រដ្ឋបាលខេត្តកំពង់ស្ពឺ បដិសេធចំពោះព័ត៌មានដែលថា អាជ្ញាធរបានកាត់ឆ្វៀលដីនៅក្នុងដែនជម្រកសត្វព្រៃភ្នំឱរ៉ាល់ ធ្វើជាកម្មសិទ្ធិផ្ទាល់ខ្លួន ដោយរដ្ឋបាលខេត្តនេះចាត់ទុកការផ្សាយព័ត៌មាននេះមានចេតនាញុះញង់ធ្វើឱ្យសាធារណជនយល់ច្រឡំលើមន្ត្រីជំនាញពាក់ព័ន្ធ។
រដ្ឋបាលខេត្តកំពង់ស្ពឺ កាលពីថ្ងៃទី៩ ខែកក្កដា បានចេញលិខិតបំភ្លឺដោយបដិសេធព័ត៌មាននេះថាជាព័ត៌មានគ្មានមូលដ្ឋានត្រឹមត្រូវច្បាស់លាស់ សរសេរឡើងក្នុងចេតនាបង្កាច់បង្ខូច និងញុះញង់ធ្វើឱ្យសាធារណជនយល់ច្រឡំ និងប៉ះពាល់ដល់កិត្តិយសថ្នាក់ដឹកនាំខេត្ត មន្ទីរជំនាញ និងអាជ្ញាធរពាក់ព័ន្ធ។
នៅក្នុងលិខិតបំភ្លឺដដែលបានអះអាងថា អាជ្ញាធរខេត្តកំពង់ស្ពឺ បានយកចិត្តទុកដាក់ក្នុងការអភិរក្សតំបន់សហគមន៍នៃដែនជម្រកសត្វព្រៃភ្នំឱរ៉ាល់ ក្នុងស្រុកឱរ៉ាល់ តាមរយៈការផ្សព្វផ្សាយច្បាប់ភូមិបាល និងលិខិតបទដ្ឋានគតិយុត្តិជាធរមាន ស្របតាមក្រមបរិស្ថាន និងធនធានធម្មជាតិដល់ប្រជាពលរដ្ឋ ព្រមទាំងបានដោះស្រាយវិវាទដីធ្លី និងការចុះបញ្ជីដីធ្លីមានលក្ខណៈជាប្រព័ន្ធ ដើម្បីបានផ្ដល់លទ្ធភាពចេញបណ្ណកម្មសិទ្ធិជូនពលរដ្ឋដែលបានកាន់កាប់ និងអាស្រ័យផលជាក់ស្ដែង ឱ្យទទួលបានដីសម្រាប់បង្កបង្កើនផល លើកកម្ពស់កម្រិតជីវភាពផងដែរ។
ការបំភ្លឺពីរដ្ឋបាលខេត្តកំពង់ស្ពឺ បញ្ជាក់បន្ថែមថា រដ្ឋបាលខេត្តនឹងបន្តចាត់វិធានការចំពោះបុគ្គលទាំងឡាយណាដែលរុករានទន្ទ្រានដីសាធារណៈរបស់រដ្ឋ។ រដ្ឋបាលខេត្តកំពង់ស្ពឺ ស្នើឱ្យអ្នកប្រើប្រាស់បណ្ដាញសង្គម ផ្សព្វផ្សាយព័ត៌មានដែលពិត ជៀសវាងមានការយល់ច្រឡំពីសាធារណជន និងបានស្នើឱ្យអ្នកបង្ហោះព័ត៌មានបំភ្លៃនោះ កែតម្រូវខ្លឹមសារឡើងវិញ។
កាលពីថ្ងៃទី៩ ខែកក្កដា ប្រធានគម្រោងបៃតងវ៉រៀសន៍ លោក តាន់ គីមសួរ បានសរសេរនៅលើហ្វេសប៊ុករបស់លោក ដើម្បីស្នើសុំការអន្តរាគមន៍ពីលោកនាយករដ្ឋមន្ត្រី ហ៊ុន ម៉ាណែត ជាពិសេសនេះមិនមែនជាករណីកាត់ឆ្វៀលដីឲ្យប្រជាពលរដ្ឋនៅតំបន់ភ្នំឱរ៉ាល់ ខេត្តកំពង់ស្ពឺ នោះទេ នេះគឺជាការរៀបចំដើម្បីយកដីធ្វើជាកម្មសិទ្ធិរបស់អស់លោកធំ និងមានអំណាចមួយចំនួនដែលមានការគប់គិតជាប្រព័ន្ធតែម្ដង។ ករណីនេះ មិនខុសពីករណីភ្នំតាម៉ៅ នោះទេ គ្រាន់ទម្រង់នៃការរៀបចំផ្សេងគ្នាតែប៉ុណ្ណោះ។
ប្រភពដដែលបានសរសេរថា មេខ្យល់បានយកលុយទៅចែកឲ្យប្រជាពលរដ្ឋនៅតំបន់ឱរ៉ាល់ ខេត្តកំពង់ស្ពឺ ១គ្រួសារ ១លានរៀល ជាថ្នូរក្នុងការមិនប្រតិកម្មចំពោះការឈូសបំផ្លាញព្រៃឈើ មានប្រជាពលរដ្ឋដែលរស់នៅទីនោះជាច្រើនពាន់នាក់មិនសុខចិត្ត ហើយក៏មិនហ៊ានតវ៉ានោះដែរ៕
© 2025, ឌឹ ខេមបូឌា ដេលី. All rights reserved.