41.3 C
Phnom Penh

មន្រ្តី​បក្ស​កាន់​អំណាច​អះអាង​ថា ​ផ្ទៃក្នុង​របស់​បក្ស​សង្គ្រោះ​ជាតិ​កំពុង​មាន​ការ​បែកបាក់​​

ដោយ ឌឹ ខេមបូឌា ដេលី

បទវិភាគ

មន្រ្តី​ជាន់ខ្ពស់​នៃ​គណបក្ស​ប្រជាជន​កម្ពុជា​អះអាង​ថា​ លោក​សម រង្ស៊ី​ ប្រធាន​ស្តីទី​គណបក្ស​សង្គ្រោះ​ជាតិ​បាន​ទទួល​ស្គាល់​ការណ៍​ពិត​ អំពី​ការ​បែកបាក់​ផ្ទៃ​ក្នុង​របស់​ខ្លួន​រវាង​លោក​កឹម​ សុខា​ និង​លោក​សម រង្ស៊ី ប្រាកដ​មែន។​

អ្នក​នាំពាក្យ​គណបក្ស​ប្រជាជន​កម្ពុជា​លោក​សុខ ឥសាន្ត​ បាន​សរសេរ​នៅ​លើ​បណ្តាញ​ទំនាក់​ទំនង​សង្គម​តេឡេក្រាម ​នៅ​ថ្ងៃ​ច័ន្ទ​នេះ​ថា ​ដោយ​សារ​មាន​ការ​ទទួល​ស្គាល់​អំពី​ការ​បែក​បាក់​ផ្ទៃ​ក្នុង​របស់​គណបក្ស​សង្គ្រោះ​ជាតិ​នេះ​ហើយ​បាន​ជា​លោក​សម រង្ស៊ី ​កាលពី​ថ្ងៃ​ទី​២៣​ ខែ​ធ្នូ​ បាន​ អំពាវ​នាវ​ឲ្យ​ភាគី​ទាំង​សង​ខាង​បញ្ឈប់​វាយ​ប្រហារ​គ្នា​ត​ទៅទៀត​ចាប់ពី​ឆ្នាំ​ថ្មី​២០១៩​ត​ទៅ។​​

កាលពី​ថ្ងៃ​ទី​២៣​ខែ​ធ្នូ ​លោក​សម រង្ស៊ី​ បាន​សរសេរ​នៅក្នុង​ទំព័រ​ហ្វេសប៊ុក​របស់​លោក​ពី​ប្រទេស​បារាំង​មក​ថា​ ក្នុង​ឱកាស​បុណ្យ​ Christmas​និង​បុណ្យ​ឆ្លង​ឆ្នាំ​សាកល​២០១៨​ ផ្លាស់​ចូល​ឆ្នាំ​ថ្មី​សាកល​ ២០១៩​ខាង​មុខ​នេះ ​ក្នុង​ឋានៈ​លោក​ជា​ប្រធាន​ស្ដីទី​របស់​គណបក្ស​សង្គ្រោះ​ជាតិ​ លោក​សូម​ផ្ញើ​នូវ​សេចក្ដី​នឹក​រលឹក​ដល់​បងប្អូន​ជន​រួម​ជាតិ​ សមាជិក​សមាជិកា ​អ្នក​គាំទ្រ​គណបក្ស​សង្គ្រោះ​ជាតិ​ទាំង​ក្នុង​ និង​ក្រៅ​ប្រទេស ​ហើយ​សូម​ជូន​ពរ​ដល់​ជនរួម​ជាតិ​គ្រប់​មជ្ឈដ្ឋាន​សម្រាប់​ឆ្នាំថ្មី​សាកល​ខាង​មុខ​នេះ ​សុំ​ឱ្យ​ជន​រួមជាតិ​ទទួល​បាន​នូវ​សេចក្ដី​សុខ​ សុភ​មង្គល​ និង​រក្សា​សាមគ្គី​ភាព​ជាតិ​ ដោយ​មេត្តា​ធម៌​ រម្ងាប់​ចិត្ត​មារព្យាបាទ​ ឯកភាព​ជាតិ​ ជាឆ្នាំ​ដែល​មហា​គ្រួសារ​ខ្មែរ​អាច​ជួប​ជុំគ្នា​វិញ​ក្នុង​កំណត់​ត្រា​ជា​ប្រវត្តិ​សាស្ត្រ​សម្រាប់​កូន​ខ្មែរ​ជំនាន់​ក្រោយ​ ដើម្បី​បាន​ចូល​រួម​កសាង​និង​ការពារ​ប្រទេស​ជាតិ​ សាសនា​ និង​ការ​ពារ​រាល់​ផល​ប្រយោជន៍​ជាតិ​ខ្មែរ​ឱ្យ​បាន​ព្រម​ទាំង​មាន​ការឯក​ភាពជាតិ​ពិត​ប្រាកដ​ មិន​យក​ខ្មែរ​ណា​ជា​សត្រូវ។​
លោក​សមរង្ស៊ី​បាន​អះអាង​ថា​ លោក​មាន​ក្តី​សង្ឃឹម​យ៉ាង​មុត​មាំ​ថា​ គណបក្ស​សង្គ្រោះ​ជាតិ​នឹង​អាច​ដំណើរ​ការ​ជា​ប្រក្រតី​ដូច​ដើម​វិញ​ ហើយ​លោក​ប្រធាន​កឹម សុខា​ នឹង​មាន​សេរីភាព​ពេញ​លេញ​វិល​មក​ដឹកនាំ​គណបក្ស​សង្គ្រោះ​ជាតិ​ដើម្បី​ឈាន​ទៅ​រក​ភាព​ជោគជ័យ​ និង​ការ​ផ្លាស់​ប្តូរ​ជា​វិជ្ជមាន​តាម​យន្ត​ការ​ប្រជា​ធិបតេយ្យ។​

ជាង​នេះ​ទៅទៀត​ លោក​សម រង្ស៊ី​ប្រាកដ​ក្នុង​ចិត្ត​ថា  ​លោក​កឹម សុខា​និង​រូប​លោក​ផ្ទាល់​ជាដៃ​គូ​នយោបាយ​​ស្មោះ​ត្រង់​សម្រាប់​ជាតិ​ខ្មែរ​ និង​ជា​មនុស្ស​តែមួយ​សម្លុត​មិន​ខ្លាច​ បំបែក​មិន​បាន។​ ហេតុដូច្នេះ​សូម​ថ្នាក់ដឹក​នាំ ​និង​អ្នក​គាំទ្រ​គណបក្ស​សង្គ្រោះ​ជាតិ​ទាំងអស់​ ត្រូវ​បញ្ឈប់​ការ​យល់​ច្រឡំ ​ការ​ជេរ​ប្រមាថ​ ការ​វាយ​ប្រហារ​គ្រប់រូប​ភាព​ចាប់ពី​ឆ្នាំ​ថ្មី​នេះ​ត​ទៅ។

ទោះជាយ៉ាង​ណាក៏​ដោយ ​លោក​សុខ ឥសាន្ត​អះអាង​ថា ​ លោក​សម រង្ស៊ី​នៅតែ​មានៈ​ និង​ចចេស​និយាយ​រត់​មាត់​បោក​ប្រាស់​មហា​ជន​ថា​ សម រង្ស៊ី​និងកឹម សុខា​ជា​មនុស្ស​តែមួយ​ដដែល​ នៅ​ពេល​ដែល​មនុស្ស​ទាំង​ពីរ​នៅ​ដាច់​ដោយ​ឡែក​ពី​គ្នា ​និង​មាន​គោល​ជំហរ​ខុស​គ្នា។​

មន្រ្តី​នាំពាក្យ​របស់​គណបក្ស​ប្រជាជន​កម្ពុជា​រូប​នេះ​អះអាង​ថា​ ការ​អំពាវ​នាវ​របស់​លោក​សម រង្ស៊ី​ធ្វើ​ឡើង​នៅពេល​ដែល​មាន​រលក​បែក​បាក់​យ៉ាង​ស្រួច​ស្រាល​​រវាង​ភាគី​គាំទ្រ​លោក​សម រង្ស៊ី ​និង​ភាគី​គាំទ្រ ​លោក​កឹម សុខា​ ហើយ​ថា​ ទោះបី​លោក​សម រង្ស៊ី​ ខិត​ខំបិទ​បាំង​ការណ៍​ពិត​ក៏​ដោយ​ ការណ៍​ពិត​នៅ​តែ​ជា​ការណ៍​ពិត​ដដែល។​

The Cambodia Daily​បាន​ព្យាយាម​ទាក់ទង​លោក​សម រង្ស៊ី​ដើម្បី​សុំ​ប្រតិកម្ម​ពី​លោក​សមរង្ស៊ី​នៅ​ថ្ងៃ​ច័ន្ទ​នេះ​ដែរ​ តែ​លោក​មិន​លើក​ទូរស័ព្ទ។​

ប៉ុន្តែ​លោក​សមរង្ស៊ី​បាន​សរសេរ​នៅ​លើ​បណ្តាញ​សង្គម​ហ្វេសប៊ុក​របស់​លោក​ថា​លោក​ហ៊ុន សែន​និង​គណបក្ស​ប្រជាជន​កម្ពុជា​ កំពុង​ភ័យ​ខ្លាច​ ហើយ​ពួកគេ​កំពុង​តែ​ប្រើ​លិ្បច​គ្រប់​បែប​យ៉ាង​ដើម្បី​បំបែក​លោក​ចេញ​ពី​លោក​កឹម សុខា។​

ទោះជាយ៉ាង​ណាក៏​ដោយ ​អ្នក​ណា​ក៏​ដឹង​ដែរ​ថា ​ក្រុម​អ្នក​គាំទ្រ​លោក​សម រង្ស៊ី​និង​ក្រុម​អ្នក​គាំទ្រ​លោក​កឹម សុខា​ក្នុង​គណបក្ស​សង្រ្គោះ​ជាតិ​ កំពុង​វាយ​ប្រហារ​គ្នា​ទៅវិញ​ទៅ​មក​យ៉ាង​ជោគ​ជាំ​ជាបន្ត​បន្ទាប់​តាម​បណ្តាញ​សង្គម​ហ្វេសប៊ុក។​

ក្រុមអ្នក​ឃ្លាំមើល​និយាយ​ថា​ គណបក្ស​សង្រ្គោះ​ជាតិ​កំពុង​ប្រឈម​ការ​បែក​បាក់​ផ្ទៃនៅ​ពេល​ខាង​មុខ​ ហើយ​ការ​បែកបាក់​នេះ​ជា​ទិស​ដៅ​សំខាន់​មួយ​ដែល​លោក​ហ៊ុន សែន​ និង​គណបក្ស​ប្រជាជន​កម្ពុជា​ចង់​បាន។​

ប្រធាន​អង្គការ​តម្លាភាព​កម្ពុជា​កាលពី​ដើម​ខែ​ធ្នូ ​បាន​សរសេរ​នៅ​លើ​គណនី​ហ្វេសប៊ុក​របស់​លោក​ថា​ ប្រសិន​បើ​ក្រុម​អ្នក​គាំទ្រ​លោក​សម រង្ស៊ី​និង​ក្រុម​អ្នកគាំទ្រ​លោក​កឹម សុខា​ បន្ត​ធ្វើ​សង្រ្គាម​ពាក្យ​សម្តី​ដាក់​គ្នា​ទៀត ​លទ្ធផល​ចុង​ក្រោយ​ជម្លោះ​នេះ​កាន់​តែ​រីករាល​ដាល​ឡើងៗ​ រហូត​ឈាន​ទៅ​ដល់​ការ​ចែក​ផ្លូវ​គ្នា​ដើរ​ ហើយ​ជា​លទ្ធផល​គណបក្ស​ប្រជា​ជន​កម្ពុជា​នៅ​តែ​ឈ្នះ​ដដែល៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស