អតីតប្រមុខរដ្ឋក្នុងរបបរដ្ឋកម្ពុជា និងជាប្រធានកិត្តិយសគណបក្សប្រជាជនកម្ពុជាជំរុញឲ្យសមាជិកបក្សរបស់ខ្លួនពង្រឹងប្រជាធិបតេយ្យផ្ទៃក្នុងបន្ថែមទៀតដើម្បីឲ្យកម្ពុជាមានការដឹកនាំរីកចម្រើនទៅមុខបាន។
ជាងនេះទៅទៀតលោកបានប្រាប់ទៅសមាជិកគណបក្សប្រជាជនកម្ពុជាទាំងអស់កុំឱ្យមានអំនួតនឹងជ័យជម្នះរបស់ខ្លួន ក្នុងរយៈពេល ៦ អាណត្តិកន្លងមកនេះខ្លាំងពេក។ លោកបន្តថា មន្រ្តីគណបក្សប្រជាជនកម្ពុជាទាំងអស់ត្រូវខិតខំបម្រើពលរដ្ឋឲ្យបានច្រើនតាមដែលអាចធ្វើទៅបាន។
ការអះអាងរបស់លោកហេង សំរិនធ្វើឡើងក្នុងកិច្ចប្រជុំសន្និបាតគណៈកម្មាធិការកណ្តាលរបស់គណបក្សប្រជាជនកម្ពុជា នៅមជ្ឈមណ្ឌលកោះពេជ្រ កាលពីព្រឹកមិញ។ មហាសន្និបាតនេះធ្វើចាប់ពីថ្ងៃទី១៨រហូតដល់ថ្ងៃទី២០ខែធ្នូឆ្នាំ២០១៨។
ប្រធានកិត្តិយសគណបក្សប្រជាជនកម្ពុជាលោក ហេង សំរិន បានសម្តែងមោទនភាពថា ការបោះឆ្នោតជ្រើសតាំងតំណាងរាស្ត្រអាណត្តិទី៦នេះដំណើរការទៅប្រកបដោយភាពសេរី ត្រឹមត្រូវ និងយុត្តិធម៌ ហើយពលរដ្ឋជាង៨០% បានចេញទៅបោះឆ្នោតឲ្យគណបក្សប្រជាជនកម្ពុជាទទួលបានជ័យជំនះភ្លូកទឹកភ្លូកដីទទួលបានអាសនៈ ទាំងអស់ចំនួន១២៥ក្នុងសភា ដែលនាំឲ្យគណបក្សកាន់អំណាចមួយនេះកាន់តែខ្លាំងទៅៗ។
ប៉ុន្តែអ្នកវិភាគឯករាជ្យលោកបណ្ឌិត ឡៅ ម៉ុងហៃ អះអាងថា ការបោះឆ្នោតកន្លងទៅមិនមែនជាការបោះឆ្នោតដោយសេរី និងយុត្តិធម៌ ហើយមិនឆ្លុះបញ្ចាំងពីឆន្ទៈរបស់ពលរដ្ឋនោះទេ ដោយសារមានការកែប្រែច្បាប់បោះឆ្នោតគណបក្សនយោបាយដើម្បីរំលាយគណបក្សសង្គ្រោះជាតិ បន្ទាប់ពីគណបក្សកាន់អំណាចបាត់បង់ប្រជាប្រិយភាពហើយ អស់យុទ្ធសាស្រ្តនយោបាយក្នុងការប្រើទប់ទល់ដោយសន្តិវិធីជាមួយក្រុមបក្សប្រឆាំង។
លោកបន្តថា ការបោះឆ្នោតកាលពីឆ្នាំ២០១៨ កន្លងទៅធ្វើឡើងដោយសារការគំរាមកំហែងផ្នែកនយោបាយ ចាប់មេដឹកនាំបក្សសង្គ្រោះជាតិដាក់ពន្ធនាគារ និងសកម្មជនបក្សប្រឆាំងជាង១០រូបដាក់ពន្ធនាគារ គាបសង្កត់សេរីភាពរបស់សង្គមស៊ីវិល និងធ្វើទុក្ខបុកម្នេញបណ្តាសារព័ត៌មានឯករាជ្យជាដើម៕