ក្រុមគ្រួសាររបស់លោករ៉ាត់ រត្នមុនីនិងសហគមន៍ដីធ្លីមួយចំនួននៅព្រឹកថ្ងៃទី៩ខែមករាឆ្នាំ២០១៩នឺនាំគ្នាធ្វើការតវ៉ាជាលើកទី៣ នៅមុខស្ថានទូតរុស្ស៊ីវេលាម៉ោង៨ព្រឹក ដើម្បីទាមទារឲ្យមានអន្តរាគមន៍ពីរដ្ឋាភិបាលរុស្ស៊ីឲ្យមានការដោះលែងអ្នកបកប្រែ ខ្សែភាពយន្តឯកសារស្តីអំពីការជួញដូរផ្លូវភេទរូបនេះមានសេរីភាពឡើងវិញ។
លោករ៉ាត់ រត្នមុនីត្រូវបានតុលាការចោទប្រកាន់ពីបទញុះញង់ឲ្យមានការរើសអើងតាមមាត្រា៤៩៦នៃក្រមព្រហ្មទណ្ឌ ដែលត្រូវប្រឈមទៅនឹងការជាប់ទោសក្នុងពន្ធនាគារពី១ឆ្នាំទៅ៣ឆ្នាំពាក់ព័ន្ធនឹងការចូលរួមជួយផលិតខ្សែភាពយន្តឯកសារដែលមានចំណងជើងថា«ម្ដាយខ្ញុំលក់ខ្ញុំ»របស់ស្ថានីយទូរទស្សន៍ Russia Todayដែលរដ្ឋាភិបាលចាត់ទុកថា ជាការធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា ហើយជារឿងដែលមិនអាចអត់ឱនឱ្យបាន។
ប្រធានសហព័ន្ធសហជីពកម្មករសំណង់កម្ពុជា(CCTUF)លោករ៉ាត់ រត្នមុនីត្រូវបានសមត្ថកិច្ចថៃចាប់ខ្លួនកាលពីថ្ងៃទី៧ធ្នូក្នុងទីក្រុងបាងកក ខណៈលោកនិងក្រុមគ្រួសារកំពុងព្យាយាមរត់ភៀសខ្លួនទៅកាន់ប្រទេសហូឡង់(Netherland)។
ភរិយារបស់លោករ៉ាត់ រត្នមុនីគឺអ្នកស្រីឡុង គឹមហ៊ានបានប្រាប់The Cambodia Daily នៅមុនការផ្សាយនេះបន្តិចថា សមត្ថកិច្ចពន្ធនាគារព្រៃស មានការរឹតត្បិតយ៉ាងខ្លាំងអំពីការចូលជួបប្តីរបស់អ្នកស្រី។
អ្នកស្រីបន្តថា ក្រុមរបស់អ្នកស្រីនឹងនាំគ្នាធ្វើបាតុកម្មនៅមុខស្ថានទូតរុស្ស៊ី លុះត្រាតែមានដំណោះស្រាយ និងអន្តរាគមន៍ពីស្ថានទូតរុស្ស៊ីដើម្បីឲ្យមានការដោះលែងលោករ៉ាត់ រត្នមុនី ឲ្យមានសេរីភាពឡើងវិញ៕