី​ការ​បោះឆ្នោត​ជ្រើសរើស​តំណាងរាស្ត្រ​ទាំងស្រុង។

ដោយសារតែ​រដ្ឋាភិបាល​អនុវត្ត​តាម​សេចក្តី​ជូនដំណឹង​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) នៅ​ទីបំផុត គណបក្ស​ភ្លើង​ទៀន​ត្រូវ​បាន​បដិសេធ​មិន​ទទួល​ស្គាល់​ចុះឈ្មោះ​ក្នុង​បញ្ជី​បោះឆ្នោត​ឡើយ។

ទន្ទឹម​នឹង​គណបក្ស​ភ្លើង​ទៀន​ត្រូវ​បាន​រារាំង​មិន​ឱ្យ​ចូលរួម​បោះឆ្នោត លោក ហ៊ុន សែន ក៏​បាន​បញ្ជា​ឱ្យ​ក្រសួង​យុត្តិធម៌ និង​ក្រសួង​មហាផ្ទៃ ធ្វើ​វិសោធនកម្ម​ច្បាប់​បោះឆ្នោត​ទាំងអស់ ដោយ​លោក ហ៊ុន សែន បញ្ជាក់​ខ្លឹមសារ​ជា​រួម​របស់​ច្បាប់​នេះ​ថា ជន​ណា​ក៏ដោយ នៅ​ក្នុង​គណបក្ស​ណា​ក៏ដោយ ដែល​មាន​បំណង​ឈរឈ្មោះ​ឱ្យ​គេ​បោះឆ្នោត​ឱ្យ ប៉ុន្តែ​មិន​ទៅ​ចូលរួម​បោះឆ្នោត​នៅ​ថ្ងៃទី​២៣ ខែ​កក្កដា ឆ្នាំ​២០២៣ នោះ​ពួកគេ​នឹង​ត្រូវ​បាត់បង់​សិទ្ធិ​ឈរឈ្មោះ​ឱ្យ​គេ​បោះឆ្នោត​ឱ្យ​អស់​មួយ​ជីវិត ដែល​ខ្លឹមសារ​នៃ​ច្បាប់​នេះ​ត្រូវ​គេ​មើល​ឃើញ​ថា ជា​ចេតនា​ប៉ុនប៉ង​រារាំង​ក្រុម​ប្រឆាំង​មិន​ឱ្យ​វិល​ចូល​ឆាក​នយោបាយ​អស់​មួយ​ជីវិត៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស