លោកហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងមេបញ្ជាការកងទ័ពជើងគោកដែលជាកូនប្រុសច្បងរបស់លោកហ៊ុន សែន បញ្ជាក់ថា បញ្ហាព្រំដែន គឺជារឿងដែលត្រូវទទួលខុសត្រូវទាំងអស់គ្នា។
លោកលោកហ៊ុន ម៉ាណែតថាការការពារទឹកដីត្រូវធ្វើឡើងតាមគ្រប់រូបភាព មិនមែនទាល់តែប្រយុទ្ធគ្នាដូចករណីព្រះវិហារទើបថា ការពារព្រំដែននោះទេ។
ការអះអាងរបស់លោកហ៊ុន ម៉ាណែតធ្វើឡើងនៅក្នុងសិក្ខាសាលា បូកសរុបលទ្ធផលការងារយោធាសន្តិសុខឆ្នាំ២០១៨និងផ្សព្វផ្សាយផែនការសកម្មភាពការងារ យោធាសន្តិសុខឆ្នាំ២០១៩ នៅទីបញ្ជាការយោធភូមិភាគទី៥ ខេត្តបាត់ដំបងកាលពីម្សិលមិញ។
សារព័ត៌មានដែលស្និទនឹងរដ្ឋាភិបាលបានដកស្រង់សម្តីលោកហ៊ុន ម៉ាណែតចុះផ្សាយថា ការប្រែក្លាយព្រំដែនពីតំបន់សមរភូមិទៅជាតំបន់មិត្តភាព និងសេដ្ឋកិច្ចត្រូវធ្វើឡើងតាមទិសដៅរបស់រដ្ឋាភិបាល ដែលមិនធ្វើអ្វីចាញ់ប្រៀបគេនោះទេ ព្រោះរឿងព្រំដែននេះគឺជារឿងយូរអង្វែង។
ប៉ុន្តែកន្លងមកអ្នកដែលឈឺឆ្អាលរឿងព្រំដែនតែងត្រូវបានអាជ្ញាធរគំរាមកំហែង វាយដំ ប្តឹងតាមផ្លូវតុលាការ និងចាប់ដាក់គុកជាដើម ដូចជាករណីអតីតមេដឹកនាំបក្សសង្រ្គោះជាតិលោកសម រង្ស៊ី ដែលត្រូវបាន រដ្ឋាភិបាលប្តឹងករណីដកបង្គោលតម្រុយព្រំដែននៅលើដីស្រែរបស់អ្នកស្រុកនៅខេត្តស្វាយរៀង កាលពីឆ្នាំ២០០៨ ហើយតុលាការបានផ្តន្ទាទោសលោកឱ្យជាប់ពន្ធនាគារជាច្រើនឆ្នាំ។
លោកអ៊ុំ សំអាន អតីតអ្នកតំណាងរាស្ត្រគណបក្សសង្រ្គោះជាតិ ដែលសកម្មនឹងបញ្ហាព្រំដែនកម្ពុជាវៀតណាម ត្រូវបានចាប់ខ្លួនកាលពីខែមេសាឆ្នាំ២០១៦នៅក្នុងខេត្តសៀមរាប ពាក់ព័ន្ធនឹងការចោទប្រកាន់រឿងប្រើប្រាស់ផែនទីក្លែងក្លាយ និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កឲ្យមានភាពវឹកវរធ្ងន់ធ្ងរដល់សន្តិសុខសង្គមនិងបទញុះញង់ឲ្យមានការរើសអើង។
ជាងនេះទៅទៀត ពលរដ្ឋខ្មែររស់នៅក្បែរព្រំដែនកម្ពុជា-វៀតណាម តែងតែបានលើកអំពីបញ្ហារំលោភបំពានពីសំណាក់ជនជាតិវៀតណាម មកលើដីស្រែ ចម្ការរបស់ខ្លួន ប៉ុន្តែនៅពេលពួកគេតវ៉ា ពួកគេតែងរងការបង្ក្រាបពីសំណាក់សមត្ថកិច្ចទៅវិញ៕