TAG
paywall
ជនដៃដល់ប្រដាប់ដោយដាវសាម៉ូរ៉ៃធ្វើឲ្យមនុស្សប្រាំមួយនាក់រងរបួស នៅពិធីមង្គលការមួយ
នគរបាលបាននិយាយកាលពីម្សិលមិញថា មនុស្សប្រាំំមួយនាក់រងរបួសធ្ងន់កាលពីថ្ងៃអង្គារ នៅពេលបុរសពីរនាក់ត្រូវបានឲ្យចេញពីពិធីមង្គលការមួយក្នុងខេត្តពោធិ៍សាត់ បានត្រឡប់មកវិញដោយនាំមិត្តភក្តិប្រហែល១០នាក់ទៀតមក ហើយបានកាប់លើភ្ញៀវចូលរួមដោយប្រើដាវសាម៉ូរ៉ៃ។
លោក ម៉ោល សុត អធិការរងនគរបាលស្រុកក្រគរបានមានប្រសាសន៍ថា បុរសទាំងពីរនាក់នេះឈ្មោះ សៀក សាវ័ន និង ខេង វិបុល អាយុ២៥ឆ្នាំដូចគ្នា ដែលក៏បានរងរបួសនៅក្នុងហេតុការណ៍នោះដែរត្រូវបានប្រាប់ឲ្យចេញពីពិធីមង្គលការ បន្ទាប់ពីភ្ញៀវម្នាក់បានជាន់ជើងបុរសម្នាក់ខណៈពេលកំពុងរាំកម្សាន្ត។ លោកបានមានប្រសាសន៍ថា "ពួកគេមានជម្លោះជាមួយភ្ញៀវដែលមកចូលរួមក្នុងពិធីមង្គលការនោះនៅពេលពួកគេកំពុងរាំ ប៉ុន្តែ មនុស្សផ្សេងទៀតបានឃាត់កុំឲ្យពួកគេវាយតប់គ្នា"។
លោកបានបន្ថែមថា "ប្រហែលកន្លះម៉ោងក្រោយមក ពួកគេបានហៅមិត្តភត្តិរបស់ខ្លួនមក ហើយមនុស្សប្រហែល១០នាក់ទៀតប្រដាប់ដោយដាវបានជិះម៉ូតូមកកាន់ពិធីមង្គលការនោះ ដើម្បីវាយប្រហារទៅលើមនុស្សទាំងនោះ"។
លោក សុត បានមានប្រសាសន៍ថា ភ្ញៀវ ដែលចូលរួមពិធីមង្គលការបានយកកៅអីវាយជនទាំងនោះ។ លោកបានមានប្រសាសន៍ថា "ភ្ញៀវបានយកកៅអីវាយពួកគេបណ្តាលឲ្យ សាវ័ន និងវិបុល រងរបួសក្បាល មុនពេលនគរបាលឃុំបានមកធ្វើអន្តរាគមន៍ ហើយបានចាប់ខ្លួនពួកគេ។ លទ្ធផលនៃការវាយតប់គ្នាបានបណ្តាលឲ្យភ្ញៀវប្រាំមួយនាក់រងរបួសធ្ងន់ត្រង់ក្បាល និងដងខ្លួន"។
លោក សុត បានមានប្រសាសន៍ថា ជនដែលប្រដាប់ដោយដាវសាម៉ូរ៉ៃដទៃទៀតអាចរត់គេខ្លួនរួច បើទោះជាមន្ត្រីនគរបាលឃុំពីរនាក់មានវត្តមាននៅក្នុងពិធីមង្គលការនោះក៏ដោយ។ លោកបានមានប្រសាសន៍ដល់មន្ត្រីទាំងនោះថា "ពួកគេមិនអាចធ្វើអ្វីបានទេ ពីព្រោះមានក្មេងទំនើងច្រើនណាស់។ ពួកគេគ្រាន់តែប្រាប់ឲ្យឈប់តែប៉ុណ្ណោះ ប៉ុន្តែ ពួកគេមិនស្តាប់ឡើយ"។ លោក សុត បានមានប្រសាសន៍ថា មនុស្សប្រាំនាក់ រួមមានជនសង្ស័យពីរនាក់ផង បច្ចុប្បន្ននេះកំពុងសម្រាកព្យាបាលនៅក្នុងមន្ទីរពេទ្យបង្អែកខេត្ត"។
លោក កែវ សុគន្ធា ស្នងការរងនគរបាលខេត្តបានមានប្រសាសន៍ថា អាជ្ញធរបានកំណត់អត្តសញ្ញាណជនដៃដល់បន្ថែមទៀត ហើយបច្ចុប្បន្ននេះកំពុងស្វែងរកពួកគេ។ លោក សុគន្ធា បានមានប្រសាសន៍ថា "យើងស្គាល់អត្តសញ្ញាណជនសង្ស័យបន្ថែមទៀតដូច្នេះយើងសង្ឃឹមថា យើងនឹងចាប់ខ្លួនក្នុងពេលឆាប់ៗនេះ។ លោកបានបន្ថែមថា "មន្ត្រីនគរបាលរបស់យើងបានព្យាយាមសុំការអនុញ្ញាតពីគ្រូពេទ្យដើម្បីយកជនសង្ស័យទាំងនេះចេញពីមន្ទីរពេទ្យដើម្បីសាកសួរ ប៉ុន្តែ គ្រូពេទ្យនិយាយថា ពួកគេត្រូវសម្រាកព្យាបាលបន្តទៀត"៕សារុន
ស្ត្រីម្នាក់កំពុងរត់គេចខ្លួនបន្ទាប់ពីយកកាំភ្លើងបាញ់ប្តីរបស់ខ្លួនដោយសារមានស្រីច្រើន
ក្រុមមន្ត្រីបាននិយាយកាលពីម្សិលមិញថា ស្ត្រីម្នាក់កំពុងរត់គេចខ្លួនបន្ទាប់ពីយកកាំភ្លើងអាកា៤៧បាញ់ប្តីរបស់ខ្លួននៅក្នុងខេត្តឧត្តរមានជ័យកាលពីថ្ងៃអង្គារទំនងជាខឹងដោយសារប្តីរបស់ខ្លួនមានភាពមិនស្មោះត្រង់។
យោងតាមលោក អិុន លន អធិការរងនគរបាលស្រុកបានឲ្យដឹងថា អ្នកស្រី សែម ធារី អាយុ៣០ឆ្នាំ តាមចោទថា បានយកកាំភ្លើងបាញ់ប្តីរបស់ខ្លួននៅពេលប្តីរបស់គាត់នៅបន្ទាយកងយោធពលខេមរភូមិន្ទស្ថិតក្នុងត្រពាំងប្រាសាទ ដែលគាត់បានឈរជើងនៅទីនោះ។
លោក លន បានមានប្រសាសន៍ថា ស្ត្រីរូបនេះបានបាញ់បីគ្រាប់ ដោយមួយគ្រាប់ត្រូវបុរសជាប្តីឈ្មោះ ណែម វ៉ាង អាយុ២៨ឆ្នាំ បណ្តាលឲ្យរងរបួសធ្ងន់ធ្ងរ។ លោកបានមានប្រសាសន៍ថា "គាត់ត្រូវមួយគ្រាប់ដែលចូលពីក្រោមផ្ចិត ហើយធ្លាយមកកំប៉េះគូទ"។
លោកបានបន្ថែមថា ដំបូងលោក...
ស្ត្រីម្នាក់ជាប់ពន្ធនាគារពីបទប្លន់ប្រដាប់អាវុធដើម្បីយកលុយមករៀបការ
ក្រុមមន្ត្រីបាននិយាយថា សាលាដំបូងខេត្តស្វាយរៀងបានចោទប្រកាន់ស្ត្រីម្នាក់ដែលបានចាក់អ្នករត់ម៉ូតូឌុបម្នាក់ដោយប៉ុនប៉ងប្លន់ បន្ទាប់ពីស្ត្រីរូបនេះចាញ់ល្បែងអស់ប្រាក់ដែលខ្លួនទុកសម្រាប់រៀបការនៅពេលខាងមុខ។
យោងតាមលោក គាង ស៊ុនថារ៉ូ ព្រះរាជអាជ្ញាអមសាលាដំបូងខេត្តបានឲ្យដឹងថា ខុន ស្រីឌី អាយុ២០ ជាកម្មការិនីរោងចក្រ ត្រូវបានចោទប្រកាន់កាលពីថ្ងៃសៅរ៍ ហើយបច្ចុប្បន្ននេះត្រូវបានឃុំខ្លួននៅពន្ធនាគារខេត្ត។ លោកបានមានប្រសាសន៍ថា "ជនសង្ស័យរូបនេះត្រូវបានចោទប្រកាន់ពីបទប្លន់ដោយមានទាំងការប្រើអំពើហិង្សា ពីព្រោះគាត់បានចាក់ទៅលើជនរងគ្រោះ"។
លោក កែវ សុថា នាយការិយាល័យនគរបាលព្រហ្មទណ្ឌកម្រិតស្រាលខេត្តបានមានប្រសាសន៍ថា ស្រីឌី ដែលធ្វើការនៅរោងចក្រមួយក្នុងតំបន់សេដ្ឋកិច្ចពិសេសម៉ាន់ហាតាន់ក្នុងក្រុងបាវិត ដែលគ្រោងរៀបការនៅខែមករានេះ បានចាញ់ល្បែងអស់ប្រាក់ដែលក្រុមគ្រួសារកូនកំលោះបានផ្តល់ឲ្យ។
លោក សុថា បានមានប្រសាសន៍ថា "បន្ទាប់ពីនាងចាញ់ល្បែងអស់ប្រាក់នៅកាសីុណូក្នុងក្រុងបាវិត ម្តាយរបស់នាងបានសួររកលុយនោះ ដើម្បីគាត់យកទៅចាត់ចែងរៀបមង្គលការ"។ លោកបានបន្ថែមថា លោកមិនដឹងពីចំនួនទឹកប្រាក់នោះឡើយ។ លោកបានមានប្រសាសន៍ថា "ស្ត្រីរូបនេះបានប្រាប់ម្តាយរបស់នាងថា នាងបានឲ្យលុយនេះទៅមិត្តភក្តិខ្ចី ហើយនឹងយកមកវិញនៅពេលឆាប់ៗនេះ ប៉ុន្តែ តាមពិតនាងមានគម្រោងប្លន់អ្នករត់ម៉ូតូឌុបម្នាក់ ដើម្បីបានលុយនោះមកវិញ"។
លោក សុថា បានមានប្រសាសន៍ថា ស្រីឌី បានទៅផ្សារនៅជិតកន្លែងធ្វើការរបស់នាងនៅក្នុងសង្កាត់បាវិតកាលពីថ្ងៃព្រហស្បតិ៍ ហើយនៅពេលនោះនាងបានហៅម៉ូតូឌុបជិះ ហើយបានសុំឲ្យដឹកទៅបរិវេណរោងចក្រក្បែរនោះ ដែលស្ថិតនៅក្នុងតំបន់សេដ្ឋកិច្ចពិសេស តៃសេង បាវិត។
លោកបានមានប្រសាសន៍ថា នៅពេលទៅដល់ទីនោះនាងបានទិញកាំបិតពីផ្សារ ហើយមកជិះម៉ូតូនោះវិញ ដោយប្រាប់អ្នករត់ម៉ូតូឲ្យទៅតាមផ្លូវមួយក្នុងកន្លែងស្ងាត់ស្ថិតក្នុងសង្កាត់ព្រៃអង្គុញ។ លោកបានមានប្រសាសន៍ថា "នៅពេលនោះជនសង្ស័យរូបនេះបានដកកាំបិតភ្ជង់ខ្នងជនរងគ្រោះ ហើយជនរងគ្រោះបានឈប់មូ៉តូ។ បន្ទាប់មកពួកគេបានប្រវាយប្រតប់គ្នា ហើយនាងបានចាក់គាត់ត្រូវត្រង់ពោះ"។
លោក សុថា បានមានប្រសាសន៍ថា មិត្តភក្តិម្នាក់ និងសាច់ញាតិអ្នករត់ម៉ូតូឌុប ដែលបានឃើញស្ត្រីរូបនេះទិញកាំបិត និងមានការសង្ស័យ ហើយបានមកដល់កន្លែងកើតហេតុភ្លាមៗ បន្ទាប់ពីសកម្មភាពកើតឡើង ហើយបានចាប់ ស្រីឌី ទុករហូតដល់នគរបាលក្រុងបាវិត បានមកដល់ ហើយបានចាប់ខ្លួននាង។
លោក គឹម ឡៃ នាយនគរបាលព្រហ្មទណ្ឌកម្រិតធ្ងន់ខេត្តបានមានប្រសាសន៍ថា ជនរងគ្រោះបានធូរស្រាលពីរបួសហើយនៅមន្ទីរពេទ្យបង្អែកខេត្ត។ លោកបានមានប្រសាសន៍ថា "យើងមិនខ្វល់ថា នាងព្យាយាមយកលុយមករៀបការឡើយ។ នាងប្រព្រឹត្តបទឧក្រិដ្ឋ ហើយធ្វើឲ្យជនរងគ្រោះរងរបួសធ្ងន់"៕សារុន
លោក ហ៊ុន សែន សរសើររដ្ឋាភិបាលចំពោះ ‘សមិទ្ធផលធំធេង’ ក្នុងឆ្នាំ២០១៤
នៅក្នុងសារលិខិតជូនជនរួមជាតិសម្រាប់ឆ្នាំថ្មីលោកនាយករដ្ឋមន្ត្រី ហ៊ុន សែន បានសរសើររដ្ឋាភិបាលរបស់លោក ចំពោះ"សមិទ្ធផលធំធេង"ក្នុងការធ្វើឲ្យប្រទេសមានសុខសន្តិភាព និងវិបុលភាពក្នុងឆ្នាំ២០១៤។
នៅក្នុងសារលិខិតជូនពរប្រចាំឆ្នាំរបស់លោកនាយករដ្ឋមន្ត្រី ដែលចុះហត្ថលេខាកាលពី ថ្ងៃទី២៩ ខែធ្នូ បានឆ្លុះបញ្ចាំងពីអ្វីដែលលោកបានលើកឡើងថា ជាជោគជ័យតាមរយៈ"កិច្ចប្រឹងប្រែងរបស់គ្រប់ភាគីពាក់ព័ន្ធទាំងរដ្ឋ និងឯកជន"។
សារលិខិតនោះមានខ្លឹមសារថា "កម្ពុជាបច្ចុប្បន្នមានសុខសន្តិភាព ស្ថិរភាពនយោបាយ សណ្តាប់ធ្នាប់បរិបូរណ៍ ប្រព័ន្ធហេដ្ឋារចនាសម្ព័ន្ធល្អប្រសើរ និងមានការអភិវឌ្ឍលើគ្រប់វិស័យ ដែលជាកត្តាធានាដល់ការរស់នៅរបស់ប្រជាជនប្រកបដោយសេចក្តីសុខ សុភមង្គលក្នុងភាពសុខដុមរមនា និងមានជីវភាពរស់នៅកាន់តែប្រសើរឡើង"។
សារលិខិតដដែលនេះមានខ្លឹមសារទៀតថា "ក្នុងឆ្នាំ២០១៤ ដែលនឹងកន្លងផុតទៅនាពេលបន្តិចទៀតនេះ រាជរដ្ឋាភិបាលមានមោទនភាព ដោយបានអនុវត្ត និងសម្រេចបានប្រកបដោយជោគជ័យនូវសមិទ្ធផលធំៗជាច្រើនជូនជាតិ និងប្រជាជនដោយរក្សាបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គម ស្ថិរភាពហិរញ្ញវត្ថុ និងលំនឹងម៉ាក្រូសេដ្ឋកិច្ចល្អប្រសើរ។
លោកស្រី មូរ សុខហួរ សមាជិកសភាគណបក្សប្រឆាំងបានសំដែងការមិនយល់ស្របជាមួយការវាយតម្លៃរបស់លោកនាយករដ្ឋមន្ត្រីរយៈពេល១២ខែកន្លងមកឡើយ ដោយផ្ទុយទៅវិញបានចាត់ទុកឆ្នាំ២០១៤ថា ជា "ឆ្នាំនៃការអំពាវនាវឲ្យមានលទ្ធិប្រជាជិបតេយ្យ"។
លោកស្រី មូរ សុខហួរ បានមានប្រសាសន៍ថា "ចាប់ពីថ្ងៃទី២ ទី៣ និងទី៤ខែមករា ដោយការបង្ក្រាប ដោយការបាញ់សម្លាប់កម្មកររោងចក្រកាត់ដេរ។ ការប្រើអំពើហិង្សាមកលើអ្នកតវ៉ានៅទីលានប្រជាធិបតេយ្យ ប្រាក់ខែរបស់កម្មករ ដែលមិនត្រូវបានដោះស្រាយ"។ លោកស្រីបានបន្ថែមថា "បើទោះណាជាទីលានប្រជាធិបតេយ្យត្រូវបានបិទក៏ដោយ ក៏ប្រជាជនបានតាំងចិត្តសំដែងមតិរបស់ខ្លួន និងចាត់ទុក ជាឆ្នាំនៃការតវ៉ាជាពិសេសការតវ៉ារឿងដីធ្លី"។
ទោះជាយ៉ាងណា លោកស្រី មូរ សុខហួរ បានមានប្រសាសន៍ថា ការវិវឌ្ឍនយោបាយថ្មីៗ រួមមាន "វប្បធម៌នៃការចរចា"ថ្មីរវាងគណបក្សប្រជាជនកម្ពុជា និងគណបក្សសង្គ្រោះបង្ហាញពីជំហានវិជ្ជមាន។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូបានមានប្រសាសន៍ថា លោកបានកត់សម្គាល់ឃើញការរំលោភបំពានសិទ្ធិមនុស្សធ្ងន់ធ្ងរជាច្រើនក្នុងឆ្នាំ២០១៤ រួមមានការបាញ់សម្លាប់ក្រុមអ្នកតវ៉ាកាលពីខែមករា និងការចាប់ខ្លួនសកម្មជនដីធ្លីកាលពីខែវិច្ឆិកាជាដើម។ លោកបានមានប្រសាសន៍ថា "ខ្ញុំសង្ឃឹមថា ឆ្នាំ២០១៥គណបក្សទាំងពីរនឹងបន្តចរចាគ្នាដោយសន្តិវិធី ហើយថា ពួកគេនឹងមិនប្រើប្រាស់ប្រជាជនជាឧបករណ៍នយោបាយរបស់ខ្លួនឡើយ"៕សារុន (រាយការណ៍បន្ថែមដោយ Holly Robertson)
សាលាឧទ្ធរណ៍ចោទប្រកាន់បុរសប្រាំនាក់ពីបទពាក់ព័ន្ធការលួចព្រះបរមសារីរិកធាតុ
រយៈពេលជាងមួយខែមកហើយ បន្ទាប់ពីសាលាដំបូងខេត្តកណ្តាលបានច្រានចោលរឿងក្តីប្រឆាំងបុរសប្រាំនាក់ដែលបានជាប់ពន្ធនាគាររយៈពេលមួយឆ្នាំជុំវិញការជាប់ពាក់ព័ន្ធក្នុងការបាត់ព្រះបរមសារីរិកធាតុពីព្រះសក្យមុនីចេតិយនៅភ្នំឧដុង្គមក កាលពីម្សិលមិញ សាលាឧទ្ធរណ៍ បានចោទប្រកាន់លើក្រុមនេះពីបទចោរកម្ម។
លោក ចោម ថៃ អាយុ៥៧ឆ្នាំ សៀង សារិន អាយុ៥៨ឆ្នាំ និង កា សាក់ អាយុ៤៧ឆ្នាំ ជាសន្តិសុខយាមសក្យមុនីចេតិយ លោក ផា សុខែម អាយុ៥៩ឆ្នាំជាប្រធានសន្តិសុខ និង កាន់ សុភក្ត្រ អាយុ៣៩ឆ្នាំ ជាអ្នករត់ម៉ូតូឌុប ត្រូវបានឃុំខ្លួននៅពន្ធនាគារខេត្តកណ្តាលបន្ទាប់ពីបាត់ព្រះបរមសារីរិកធាតុកាលពីខែធ្នូឆ្នាំមុន។
កាលពីខែកុម្ភៈ នគរបាលបានរកឃើញព្រះបរមសារីរិកធាតុនៅក្នុងផ្ទះរបស់លោក កែវ រស្មី ជាកសិកររស់នៅខេត្តតាកែវ ដែលបានសារភាពថា ជាអ្នកលួច ហើយបន្ទាប់មក ត្រូវបានចោទប្រកាន់ ហើយឃុំខ្លួនក្នុងពន្ធនាគារ។ ចាប់តាំងពីពេលនោះមកព្រះបរមសារីរិកធាតុត្រូវបានយកមកតម្កល់នៅក្នុងព្រះបរមរាជវាំង។
កាលពីថ្ងៃទី២០ខែវិច្ឆិកា លោក លឹម សុគន្ថា ចៅក្រមស៊ើបសួរនៅសាលាដំបូងខេត្តកណ្តាលបានលើកលែងការចោទប្រកាន់លើបុរសទាំង៥នាក់នេះ ប៉ុន្តែ លោក សម រិទ្ធីវាសនា ព្រះរាជអាជ្ញារងបានជំទាស់សេចក្តីសម្រេចនេះ ខណៈដែលបុរសទាំងនេះនៅក្នុងពន្ធនាគារនៅឡើយ។
លោក សេង ស៊ីវុត្ថា ចៅក្រមប្រធានក្រុមប្រឹក្សាជំនុំជម្រះសាលាឧទ្ធរណ៍ បានមានប្រសាសន៍កាលពីម្សិលមិញថា រឿងក្តីរបស់ពួកគេនឹងត្រូវបើកសវនាការជំនុំជម្រះនៅសាលាដំបូងខេត្ត ប៉ុន្តែមិនបានលើកឡើងថា តើតុលាការមានភ័ស្តុតាងអ្វីដើម្បីដាក់បន្ទុកលើចុងចោទនោះឡើយ។
លោក ស៊ីវុត្ថា បានមានប្រសាសន៍ថា "យើងបានសម្រេចចោទប្រកាន់ពួកគេ"។ លោកបានបន្ថែមថា បុរសទាំងនេះប្រឈមការចោទប្រកាន់ពីបទចោរកម្ម។
លោក តាន់ សេណារ៉ុង ព្រះរាជអាជ្ញានៅសាលាឧទ្ធរណ៍បានមានប្រសាសន៍ថា ជនសង្ស័យទាំងនេះមិនត្រូវបានដោះលែងពីពន្ធនាគារភ្លាមៗបន្ទាប់ពីការលើកលែងការចោទប្រកាន់ទេ ពីព្រោះមានភ័ស្តុតាងភ្ជាប់ពួកគេទៅនឹងបទឧក្រិដ្ឋ។
លោកបានមានប្រសាសន៍ថា "មានស្នាមជើង និងមានដៃជនទាំងនេះជាប់នៅលើកម្រាល ទ្វារ និងជញ្ជាំងសក្យមុនីចេតិយ។ ពួកគេមិនមានសិទ្ធិចូលទៅក្នុងព្រះសក្យមុនីចេតិយទេ ពីព្រោះពួកគេយាមនៅខាងក្រៅតែប៉ុណ្ណោះ"។
លោក សឿង ពិសិដ្ឋ មេធាវីតំណាងអ្នកទាំងប្រាំនាក់មិនអាចទាក់ទងសុំអត្ថាធិប្បាយបានទេ។
នៅក្នុងបរិវេណសាលាឧទ្ធរណ៍កាលពីម្សិលមិញ លោក សុខែម ប្រធានសន្តិសុខនៅសក្យមុនីចេតិយបានអះអាងថា លោកមិនមានទោសទេ ហើយបានអះអាងថា លោកមិនបានឃុបឃិតជាមួយលោក រស្មី ជាកសិករនោះទេ។
លោកបាននិយាយថា "វាអយុត្តិធម៌ណាស់សម្រាប់ពួកយើង ពីព្រោះយើងមិនបានជាប់ពាក់ព័ន្ធក្នុងការលួចព្រះបរមសារីរិកធាតុទេ"។
អ្នកស្រី សុខ ខេង អាយុ៤១ឆ្នាំ ជាប្រពន្ធរបស់ កា សាក់ ជាជនសង្ស័យម្នាក់ទៀតបាននិយាយថា តុលាការគួរដោះលែងអ្នកទាំងប្រាំនាក់នេះ ពីព្រោះ លោក រស្មី បានសារភាពថា ជាអ្នកលួចរួចហើយ ហើយថា គាត់បានធ្វើសកម្មភាពតែម្នាក់ឯង។
អ្នកស្រីបាននិយាយថា "ពួកគេគ្មានទោសទេ ហើយអ្នកលួចក៏ត្រូវបានរកឃើញដែរ"៕សារុន
ផ្លាស់ប្តូរតំណែងអភិបាលខេត្តកណ្តាលបន្ទាប់ពីកាន់តួនាទីបាន១៨ខែ
លោក ផៃ ប៊ុនឈឿន អភិបាលខេត្តកណ្តាលដែលត្រូវបានតែងតាំងឲ្យកាន់តួនាទីរបស់លោកកាលពីឆ្នាំមុននោះ ត្រូវបានជំនួសដោយប្រធានក្រុមប្រឹក្សាខេត្តនេះនៅក្នុងពិធីប្រកាសតែងតាំងមួយដែលធ្វើឡើងនៅក្នុងក្រុងតាខ្មៅ កាលពីព្រឹកម្សិលមិញ។
ឥឡូវនេះ លោក ប៊ុនឈឿន គ្រោងមកកាន់តួនាទីជាអនុរដ្ឋលេខាធិការក្រសួងមហាផ្ទៃ បើទោះជាលោកត្រូវបានផ្លាស់ប្តូរពីអភិបាលខេត្ត ដោយសារបច្ចុប្បន្ននេះលោកឈានចូលអាយុ៦០ឆ្នាំ ជាអាយុចូលនិវត្តរបស់មន្ត្រីរាជការក្នុងជួររដ្ឋាភិបាលក៏ដោយ។
លោក ម៉ៅ ភិរុណ អាយុ៥៤ឆ្នាំជាប្រធានក្រុមប្រឹក្សាខេត្តកណ្តាលត្រូវបានតែងតាំងផ្លូវការជាអភិបាលខេត្តនេះបន្ទាប់ពីត្រូវបានតែងតាំងឲ្យកាន់តួនាទីនេះកាលពីថ្ងៃទី១៨ ខែធ្នូ។
លោកបានមានប្រសាសន៍តាមទូរស័ព្ទបន្ទាប់ពីពិធីប្រកាសតែងតាំងថា "ខ្ញុំកើតនៅឆ្នាំ១៩៦០ ដូច្នេះខ្ញុំមិនទាន់ដល់អាយុចូលនិវត្តទេ ហើយខ្ញុំត្រូវបានជ្រើសរើសជាប្រធានក្រុមប្រឹក្សាខេត្តនេះ ដូច្នេះខ្ញុំត្រូវបានតែងតាំងជាអភិបាលខេត្ត។ ខ្ញុំចាប់ផ្តើមកាន់តួនាទីរបស់ខ្ញុំចាប់ពីថ្ងៃនេះទៅ"។
លោក ភិរុណ បានមានប្រសាសន៍ថា លោកនឹងផ្តោតលើការផ្តល់សេវាសាធារណៈដល់ប្រជាពលរដ្ឋក្នុងខេត្តកណ្តាលឲ្យបានល្អប្រសើរ។
លោកបានមានប្រសាសន៍ថា "ខ្ញុំមានអារម្មណ៍រំភើបរីករាយណាស់អំពីការតែងតាំងនេះ។ ហើយរឹតតែសំខាន់ទៅទៀតនោះ ខ្ញុំនឹងពង្រឹងការផ្តល់សេវាសាធារណៈរួមមានការកែលម្អហេដ្ឋារចនាសម្ព័ន្ធ សណ្តាប់ធ្នាប់ សន្តិសុខ សុវត្ថិភាព និងលើកកម្ពស់ការវិនិយោគនិងពាណិជ្ជកម្មឯកជន"។
លោក ប៊ុនឈឿន គឺជាសមាជិកសភាគណបក្សប្រជាជនកម្ពុជាចាប់ពីឆ្នាំ២០០៣ ដល់ឆ្នាំ២០០៧។ បន្ទាប់មក លោកបម្រើការជាអភិបាលរងខេត្តកណ្តាលរហូតដល់ខែឧសភា ឆ្នាំ២០១៣ នៅពេលរដ្ឋាភិបាលបានដោះដូរអភិបាលខេត្តមួយចំនួននៅក្នុងប្រទេសនៅមុនការបោះឆ្នោតជាតិនាឆ្នាំនោះ។
លោកបានមានប្រសាសន៍ថា "ខ្ញុំត្រូវបានតែងតាំង...ជាអនុរដ្ឋលេខាធិការក្រសួងមហាផ្ទៃ ប៉ុន្តែខ្ញុំមិនទាន់ប្រាកដថា តើខ្ញុំនឹងកាន់តួនាទីរបស់ខ្ញុំនៅពេលណានោះឡើយ។ ប្រហែលជានៅសប្តាហ៍ក្រោយ អាស្រ័យលើឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ"។
លោកបានបន្ថែមថា "ទោះយ៉ាងណា ខ្ញុំជឿថា ប្រហែលជានៅសប្តាហ៍ក្រោយ ពីព្រោះមិនទុកពេលឲ្យយើងទំនេរយូរទេ"។
លោក ប៊ុនឈឿន បានបន្តថា "នឹងមានការប្រជុំផ្ទៃក្នុងដើម្បីពិភាក្សាអំពីការទទួលខុសត្រូវរបស់ខ្ញុំនៅទីនេះ។ខ្ញុំមានអារម្មណ៍សប្បាយរីករាយណាស់ដែលរដ្ឋាភិបាលបានផ្តល់ឱកាសនេះដល់ខ្ញុំ ពីព្រោះតាមពិតទៅ ខ្ញុំដល់អាយុចូលនិវត្តទៅហើយ"៕សារុន
សាលាឧទ្ធរណ៍បើកសវនាការសម្រេចលើសំណើសុំនៅក្រៅឃុំរបស់ព្រះសង្ឃដែលត្រូវបានចាប់ផ្សឹក
កាលពីម្សិលមិញ សាលាឧទ្ធរណ៍បានបើកសវនាការសម្រេចលើសំណើសុំនៅក្រៅឃុំសម្រាប់ព្រះសង្ឃពីរអង្គដែលត្រូវបានចាប់ផ្សឹក និងចោទប្រកាន់ពីបទចូលរួមក្នុងសមាគមទុច្ចរិត ក្រោយពីត្រូវចាប់ខ្លួនកាលពីខែមុន ខណៈពេលព្រះតេជគុណទាំងពីរកំពុងយួរបាវទង់ជាតិទៅកាន់កន្លែងហែក្បួនតវ៉ាមួយតាមការគ្រោងទុក។
នគរបាលបានចាប់ខ្លួនព្រះតេជគុណ សាង កុសល ព្រះជន្ម១៩វស្សា និងព្រះតេជគុណ ឃិត វណ្ណៈ ព្រះជន្ម២៦វស្សាកាលពីថ្ងៃទី១២ ខែវិច្ឆិកា ខណៈពេលព្រះអង្គទាំងពីរបានចូលទៅជិតចំណុចចាប់ផ្តើមហែលក្បួនតវ៉ា ដោយអះអាងថា ទង់ជាតិទាំងនោះបង្កគ្រោះថ្នាក់ពីព្រោះវាចងភ្ជាប់នឹងដំបងឈើ។
ព្រះតេជគុណទាំងពីរត្រូវបានចោទប្រកាន់ពីបទចូលរួមក្នុងសមាគមទុច្ចរិតមួយ ប៉ុន្តែអាជ្ញាធរបានបដិសេធមិនបញ្ជាក់អត្តសញ្ញាណសមាគមនេះទេ។
អន្ទិតទាំងពីរបានអះអាងថា ខ្លួនគ្មានកំហុសទេនៅពេលចាកចេញពីសវនាការបិទទ្វារកាលពីម្សិលមិញ ហើយលោកស្រី សំ សុគន្ធា មេធាវីរបស់អ្នកទាំងពីរបានមានប្រសាសន៍ថា លោកស្រីបានជំរុញឲ្យតុលាការដោះលែងអ្នកទាំងពីរឲ្យនៅក្រៅឃុំ។
លោកស្រីបានមានប្រសាសន៍ថា...
លោក ហង្ស វុទ្ធី និងអ្នកទោសមួយចំនួនទៀតត្រូវបានផ្ទេរទៅ ពន្ធនាគារក្នុងខេត្តត្បូងឃ្មុំ
រយៈពេលជាងប្រាំបីឆ្នាំមកហើយ លោក ហង្ស វុទ្ធី បានរត់ចេញពីពន្ធនាគារព្រៃស ក្នុងរាជធានីភ្នំពេញ ដោយទើបតែប្រគល់ខ្លួនឲ្យអាជ្ញាធរកាលពីឆ្នាំ២០១២នោះ បានអះអាងថា លោកត្រូវគេបង្ខំឲ្យរត់ចេញទេ។
មន្ត្រីម្នាក់បាននិយាយថា កាលពីដើមសប្តាហ៍នេះ អតីតមន្ត្រីនគរបាលរាជធានីដែលអបយសរូបនេះបានចេញពីពន្ធនាគារម្តងទៀត ក្នុងពេលនេះក្នុងនាមជាអ្នកទោសម្នាក់ក្នុងចំណោមអ្នកទោស១០០នាក់ដែលត្រូវបានបញ្ជូនទៅពន្ធនាគារដែលមានការយាមកាមតឹងរ៉ឹងនៅក្នុងខេត្តត្បូងឃ្មុំដើម្បីជួយសម្រាលអ្នកទោសដ៏ណែនណាន់តាន់តាប់នៅពន្ធនាគារក្នុងរាជធានីភ្នំពេញ។
លោក គា សុវណ្ណា ប្រធានមណ្ឌលអប់រំកែប្រែ៣ក្នុងខេត្តត្បូងឃ្មុំបានមានប្រសាសន៍ថា "វាជានីតិវិធីក្នុងការផ្ទេរអ្នកទោសមកទីនេះ ពីព្រោះពន្ធនាគារព្រៃសមានអ្នកទោសច្រើនណែនណាន់តាន់តាប់ ដូច្នេះហើយយើងត្រូវរំលែកគ្នាខ្លះ"។
លោកបានបន្ថែមថា ឥឡូវនេះមានអ្នកទោសចំនួន១.៤៥៦នាក់រួមទាំងលោក ហង្ស វុទ្ធី នៅក្នុងពន្ធនាគារដែលអាចដាក់អ្នកទោសបានចំនួន១.៦០០នាក់។
លោក ហង្ស វុទ្ធី អតីតនាយរងនគរបាលព្រហ្មទណ្ឌរាជធានីភ្នំពេញ ត្រូវបានផ្តន្ទាទោសឲ្យជាប់ពន្ធនាគាររយៈពេល៤៥ឆ្នាំកាលពីឆ្នាំ២០០៦ពីបទពាក់ព័ន្ធការសម្លាប់លោក សុខ សេដ្ឋាមុនី ចៅក្រមសាលាដំបូងរាជធានីភ្នំពេញកាលពីឆ្នាំ២០០៣។
ចាប់តាំងពីពេលនោះមក លោកត្រូវបានគេភ្ជាប់ទៅនឹងការធ្វើឃាតជាច្រើន និងគម្រោងវាយប្រហារដែលរៀបចំឡើងដោយលោក ហេង ពៅ អតីតស្នងការរាជធានីភ្នំពេញ។
យោងតាមនគរបាលបានឲ្យដឹងថា ដើម្បីរត់ចេញបានកាលពីឆ្នាំ២០០៦ លោក ហង្ស វុទ្ធី និងអ្នកទោស១១នាក់ទៀតបានចង និងបិទមាត់អ្នកទោសប្រាំនាក់ បានអារចេញតាមចម្រឹងបង្អួច ហើយលោតមកដីដោយប្រើក្រណាត់ និងមុងធ្វើជាខ្សែ។
លោក ហង្ស វុទ្ធី មិនបានបង្ហាញខ្លួននៅសវនាការជំនុំជម្រះនៅតុលាការកំពូលទេកាលពីខែតុលា ដែលក្នុងនោះ លោក ហេង ពៅ និងអ្នកទោសមួយចំនួនទៀតបានអះអាងថា ពួកគេមិនមានទោសទេ ប៉ុន្តែ ការផ្តន្ទាទោសរបស់ពួកគេត្រូវបានតម្កល់។
អំឡុងសវនាការ ចុងចោទទាំងនោះបានអះអាងថា លោក ហង្ស វុទ្ធី មិនត្រូវបានកោះហៅឲ្យមកចូលរួមសវនាការទេ ពីព្រោះលោកមានព័ត៌មានដែលបង្ហាញថា ក្រុមនេះត្រូវបានទម្លាក់កំហុសដោយលោក ម៉ក់ ជីតូ ដែលបច្ចុប្បន្ននេះជាប្រធាននាយកដ្ឋានកណ្តាលយុត្តិធម៌ក្រសួងមហាផ្ទៃ។
អ្នកស្រី ស៊ុន សុភ័ណ អាយុ៣៤ឆ្នាំជាប្អូនស្រីរបស់លោក ហង្ស វុទ្ធី បាននិយាយកាលពីម្សិលមិញថា អ្នកស្រីបានទទួលការហៅទូរស័ព្ទកាលពីព្រឹកថ្ងៃសៅរ៍ដោយប្រាប់អ្នកស្រីថា បងប្រុសរបស់អ្នកស្រីហៀបនឹងត្រូវបញ្ជូនចេញពីរាជធានីហើយ។
អ្នកស្រីបានបន្ថែមថា "ពួកគេមិនបានប្រាប់ពីមូលហេតុទេ។ ខ្ញុំបានទៅសួរសុខទុក្ខគាត់កាលពីថ្ងៃសៅរ៍ ហើយគាត់បានប្រាប់ខ្ញុំថា គាត់បារម្ភថា ពួកគេនឹងយកគាត់ចេញដើម្បីសម្លាប់គាត់បំបិទមាត់"។
លោក គា សុវណ្ណា ប្រធានពន្ធនាគារបានមានប្រសាសន៍ថា "នេះគឺជាការចោទប្រកាន់ពីមនុស្សមួយចំនួនដែលគ្មានការអប់រំ"៕សារុន
អភិបាលខេត្តតាកែវយល់ព្រមបញ្ចប់អាជ្ញាប័ណ្ណសម្រាប់សិទ្ធិផ្តាច់មុខធ្វើប្រតិបត្តិការទីសត្តឃាត
អភិបាលខេត្តតាកែវបានមានប្រសាសន៍កាលពីម្សិលមិញថា លោកនឹងមិនបន្តកិច្ចសន្យាសម្រាប់ក្រុមហ៊ុនឯកជនមួយដែលមានសិទ្ធិផ្តាច់មុខធ្វើប្រតិបត្តិការលើទីសត្តឃាតនានាទូទាំងខេត្តនេះឡើយ បន្ទាប់ពីពេជ្ឈឃាតជ្រូកមួយក្រុមបានធ្វើញត្តិជូនអភិបាលក្រុងដូនកែវកាលពីថ្ងៃសុក្រ។
កាលពីឆ្នាំ២០០២ ក្រសួងកសិកម្មបានផ្តល់អាជ្ញាប័ណ្ណឲ្យក្រុមហ៊ុន ហូយ ហ៊ាង (Hoy Hieng Company) ធ្វើប្រតិបត្តិការទីសត្តឃាតទាំងអស់ក្នុងខេត្តនេះ ធ្វើឲ្យក្រុមពេជ្ឈឃាតក្នុងមូលដ្ឋានគ្មានជម្រើសក្រៅតែពីប្រើប្រាស់ទីសត្តឃាតរបស់ក្រុមហ៊ុននេះ។
ប៉ុន្តែ ដោយអាជ្ញាប័ណ្ណនេះត្រូវផុតសុពលភាពនៅថ្ងៃនេះ កាលពីសប្តាហ៍មុន តំណាងក្រុមអាជីវករទីសត្តឃាតបានធ្វើញត្តិជូនលោក មុល វិចិត្រ អភិបាលក្រុងដូនកែវ ឲ្យលុបចោលអាជ្ញាប័ណ្ណនេះ។
សំណើរបស់ពួកគាត់ត្រូវបានបញ្ជូនបន្តទៅលោកអភិបាលខេត្ត ឡាយ វណ្ណៈ ដែលបានមានប្រសាសន៍កាលពីម្សិលមិញថា លោកនឹងមិនបន្តអាជ្ញាប័ណ្ណរបស់ក្រុមហ៊ុន ហូយ ហ៊ាង ទេ ហើយក៏មិនផ្តល់អាជ្ញាប័ណ្ណឲ្យពួកគេគ្រប់គ្រងទីសត្តឃាតនៅក្នុងខេត្តនេះដែរនៅពេលអនាគត។
លោកបានមានប្រសាសន៍ថា "យើងនឹងអនុញ្ញាតឲ្យក្រុមហ៊ុនផ្សេងៗទៀតដេញថ្លៃសម្រាប់ការងារនេះ"។ លោកបានលើកឡើងបន្ថែមទៀតថា នៅពេលជ្រើសរើសក្រុមហ៊ុនថ្មីដើម្បីជំនួសក្រុមហ៊ុន ហូយ ហ៊ាង ខេត្តនឹងយកទុក្ខលំបាករបស់ក្រុមពេជ្ឈឃាតទៅពិចារណា។
ពីមុនពួកគាត់ធ្លាប់ត្អូញត្អែរថា ទីសត្តឃាតរបស់ក្រុមហ៊ុន ហូយ ហ៊ាង គ្មានអនាម័យ គ្មានអគ្គិសនីប្រើប្រាស់គ្រប់គ្រាន់ និងដំបូលទាបពេកធ្វើឲ្យរំុផ្សេង។ ពួកគាត់ក៏បានលើកឡើងដែរថា ក្រុមហ៊ុនយកថ្លៃពីពួកគាត់សម្រាប់ការសម្លាប់ជ្រូកមួយក្បាល ថ្លៃជាងតម្លៃដែលមានចែងនៅក្នុងកិច្ចសន្យា។
លោក ឡាយ វណ្ណៈ បានមានប្រសាសន៍ថា "ខ្ញុំយល់ស្របនិងគាំទ្រសំណើរបស់អាជីវករទាំងស្រុង"។
លោក ប៊ុន សេងលី អាយុ៤៥ឆ្នាំជាអាជីវករម្នាក់ក្នុងចំណោមអាជីវករដែលបានចុះហត្ថលេខាលើញត្តិនេះ បាននិយាយថា លោកស្វាគមន៍ការសម្រេចរបស់លោកអភិបាលខេត្តក្នុងការបើកការដេញថ្លៃ ប៉ុន្តែ លុះត្រាតែក្រុមហ៊ុនថ្មីមានឆន្ទៈធ្វើឲ្យស្ថានភាពការងារល្អប្រសើរឡើង។
លោកបាននិយាយទៀតថា "បើអាជ្ញាធរេខត្ត គ្រាន់តែយកក្រុមហ៊ុនមួយមកជំនួសក្រុមហ៊ុនចាស់ ហើយមិនកែប្រែអ្វីទាំងអស់នោះ យើងនឹងបន្តធ្វើការតវ៉ា"។លោកបាននិយាយបន្តថា កាលពីឆ្នាំ២០០២ មានអាជីវករតែបួន ឬប្រាំនាក់ប៉ុណ្ណោះនៅតាមទីសត្តឃាតនីមួយៗ ប៉ុន្តែ ពេលនេះមានដល់ទៅ៤០នាក់ឯណោះ។
លោកបានលើកឡើងថា "តំបន់នោះគួរឲ្យខ្ពើម វាកខ្វក់។ បើអតិថិជនដឹង តើពួកគេគិតយ៉ាងណា? អ្នកណាបន្តទិញសាច់ជ្រូករបស់យើង?”។
ចំណែកឯតំណាងក្រុមហ៊ុន ហូយ ហ៊ាង មិនអាចទាក់ទងសុំការបំភ្លឺបានទេពាក់ព័ន្ធនឹងបញ្ហានេះ៕សុខុម
មន្ត្រីក្នុងជួររដ្ឋាភិបាលផ្តល់ជំនួយដល់អង្គការរបស់លោកស្រី ម៉ម សូម៉ាលី
នៅពេលលោកស្រី ម៉ម សូមា៉លី ដែលជាសកម្មជនប្រឆាំងការជួញដូរមនុស្សធ្លាប់មានរឿងអាស្រូវបានខិតខំទាក់ទាញម្ចាស់ជំនួយអន្តរជាតិសម្រាប់អង្គការអាហ្វេសីប(Afesip) ដែលបានបិទទ្វាររបស់លោកស្រីនោះ លោកស្រីនៅតែមានអ្នកគាំទ្រដ៏សំខាន់ៗនៅក្នុងជួររដ្ឋាភិបាលកម្ពុជា ក្នុងនោះមានរួមទាំងលោកនាយករដ្ឋមន្ត្រីផងដែរ។
លោកស្រី ម៉ម សុមាលី បានលាលែងពីតំណែងជាប្រធានមូលនិធិ ម៉ម សូម៉ាលី ដែលដើរតួនាទីជាអ្នកកៀងគរមូលនិធិសម្រាប់អង្គការអាហ្វេសីប កាលពីខែឧសភា បន្ទាប់ពីកាសែត Newsweek បានលាតត្រដាង ថា លោកស្រីបានប្រឌិតរឿងអតីតកាលជាទាសករផ្លូវភេទរបស់ខ្លួន ហើយបានបង្រៀនស្ត្រីក្មេងៗឲ្យចេះភូតកុហក់អំពីរឿងអតីតកាលរបស់ខ្លួនដែរដើម្បីកៀងគរមូលនិធិ។
ប៉ុន្តែ នៅក្នុងលិខិតមួយដែលគេបង្ហោះតាមអីុនធើណិតកាលពីសប្តាហ៍មុន លោកស្រី ម៉ម សូម៉ាលី បានខិតខំអំពាវនាវរកជំនួយសម្រាប់អង្គការថ្មីរបស់លោកស្រី គឺ"មូលនិធិ ម៉ម សូម៉ាលី ថ្មី៖ សំឡេងនៃការផ្លាស់ប្តូរ" ដែលលោកស្រីបានលើកឡើងថា "វានឹងបូករួមបញ្ចូលគ្នានៃធាតុផ្សំការងារ ដែលអង្គការអាហ្វេសីប និងមូលនិធិ ម៉ម សូម៉ាលី ធ្លាប់បានធ្វើពីមុនមក។
លិខិតនេះត្រូវបានធ្វើឡើង បន្ទាប់ពីមានកិច្ចប្រជុំយុទ្ធសាស្ត្រមួយចំនួន ដែលធ្វើឡើងនៅក្នុងប្រទេសកម្ពុជាកាលពីដើមខែនេះដោយមានការចូលរួមពីសំណាក់ម្ចាស់ជំនួយអន្តរជាតិមួយចំនួនតូចក្នុងគោលបំណងរៀបចំផែនការដើម្បីធ្វើឲ្យអង្គការអាហ្វេសីបរស់ឡើងវិញ។ អង្គការអាហ្វេសីបបានបិទទ្វារ ដោយសារតែការផ្តាច់មូលនិធិ បន្ទាប់ពីមានការលាតត្រដាងអំពីរឿងរ៉ាវអាស្រូវរបស់លោកស្រី ម៉ម សូម៉ាលី ។
យោងតាមការបង្ហោះមួយនៅលើគេហទំព័រអគ្គស្នងការដ្ឋាននគរបាលជាតិកាលពីថ្ងៃច័ន្ទ ភរិយា និងកូនៗរបស់លោក នេត សាវឿន អគ្គស្នងការនគរបាលជាតិបានធ្វើដំណើរទៅកាន់មជ្ឈមណ្ឌលបណ្តុះបណ្តាលវិជ្ជាជីវៈ និងស្តារនីតិសម្បទារបស់អង្គការអាហ្វេសីប នៅក្នុងស្រុកកងមាស ខេត្តកំពង់ចាមជាទីដែលពួកគាត់បានបរិច្ចាគប្រាក់ និងស្បៀងអាហារ។
ការបង្ហោះនោះបានដកស្រង់សំដីរបស់លោកស្រី ម៉ម សូម៉ាលី មក ថាចាប់តាំងពីមជ្ឈមណ្ឌលនេះបានបើកកាលពីឆ្នាំ២០០៨មក មជ្ឈមណ្ឌលបានទទួលយកក្មេងៗចំនួន៣២៤នាក់ក្នុងនោះមានជនរងគ្រោះដោយសារការជួញដូរចំនួន១១១នាក់ ជនរងគ្រោះដោយសារការចាប់រំលោភចំនួន១០១នាក់ និង១០៩នាក់ទៀតគឺទទួលបានពី"ក្រុមងាយរងគ្រោះ"។
ការបង្ហោះនោះមានខ្លឹមសារដូច្នេះថា "ស្របពេលជាមួយគ្នានេះដែរ លោកស្រី ម៉ម សូម៉ាលី ក៏បានសម្ដែងការដឹងគុណយ៉ាងជ្រាលជ្រៅចំពោះសម្តេច តេជោ ហ៊ុន សែន និងសម្តេច គិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក៏ដូចជាកូនស្រីនិងកូនប្រុសរបស់ពួកគាត់ដែលតែងតែផ្តល់ថវិកាចំនួន៥.០០០ដុល្លាររាល់ខែសម្រាប់មជ្ឈមណ្ឌលនេះផងដែរ"។
នៅក្នុងទំព័រហ្វេសប៊ុករបស់លោកស្រីកាលពីថ្ងៃច័ន្ទ លោកស្រី ម៉ម សូម៉ាលី បានថ្លែងអំណរគុណដល់នាយឧត្តមសេនីយ៍ នេត សារឿន និងភរិយារបស់លោក គឺលោកស្រី ហ៊ុន គឹមឡេង ដែលជាក្មួយស្រីរបស់លោកនាយករដ្ឋមន្ត្រី សម្រាប់ចិត្តសប្បុរសធម៌ និងការយកចិត្តទុកដាក់ខ្ពស់ចំពោះជនរងគ្រោះ និងអ្នករស់រានមានជីវិត។
កាលពីខែតុលា លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថា រដ្ឋាភិបាលនឹងមិនអនុញ្ញាតឲ្យលោកស្រី ម៉ម សូម៉ាលី បើកអង្គការថ្មីមួយទៀតនៅក្នុងប្រទេសកម្ពុជាឡើយ បន្ទាប់ពីមានការលាតត្រដាងរឿងអាស្រូវ ប៉ុន្តែ លោកបានដកការលើកឡើងរបស់លោកវិញត្រឹមតែប៉ុន្មានថ្ងៃក្រោយប៉ុណ្ណោះ។
អង្គការថ្មីរបស់លោកស្រី ម៉ម សូម៉ាលី ដែលមានទីស្នាក់ការកណ្តាលនៅក្នុងរដ្ឋតិចសាសគឺកំពុងត្រូវបានដឹកនាំរួមគ្នាដោយលោកស្រី និងលោកស្រី Rigmor Schneider អតីតនាយកប្រតិបត្តិមូលនិធិ ម៉ម សូម៉ាលី ។ លោកស្រី Schneider បានប្រាប់ទីភ្នាក់ងារព័ត៌មាន រ៉យទ័រ នៅក្នុងកិច្ចសម្ភាសមួយកាលពីសប្តាហ៍មុនថា លោកស្រីនៅតែជួយគាំទ្រលោកស្រី ម៉ម សូម៉ាលី ដែលលើកឡើងថា លោកស្រីគ្មានអ្វីត្រូវលាក់បាំងអំពីរឿងអតីតរបស់អ្នកស្រីនោះ។
យោងតាមទីភ្នាក់ងារព័ត៌មានរ៉យទ័របានឲ្យដឹងថា តារាសម្ដែងស្រី Susan Sarandon ដែលធ្លាប់ជាសមាជិកក្រុមប្រឹក្សានៅមូលនិធិ ម៉ម សូម៉ាលី ក៏ជាសមាជិកនៃក្រុមប្រឹក្សារបស់អង្គការថ្មីនេះដែរ៕ស៊ុយឈាង
Latest news
© 2021, ដេលី. All rights reserved.