តំណាងរាស្ត្រគណបក្សសង្គ្រោះជាតិ លើកឡើងថា ការដែលពលរដ្ឋធ្វើយុទ្ធនាការចែកចាយក្រដាសប្រាក់រាប់លានសន្លឹកប្រឆាំងរបបដឹកនាំបច្ចុប្បន្ន គឺជាភស្តុតាងបង្ហាញឱ្យឃើញពីការរើបម្រះដើម្បីសេរីភាពពលរដ្ឋដែលត្រូវបានគាបសង្កត់ដោយរបបដឹកនាំត្រកូលហ៊ុន។
មន្ត្រីជាន់ខ្ពស់បក្សប្រឆាំង លោក អ៊ុំ សំអាន ប្រាប់សារព័ត៌មាន The Cambodia Daily នៅថ្ងៃទី២៩ មេសា នេះថា សម្រាប់រូបលោកផ្ទាល់ រួមទាំងបក្សប្រឆាំងផង មិនបានចូលរួម ឬផ្ដួចផ្ដើមឱ្យមានការចែកចាយក្រដាសប្រាក់នេះទេ ប៉ុន្តែក្រដាសប្រាក់ទាំងនេះត្រូវបានគេយកមកផ្សព្វផ្សាយលើបណ្ដាញទំនាក់ទំនងសង្គមដែលបង្ហាញពីការមិនពេញចិត្តរបស់ពលរដ្ឋដែលរងនូវភាពអយុត្តិធម៌ក្រោមការដឹកនាំរបស់គណបក្សប្រជាជនកម្ពុជារហូតមក។
លោក អ៊ុំ សំអាន លើកឡើងថា ការធ្វើបែបនេះក៏ជាការបញ្ចេញមតិដោយអហិង្សាមួយដែរ ចំពោះការដឹកនាំដែលបំបិទសិទ្ធិសេរីភាពបញ្ចេញមតិ និងការរំលោភសិទ្ធិពលរដ្ឋពេញប្រទេស។ លោកថា ជាបទពិសោធន៍ អ្នកដែលចេញមុខបញ្ចេញមតិរិះគន់ការដឹកនាំរបបនេះកន្លងមក ឃើញតែត្រូវបានចាប់ខ្លួនជាបន្តបន្ទាប់។
មន្ត្រីបក្សប្រឆាំងរូបនេះបញ្ជាក់ថា តាមរយៈនៃការចែកចាយក្រដាសប្រាក់ទាំងនេះ លោក ហ៊ុន សែន គួរតែដឹងដោយខ្លួនឯងហើយថា ទោះគាត់គំរាមចាប់ខ្លួនអ្នកហ៊ានចេញមុខបញ្ចេញមតិរិះគន់ក៏ដោយ ក៏គាត់មិនអាចបង្ក្រាបពលរដ្ឋដែលរងការឈឺចាប់ក្រោមរបបដឹកនាំរបស់គាត់បានដែរ ដូចពាក្យខ្មែរថា «មានការគាបសង្កត់នៅទីណា ការរើបម្រះក៏កើតមាននៅទីនោះដែរ»។
អ្នកលេងបណ្ដាញសង្គមហ្វេសប៊ុកបាននាំគ្នាចែកចាយនូវក្រដាសប្រាក់រៀលជាច្រើនប្រភេទ និងជាច្រើនសន្លឹក ដូចជា ក្រដាសប្រាក់ ១ពាន់រៀល ៥ពាន់រៀល និងក្រដាសប្រាក់ ៥០០រៀល ជាដើម ដែលមានសរសេរអក្សរផ្សេងៗថា «យុទ្ធនាការចែកចាយក្រដាសប្រាក់រៀលដើម្បីប្រឆាំងការកាន់អំណាចផ្ដាច់ការតពូជត្រកូលហ៊ុន»។
ក្រដាសប្រាក់ខ្លះទៀតសរសេរថា «អំណាចហ៊ុនតត្រកូល ខ្មែរថ្ងូរតជំនាន់»។ យុទ្ធនាការនេះនឹងធ្វើឡើងគ្រប់ ២៥រាជធានី-ខេត្ត ហើយសូមឲ្យពលរដ្ឋខ្មែរចូលរួមយុទ្ធនាការនេះឱ្យបានច្រើនកុះករ ដើម្បីទាមទារឱ្យមានការដោះលែងអ្នកទោសនយោបាយ ស្ដារប្រជាធិបតេយ្យ គោរពសិទ្ធិមនុស្ស និងទាមទារឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌នៅក្នុងប្រទេសកម្ពុជាឡើងវិញ។
អ្នកឃ្លាំមើលសង្គមខ្លះរង់ចាំមើលថា តើរដ្ឋអំណាចសព្វថ្ងៃនឹងចោទប្រកាន់អ្នកចែកចាយក្រដាសប្រាក់រៀលថាជាក្រុមឧទ្ទាមបដិវត្តន៍ពណ៌ដែរឬក៏អត់។
អង្គការ Freedom House បញ្ជាក់ថា ឆ្នាំ២០២៤ នេះ ប្រទេសកម្ពុជាជាប់ចំណាត់ថ្នាក់លេខរៀងទី៨ ក្នុងចំណោមប្រទេសទាំង១១ ក្នុងតំបន់អាស៊ាន ជាប្រទេសល្បីល្បាញខាងគាបសង្កត់សេរីភាពនយោបាយ សេរីភាពបញ្ចេញមតិ សិទ្ធិមូលដ្ឋានរបស់ប្រជាពលរដ្ឋ និងបំបិទប្រព័ន្ធផ្សព្វផ្សាយឯករាជ្យ៕
© 2025, ឌឹ ខេមបូឌា ដេលី. All rights reserved.