36 C
Phnom Penh

លោក​បណ្ឌិត​ឡៅ ម៉ុងហៃ​ស្នើឲ្យ​សមត្ថ​កិច្ច​រក​យុត្តិធម៌​ដល់​ស្រ្តី​រកស៊ី​ផ្លូវភេទ​ដែល​លង់​ទឹក​ស្លាប់​កាលពី​ពីរ​ឆ្នាំ​មុន​

ដោយ ឌឹ ខេមបូឌា ដេលី

បទវិភាគ

អ្នក​វិភាគ​ឯករាជ្យ​លោក​បណ្ឌិត​ឡៅ ម៉ុងហៃ​ បាន​ជំរុញ​ឲ្យ​សមត្ថ​កិច្ច​កម្ពុជា​ស្វែង​រក​យុត្តិធម៌​ដល់​ស្រ្តី​រក​ស៊ី​ផ្លូវ​ភេទ​ឈ្មោះ​ប៉ែន សុគន្ធា​ហៅស្រី​ម៉ៅ ដែល​ក្រុម​សន្តិសុខ​ខណ្ឌដូន​ពេញ​ដេញ​ចាប់​រហូត​ដល់​នាង​លង់​ទឹក​ស្លាប់​កាលពី​យប់​ថ្ងៃ​ទី​១ ខែ​មករា​ឆ្នាំ​២០១៧​កន្លង​ទៅ។

​លោក​បន្ត​ថា​ ករណី​ស្លាប់​ស្ត្រី​រក​ស៊ីផ្លូវ​ភេទ​រូប​នេះ​ បាន​ស្ងាត់បាត់​ស្រមោល​ដោយ​គ្មាន​ការ​ស្វែងរក​យុត្តិធម៌​ពិត​ប្រាក​ដល់​នាង​ឡើយ។ ​លោក​បណ្តិត​ឡៅ ម៉ុងហៃ​បាន​សរសេរ​នៅ​លើ​គណនី​ហ្វេសប៊ុក​របស់​​លោក​នៅ​ថ្ងៃ​អង្គារ​នេះ​ថា ​អ្នក​ស្លាប់​មិន​អាច​ស្រែក​រក​យុត្តិធម៌​បាន​ទេ​ មាន​តែ​អ្នក​ដែល​នៅ​រស់​ទេ ​ដែល​ត្រូវ​តែ​រក​យុត្តិធម៌​ឲ្យ​ពួក​គេ។​

អ្នក​វិភាគ​នយោបាយ​ចាស់​វស្សា​រូប​នេះ​បាន​សរសេរ​ថា​ បើ​ទេវតា​មិន​បាន​ជួយ​គ្នា​ទៅ​ហើយ​ តើ​មនុស្ស​អាច​ជួយ​រក​យុត្តិធម៌​ឲ្យ​ស្ត្រី​នេះ​បាន​ទេ?​លោក​បន្ត​ថា​ ការ​រក​ស៊ី​ផ្លូវ​ភេទ​មិន​មែន​ជា​បទ​ល្មើស​ទេ ​លើក​លែង​តែ​ទាក់​ទាញ​ហៅ​គេ​ឲ្យ​មាន​ ទំនាក់​ផ្លូវ​ភេទ​ទើប​ជា​បទ​ល្មើស​ដែល​ត្រូវ​ពិន័យ​ជា​ប្រាក់​ពី​ ៥​ពាន់​ ដល់​ ៥​ម៉ឺន​រៀល​ ប៉ុណ្ណោះ។​
លោក​បាន​ចោទ​​ជា​សំណួរ​ថា​ តើគួរ​ដាក់​ទណ្ឌកម្ម​ដល់​អ្នក​ទិញ​សេវា​ផ្លូវ​ភេទ​វិញ​ឬ​ទេ ​ដើម្បី​កុំ​ឲ្យ​គេ​ធ្វើ​បាប​ស្ត្រី?​

នាង​ប៉ែន សុគន្ធា​ហៅស្រី​ម៉ៅ​ជា​ស្ត្រី​រក​ស៊ី​ផ្លូវ​ភេទ​ មាន​កូន​ប្រុស​មួយ​ ពិការ​ជើង​មិន​អាច​ដើរ​បាន។​ នៅ​យប់​ថ្ងៃ​អាទិត្យ​ទី​១​ខែ​មករា​ឆ្នាំ​២០១៧ ​សន្តិសុខ​មួយ​ ក្រុម​បាន​ដេញ​ចាប់​ស្ត្រី​រក​ស៊ី​ផ្លូវ​ភេទ​មួយ​ក្រុម​ ចាប់​ផ្តើម​ពី​វត្ត​ភ្នំ​ឆ្ពោះ​ទៅ​សួន​ច្បារ​មាត់​ទន្លេសាប​ត្រង់​ចំណត​ទូក​ទេសចរណ៍​ នៅ​ក្នុង​សង្កាត់​ស្រះចក​ ខណ្ឌ​ដូនពេញ។​ ស្រ្តី​ទាំង​នោះ​បាន​រត់គេច​ពីការ​ដេញ​ចាប់​នេះ ​រួម​ទាំងនាង​ ប៉ែន សុគន្ធា​ដែរ​ ដែល​នាង​បាន​រត់​គេច​ចុះទៅ​​ច្រាំង​ទន្លេ ​ហើយ​រត់​ឆ្លង​ពី​ទូក​មួយ​ទៅ​ទូក​មួយ​ ដែល​ចត​នៅ​តាម​មាត់​ទន្លេ។​

ដោយ​ភ័យ​ស្លន់​ស្លោ​​ទាំង​យប់​ងងឹត​ផង​នោះ ​ នាង​សគុន្ធា ​បាន​ទាក់​ជើង​នឹង​ខ្សែ ហើយ​បោក​ទៅ​នឹង​ទូក​ធ្លាក់​ទៅ​ក្នុង​ទឹក។​ សាក្សី​នៅ​កន្លែង​កើត​ហេតុ​ជា​សន្តិសុខ​ដែរ​នោះ​ឲ្យ​ដឹង​ថា ​មាន​អ្នក​ឯ​ទៀត​ចង់​ជួយ​ស្រង់​នាង​សុគន្ធា​ដែរ​ តែត្រូវ​បាន​ក្រុម​សន្តិសុខ​ហាម​ថា​«កុំចេះ ​ទុក​ឲ្យ​វា​ងាប់​ទៅ»។​ ក្រុម​សន្តិសុខ​ក៏​បាន​ស្រែក​ឲ្យ​ នាង​សុគន្ធា​ឡើង​ពី​ទឹក​ហើយ​នាង​ឆ្លើយ​ដោយ​សម្លេង​ខ្សោយៗ​ថា​ នឹង​ឡើង។​ ពលរដ្ឋ​នៅក្បែរ​នោះ​ក៏​បាន​បោះខ្សែ​ទៅ​ឲ្យ​នាង​សុគន្ធា​តោង​តែ​នាង​អត់​តោង​ ហើយ​ក៏​ហូរ​តាម​ទឹក​ទៅ​បាត់​នៅ​នោះ​ទៅ៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស