ប្រមុខដឹកនាំ និងមន្ត្រីជាន់ខ្ពស់កម្ពុជា ចាប់ពីរដ្ឋមន្ត្រីក្រសួងការបរទេស លោកប្រាក់ សុខុន លោកនាយករដ្ឋមន្ត្រីហ៊ុន សែនអង្គព្រះមហាក្សត្រ និងនៅចុងក្រោយគឺរដ្ឋមន្ត្រីក្រសួងមហាផ្ទៃ លោកស ខេង បាននាំគ្នាទៅធ្វើទស្សកិច្ចនៅប្រទេសកុម្មុនីស្តវៀតណាមជាបន្តបន្ទាប់ចាប់តាំងពីចុងខែវិច្ឆិកា២០១៨រហូតមកទល់សព្វថ្ងៃនេះ។
គេហទំព័រក្រសួងមហាផ្ទៃបានចុះផ្សាយនៅថ្ងៃសុក្រនេះថា ក្នុងការ ប្រជុំលើកទី១០ស្តីពីកិច្ចសហប្រតិបត្តិការ និងការអភិវឌ្ឍបណ្តាខេត្តជាប់ព្រំដែនកម្ពុជា-វៀតណាម កាលពីថ្ងៃទី៩និងថ្ងៃទី១០ខែមករា ក្នុងទីក្រុងហូជីមិញនោះ រដ្ឋមន្ត្រីក្រសួងមហាផ្ទៃលោកស ខេង និងរដ្ឋមន្រ្តីក្រសួងការបរទេសវៀតណាមលោកផាម ប៊ិញមីញ បានចេញសេចក្តីប្រកាសរួមគ្នាមួយថា កម្ពុជា-វៀតណាមបានប្តេជ្ញាចិត្តមិនអនុញ្ញាតឲ្យមានអង្គការចាត់តាំង ឬបុគ្គលណាមួយឬ ប្រទេសណាមួយប្រើប្រាស់ទឹកដីរបស់ប្រទេសនេះបង្កការអន្តរាយដល់សន្តិសុខជាតិ និងស្ថិរភាពរបស់ប្រទេសម្ខាងទៀតនោះឡើយ។
ក្រុមអ្នកឃ្លាំមើលនិយាយថា ការប្តេជ្ញាចិត្តរបស់កម្ពុជា និងវៀតណាម នៅពេលនេះដោយសារវៀតណាមរារាំងមិនឲ្យកម្ពុជាបាត់ចេញពីកណ្តាប់ដៃរបស់ខ្លួនធ្លាក់ទៅក្នុងការគ្រប់គ្រងរបស់ប្រទេសចិនទាំងស្រុងនោះ។
សារព័ត៌មានThe Asia Timesកាលពីខែវិច្ឆិកាឆ្នាំ២០១៨ បានចុះផ្សាយអត្ថបទរបស់ខ្លួនមួយ ដែលមានចំណងជើងថា «កម្ពុជាអាចក្លាយជាចំណុចស្នូលនៃសង្គ្រាមត្រជាក់ថ្មី ដោយសារកម្ពុជាបានផ្តល់ដីសម្បទានសេដ្ឋកិច្ចទៅឲ្យក្រុមហ៊ុនចិនជាង៤ម៉ឺន៥ពាន់ ហិកតា រយៈពេល៩៩ឆ្នាំ នៅខេត្តកោះកុង ហើយចិនបានសាងសង់កំពង់ផែសមុទ្រទឹកជ្រៅ ដែលអាចឲ្យកប៉ាល់ចម្បាំងរបស់ចិនចូលចតបាន៕