ពលរដ្ឋរងគ្រោះ ៤នាក់ដែលបានស្លាប់បាត់បង់ជីវិតអំឡុងពេលប្រជ្រៀតគ្នាដណ្តើមអាំងប៉ាវនៅភូមិគ្រឹះអ្នកឧកញ៉ា សុខ គង់ ទទួលបានប្រាក់ឧបត្ថម្ភពីអភិបាលក្រុងភ្នំពេញ លោក ឃួង ស្រេង និងអ្នកឧកញ៉ា សុខ គង់ សរុបក្នុងម្នាក់ៗ ១៥លានរៀល និងក្ដារមឈូសម្នាក់១ ចំណែកអ្នករងរបួសចំនួន ៥នាក់ផ្សេងទៀត ក្នុងម្នាក់ៗទទួលបានថវិកាសរុប ៤លានរៀល។
កាលពីថ្ងៃទី២៣ ខែមករា ឆ្នាំ២០២៥ នេះ ពលរដ្ឋជាច្រើននាក់បានប្រមូលផ្ដុំគ្នានៅភូមិគ្រឹះអ្នកឧកញ៉ា សុខ គង់ ស្ថិតនៅតាមបណ្ដោយមហាវិថីព្រះនរោត្តម សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ដើម្បីទទួលយកអាំងប៉ាវពីអ្នកឧកញ៉ា សុខ គង់ សម្រាប់ឱកាសបុណ្យចូលឆ្នាំចិន នៅចុងសប្តាហ៍នេះ ប៉ុន្តែជាអកុសល ស្រាប់តែកើតមានហេតុការណ៍ខ្យល់គដួលសន្លប់ជាបន្តបន្ទាប់បណ្ដាលឲ្យមនុស្ស ៤នាក់ស្លាប់ ពេលបញ្ជូនដល់មន្ទីរពេទ្យ និង ៥នាក់ផ្សេងទៀតត្រូវបញ្ជូនទៅក្នុងបន្ទប់សង្គ្រោះបន្ទាន់។
អំឡុងពេលកើតហេតុ រដ្ឋបាលរាជធានីភ្នំពេញបានដឹកនាំកម្លាំងសមត្ថកិច្ច និងរថយន្តសង្គ្រោះបន្ទាន់ជួយអន្តរាគមន៍ដឹកពលរដ្ឋទាំងនោះទៅសង្គ្រោះបន្ទាន់នៅមន្ទីរពេទ្យភ្លាមៗផងដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ សរសេរលើគណនីហ្វេសប៊ុករបស់លោកនៅថ្ងៃទី២៣ មករា នេះថា ហេតុការណ៍នេះមិនត្រឹមតែបង្ហាញពីការបាត់បង់ជីវិតមនុស្សទេ ប៉ុន្តែថែមទាំងឆ្លុះបញ្ចាំងពីមុខមាត់នៃបញ្ហាសង្គមដ៏ធំមួយអំពីការរស់នៅប្រចាំថ្ងៃរបស់ពលរដ្ឋខ្មែរ ដែលពោរពេញទៅដោយភាពខ្វះខាតថែមទៀត។
លោក សេក សុជាតិ អះអាងថា ការបាត់បង់ជីវិតបែបនេះ គឺជាសញ្ញាដ៏ច្បាស់លាស់មួយដែលបញ្ជាក់ពីការខ្វះខាតប្រព័ន្ធគ្រប់គ្រង សុវត្ថិភាពសង្គម និងការរៀបចំដើម្បីទប់ស្កាត់ហេតុការណ៍បែបនេះ ហើយវប្បធម៌ចែកអាំងប៉ាវក្នុងរដូវចូលឆ្នាំបែបនេះ ក៏មិនគួរឱ្យកើតមានបន្តទៀតនោះដែរ។
លោកចោទជាសំណួរថា តើបញ្ហានេះកើតឡើងដោយសារតែគ្មានការផ្ដល់ការថែរក្សាគ្រប់គ្រាន់ ឬមិនគោរពសិទ្ធិមនុស្ស និងសេចក្ដីសុខសាន្តរបស់បងប្អូនខ្មែរ ឬយ៉ាងណា? តើនរណាជាអ្នកត្រូវទទួលខុសត្រូវចំពោះការស្លាប់របស់បងប្អូនខ្មែរក្នុងហេតុការណ៍នេះ? ចំណែកអ្នករងរបួសដែលកំពុងព្យាបាលនៅមន្ទីរពេទ្យ តើមានលទ្ធភាពគ្រប់គ្រាន់សម្រាប់ថែទាំខ្លួនឯងដែរឬទេនៅក្នុងស្ថានភាពដែលពួកគេមិនទាន់មានលទ្ធភាពចិញ្ចឹមជីវិត និងសង្ឃឹមលើអាំងប៉ាវរបស់អ្នកមានទ្រព្យធននោះ?
ជុំវិញបញ្ហានេះ អាជ្ញាធរក្រុងភ្នំពេញ បញ្ជាក់ថា ជនរងគ្រោះដែលបានស្លាប់បាត់បង់ជីវិត គឺដោយសារបញ្ហាសុខភាពផ្ទាល់ខ្លួន ដូច្នេះមិនមានការទាមទារឱ្យបុគ្គលណាម្នាក់ទទួលខុសត្រូវក្នុងឧបទ្ទវហេតុនេះឡើយ។
សាច់ញាតិជនរងគ្រោះដែលបានស្លាប់ លើកឡើងថា ស្ថានភាពគ្រួសាររបស់ពួកគេសព្វថ្ងៃនេះមានការខ្វះខាតយ៉ាងខ្លាំង ហើយការប្រជ្រៀតគ្នាទៅទទួលអាំងប៉ាវនេះ ក៏ដើម្បីដោះទាល់ជីវភាពប្រចាំថ្ងៃដែរ។
យ៉ាងណាក៏ដោយ កាលពីចុងខែវិច្ឆិកា ឆ្នាំ២០២៤ អតីតនាយករដ្ឋមន្ត្រីកម្ពុជា លោក ហ៊ុន សែន លើកឡើងថា កម្ពុជានឹងចាកចេញពីប្រទេសក្រីក្រនៅត្រឹមឆ្នាំ២០២៩ និងក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ ដើម្បីឈានទៅសម្រេចឱ្យបានជាប្រទេសដែលមានប្រាក់ចំណូលខ្ពស់នៅឆ្នាំ២០៥០។
អ្នកវិភាគនយោបាយ លោក គឹម សុខ អះអាងថា មិនមែនព្រោះតែអាំងប៉ាវ ទើបនាំឱ្យមានមនុស្សស្លាប់ទេ ប៉ុន្តែជនជាតិខ្មែរបានស្លាប់ដោយសារភ្នក់ភ្លើងនៃភាពក្រីក្រដែលនាំឱ្យឆេះខ្ទេចទាំងសេចក្ដីថ្លៃថ្នូរ និងអនាគតជនជាតិមួយនេះអស់ទៅហើយ៕
© 2025, ឌឹ ខេមបូឌា ដេលី. All rights reserved.