38 C
Phnom Penh

អ្នក​នាំពាក្យ​អះអាង​ថា​សមយុទ្ធ​នាគ​មាស​រវាង​កម្ពុជា និង​ចិន មិន​គំរាមកំហែង​ប្រទេស​ណា​ឡើយ

ដោយ ឌឹ ខេមបូឌា ដេលី

បទវិភាគ

អ្នក​នាំពាក្យ​នៃ​អគ្គបញ្ជាការដ្ឋាន​នៃ​កងយោធពល​ខេមរភូមិន្ទ លោក ថោង សូលីម៉ូ អះអាង​ថា សមយុទ្ធ​នាគ​មាស​រវាង​កម្ពុជា និង​ចិន មិន​គំរាមកំហែង​ប្រទេស​ណា​ឡើយ ខណៈ​សមយុទ្ធ​នាគ​មាស​រួម​គ្នា នឹង​ចាប់ផ្តើម​ពី​ថ្ងៃទី​១៦ ដល់​ថ្ងៃទី​៣០ ខែ​ឧសភា នេះ នៅ​ភ្នំ​ជុំសែនរីករាយ ខេត្ត​កំពង់ឆ្នាំង និង​ខេត្ត​ព្រះសីហនុ។

បើ​តាម​អ្នក​នាំពាក្យ​នៃ​អគ្គបញ្ជាការដ្ឋាន​នៃ​កងយោធពល​ខេមរភូមិន្ទ​រូប​នេះ​ឲ្យ​ដឹង​ទៀត​ថា សមយុទ្ធ​នាគ​មាស នឹង​ធ្វើ​ឡើង​នៅ​ភ្នំ​ជុំសែនរីករាយ ខេត្ត​កំពង់ឆ្នាំង និង​ខេត្ត​ព្រះសីហនុ ក្រោម​ប្រធានបទ «ប្រតិបត្តិការ​ប្រឆាំង​អំពើ​ភេរវកម្ម​រួម និង​សង្គ្រោះ​មនុស្សធម៌»

លោក ថោង សូលីម៉ូ ថ្លែង​នៅ​ក្នុង​សន្និសីទ​កាសែត​ស្ដីពី​សមយុទ្ធ​នាគ​មាស កាលពី​ថ្ងៃទី​១៣ ខែ​ឧសភា ថា ការ​ធ្វើ​សមយុទ្ធ​នេះ គឺ​ផ្ដោត​ជា​សំខាន់​ទៅ​លើ​ប្រធានបទ​ការ​ប្រឆាំង​អំពើ​ភេរវកម្ម និង​កិច្ចការ​មនុស្សធម៌ ដើម្បី​ដក​បទពិសោធន៍​ពី​គ្នា​ទៅវិញ​ទៅមក​រវាង​កងទ័ព​នៃ​ប្រទេស​ទាំង​ពីរ ហើយ​ការ​ធ្វើ​សមយុទ្ធ​នេះ មិន​មាន​បំណង​គំរាមកំហែង​ធ្វើ​ឱ្យ​ប៉ះពាល់​ដល់​ប្រទេស​ណា​មួយ​ឡើយ។

ប្រភព​ដដែល​បាន​អះអាង​ថា សមយុទ្ធ​លើក​ទី​៦ នេះ ជា​លក្ខណៈ​ទ្រង់ទ្រាយ​ធំ បើ​គិត​ចាប់​តាំងពី​ឆ្នាំ​២០១៦ មក ខណៈ​ប្រទេស​ទាំង​ពីរ​គឺជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ហើយ​កំពុង​កសាង​សហគមន៍​វាសនា​តែ​មួយ​ថែម​ទៀត​ផង។

លោក ថោង សូលីម៉ូ ថ្លែង​ថា ចំពោះ​កងកម្លាំង​ដែល​នឹង​ចូលរួម​ក្នុង​សមយុទ្ធ​នេះ​មាន​ចំនួន ២០៧៥​នាក់ ក្នុង​នោះ​កងយោធពល​ខេមរភូមិន្ទ​កម្ពុជា​មាន​ចំនួន ១៣១៥​នាក់ និង​កងទ័ព​រំដោះ​ប្រជាជន​ចិន មាន​ចំនួន ៧៦០​នាក់។

សមយុទ្ធ​លើ​គោក​មាន​រថពាសដែក និង​រថយន្ត​គ្រប់​ប្រភេទ​ទាំងអស់​ចំនួន ៦៩​គ្រឿង រួម​ទាំង​បរិក្ខារ​ស៊ើប​ការណ៍ បរិក្ខារ​បោស​សម្អាត​ជាតិ​ផ្ទុះ និង​បរិក្ខារ​បញ្ជូន​សារធាតុ​គីមី​ជាច្រើន​ឈុត​ទៀត។

ចំណែក​សមយុទ្ធ​លើ​ទឹក​មាន​នាវាចម្បាំង​ចំនួន ១៤​គ្រឿង ឧទ្ធម្ភាគចក្រ​ចំនួន ២​គ្រឿង និង​សម្ភារៈ​យោធា​ជាច្រើន​ទៀត។

លោក ថោង សូលីម៉ូ អំពាវនាវ​ដល់​សាធារណជន​ទាំងអស់ កុំ​មាន​ការ​ព្រួយបារម្ភ ប្រសិន​ឃើញ​មាន​ការ​ចល័ត ឬ​ផ្លាស់​ទី​របស់​កងទ័ព​នា​អំឡុង​ពេល​សមយុទ្ធ​នេះ​កើត​ឡើង។

អ្នកវិភាគ និង​ជា​សាស្ត្រាចារ្យ​ផ្នែក​វិទ្យាសាស្ត្រ​នយោបាយ លោក ឯម សុវណ្ណារ៉ា ធ្លាប់​បាន​ប្រាប់​សារព័ត៌មាន​ក្នុង​ស្រុក​ថា ការ​ធ្វើ​សមយុទ្ធ​នេះ​ជា​ការ​ល្អ​ក្នុង​ការ​ពង្រឹង​សមត្ថភាព​កងទ័ព​កម្ពុជា​តាមរយៈ​សមយុទ្ធ​នានា និង​ថា​វា​រឹតតែ​ប្រសើរ​ជាង​នេះ​ទៅ​ទៀត ប្រសិនបើ​កម្ពុជា​នៅ​មាន​សមយុទ្ធ​ឆ្មាំ​អង្គរ​ជាមួយ​សហរដ្ឋ​អាមេរិក និង​សមយុទ្ធ​គោព្រៃ​ជាមួយ​យោធា​អូស្ត្រាលី អាច​នឹង​ជួយ​ទាញ​ទំនាក់ទំនង​វិស័យ​ការទូត និង​យោធា​កម្ពុជា​ឲ្យ​នៅ​ជា​អព្យាក្រឹត។

សមយុទ្ធ​នាគ​មាស​រវាង​កម្ពុជា-ចិន គឺ​បាន​ធ្វើឡើង​តាំងពី​ឆ្នាំ​២០១៦ រហូត​មក​ដល់​ពេលនេះ​គឺ​បាន​ចំនួន ៤​លើក​រួច​មក​ហើយ គឺ​នៅ​ក្នុង​ឆ្នាំ​២០១៦ ឆ្នាំ​២០១៨ ឆ្នាំ​២០១៩ និង​ឆ្នាំ​២០២០។ ភាគី​ទាំង​ពីរ​បាន​ផ្អាក​ចំនួន​បី​ដង គឺ​នៅ​ឆ្នាំ​២០១៧ ដោយ​ជាប់​រវល់​ក្នុង​យុទ្ធនាការ​បង្ក្រាប​គ្រឿងញៀន និង​ការ​បោះឆ្នោត​ក្រុមប្រឹក្សា​ឃុំ-សង្កាត់។ ឆ្នាំ​២០២១ និង​ឆ្នាំ​២០២២ ដោយសារតែ​ប្រទេស​ទាំង​ពីរ​ប្រឈម​នឹង​ការ​ឆ្លង​រីក​រាលដាល​ជំងឺ​កូវីដ-១៩៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស