ពលរដ្ឋជាង១ពាន់នាក់ ក្នុងចំណោមពលរដ្ឋជិត២ពាន់គ្រួសារ មកពីឃុំបឹងខ្យាង ស្រុកកណ្តាលស្ទឹង ខេត្តកណ្តាល បាននាំគ្នាទាមទារលុយថ្លៃដីចំនួន២៥០ដុល្លារ ពីអាជ្ញាធរខេត្តករណីដីធ្លីជាង៤រយហិចតា ដែលពួកគាត់ធ្លាប់អាស្រ័យផលធ្វើស្រែចំការ កាប់អុស ឬរកត្រី ហើយក្រោយមកដីនោះត្រូវបានសម្បទានទៅឲ្យក្រុមហ៊ុនហេងអភិវឌ្ឍន៍។
កន្លងមកអាជ្ញាធរខេត្តធ្លាប់បានសន្យាផ្តល់សំណងចំនួន១០០ដុល្លារ ទៅឲ្យប្រជាពលរដ្ឋដើម្បីជាថ្នូរទៅនឹងការបញ្ឈប់អាស្រ័យផលលើដីនោះទៀត ប៉ុន្តែពលរដ្ឋមិនព្រមដោយសារលុយចំនួន១០០ដុល្លារនេះ មិនសមមាត្រទៅនឹងតម្លៃទីផ្សារ។
ទោះជាយ៉ាងណាក៏ដោយកាសែតThe Cambodia Dailyនៅមិនទាន់អាចសុំការបំភ្លឺពីចៅហ្វាយខេត្តកណ្តាលបាននៅឡើយទេ។
ជម្លោះដីធ្លីរវាងពលរដ្ឋនៅស្រុកកណ្ដាលស្ទឹង ខេត្តកណ្ដាលជាមួយក្រុមហ៊ុនហេងអភិវឌ្ឍន៍របស់អ្នកស្រីឧកញ៉ាសៀង ចាន់ហេង បានកើតឡើងតាំងពីឆ្នាំ ២០០៨ មកម្ល៉េះ។ ដីដែលមានជម្លោះនេះ ជាប្រភេទដីសហគមន៍ ដែលពលរដ្ឋតែនាំគ្នា អាស្រ័យផលតាមលក្ខណៈគ្រួសារជាយូរមកហើយ។
ដីមានជម្លោះនេះមានទំហំជាង៤០០ហិកតា ស្ថិតនៅក្នុងឃុំចំនួន៤ គឺ ឃុំអំពៅព្រៃ ឃុំបឹងខ្យាង ឃុំកណ្ដោក និងឃុំព្រែកស្លែង។ ក្នុងរយៈពេល១០ឆ្នាំមកនេះក្រុមប្រជាពលរដ្ឋអះអាងថា អាជ្ញាធរខេត្តបានជ្រោមជ្រែងក្រុមហ៊ុនហេងអភិវឌ្ឍន៍ជាខ្លាំង ហើយបង្ខំឲ្យពួកគេព្រមទទួលយកប្រាក់ក្នុងតម្លៃទាបមិនបំផុត៕