មន្ត្រីជាន់ខ្ពស់របស់បក្សកាន់អំណាចអះអាងថា រដ្ឋាភិបាលគ្មានការព្រួយបារម្ភ និងមិនចាប់អារម្មណ៍សេចក្តីព្រាងច្បាប់របស់ក្រុមសមាជិកព្រឹទ្ធសភាសហព័ន្ធសហរដ្ឋអាមេរិកដែលមានបំណងដកប្រព័ន្ធអនុគ្រោះពន្ធទូទៅ ឬ GSPនោះឡើយ។
សារព័ត៌មានសំឡេងប្រជាធិបតេយ្យVODបានដកស្រង់សម្តីអ្នកនាំពាក្យគណបក្សប្រជាជនកម្ពុជាលោកឈឹម ផលវរុណ ចុះផ្សាយនៅថ្ងៃព្រហស្បតិ៍ថា លោកមិនចាប់អារម្មណ៍សេចក្តីព្រាងច្បាប់របស់សមាជិកព្រឹទ្ធសភាអាមេរិកទាំងនោះឡើយ ដោយសារសេចក្តីព្រាងច្បាប់នោះមិនឆ្លុះបញ្ចាំងពីឆន្ទៈរបស់ប្រធានាធិបតីអាមេរិក លោកដូណាល់ត្រាំ។
ការអះអាងរបស់លោកឈឹម ផលវរុណធ្វើឡើងក្រោយពីសមាជិកព្រឹទ្ធសភាសហរដ្ឋអាមេរិកពីររូប រួមមានលោកTed Cruz និងលោកChris Coonsបានធ្វើសេចក្តីព្រាងច្បាប់ថ្មីមួយ ដែលមានឈ្មោះថា«ច្បាប់ពាណិជ្ជកម្មកម្ពុជាឆ្នាំ២០១៩» ដើម្បីឲ្យរដ្ឋាភិបាលលោកដូណាល់ត្រាំ ដាក់ទណ្ឌកម្មដកប្រព័ន្ធអនុគ្រោះពន្ធទូទៅឬGSPពីកម្ពុជា។
លោកTed Cruzដែលជាសមាជិកព្រឹទ្ធសភាសហព័ន្ធរបស់សហរដ្ឋអាមេរិកពីរដ្ឋTexasពីខាងគណបក្សសាធារណរដ្ឋ បានបញ្ជាក់នៅក្នុងសេចក្តីថ្លែងការណ៍របស់លោកកាលពីថ្ងៃពុធថា លោកហ៊ុន សែនបាននាំគ្នាកេងប្រវ័ញ្ចប្រព័ន្ធអនុគ្រោះពន្ធសហរដ្ឋអាមេរិក និងសហគមន៍អ៊ឺរ៉ុបផ្តល់ឲ្យដល់កម្ពុជា។ លោកបន្តថា របបលោកហ៊ុន សែន ខកខានមិនបានគោរពស្តង់ដារការងារ មើលងាយដល់សុច្ចរិតភាពនៃការបោះឆ្នោតនៅកម្ពុជា និងកំពុងបោះពួយទៅរកប្រទេសចិនថែមទៀត។
នាយកអង្គការសម្ព័ន្ធភាពការងារ និងសិទ្ធិមនុស្ស លោកមឿន តុលា បានប្រាប់សារព័ត៌មានThe Cambodia Dailyនៅថ្ងៃព្រហស្បតិ៍នេះថា កម្ពុជានឹងរងផលប៉ះពាល់ជាទម្ងន់ ប្រសិនបើសហគមន៍អ៊ឺរ៉ុបដកប្រព័ន្ធអនុគ្រោះពន្ធEBAចេញពីកម្ពុជា ហើយសហរដ្ឋអាមេរិកដកប្រព័ន្ធអនុគ្រោះពន្ធទូទៅ ឬGSPពីកម្ពុជាដែរនោះ។ លោកបន្តថា កម្ពុជានឹងអាចបាត់បង់ចំណូលរបស់ខ្លួនចំនួនជិត១ពាន់លានដុល្លារសហរដ្ឋអាមេរិកក្នុងមួយឆ្នាំៗ៕