ក្រសួងការពារជាតិសហរដ្ឋអាមេរិក កំពុងព្យាយាមបោះដៃរឹតចំណងមិត្តភាពខាងវិស័យសហប្រតិបត្តិការយោធាជាមួយកងយោធពលខេមរភូមិន្ទនៃរាជាណាចក្រកម្ពុជាឡើងវិញ ក្នុងពេលគណៈប្រតិភូសហក្រសួងកិច្ចការបរទេស និងកិច្ចការពារជាតិ បំពេញទស្សនកិច្ចប៉ុន្មានថ្ងៃមុននេះ។
ក្រៅពីជួបពិភាក្សាជាមួយនាយករដ្ឋមន្ត្រី ហ៊ុន ម៉ាណែត រដ្ឋមន្ត្រីក្រសួងការពារជាតិ លោក ទៀ សីហា នៅថ្ងៃទី២៦ ខែកុម្ភៈ លោក Jedidiah ឬ Jed Royal ភូឈួយជំនួយការរដ្ឋមន្ត្រីក្រសួងការពារជាតិសហរដ្ឋអាមេរិក បានជួបពិភាក្សាដោយឡែកជាមួយអគ្គមេបញ្ជាការកងទ័ពជាតិ ឧត្តមសេនីយ៍ វង្ស ពិសេន ដោយបានសម្ដែងអំពីបំណងរឹតចំណងសហប្រតិបត្តិការដូចមុនឡើងវិញជាមួយប្រទេសកម្ពុជា។
ក្នុងកិច្ចពិភាក្សានោះ មន្ត្រីអាមេរិកាំងបាននិយាយអំពីការចូលរួមធ្វើសហប្រតិបត្តិការរួមគ្នាក្នុងការប្រឈមនឹងបញ្ហាសន្តិសុខក្នុងភូមិភាគអាស៊ី ហើយនិងសារសំខាន់នៃការធានាការពារអធិបតេយ្យជាតិនៃប្រទេសកម្ពុជា។
លោក Jed Royal រំឭកថា ប្រទេសទាំងពីរនៅមានបញ្ហាប្រឈមមុខមួយចំនួនក្នុងទំនាក់ទំនងយោធា ប៉ុន្តែបានអះអាងជាថ្មីអំពីចេតនាធ្វើឲ្យចំណងមិត្តភាពរស់ឡើងវិញ ដើម្បីគោលដៅ និងប្រយោជន៍រួម ហើយក៏ឆ្លៀតដោះស្រាយបញ្ហាមួយចំនួនដែលកំពុងតែមានចំពោះមុខ។ ក្នុងន័យនេះ សហរដ្ឋអាមេរិកចង់ផ្តើមឲ្យមានកិច្ចសហប្រតិបត្តិការខាងវិស័យយោធាជាមួយគ្នាឡើងវិញ ហើយក៏នឹងផ្តល់ជំនួយខាងដោះមីន និងមនុស្សធម៌ ព្រមទាំងទទួលយកសិក្ខាកាមយោធាទៅរៀននៅឯមជ្ឈមណ្ឌលសិក្សាអាស៊ី-ប៉ាស៊ីហ្វិក ផ្នែកសន្តិសុខ Daniel Inouye នៅរដ្ឋហាវ៉ៃ។
គួររំឭកថា ប្រមាណជិតមួយទសវត្សមុន អង្គការឃ្លាំមើលសិទ្ធិមនុស្ស Human Rights Watch រាយការណ៍ថា ការបង្វឹកបង្វឺនបង្ហាត់បង្រៀនសមាជិកនៃកងកម្លាំងប្រដាប់អាវុធនៃប្រទេសកម្ពុជាពីសំណាក់កងទ័ពសហរដ្ឋអាមេរិក ហាក់បីដូចជាបង្រៀនឲ្យទៅរំលោភសិទ្ធិមនុស្ស ពីព្រោះអ្នកដឹកនាំរាជរដ្ឋាភិបាលបានប្រើកងកម្លាំងសន្តិសុខប្រដាប់អាវុធទៅបង្ក្រាបប្រជាពលរដ្ឋស៊ីវិលដែលធ្វើបាតុកម្មអហិង្សា។
អង្គការសិទ្ធិមនុស្សនិយាយថា ក្រសួងការពារជាតិសហរដ្ឋអាមេរិក អាចនឹងបំពានច្បាប់ និងគោលនយោបាយអាមេរិកាំង ដែលសភាជាតិបានកំណត់ក្នុងច្បាប់ចំណាយថវិកាប្រចាំឆ្នាំសម្រាប់រដ្ឋាភិបាល។ ពេលរឿងហ្នឹងបែកធ្លាយ គេបញ្ឈប់កម្មវិធីហ្វឹកហ្វឺនរួមគ្នាម្តងទៅហើយ៕