សមាជិកគណបក្សភ្លើងទៀន ចំនួន ៣រូបដែលរងការចោទប្រកាន់ជាប់ពាក់ព័ន្ធនឹងការក្លែងបន្លំស្នាមមេដៃស្នើបង្កើតគណបក្សបេះដូងជាតិ ត្រូវបានដោះលែងឲ្យមានសេរីភាពឡើងវិញនៅម៉ោង ២រំលងអាធ្រាត្រថ្ងៃចន្ទ ទី២៤ មីនា ក្រោយពីបានអនុវត្តទោសក្នុងពន្ធនាគារចំនួន ២ឆ្នាំ ដោយពួកគេបានស្នើសុំសម្រាកពីនយោបាយមួយរយៈ។
អ្នកនាំពាក្យសម្ព័ន្ធឆ្ពោះទៅអនាគត លោក គីមសួរ ភីរិទ្ធិ បានប្រាប់ក្រុមអ្នកសារព័ត៌មាននៅថ្ងៃទី២៤ មីនា នេះថា សមាជិកគណបក្សភ្លើងទៀន ចំនួន ៣រូប ដែលត្រូវបានដោះលែងឲ្យមានសេរីភាពវិញនោះរួមមាន លោក ខឿន វីរ៉ាត់ ប្រធានចលនាយុវជនគណបក្សភ្លើងទៀនប្រចាំរាជធានីភ្នំពេញ អ្នកស្រី នូ សិទ្ធារី និងលោក តូច ថឹង ប្រធានប្រតិបត្តិគណបក្សភ្លើងទៀនប្រចាំខេត្តកំពង់ចាម។ ពួកគេទាំងបីនាក់ត្រូវបានដោះលែងនៅម៉ោង ២រំលងអាធ្រាត្រថ្ងៃចន្ទ ទី២៤ មីនា។
លោក គីមសួរ ភីរិទ្ធ បានឲ្យដឹងថា មន្ត្រីសម្ព័ន្ធឆ្ពោះទៅអនាគតបានទៅសួរសុខទុក្ខពួកគេដើម្បីដឹងឮពីបញ្ហាសុខភាព និងគោលជំហរនយោបាយទៅមុខជាបន្តទៀត ប៉ុន្តែអ្នកទាំង ៣នាក់នៅមិនទាន់មានទឹកចិត្តប្រឡូកក្នុងសកម្មភាពនយោបាយឡើងវិញភ្លាមៗទេ ដោយស្នើសុំសម្រាកដកខ្លួនពីនយោបាយមួយរយៈពេលសិន។
ប្រភពដដែលឲ្យដឹងថា ក្នុងនាមជាអ្នកនាំពាក្យសម្ព័ន្ធឆ្ពោះទៅអនាគត លោកចាត់ទុករឿងនេះជារឿងដ៏អយុត្តិធម៌ចំពោះសកម្មជនបក្សប្រឆាំង។
នៅថ្ងៃទី២៤ មីនា នេះ គណបក្សភ្លើងទៀន និងគណបក្សឆន្ទៈខ្មែរ ចេញសេចក្តីថ្លែងការណ៍រួមមួយដោយកោតសរសើរពីវីរភាពរបស់លោក ខឿន វីរ៉ាត់ លោក តូច ថឹង និងអ្នកស្រី នូ សិទ្ធារី ដែលហ៊ានលះបង់សេរីភាពអស់ ២ឆ្នាំដើម្បីបុព្វហេតុយុត្តិធម៌ សិទ្ធិសេរីភាព និងលទ្ធិប្រជាធិបតេយ្យ។
សេចក្តីថ្លែងការណ៍របស់គណបក្សទាំងពីរបានទទូចជាថ្មីឲ្យអាជ្ញាធរដោះលែងអ្នកទោសមនសិការផ្សេងទៀត ដើម្បីឲ្យពួកគេមានសេរីភាពជួបជុំគ្រួសារនៅក្នុងឱកាសបុណ្យចូលឆ្នាំប្រពៃណីខ្មែរខាងមុខ។
ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា បានឲ្យដឹងថា លោកស្វាគមន៍ចំពោះការដោះលែងពួកគេឲ្យមានសេរីភាពវិញ។ លោកថាចំណាត់ការលើអ្នកទាំងបីនាក់ឱ្យជាប់ពន្ធនាគារកន្លងទៅ គឺធ្វើឡើងមិនត្រឹមត្រូវតាមច្បាប់ស្ដីពីគណបក្សនយោបាយនោះទេ។
លោក ខឿន វីរ៉ាត់ លោក តូច ថឹង និងអ្នកស្រី នូ សិទ្ធារី ត្រូវបានសមត្ថកិច្ចចាប់ខ្លួនអំឡុងឆ្នាំ២០២៣ ក្រោមបទចោទប្រកាន់ជាប់ពាក់ព័ន្ធនឹងការក្លែងបន្លំស្នាមមេដៃស្នើបង្កើតគណបក្សបេះដូងជាតិ ដែលមានលោក សៀម ភ្លុក ជាស្ថាបនិក និងចូលរួមប្រមូលស្នាមមេដៃប្រជាពលរដ្ឋឲ្យបានគ្រប់លក្ខខណ្ឌស្របតាមច្បាប់ដើម្បីឲ្យគណបក្សអាចចូលរួមបោះឆ្នោតកាលពីឆ្នាំ២០២៣៕
© 2025, ឌឹ ខេមបូឌា ដេលី. All rights reserved.