ក្រុមមន្ត្រីបាននិយាយកាលពីម្សិលមិញថា ស្ត្រីម្នាក់កំពុងរត់គេចខ្លួនបន្ទាប់ពីយកកាំភ្លើងអាកា៤៧បាញ់ប្តីរបស់ខ្លួននៅក្នុងខេត្តឧត្តរមានជ័យកាលពីថ្ងៃអង្គារទំនងជាខឹងដោយសារប្តីរបស់ខ្លួនមានភាពមិនស្មោះត្រង់។
យោងតាមលោក អិុន លន អធិការរងនគរបាលស្រុកបានឲ្យដឹងថា អ្នកស្រី សែម ធារី អាយុ៣០ឆ្នាំ តាមចោទថា បានយកកាំភ្លើងបាញ់ប្តីរបស់ខ្លួននៅពេលប្តីរបស់គាត់នៅបន្ទាយកងយោធពលខេមរភូមិន្ទស្ថិតក្នុងត្រពាំងប្រាសាទ ដែលគាត់បានឈរជើងនៅទីនោះ។
លោក លន បានមានប្រសាសន៍ថា ស្ត្រីរូបនេះបានបាញ់បីគ្រាប់ ដោយមួយគ្រាប់ត្រូវបុរសជាប្តីឈ្មោះ ណែម វ៉ាង អាយុ២៨ឆ្នាំ បណ្តាលឲ្យរងរបួសធ្ងន់ធ្ងរ។ លោកបានមានប្រសាសន៍ថា “គាត់ត្រូវមួយគ្រាប់ដែលចូលពីក្រោមផ្ចិត ហើយធ្លាយមកកំប៉េះគូទ”។
លោកបានបន្ថែមថា ដំបូងលោក វ៉ាងត្រូវបានបញ្ជូនទៅមន្ទីរពេទ្យបង្អែកស្រុកអន្លង់វែង ប៉ុន្តែក្រោយមកត្រូវបានបញ្ជូនបន្តទៅមន្ទីរពេទ្យបង្អែកខេត្តសៀមរាប ដោយសាររបួសធ្ងន់ធ្ងរ។
យោងតាមលោក លន បានឲ្យដឹងថា សាច់ញាតិជនរងគ្រោះបានប្រាប់នគរបាលថា ប្តីប្រពន្ធនេះឈ្លោះប្រកែកគ្នាមិនសូវលោះពេលឡើយ ដោយសារលោក វ៉ាង មានស្រីច្រើន ហើយអ្នកស្រី ធារី បានទៅកាន់បន្ទាយទាហាននោះស្ថិតក្នុងឃុំព្រះប្រឡាយ បន្ទាប់ពីឮថាប្តីរបស់ខ្លួននៅជាមួយស្រីផ្សេង។
លោក លន បានមានប្រសាសន៍ថា មិនមានសាក្សីឃើញការបាញ់នោះទេ។ លោកបានមានប្រសាសន៍ថា “ខ្ញុំគិតថា គាត់មានកំហឹងយ៉ាងខ្លាំងនៅពេលគាត់ឃើញប្តីរបស់គាត់នៅជាមួយស្រីកំណាន់ ហើយមិនអាចទប់កំហឹងបាន។ ជំហានដំបូងយើងសន្និដ្ឋានថា ករណីនេះកើតឡើងដោយសារការប្រចណ្ឌ”។
លោក នៅសំ តារារិទ្ធ អភិបាលស្រុកត្រពាំងប្រាសាទបានមានប្រសាសន៍កាលពីម្សិលមិញថា អ្នកស្រី ធារី បានរត់គេចខ្លួនពីកន្លែងកើតហេតុ បន្ទាប់ពីបាញ់ប្តីរបស់ខ្លួន ហើយកំពុងរត់គេចខ្លួននៅឡើយ។ លោកបានមានប្រសាសន៍ថា “ខ្ញុំបានបញ្ជាឲ្យកម្លាំងជំនាញស្វែងរកជនសង្ស័យរូបនេះហើយ”។
លោក នួន នៅ មេបញ្ជាការរងយោធភូមិភាគ៤នៃកងយោធពលខេមរភូមិន្ទក្នុងខេត្តឧត្តរមានជ័យបានមានប្រសាសន៍ថា លោកបានដឹងពីឧបទ្ទវហេតុនេះ ហើយបានបញ្ជាក់ថា លោក វ៉ាង ជាកូនទាហានរបស់លោក។ លោកបានមានប្រសាសន៍ថា “វាជាជម្លោះក្នុងគ្រួសារ ។ទុកឲ្យនគរបាលដោះស្រាយករណីនេះ”៕សារុន