CATEGORY
ពាណិជ្ជកម្ម
លោក ហ៊ុន សែន ជំរុញឲ្យក្រុមហ៊ុនចិនពន្លឿនសកម្មភាពសាងសង់រោងចក្រចម្រាញ់ប្រេង
យោងតាមជំនួយការលោកនាយករដ្ឋមន្ត្រីនៃព្រះរាជាណាចក្រកម្ពុជា បានឲ្យដឹងថា លោកនាយករដ្ឋមន្ត្រី ហ៊ុន សែន បានជំរុញឲ្យក្រុមហ៊ុនចិន ពន្លឿនសកម្មភាពគម្រោងសាងសង់រោងចក្រចម្រាញ់ប្រេង ដែលនឹងក្លាយជារោងចក្រចម្រាញ់ប្រេងដំបូងរបស់ប្រទេសនេះ និងបានជំរុញឲ្យមានប្រតិបត្តិការយ៉ាងយូរ ក្នុងឆ្នាំ២០១៨។
លោក អៀង សុផាល្លែត ជំនួយការផ្ទាល់លោកនាយករដ្ឋមន្ត្រី បានលើកសំណើអំឡុង កិច្ចប្រជុំជាមួយលោក សៃ ស៊ីយូ (Cai Xiyou) អនុប្រធានជាន់ខ្ពស់ក្រុមហ៊ុនសាជីវកម្មប្រេងកាត និងគីមីចិន (China Petroleum and Chemical Corporation) ឬហៅកាត់ថា ក្រុមហ៊ុនស៊ីនណូប៉ិក (Sinopec) ដែលបានមកបំពេញទស្សនកិច្ចនៅក្នុងប្រទេសកម្ពុជា និងបានជួបសម្តែងការគួរសមជាមួយលោក ហ៊ុន សែន។
លោក សុផាល្លែត បានថ្លែងទៅកាន់ក្រុមអ្នកយកព័ត៌មានក្រោយកិច្ចប្រជុំថា “ដំបូង អ្វីដែលសម្តេច ហ៊ុន សែន ចង់បានគឺថា លោកចង់ឲ្យក្រុមហ៊ុននេះខិតខំប្រឹងប្រែងកាត់បន្ថយហេតុប៉ះពាល់បរិស្ថានឲ្យបានច្រើនតាមលទ្ធភាពដែលអាចធ្វើទៅបាន។ទី២ក្រុមហ៊ុនត្រូវជំរុញល្បឿនសាងសង់រោងចក្រចម្រាញ់ប្រេងនេះដែលគួរតែអាចផលិតប្រេងបានក្នុងឆ្នាំ២០១៨”។
លោក សុផាល្លែត បានលើកឡើងបន្តទៀតថា លោក សៃ បានឆ្លើយតបថា រោងចក្រ ចម្រាញ់ប្រេងនឹងទទួលជោគជ័យ “ នៅពេល ឆាប់ៗនេះ” ហើយក្រុមហ៊ុន ស៊ីនណូប៉ិក នឹងខិតខំកាត់បន្ថយហេតុប៉ះពាល់ផ្សេងៗ។ លោកបានមានប្រសាសន៍ថា “ក្រុមហ៊ុនរបស់លោកនឹងប្រើប្រាស់បច្ចេកវិទ្យាថ្មីៗ និងទំនើបៗដើម្បីកាត់បន្ថយហេតុប៉ះពាល់ដែលបង្កឡើងដោយរោងចក្រទៅលើបរិស្ថាន និងដើម្បីផលិតប្រេងឲ្យស្របតាមស្តង់ដារអន្តរជាតិ”។
យោងតាមទីភ្នាក់ងារព័ត៌មានរដ្ឋអាកាប៉េ(AKP) បានឲ្យដឹងថា ក្រុមហ៊ុន ស៊ីនណូប៉ិក ស្ថិតក្នុងចំណោមក្រុមហ៊ុនចិនមួយចំនួនដែលបានចុះហត្ថលេខាលើអនុស្សរណៈនៃការយោគយល់គ្នា កាលពីខែមេសា ដើម្បីបោះទុនវិនិយោគចំនួន១,៦៧ពាន់លានដុល្លារ ក្នុងគោលបំណងសាងសង់រោងចក្រចម្រាញ់ប្រេងមួយនៅខេត្តកំពត ដែលមានសមត្ថភាពចម្រាញ់ប្រេងបានរហូតដល់៥លានតោនក្នុងមួយឆ្នាំៗ។
ក្រុមហ៊ុន ស៊ីនណូម៉ាច ឆាយណា ភើហ្វិក ម៉ាកឈីនារី អ៊ីនដាសស្ទ្រី ខបភើរ៉េសិន (Sinomach China Perfect Machinery Industry Corporation ) ដែលជាក្រុមហ៊ុនចិនមួយផ្សេងទៀតបានចុះហត្ថលេខាលើកិច្ចព្រមព្រៀងមួយជាមួយក្រុមហ៊ុនរដ្ឋ ខេមបូឌាន ផេតត្រូ ឆេមីខល ខំផេនី (Cambodian Petrochemical Company) ដើម្បីសាងសង់រោងចក្រចម្រាញ់ប្រេងមួយដែលមានសមត្ថភាពចម្រាញ់ប្រេងបាន៥លានតោនក្នុងមួយឆ្នាំនៅក្នុងទីតាំងដូចគ្នាដោយត្រូវចំណាយប្រាក់២,៣ពាន់លានដុល្លារ កាលពីខែធ្នូ។ ក៏ប៉ុន្តែ កាលពីម្សិលមិញ មិនមានភាពច្បាស់លាស់ថា តើក្រុមហ៊ុន ស៊ីណូម៉ាច នៅមានការពាក់ព័ន្ធក្នុងគម្រោងនេះ ឬយ៉ាងណានោះទេ។
ក្នុងពេលជាមួយគ្នានោះដែរមន្ត្រីរដ្ឋាភិបាលនិងមន្ត្រីរបស់ក្រុមហ៊ុន បានលើកឡើងថា រោងចក្រចម្រាញ់ប្រេងនេះនឹងចាប់ផ្តើមការសាងសង់នៅដើមឆ្នាំ២០១៣ និងត្រូវការពេលវេលាប្រហែលបីឆ្នាំ ដើម្បីបញ្ចប់ការសាងសង់។
លោក តែ ជីមណារិទ្ធ អនុប្រធាននាយកដ្ឋានមន្ទីរឧស្សាហកម្មខេត្តកំពតបានអះអាងថា ការងារសម្រាប់រោងចក្រចម្រាញ់ប្រេងនេះបានចាប់ផ្តើមកាលពីឆ្នាំមុន ក៏ប៉ុន្តែ លោកមិនដឹងថា តើអ្នកណាមានការពាក់ព័ន្ធខ្លះទេ ហើយបានបង្វែរសំណួរទៅក្រសួងឧស្សាហកម្ម រ៉ែ និងថាមពល។
លោក ខូយ ឃុន អភិបាលខេត្តកំពត បានបដិសេធមិនធ្វើសេចក្តីអត្ថាធិប្បាយ និងបានបង្វែរសំណួរទៅក្រសួងឧស្សាហកម្ម រ៉ែ និងថាមពលផងដែរ ខណៈដែលលោក អ៊ិត ប្រាំង រដ្ឋលេខាធិការក្រសួងនេះ និងទទួលបន្ទុកផ្នែកថាមពលបានបដិសេធមិនធ្វើសេចក្តីអត្ថាធិប្បាយ។...
និន្នន័យដែលចេញផ្សាយដោយក្រុមហ៊ុនអាកាសយានដ្ឋានកម្ពុជា (Cambodia Airports) បានបង្ហាញថា អ្នកដំណើរជិត២លាននាក់បានឆ្លង កាត់ អាកាស យានដ្ឋានអន្តរជាតិសៀមរាប អំឡុងរយៈពេលប្រាំបួនខែដំបូងនៃឆ្នាំនេះ គឺកើនឡើង២១ភាគរយ...
ផេអេនហ្គោ បង្កើតឡើងក្នុងគោលបំណងចូលរួមចំណែកក្នុងការបង្កើនសេវាកម្មទូទាត់វិក្កយបត្រ
ក្រុមហ៊ុនក្នុងស្រុកមួយបានចាប់ផ្តើមធ្វើប្រតិបត្តិការរបស់ខ្លួន ដោយសហប្រតិបត្តិការ ជាមួយធនាគារ អេប៊ីអេ (ABA Bank) ដើម្បីបង្កើនវិសាលភាពនៃប្រព័ន្ធទូទាត់ថ្លៃសេវាកម្មផ្សេងៗ ដូចជា វិក្កយបត្រអគ្គិសនី និងទឹកប្រាក់ក្នុងទូរស័ព្ទចល័ត ជាហេតុបណ្តាលឲ្យប្រជាជនមានលទ្ធភាពបង់ប្រាក់តាមគេហទំព័រ ប្រតិបត្តិការទូរស័ព្ទ និងប្រព័ន្ធអេឡិចត្រូនិកផ្សេងៗទៀត។
ក្រុមហ៊ុន ផេហ្គោ ស៊ី (ខេមបូឌា) ខូ អិលធីឌី (PayGo SEA (Cambodia) Co., Ltd.) ដែលធ្វើប្រតិបត្តិការក្រោមយីហោ ផេអេនហ្គោ នឹងផ្តល់លទ្ធភាពដល់អ្នកប្រើប្រាស់ក្នុងការដាក់ប្រាក់កក់សម្រាប់ការទិញទំនិញតាមប្រព័ន្ធអីុនធើណិតដោយប្រើប្រាស់ប័ណ្ណឥណទាន ប្រព័ន្ធទូទាត់ ផេផាល ( PayPal) ឬក៏សាច់ប្រាក់។ ក្រុមហ៊ុននានាដែលប្រើប្រាស់សេវាកម្មនេះ មានដូចជាក្រុមហ៊ុនប្រតិបត្តិករទូរស័ព្ទចល័ត ម៉ូប៊ីតែល (MobiTel) និងក្រុមហ៊ុនស្មាត (Smart) ព្រមទាំងក្រុមហ៊ុនផ្តល់សេវាកម្មសាធារណៈ ដូចជា អគ្គិសនីកម្ពុជាជាដើម ក៏ដូចជាហាងលក់សម្លៀកបំពាក់ផងដែរ។
លោក អែវហ្គេនី កាហ្គាយ (Evgeniy Kagay) អ្នកគ្រប់គ្រងទូទៅសេវាកម្ម ផេអេនហ្គោ បានបដិសេធមិនធ្វើសេចក្តីអត្ថាធិប្បាយ ឡើយកាលពីម្សិលមិញ បើទោះជាមានការអញ្ជើញអ្នកសារព័ត៌មានឲ្យទៅកាន់ការិយាល័យរបស់ក្រុមហ៊ុននេះ ដែលមានទីស្នាក់ការកណ្តាលនៅធនាគារ អេប៊ីអេ នៅមហាវិថីព្រះសីហនុ ក៏ដោយ។ លោកបានមានប្រសាសន៍ថា “ ខ្ញុំមិនអាចផ្តល់ព័ត៌មានលម្អិតបានទេ” ។
របាយការណ៍ស្តីពីក្រុមហ៊ុន ផេហ្គោ ស៊ី (ខេមបូឌា) ខូ អិលធីឌី ដែលនិពន្ធដោយក្រុមហ៊ុន ឌីអេនប៊ី (D&B) ដែលជាក្រុមហ៊ុនផ្តល់សេវាគ្រប់គ្រងទិន្នន័យមេផ្នែកពាណិជ្ជកម្មនៅទូទាំងសាកលលោក បានបង្ហាញថា នាយករបស់ក្រុមហ៊ុននេះ មានឈ្មោះថា ហ៊្គែរ៉ាត ខាសប៊ីលីន (Gairat Khasbiullin) អតីតប្រធាននាយកប្រតិបត្តិក្រុមហ៊ុនទូរគមនាគមន៍មួយនៅប្រទេសអ៊ូសបេគីស្ថាន។
លោក អ៊ីហ្គ័រ ហ្ស៊ីម៉ារ៉េវ (Igor Zimarev) មន្ត្រីទីផ្សារធនាគារ អេប៊ីអេ បានឲ្យដឹងថា ធនាគារ អេប៊ីអេ មិនមានការពាក់ព័ន្ធនឹងសេវាកម្ម ផេអេនហ្គោ ទេ ក៏ប៉ុន្តែ ធនាគារនេះកំពុងតែសហប្រតិបត្តិការជាមួយសេវាកម្មនេះ ដើម្បីស្វែងយល់បន្ថែមអំពីប្រព័ន្ធទូទាត់សាច់ប្រាក់ចូល ដែលត្រូវបានធ្វើឡើងតាមរយៈកន្លែងផ្សេងៗ។
លោកបានមានប្រសាសន៍ថា “មិនមានការពាក់ព័ន្ធជាមួយក្រុមហ៊ុននេះទេ។ ពួកគេបានបង្កើតគំនិតនេះហើយយើងក៏ចាប់អារម្មណ៍គំនិតនេះ ហើយនេះជាមូលហេតុដែលយើងចង់បង្កើតកិច្ចសហប្រតិបត្តិការជាមួយពួកគេ។ ពួកគេផ្តល់ឲ្យយើងនូវបច្ចេកវិទ្យា និងសេវាកម្មនេះ ហើយយើងបានដាក់សេវានេះចូលទៅក្នុងប្រព័ន្ធរបស់យើង”។
យោងតាមគេហទំព័រ សេវាកម្ម ផេអេន ហ្គោ សេវាកម្មនេះ ក៏មាននៅក្នុងប្រទេសផ្សេងៗទៀតផងដែរ ដូចជា ប្រទេសស្រីលង្កា និងប្រទេសម៉ាល់ឌីវ ជាដើម។ គេហទំព័រ និងទំព័រហ្វេសប៊ុករបស់សេវាកម្ម ផេ អេន ហ្គោ ក៏បានបង្ហាញផងដែរថា សេវាកម្មនេះត្រូវបានបង្កើតឡើងនៅក្នុងឆ្នាំ២០១១ និងបានចូលមកដល់ទីផ្សារកម្ពុជាកាលពីឆ្នាំមុន ក៏ប៉ុន្តែ សេវាកម្មនេះមានសកម្មភាពមួយចំនួនប៉ុណ្ណោះសម្រាប់កន្លែងផ្សេងៗ ក្នុងរយៈពេលប៉ុន្មានខែចុងក្រោយនេះ។
កន្លែងផ្សេងៗបានផ្តល់លទ្ធភាពដល់អ្នកប្រើប្រាស់សេវាកម្ម ផេអេនហ្គោ ក៏ដូចជា អតិថិជនរបស់កន្លែងទាំងនោះក្នុងការបង់ប្រាក់ថ្លៃប្រើប្រាស់ទូរស័ព្ទចល័ត និងវិក្កយបត្រផ្សេងៗទៀត ដោយជ្រើសរើសយកសេវាកម្មនេះ និងបញ្ចូលសាច់ប្រាក់។ កាលពីម្សិលមិញ នៅឯម៉ាស៊ីនមួយក្នុងចំណោមម៉ាស៊ីន ដែលត្រូវបានដាក់ឲ្យប្រើប្រាស់នៅក្នុងហាងលក់ទំនិញខ្នាតតូចមួយនៅកាច់ជ្រុងផ្លូវ៥១ និងផ្លូវ៣០២ អ្នកគិតលុយដែលធ្វើការនៅក្នុងហាងលក់ទំនិញនោះបានលើកឡើងថា នាងឃើញមនុស្សយ៉ាងតិច៣០នាក់ ក្នុងមួយថ្ងៃ មានទាំងជនបរទេស ទាំងប្រជាជនខ្មែរ ចេញចូលក្នុងហាងនេះ អំឡុងវេនធ្វើការរយៈពេល១២ម៉ោងរបស់នាង។
សេវាកម្មនៅកន្លែងនេះ ក៏ត្រូវបានផ្តល់ឲ្យអតិថិជនដោយប្រើភាសាអង់គ្លេស និងភាសាខ្មែរដែរ។ ក៏ប៉ុន្តែ មិនទាន់ច្បាស់ថា តើសេវាកម្ម ផេអេនហ្គោ នឹងទទួលបានប្រជាប្រិយភាពក្នុងកម្រិតណាទេ សម្រាប់ទីផ្សារប្រទេសកម្ពុជា។ លោក អ៊ិន វិជ្ជា ម្ចាស់ហាងលក់សម្លៀកបំពាក់ឈ្មោះ លីតថល ហ្វេសិន (Little Fashion) បានលើកឡើងថា គ្មាននរណាម្នាក់បង់ប្រាក់នៅក្នុងហាងរបស់លោកដែលលក់ទំនិញតាមប្រព័ន្ធអ៊ីនធើណិត ដោយប្រើសេវាកម្ម ផេអេនហ្គោ ...
បរិមាណនាំចេញដំឡូងមីធ្លាក់ចុះយ៉ាងគំហុកក្នុងរយៈពេលប្រាំបីខែដើមឆ្នាំ
យោងតាមតួលេខដែលក្រសួងពាណិជ្ជកម្មដែលចេញផ្សាយកាលពីម្សិលមិញ បានបង្ហាញថា បរិមាណនាំចេញដំឡូងមី បានធ្លាក់ចុះ៥៦ភាគរយ មកនៅប្រហែល២៨៨.០០០តោន ក្នុងរយៈពេលប្រាំបីខែ ដើមឆ្នាំនេះបើធៀបនឹងរយៈពេលដូចគ្នាកាលពីឆ្នាំមុន។ មន្ត្រីនានាបានស្តីបន្ទោសថា បញ្ហាធ្លាក់ចុះយ៉ាងគំហុកនេះ...
នៅក្នុងកិច្ចប្រឹងប្រែងបង្កើនការនាំចេញអង្កររបស់កម្ពុជាទៅទីផ្សារនៅអាស៊ី និងអាហ្វ្រិក ប្រូប៉ាកូ (Proparco) ដែលជាសេនាធិការផ្នែកឯកជនរបស់ទីភ្នាក់ងារអភិវឌ្ឍន៍បារាំង ( French Development Agency) បានចុះហត្ថលេខាលើកិច្ចព្រមព្រៀងផ្តល់់ប្រាក់កម្ចីចំនួន១០លានដុល្លារដែលត្រូវសងវិញនៅក្នុងអំឡុងពេល៥ឆ្នាំដល់ក្រុមហ៊ុន ហ្គោលដេនរ៉ាយស៍ (Golden Rice)...
យោងតាមទិន្នន័យចេញផ្សាយ កាលពីថ្ងៃអង្គារ ដោយសមាគមធានារ៉ាប់រងទូទៅកម្ពុជា(GIAC) បានបង្ហាញថា ប្រាក់ចំណូលដែលក្រុមហ៊ុនផ្តល់សេវាធានារ៉ាប់រងនៅក្នុងប្រទេសកម្ពុជាសម្រេចបាន បានកើនឡើង២៥ភាគរយ ដល់២២លានដុល្លារ សម្រាប់រយៈពេលប្រាំមួយខែដំបូងនៃឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។
សេវាធានារ៉ាប់រងផ្នែកវិស្វកម្មបានក្លាយជាឆ្អឹងខ្នងរបស់វិស័យនេះ ដោយសារតែប្រាក់បង់ថ្លៃសេវាធានារ៉ាប់រងបានកើនឡើង១០២ភាគរយ ដល់២,៤លានដុល្លារ...
ក្រុមហ៊ុនណាហ្គាខប នឹងវិនិយោគរមណីយដ្ឋានកាស៊ីណូនៅរុស្ស៊ី
ក្រុមហ៊ុនណាហ្គាខប (NagaCorp Ltd.,) ដែលជាម្ចាស់សណ្ឋាគារនិងកាស៊ីណូ ណាហ្គាវើល ក្នុងរាជធានីភ្នំពេញបានប្រកាសកាលពីម្សិលមិញថា ខ្លួនមានផែនការវិនិយោគទឹកប្រាក់៣៥០លានដុល្លារ លើរមណីយដ្ឋានកាស៊ីណូរុស្ស៊ីមួយនៅក្បែរព្រំដែនជាប់ប្រទេសចិន។ រមណីយដ្ឋានដែលនឹងត្រូវសាងសង់នៅក្រៅទីក្រុងកំពង់ផែវ៉្លាឌីវ៉ូស្តុក (Vladivostok) ភាគខាងកើត ក្នុងតំបន់ព្រីម៉ស្គី(Primorsky)ប្រទេសរុស្សីនេះ នឹងត្រូវគេឲ្យឈ្មោះថា ទីក្រុងរមណីយដ្ឋានកំសាន្តព្រីម៉ស្គីហៅកាត់ថា...
ជាធម្មតា តម្លៃភាគហ៊ុនរបស់រដ្ឋាករទឹកស្វយ័តក្រុងភ្នំពេញ ដែលនៅតែជាក្រុមហ៊ុនតែមួយគត់ នៅផ្សារមូលបត្រកម្ពុជា មានការប្រែប្រួលបន្តិចបន្តួចប៉ុណ្ណោះ ក៏ប៉ុន្តែ កាលពីម្សិលមិញ បានធ្លាក់ចុះដល់កម្រិតទាបបំផុត បើគិតតាំងពីផ្សារមូលបត្រនេះបានចាប់ផ្តើមប្រតិបត្តិការជួញដូរ កាលពីជាងពីរឆ្នាំមុន។
នៅពេលបិទវគ្គជួញដូរកាលពីម្សិលមិញតម្លៃភាគហ៊ុនរបស់ក្រុមហ៊ុននេះ បានធ្លាក់ចុះដល់៥.៩៦០រៀល ឬក៏ប្រហែល១,៤៦ដុល្លារក្នុងមួយហ៊ុន ពោលគឺបានធ្លាក់ចុះ៧ភាគរយ បើធៀបនឹងតម្លៃជួញដូរកាលពីដំបូងនៅថ្ងៃទី១៨ ខែមេសា ឆ្នាំ២០១១។ នៅពេលផ្សារមូលបត្រកម្ពុជាត្រូវបានដាក់ឲ្យដំណើរការ តម្លៃភាគហ៊ុនរបស់រដ្ឋាករទឹកក្រុងភ្នំពេញបានកើនឡើងជិត៥០ភាគរយនៅថ្ងៃដំបូងនៃវគ្គជួញដូរ ហើយបានបន្តកើនឡើងខ្ពស់ដល់១០.០០០រៀល ឬក៏ប្រហែល២,៥៧ដុល្លារក្នុងមួយហ៊ុន ក្នុងរយៈពេលបីថ្ងៃ។ ក៏ប៉ុន្តែ ក្រោយមកតម្លៃភាគហ៊ុននេះបានធ្លាក់ចុះបន្តិចម្តងៗមកនៅ៦.៣០០រៀល ឬក៏ប្រហែល១,៥៧ដុល្លារក្នុងមួយហ៊ុន ដែលជាតម្លៃប្រកាសលក់ភាគហ៊ុនជាសាធារណៈលើកដំបូង ហើយបន្ទាប់មកក៏បន្តធ្លាក់មក៦.២០០រៀល ឬក៏១,៥៥ដុល្លារ ក្នុងមួយហ៊ុន ដែលជាតម្លៃកម្រនឹងកើតឡើង តាំងពីខែមករា ឆ្នាំនេះមក។
លោក គុយ វ៉ាត ប្រធានក្រុមហ៊ុនមូលបត្រភ្នំពេញ ដែលស្ថិតក្នុងចំណោមក្រុមហ៊ុនទិញលក់មូលបត្រមានអាជ្ញាប័ណ្ណទាំងប្រាំពីរនៅក្នុងប្រទេសកម្ពុជា បានលើកឡើងថា តម្លៃភាគហ៊ុនរបស់រដ្ឋាករទឹកស្វយ័តក្រុងភ្នំពេញបានធ្លាក់ចុះ ប្រហែលជាដោយសារតែសកម្មភាពជួញដូរមិនសូវមាន ដែលបណ្តាលមកពីការដែលមានក្រុមហ៊ុនតែមួយគត់ចុះបញ្ជីនៅលើផ្សារមូលបត្រ។
លោកបានមានប្រសាសន៍ថា តាមការអង្កេតរបស់ខ្ញុំ នៅពេលដែលមានក្រុមហ៊ុនតែមួយចុះបញ្ជីនៅលើផ្សារភាគហ៊ុន ការជួញដូរស្ថិតក្នុងស្ថានភាពស្ងប់ស្ងាត់។ នៅពេលមានក្រុមហ៊ុនច្រើនចុះបញ្ជីនៅលើផ្សារភាគហ៊ុន ស្ថានភាពមើលទៅគ្រាន់បើជាង ហើយមានឱកាសសម្រាប់តម្លៃភាគហ៊ុនរបស់រដ្ឋាករទឹកស្វយ័តក្រុងភ្នំពេញ កើនឡើងជាថ្មីម្តងទៀត”។
បរិយាកាសនយោបាយតានតឹង បន្ទាប់ពីថ្ងៃបោះឆ្នោតជាតិថ្ងៃទី២៨ ខែកក្កដា ក៏បានចូលរួមចំណែកក្នុងការជំរុញឲ្យតម្លៃភាគហ៊ុននេះធ្លាក់ចុះផងដែរ ដោយសារតែវិនិយោគិនមានអារម្មណ៍មិនច្បាស់លាស់អំពីស្ថិរភាពនយោបាយ និងកំណើនហិរញ្ញវត្ថុ ប្រសិនបើភាពជាប់គាំងផ្នែកនយោបាយបានទប់ស្កាត់មិនឲ្យមានការបង្កើតរដ្ឋាភិបាលថ្មី។
លោក គុយ វ៉ាត បានមានប្រសាសន៍បន្ថែមទៀតថា “ស្ថានភាពនយោបាយមានចំណែកក្នុងការធ្វើឲ្យតម្លៃភាគហ៊ុនធ្លាក់ចុះ ពីព្រោះវិនិយោគិនចង់ឃើញរដ្ឋាភិបាលថ្មី ក៏ប៉ុន្តែខ្ញុំគិតថា វាមិនយូរទេ ក្រុមហ៊ុនថ្មីៗជាច្រើននឹងត្រូវបានចុះបញ្ជី” នៅផ្សារមូលបត្រកម្ពុជា។...
យោងតាមសេចក្តីប្រកាសចេញផ្សាយកាលពីម្សិលមិញបានឲ្យដឹងថា ធនាគារជាតិនៃកម្ពុជា នឹងប្រកាសអនុវត្តប្រព័ន្ធសន្តិសុខហិរញ្ញវត្ថុថ្មីនៅថ្ងៃនេះ ក្នុងគោលបំណងពង្រឹងប្រព័ន្ធធនាគារពាណិជ្ជនៅក្នុងប្រទេសកម្ពុជា និងជួយរក្សាសាច់ប្រាក់ងាយស្រួល អំឡុងពេលដែលសេដ្ឋកិច្ចកំពុងធ្លាក់ចុះ។
មូលប័ត្រដែលគេស្គាល់ថា វិញ្ញាបនបត្រប្រាក់បញ្ញើអាចជួយដូរបាន នឹងអនុញ្ញាតឲ្យធនាគារ នា នាផ្លាស់ប្តូរប្រាក់បញ្ញើលើស ដែលពួកគេដាក់នៅធនាគារជាតិនៃកម្ពុជា ដើម្បីទទួលបានអត្រាការប្រាក់បន្តិចបន្តួច ឲ្យទៅជាមូលប័ត្រដែលពួកគេអាចលក់ ឬក៏ប្រើប្រាស់ជាទ្រព្យធានាសម្រាប់ធ្វើប្រតិបត្តិការប្រាក់កម្ចីអន្តរធនាគារ។
សេចក្តីប្រកាសរបស់ធនាគារជាតិនៃកម្ពុជា មានសេចក្តីពន្យល់ថា វិញ្ញាបនបត្រប្រាក់បញ្ញើអាចជួញដូរបាន ក៏នឹងចូលរួមចំណែកក្នុងការបង្កើតទីផ្សារអន្តរធនាគារ ដែលបំពេញមុខងាររបស់ខ្លួនបានយ៉ាងពេញលេញ ដោយបង្កលក្ខណៈកាន់តែស្រួលសម្រាប់ធនាគារនានា ដែលមានកង្វះខាតប្រាក់បញ្ញើបណ្តោះអាសន្ន ក្នុងការខ្ចីមូលនិធិពីធនាគារ ដែលមានប្រាក់បញ្ញើលើសរយៈពេលខ្លីផងដែរ។
សេចក្តីប្រកាសនោះមានខ្លឹមសារថា “វិញ្ញាបនបត្រប្រាក់បញ្ញើអាចជួញដូរបានអាចបំពេញតួនាទីជាសញ្ញាប័ណ្ណរយៈពេលខ្លី ដែលម្ចាស់របស់វាអាចប្រើប្រាស់ដើម្បីដោះស្រាយបញ្ហាកង្វះខាតប្រាក់បញ្ញើនៅក្នុងរយៈពេលខ្លី តាមរយៈការលក់ និងការដាក់បញ្ចាំ”។
លោក ហីុរ៉ូឆិ ស៊ូហ្សូគិ (Hiroshi Suzuki)សេដ្ឋវិទូនៅវិទ្យាស្ថានស្រាវជ្រាវពាណិជ្ជកម្មកម្ពុជា បានលើកឡើងកាលពីម្សិលមិញថា ការដាក់ចេញនូវវិញ្ញាបនបត្រអាចជួញដូរបាននាពេលបច្ចុប្បន្ននេះ គឺជាចំណាត់ការសមស្របតាមស្ថានភាពរបស់ប្រទេសកម្ពុជា ដោយសារតែតម្រូវការសេវាកម្មធនាគារពាណិជ្ជកំពុងកើនឡើងយ៉ាងលឿន។
លោកបានមានប្រសាសន៍ថា “ប្រសិនបើធនាគារកំពុងតែផ្តល់ហិរញ្ញប្បទានឲ្យអ្នកខ្ចីជាច្រើន ក្នុងករណីជាច្រើនដែលធនាគារទាំងនោះមិនអាចទុកលុយឲ្យបានគ្រប់គ្រាន់សម្រាប់ប្រតិបត្តិការទាំងនោះ និងប្រសិនបើមានទីផ្សារអន្តរធនាគារ នោះធនាគារទាំងនោះអាចខ្ចីគ្នាទៅវិញទៅមកបាន”។
លោកបានមានប្រសាសន៍បន្ថែមទៀតថា “ប្រសិនបើធនាគារអេស៊ីលីដា មានអតិរេករូបិយវត្ថុ ហើយធនាគារកាណាឌីយ៉ាខ្វះរូបិយវត្ថុ ឥឡូវពួកគេអាចសម្របសម្រួលគ្នាបាន ហើយវាជាជម្រើសដ៏ល្អសម្រាប់ធនាគារទាំងពីរ”។ លោកលើកឡើងបន្តទៀតថា បច្ចុប្បន្នធនាគារប្រហែលជាត្រឹមតែអាចទំនាក់ទំនងដោយផ្ទាល់ជាមួយធនាគារជាតិនៃកម្ពុជា ដើម្បីដោះស្រាយបញ្ហាខ្វះខាតរូបិយវត្ថុរយៈពេលខ្លី និងបញ្ហាលើសប្រាក់បញ្ញើ។
លោក ហីុរ៉ូឆិ បានមានប្រសាសន៍បន្ថែមទៀតថា “ ឥឡូវនេះ ប្រសិនបើពួកគេមានលុយច្រើនជាងមុន ពួកគេមានតែផ្លូវតែមួយគត់ ហើយអត្រាការប្រាក់មានកម្រិតទាបណាស់”។
លោកស្រី ងួន សុខា អគ្គនាយិកាធនាគារជាតិនៃកម្ពុជាបានលើកឡើងកាលពីម្សិលមិញថា ធនាគារពាណិជ្ជអាចចាប់ផ្តើមដាក់ពាក្យសុំវិញ្ញាបនបត្រប្រាក់បញ្ញើអាចជួញដូរបាន ដែលមានចំនួនទឹកប្រាក់ ៥០០.០០០ដុល្លារ ចាប់ពីថ្ងៃនេះតទៅ។ លោកស្រីបានមានប្រសាសន៍ថា “យើងបាននិងកំពុងរៀបចំប្រព័ន្ធនេះអស់រយៈពេលជាងមួយឆ្នាំមកហើយ ដើម្បីគ្រឹះស្ថានធនាគារយកទៅប្រើប្រាស់”។
លោកស្រីបានបន្តថា មូលបត្រនេះក៏អាចជួយសម្រួលស្ថានការណ៍វិបត្តិសេដ្ឋកិច្ចផងដែរ។នៅ ក្នុងស្ថានភាពមិនល្អបែបនេះ ធនាគារនានាអាចបង្កកឥណទានដល់គ្នាទៅវិញទៅមក ដោយសារតែមានការព្រួយបារម្ភអំពីលទ្ធភាពបាត់បង់បំណុលដែលគេជំពាក់។
លោកស្រី ងួន សុខា បានមានប្រសាសន៍បន្ថែមទៀតថា “ប្រសិនបើពួកគេមានទ្រព្យធានាបែបនេះ នឹងមានសេចក្តីទុកចិត្តនៅក្នុងវិស័យធនាគារ។ វិបត្តិសេដ្ឋកិច្ចពិភពលោកបានបង្កផលប៉ះពាល់ដល់វិស័យធនាគារ ដោយសារតែប្រព័ន្ធអន្តរធនាគារមិនមានទ្រព្យបញ្ចាំបែបនេះ”។
លោក ហ្គ្រេន ណាក់ឃី (Grant Knuckey) ប្រធាននាយកប្រតិបត្តិធនាគារ អេអិនហ្សិត រ៉ូយ៉ាល់ (ANZ Royal Bank) បានលើកឡើងកាលពីម្សិលមិញថា វិញ្ញាបនបត្រប្រាក់បញ្ញើអាចជួញដូរបាន នឹងបំពេញមុខងារប្រហាក់ប្រហែលគ្នាទៅនឹងប័ណ្ណរតនាគារចេញផ្សាយនៅសហរដ្ឋអាមេរិក។ ប័ណ្ណនេះគឺជាសញ្ញាប័ណ្ណមានអត្រាការប្រាក់ទាប ដែលត្រូវបានចាត់ទុកយ៉ាងទូលំទូលាយថា ជាមូលប័ត្រដែលមានលទ្ធភាពខ្ពស់ក្នុងការប្តូរជាសាច់ប្រាក់ និងមានសុវត្ថិភាពខ្ពស់។
លោកបានមានប្រសាសន៍ថា “ពួកវាត្រូវបានគេចាត់ទុកថា យន្តការសម្រាប់ធនាគារ” ជាជាងការដាក់ប្រាក់លើស ផ្ញើនៅធនាគារជាតិនៃកម្ពុជា ក្នុងរូបភាពជាប្រាក់បញ្ញើ។ លោកបានបន្តថា “ ជាជម្រើសផ្សេង ពួកគេអាចទិញវិញ្ញាបនបត្រប្រាក់បញ្ញើអាចជួញដូរបាន និងអាចប្រើប្រាស់វាជាទ្រព្យធានា ប្រសិនបើចាំបាច់ក្នុងពេលចុះកិច្ចព្រមព្រៀងជា មួយធនាគារផ្សេងៗទៀត”។ លោកបានបន្ថែមថា “គ្មានអ្វីត្រូវសង្ស័យទេ វាគឺជាដំណាក់កាលមួយនៃដំណើរវិវឌ្ឍន៍ទៅកាន់ប្រព័ន្ធអន្តរធនាគារដែលបំពេញមុខងារពេញលេញ”៕
ប្រែសម្រួលដោយ កង សុធា
ស្ថានីយទូរទស្សន៍ប៉ុស្តិ៍លេខ៣កំពុងចរចាលក់ភាគហ៊ុន៨០ភាគរយទៅឲ្យវិនិយោគiនជប៉ុន
ម្ចាស់ស្ថានីយទូរទស្សន៍ប៉ុស្តិ៍លេខ៣បានបញ្ជាក់កាលពីម្សិលមិញថា ក្រុមហ៊ុនទ្រីអាស៊ី (TriAsia) របស់ជប៉ុនកំពុងចរចាទិញភាគហ៊ុនដ៏ធំនៅក្នុងស្ថានីយទូរទស្សន៍ប៉ុស្តិ៍លេខ៣ និងមានគម្រោងផ្សព្វផ្សាយកម្មវិធីភាសាជប៉ុន។
យោងតាមលោក ខាំពូន កែវមណី ម្ចាស់ទូរស្សន៍ប៉ុស្តិ៍លេខ៣បានឲ្យដឹងថា ប្រាក់ចំណូលនៅស្ថានីយទូរទស្សន៍នេះកំពុងធ្លាក់ចុះ ហើយដោយមានការធ្លាក់ចុះនេះ បានធ្វើឲ្យលោកស្វែងរកវិនិយោគទុនថ្មី។ លោក កែវមណី បាននិយាយថា “យើងប្រហែលជារក្សាទុក២០ភាគរយ និងប្រគល់ហ៊ុនឲ្យគេ៨០ភាគរយ។ យើងអាចនិយាយបានថា ប្រាក់ចំណូលរបស់យើងបានធ្លាក់ចុះ៨០ភាគរយ។ ប្រសិនបើយើងមិនបង្កើនទុនរបស់យើងទេ យើងនឹងមិនអាចដំណើរការបានឡើយ ពីព្រោះមានស្ថានីយទូរទស្សន៍ច្រើនណាស់នៅក្នុងប្រទេសយើងនាពេលនេះ”។
ភាគហ៊ុននៅក្នុងស្ថានីយទូរទស្សន៍ប៉ុស្តិ៍លេខ៣ នេះ គឺជាការវិនិយោគលើកទី២របស់ក្រុមហ៊ុនទ្រីអាស៊ី នៅក្នុងប្រទេសកម្ពុជា។ វិនិយោគទុនដំបូងរបស់ក្រុមហ៊ុននេះ គឺការបើកហាងកាហ្វេគីរីយ៉ានៅក្នុងសង្កាត់បឹងកេងកង១ក្នុងរាជធានីភ្នំពេញកាលពីឆ្នាំមុន។ បុគ្គលិកនៅក្រុមហ៊ុនទ្រីអាស៊ីបាននិយាយកាលពីម្សិលមិញថា កិច្ចព្រមព្រៀងនេះមិនទាន់រួចរាល់ទេ ហើយបានបដិសេធមិនធ្វើអត្ថាធិប្បាយបន្ថែមឡើយ។
លោក យូកូអ៊ី តូម៉ូយុគី នាយកប្រតិបត្តិក្រុមហ៊ុនទ្រីអាស៊ីបានសរសេរនៅលើប្លក់(Blog) ផ្ទាល់ខ្លួនរបស់លោកកាលពីថ្ងៃសុក្រថា ក្រុមហ៊ុនបានចុះកិច្ចព្រមព្រៀងទទួលភាគហ៊ុន៨០ភាគរយពីទូរស្សន៍ប៉ុស្តិ៍លេខ៣។ទោះជាយ៉ាងណា សារនៅក្នុងប្លក់នោះត្រូវបានលុបចេញពីវិបសាយនោះវិញ បន្ទាប់ពីអ្នកយកព័ត៌មានម្នាក់បានសួរអំពីការវិនិយោគនេះ។ លោក តូម៉ូយុគី បានសរសេរថា “មានកិច្ចព្រមព្រៀងទិញភាគហ៊ុនចំនួន៨០ភាគរយពីលោក ខាំពូន កែវមណី ម្ចាស់ទូរទស្សន៍ប៉ុស្តិ៍លេខ៣បច្ចុប្បន្ន”។
លោកក៏បានសរសេរផងដែរថា ការចរចាជាមួយលោក កែវមណី បានចាប់ផ្តើមនៅខែឧសភា ហើយថា នេះគឺជាការវិនិយោគលើស្ថានីយទូរទស្សន៍ដែលគាំទ្រដោយជប៉ុនជាលើកដំបូងនៅកម្ពុជា។ ប៉ុន្តែ លោក តូម៉ូយុគី បានប្រាប់ព័ត៌មានតិចតួចអំពីផែនការរបស់ក្រុមហ៊ុនលោកសម្រាប់ទូរទស្សន៍ប៉ុស្តិ៍លេខ៣ ដោយគ្រាន់តែបញ្ជាក់ថា ស្ថានីយទូរទស្សន៍នេះនឹងផ្សាយពី ផ្នត់គំនិតជប៉ុន “ដ៏អស្ចារ្យ” ។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា មិនទាន់មានការសម្រេចលើកិច្ចព្រមព្រៀងនេះទេ ពីព្រោះសាលារាជធានីភ្នំពេញមានភាគហ៊ុនខ្លះនៅក្នុងស្ថានីយទូរទស្សន៍នេះ ហើយកិច្ចព្រមព្រៀងលក់ភាគហ៊ុនធំណាមួយត្រូវមានការយល់ព្រមពីសាលារាជធានី។
លោក កែវមណី បានច្រាលចោលការជាប់ពាក់ព័ន្ធរបស់សាលារាជធានី ហើយបានអះអាងថា សាលារាជធានីបានបំពានកិច្ចសន្យារបស់ខ្លួនជាមួយគាត់នៅពេលដែលពួកគេបានបង្ខំឲ្យគាត់ប្តូរទីស្នាក់ការទូរទស្សន៍ប៉ុស្តិ៍លេខ៣ពីមហាវិថីសហព័ន្ធរុស្ស៊ីនៅក្នុងខណ្ឌ៧មករាទៅផ្លូវលេខ៥៩៣នៅក្នុងខណ្ឌប្ញស្សីកែវ។ លោកបានមានប្រសាសន៍ថា “កិច្ចព្រមព្រៀងនេះអាស្រ័យលើខ្ញុំ”៕
ប្រែសម្រួលដោយ មូល គឹមហឿន