30 C
Phnom Penh

លោក​គង់ គាំ​នឹង​ចូល​ខ្លួន​បំភ្លឺ​នៅមុខ​តុលាការ​អំពី​ករណី​លោក​កឹម សុខា​

ដោយ ឌឹ ខេមបូឌា ដេលី

បទវិភាគ

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​លោក​គង់ គាំ​អះអាង​ថា​ លោក​នឹង​ចូល​បំភ្លឺ​ជុំវិញ​សំណុំ​រឿង​ក្បត់​ជាតិ​របស់​លោក​កឹម សុខា​ នៅ​ចុង​ខែ​មករា​ខាង​មុខ។​

សារ​​ព័ត៌មាន​​ក្នុង​ស្រុក​បាន​ដក​ស្រង់​សម្តី​លោក​គង់ គាំ​ចុះ​ផ្សាយ​ថា ​ ក្នុង​នាម​លោក​ជា​សាក្សី ​និង​ជា​ពលរដ្ឋ​ ព្រម​ទាំង​ជា​អតីត​អ្នក​រួម​ការងារ​ជាមួយ​អតីត​ថ្នាក់​ដឹកនាំ​គណបក្ស​សង្គ្រោះ​ជាតិ​ លោក​នឹង​ចូល​បំភ្លឺ​តាម​ដីកា​កោះ​របស់​តុលាការ​ ហើយ​ថា​ លោក​មិន​បំភ្លៃ​ និង​មិន​មួល​បង្កាច់​ខុស​ពី​ការណ៍​ពិត​ឡើយ។​

កាលពី​ថ្ងៃ​ទី​២៦​ខែ​ធ្នូ​ឆ្នាំ​២០១៨​  ចៅ​ក្រម​ស៊ើប​សួរ​ លោក​គី ឫទ្ធី​ ​បាន​ចេញ​ដីកា​កោះ​ហៅ​អតីត​មន្ត្រី​ជាន់ខ្ពស់​គណបក្ស​ប្រឆាំង​​គឺ ​លោក​គង់ គាំ​ក្នុង​នាម​ជា​សាក្សី ​ឱ្យចូល​បំភ្លឺ​សំណុំ​រឿង​ព្រហ្មទណ្ឌ​ របស់​លោក​កឹម សុខា ​នៅ​ថ្ងៃ​ទី​២៣​ខែ​មករា​ ប៉ុន្តែ​ដីកានោះ​ទើប​ត្រូវ​បាន​ផ្សព្វផ្សាយ​ជា​សាធារណៈ​កាលពី​ថ្ងៃ​ម្សិលមិញ។​

កាល​ពី​ថ្ងៃ​ទី​៤​មករា​ សាលាដំបូង​រាជធានី​ភ្នំពេញ​បាន​ច្រាន​ចោល​ សំណើ​សុំ​ទម្លាក់​ចោល​ការ​ចោទ​ប្រកាន់​លើ​លោក​កឹម សុខា​ដែល​ ​ជា​សំណើ​របស់​ក្រុម​មេធាវី​របស់​លោក​ដែល​បាន​ដាក់​ពាក្យ​ស្នើ​កាលពី​ថ្ងៃ​ទី​​២៧​ខែ​ធ្នូ​ឆ្នាំ​២០១៨។​

លោក​កឹម សុខា​ត្រូវ​បាន​កម្លាំង​សមត្ថ​កិច្ច​របស់​លោក​ហ៊ុន សែន ​ផ្ទាល់​នាំគ្នា​សម្រុក​ចូល​ចាប់​ខ្លួន​ដល់​ក្នុង​ផ្ទះ​កាលពី​ថ្ងៃ​ទី​៣ ​កញ្ញា​២០១៧​ ពី​បទ​ក្បត់​ជាតិ។​ លោក​ត្រូវ​បាន​តុលាការ​សម្រេច​ឃុំ​ខ្លួន​ក្នុង​គុក​ត្រពាំង​ផ្លុង​ក្បែរ​ព្រំដែន​វៀតណាម​រយៈ​ពេល​១​ឆ្នាំ ​ហើយ​បន្ទាប់​មក​ លោក​ត្រូវ​បាន​ផ្លាស់​ប្តូរ​កន្លែង​ឃុំ​ខ្លួន​ពី​ពន្ធនាគារ​ត្រពាំង​ផ្លុង​ មក​ឃុំនៅ​ក្នុង​ផ្ទះ​របស់​លោក​ជំនួស​វិញ​កាលពី​ខែ​កញ្ញា​ឆ្នាំ​២០១៨៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស