សហរដ្ឋអាមេរិកអះអាងថា រដ្ឋាភិបាលកម្ពុជា មិនត្រឹមតែមិនបានដោះស្រាយបញ្ហាជួញដូរមនុស្សទេ តែថែមទាំងជាប់ពាក់ព័ន្ធជាប្រព័ន្ធក្នុងការជួយជ្រោមជ្រែងឲ្យមានឧក្រិដ្ឋកម្មជួញដូរមនុស្សថែមទៀត។
ក្រសួងការបរទេសអាមេរិក បានដាក់ប្រទេសកម្ពុជាចូលក្នុងបញ្ជីខ្មៅដែលស្ថិតក្រោមការឃ្លាំមើលកម្រិត៣ (Tier 3 Watch List) នៃការជួញដូរមនុស្សសម្រាប់ឆ្នាំ២០២៥ នេះ ដោយរកឃើញថា រដ្ឋាភិបាលកម្ពុជា មិនត្រឹមតែមិនបានដោះស្រាយបញ្ហាជួញដូរមនុស្សទេ តែថែមទាំងជាប់ពាក់ព័ន្ធជាប្រព័ន្ធក្នុងការជួយជ្រោមជ្រែងឲ្យមានឧក្រិដ្ឋកម្មជួញដូរមនុស្សថែមទៀត។
ក្រសួងការបរទេសអាមេរិក ចេញរបាយការណ៍ស្ដីពីការជួញដូរមនុស្សនៅកម្ពុជា សម្រាប់ឆ្នាំ២០២៥ កាលពីថ្ងៃទី២៩ ខែកញ្ញា នេះថា មន្ត្រីជាន់ខ្ពស់រដ្ឋាភិបាលមួយចំនួនទទួលបានអត្ថប្រយោជន៍ផ្នែកហិរញ្ញវត្ថុពីឧក្រិដ្ឋកម្មទាំងនេះ។ លើសពីនេះ ក៏មានមន្ត្រីជាន់ខ្ពស់ក្នុងរដ្ឋាភិបាលខ្លះទៀតបានបំភិតបំភ័យជនរងគ្រោះ និងសាក្សីដែលធ្លាក់ខ្លួនក្នុងប្រតិបត្តិការឆបោកតាមអ៊ីនធឺណិត ក៏ដូចជាសង្គមស៊ីវិលផងដែរ ដែលធ្វើការក្នុងការបង្ក្រាបករណីជួញដូរមនុស្សនេះ។
ជាងនេះទៅទៀត ក៏មានការរារាំង និងបដិសេធមិនឲ្យមានការស៊ើបអង្កេតការជួញដូរមនុស្សនៅតាមមជ្ឈមណ្ឌលឆបោកតាមអនឡាញផងដែរ ដែលសកម្មភាពទាំងអស់នេះត្រូវបានអាមេរិក ចាត់ទុកថាជាការការពារប្រតិបត្តិការឆបោកតាមអនឡាញទាំងនោះ។
ជាក់ស្តែង រដ្ឋាភិបាលកម្ពុជា បានបរាជ័យក្នុងការកាត់ទោសសមាជិកព្រឹទ្ធសភា និងជាទីប្រឹក្សាជាន់ខ្ពស់របស់រដ្ឋាភិបាលមួយរូបដែលទទួលរងនូវទណ្ឌកម្មរបស់សហរដ្ឋអាមេរិក បើទោះបីជាមានភស្តុតាងជុំវិញប្រតិបត្តិការបោកប្រាស់តាមអ៊ីនធឺណិតតាមរយៈអង្គភាពសាជីវកម្មជាច្រើនដែលមន្ត្រីកម្ពុជា រូបនោះជាម្ចាស់ក៏ដោយ។
ក្រសួងការបរទេសអាមេរិក បញ្ជាក់ថា រដ្ឋាភិបាលកម្ពុជា មិនបានរាយការណ៍ជាក់លាក់អំពីការកាត់ទោសឧក្រិដ្ឋជនចាប់តាំងពីឆ្នាំ២០២២ មកម្ល៉េះ ដែលបង្ហាញយ៉ាងច្បាស់ថា កម្ពុជាមិនបានបំពេញតាមស្តង់ដាអប្បបរមាឱ្យបានពេញលេញសម្រាប់ការលុបបំបាត់ការជួញដូរមនុស្សនោះទេ។
នៅក្នុងពិធីជាតិស្ដីពីលទ្ធផលការងារប្រយុទ្ធប្រឆាំងអំពើជួញដូរមនុស្សឆ្នាំ២០២៤ និងទិសដៅការងារឆ្នាំ២០២៥ កាលពីថ្ងៃទី២៧ ខែមីនា ឆ្នាំ២០២៥ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានបង្ហាញរបាយការណ៍របស់ខ្លួនថា ក្នុងឆ្នាំ២០២៤ កន្លងទៅ អំពើជួញដូរមនុស្សមិនបានថយចុះទេ គឺកាន់តែកើនឡើងជាងមុនទៅវិញ។
ទោះជាបែបនេះក្តី គណៈកម្មការដដែលនេះអះអាងថា អាជ្ញាធរកម្ពុជាបានចាត់វិធានការបង្ក្រាបនៅតាមគោលដៅចំនួន ៧២ទីតាំង ក្នុងចំណោម ១៨រាជធានី-ខេត្ត និងបានឃាត់ខ្លួនជនសង្ស័យសរុបជាង ៣ពាន់នាក់ ដែលមាន ១៩សញ្ជាតិ កាលថ្ងៃទី២១ ខែសីហា ឆ្នាំ២០២៥ កន្លងទៅ។
នាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីថ្ងៃទី១២ ខែធ្នូ ឆ្នាំ២០២៤ បានទទួលស្គាល់ថា ប្រទេសកម្ពុជា កំពុងត្រូវបានប្រើប្រាស់ជាទីតាំងសម្រាប់ការប្រព្រឹត្តអំពើជួញដូរមនុស្សពីសំណាក់ឧក្រិដ្ឋជន ប៉ុន្តែរដ្ឋាភិបាលនៅតែប្រកាសជំហរប្រឆាំងដាច់ខាតរាល់ទម្រង់នៃឧក្រិដ្ឋកម្មឆ្លងដែនគ្រប់ប្រភេទ ជាពិសេសអំពើជួញដូរមនុស្សតែម្តង។
យ៉ាងណាក៏ដោយ ក្រសួងហិរញ្ញវត្ថុអាមេរិក កាលពីថ្ងៃទី១២ ខែកញ្ញា ឆ្នាំ២០២៤ បានប្រកាសដាក់ទណ្ឌកម្មបង្កកទ្រព្យសម្បត្តិសមាជិកព្រឹទ្ធសភាបក្សកាន់អំណាចមួយរូប គឺលោក លី យ៉ុងផាត់ និងអាជីវកម្មរបស់លោកមួយចំនួនផងដែរ ក្រោយរកឃើញថាបុគ្គលរូបនេះមានជាប់ពាក់ព័ន្ធនឹងការជួញដូរមនុស្ស ការលាងលុយកខ្វក់ ការបង្ខំឲ្យធ្វើពលកម្មដោយខុសច្បាប់ និងការបោកប្រាស់តាមបណ្ដាញអ៊ីនធឺណិត តាមច្បាប់ Executive Order លេខ ១៣-៨១៨ របស់អាមេរិក។
សារព័ត៌មាន The Cambodia Daily មិនទាន់អាចទាក់ទងសុំការបំភ្លឺបន្ថែមពីអ្នកស្រី ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ជុំវិញបញ្ហានេះបាននៅឡើយទេរហូតដល់ម៉ោងផ្សាយនេះ៕
© 2025, ឌឹ ខេមបូឌា ដេលី. All rights reserved.