លោក ទៀ បាញ់ ចោទអ្នកប្រឆាំងនៅក្រៅប្រទេសថាព្យាយាមបំបែកទំនាក់ទំនងកម្ពុជា-វៀតណាម

អតីតរដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បានចោទក្រុមអ្នកនយោបាយប្រឆាំងដែលរស់នៅក្រៅប្រទេសថា ព្យាយាមបង្កការបែកបាក់រវាងកម្ពុជា និងវៀតណាម តាមរយៈការរិះគន់ដំណើររបស់លោក ហ៊ុន សែន ទៅកាន់ប្រទេសវៀតណាមកាលពីឆ្នាំ១៩៧៧។

ថ្លែងក្នុងពិធីរំលឹកខួបលើកទី៤៩ នៃដំណើរឆ្ពោះទៅផ្តួលរំលំរបបកម្ពុជាប្រជាធិបតេយ្យ នៅថ្ងៃសៅរ៍ លោក ទៀ បាញ់ បាននិយាយថា ការចោទប្រកាន់ថា លោក ហ៊ុន សែន បាននាំកងទ័ពវៀតណាមចូលឈ្លានពានកម្ពុជា គឺជាការញុះញង់ដែលមានគោលបំណងបំផ្លាញសាមគ្គីភាពរវាងប្រទេសទាំងពីរ។

លោកបាននិយាយថា ការព្យាយាមបែបនេះ «តែងតែបរាជ័យ» ហើយបានអះអាងថា ដំណើររបស់លោក ហ៊ុន សែន ទៅកាន់វៀតណាមកាលពី ៤៩ ឆ្នាំមុន គឺជាព្រឹត្តិការណ៍ប្រវត្តិសាស្ត្រដែលនាំទៅដល់ការផ្តួលរំលំរបបខ្មែរក្រហមរបស់លោក ប៉ុល ពត។

ការលើកឡើងរបស់លោក ទៀ បាញ់ ធ្វើឡើងបន្ទាប់ពីលោក អ៊ុំ សំអាន សមាជិកនៃរដ្ឋាភិបាលកម្ពុជាឯករាជ្យ ២៣ តុលា ដែលមានលោក សម រង្ស៊ី ជាអ្នកដឹកនាំ បានរិះគន់ដំណើររបស់លោក ហ៊ុន សែន ទៅកាន់វៀតណាមក្នុងឆ្នាំ១៩៧៧។

ក្នុងការបង្ហោះលើបណ្តាញសង្គមហ្វេសប៊ុកកាលពីថ្ងៃទី១៥ មិថុនា លោក អ៊ុំ សំអាន បានសរសេរថា ការចាកចេញទៅវៀតណាមរបស់លោក ហ៊ុន សែន គឺជាការរត់គេចពីការសម្លាប់ក្រោមរបបខ្មែរក្រហម មិនមែនជាទង្វើដែលជំរុញដោយស្មារតីស្នេហាជាតិឡើយ។

លោក អ៊ុំ សំអាន ក៏បានចោទជាសំណួរអំពីការចុះហត្ថលេខាលើកិច្ចព្រមព្រៀងព្រំដែនរវាងកម្ពុជា និងវៀតណាមនៅទសវត្សរ៍ឆ្នាំ១៩៨០ និងការអនុញ្ញាតឱ្យជនជាតិវៀតណាមចូលមករស់នៅក្នុងប្រទេសកម្ពុជា។

ជាការឆ្លើយតប លោក ទៀ បាញ់ បាននិយាយថា ដំណើររបស់លោក ហ៊ុន សែន ទៅវៀតណាម គឺជា «ការបូជាឈាមស្រស់ សាច់ស្រស់» ដើម្បីរំដោះប្រទេសចេញពីរបបខ្មែរក្រហម និងបង្កើតលក្ខខណ្ឌសម្រាប់ការកសាងប្រទេសឡើងវិញ។

ដំណើររបស់លោក ហ៊ុន សែន ទៅកាន់វៀតណាមនៅឆ្នាំ១៩៧៧ និងតួនាទីរបស់កងទ័ពវៀតណាមក្នុងការផ្តួលរំលំរបបខ្មែរក្រហមនៅឆ្នាំ១៩៧៩ នៅតែជាប្រធានបទដែលបង្កឱ្យមានការជជែកដេញដោលរវាងគណបក្សកាន់អំណាច និងក្រុមអ្នករិះគន់រដ្ឋាភិបាល៕

© 2026, ឌឹ ខេមបូឌា ដេលី. All rights reserved.