គ្រោះរញ្ជួយដីក្នុងកម្លាំង ៧,៧រ៉ិចទ័រ បានកើតឡើងនៅម៉ោង ១២ និង ៥០នាទីម៉ោងក្នុងប្រទេសភូមា នៅថ្ងៃសុក្រ ទី២៨ មីនា ដោយចំណុចរញ្ជួយស្ថិតនៅតំបន់ Mandalay ភាគកណ្តាលប្រទេសភូមា ដែលនៅពេលដំណាលគ្នា រដ្ឋធានីបាងកក ប្រទេសថៃ ក៏រងការរញ្ជួយយ៉ាងខ្លាំងដែរ។
រដ្ឋាភិបាលយោធាភូមា បានប្រកាសស្ថានភាពអាសន្ននៅតំបន់ចំនួន៦ និងបានអំពាវនាវរកការផ្តល់ជំនួយមនុស្សធម៌ពីអន្តរជាតិ បន្ទាប់ពីគ្រោះរញ្ជួយដីដ៏ធំសម្បើមមួយបានវាយប្រហារប្រទេសអាស៊ានមួយនេះ ហើយជះឥទ្ធិពលញ័ររញ្ជួយដល់បណ្តាប្រទេសក្បែរខាងថែមទៀត។
នេះបើតាមការចេញផ្សាយដោយទីភ្នាក់ងារព័ត៌មាន AP នាថ្ងៃសុក្រ ទី២៨ ខែមីនា។
ឧត្ដមសេនីយ៍ មីន អ៊ុងឡាំង (Min Aung Hlaing) មេដឹកនាំរបបសឹកភូមា បានធ្វើដំណើរចុះទៅដល់មន្ទីរពេទ្យមួយកន្លែងនៅរដ្ឋធានីណៃពិដោរ ជាទីដែលអ្នករងរបួសទាំងឡាយកំពុងទទួលការសង្គ្រោះព្យាបាល ក្រោយគ្រោះរញ្ជួយដីបានវាយប្រហារតំបន់ Mandalay។
តាមទីភ្នាក់ងារជំនាញខាងគ្រោះរញ្ជួយដីសហរដ្ឋអាមេរិក USGS ការរញ្ជួយដីមួយកម្រិត ៧,៧ លើជញ្ជីងក្រិតរ៉ិចទ័រ បានវាយប្រហារនៅចម្ងាយប្រហែល ១៧គីឡូម៉ែត្រពីទីក្រុង Mandalay ជាទីដែលមានមនុស្សរស់នៅ ១លាន ២សែននាក់ ក្នុងជម្រៅ ១០គីឡូម៉ែត្រក្រោមផ្ទៃដី ហើយប៉ុន្មាននាទីក្រោយមក ក៏មានរញ្ជួយដីមួយទៀតកម្រិត ៦,៤រ៉ិចទ័រ កើតឡើងចំតំបន់ដដែលនេះ។
បើតាមរដ្ឋាភិបាលភូមា មនុស្ស ២០នាក់បានស្លាប់ ប៉ុន្តែទំហំនៃការបំផ្លិចបំផ្លាញអគារលំនៅឋានមិនទាន់មានការវាយតម្លៃនៅឡើយ។
បើតាមប្រព័ន្ធផ្សព្វផ្សាយនៅលើបណ្ដាញទំនាក់ទំនងសង្គម គ្រោះរញ្ជួយដីនៅភូមា បានធ្វើឱ្យអគារជាច្រើនដួលរលំ ហើយបង្កការខូចខាតចំពោះហេដ្ឋារចនាសម្ព័ន្ធផ្សេងៗ រួមមានទាំងស្ពាន និងផ្លូវថ្នល់។
ទីភ្នាក់ងារព័ត៌មាន AP បានចុះផ្សាយថា គ្រោះរញ្ជួយដីបានបំផ្លាញអគារផ្ទះសម្បែងជាច្រើនកន្លែង ចំណែកមន្ទីរពេទ្យដែលមានអ្នកជំងឺ ១ពាន់នាក់នៅរដ្ឋធានីណៃពិដោរ ដែលខូចខាតដោយសារគ្រោះរញ្ជួយដីលើកនេះ ក៏កំពុងកកកុញដោយអ្នករបួសសុំការព្យាបាលបន្ទាន់។
យោងតាមភ្នាក់ងារជំនាញគ្រោះមហន្តរាយសហរដ្ឋអាមេរិក គ្រោះរញ្ជួយដីក្នុងកម្រិត ៧,៧រ៉ិចទែរកើតឡើងនៅក្នុងប្រទេសភូមា ប៉ុន្តែដោយសារចំណុចរញ្ជួយស្ថិតនៅក្នុងជម្រៅតែ ១០គីឡូម៉ែត្រ បានរុញឲ្យកម្លាំងរញ្ជួយកាន់តែខ្លាំង និងឆ្ងាយ រហូតទៅដល់ទីក្រុងបាងកក ប្រទេសថៃ និងខេត្តយូណាន ប្រទេសចិន។ អាជ្ញាធរចិន ទទួលបន្ទុកគ្រោះរញ្ជួយដីបានឱ្យដឹងថា កម្រិតរញ្ជួយ ៧,៩រ៉ិចទែរនៅខេត្តយូណាន ជាប់ព្រំដែនជាមួយភូមា។
បើតាមរដ្ឋាភិបាលថៃ គ្រោះរញ្ជួយដីនៅក្រុងបាងកក បណ្ដាលឱ្យមនុស្សជ្រួលច្របល់រត់ចេញពីអគារនៅតាមខេត្តមួយចំនួនពីភាគខាងជើងទៅត្បូងប្រទេស រហូតដល់ទីក្រុងបាងកក ជាទីដែលកម្លាំងរញ្ជួយដីបានទៅអង្រួនអគារខ្ពស់ៗ ចំណែកអគារកម្ពស់ ៣០ជាន់ក្នុងការដ្ឋានសំណង់មួយកន្លែងក្នុងក្រុងបាងកក បានបាក់រលំដួលដល់ដី។
បើតាមក្រុមជួយសង្គ្រោះបន្ទាន់នៃប្រទេសថៃ ការបាក់រលំអគារដោយសារទទួលរងពីការរញ្ជួយដីនៅភូមា បានសម្លាប់មនុស្សយ៉ាងតិច ៣នាក់ និងបាត់ខ្លួន ៤៣នាក់ ដែលភាគច្រើនជាកម្មករសំណង់នៅក្នុងការដ្ឋានដែលរងការវាយប្រហារដោយការរញ្ជួយដី។
នាយករដ្ឋមន្ត្រីថៃ អ្នកស្រី Paetongtarn Shinawatra បានប្រកាសស្ថានភាពអាសន្ន និងលុបចោលទស្សនកិច្ចរបស់អ្នកស្រីនៅកោះភូកេត ដើម្បីបើកកិច្ចប្រជុំជាបន្ទាន់។ រដ្ឋាភិបាលថៃ បានឱ្យដឹងថា កម្មករយ៉ាងហោច ៣នាក់បានបាត់បង់ជីវិតនៅពេលអគារខ្ពស់មួយខ្នងកម្ពស់ ៣០ជាន់ ដែលកំពុងស្ថិតក្រោមដំណើរការសាងសង់ បានដួលរលំដោយសារគ្រោះរញ្ជួយដីកម្រិតដ៏ធ្ងន់នេះ។
ឧបនាយករដ្ឋមន្ត្រីថៃ លោក Phumtham Wechayachai បាននិយាយថា មានកម្មករសរុប ៨១នាក់បានជាប់ខ្លួននៅក្រោមគំនរបាក់បែក ក្រោយការបាក់ស្រុតអគារកម្ពស់ ៣០ជាន់នេះ ដែលកើតឡើងនៅភាគខាងជើងទីក្រុងបាងកក ដោយសារកម្លាំងរំញ័រពីគ្រោះរញ្ជួយដីកម្រិតរហូតដល់ ៧,៧រ៉ិចទ័រពីប្រទេសភូមា។
ជាមួយគ្នានេះ អភិបាលក្រុងបាងកក លោក Chadchart Sittipunt ត្រូវបានបង្គាប់ឱ្យទទួលបន្ទុកដឹកនាំសម្របសម្រួលកិច្ចប្រឹងប្រែងឆ្លើយតបគ្រោះមហន្តរាយ។
បើតាមលោក Chadchart គ្រោះរញ្ជួយដីបានបង្កឱ្យអគារខ្ពស់ៗជាច្រើននៅក្រុងបាងកក ខូចខាតជាខ្លាំង។ ស្របពេលនេះដែរ ក្រសួងដឹកជញ្ជូនថៃ បានសម្រេចឱ្យផ្អាកសេវាដឹកជញ្ជូនសាធារណៈតាមរថយន្តក្រុង និងរថភ្លើង៕
© 2025, ឌឹ ខេមបូឌា ដេលី. All rights reserved.