ក្រសួងមហាផ្ទៃបានសម្រេចដកតំណែងមន្ត្រីនគរបាលសេដ្ឋកិច្ច និងមន្រ្តីនគរបាលប្រឆាំងគ្រឿងញៀនពីររូបពីបទល្មើសនឹងវិន័យរបស់កងកម្លាំងនគរបាលជាតិ។
លោកនេត សាវឿន ដែលជាអគ្គស្នងការនគរបាលជាតិបានចុះហត្ថលេខាកាលពីដើមខែមករានេះ សម្រេចដកសក្តិលោកអនុសេនីយ៍ឯកពិន សុភ័ក្រមន្រ្តីនគរបាលប្រចាំនាយកដ្ឋានប្រឆាំងបទល្មើសសេដ្ឋកិច្ចឲ្យមកថ្នាក់អនុសេនីយ៍ទោ ហើយលោកអនុសេនីយ៍ឯក ស្រី វាសនា ដែលជាមន្ត្រីនគរបាលនៃមន្ទីរប្រឆាំងគ្រឿងញៀន ត្រូវបានដកឋានៈមកត្រឹមថ្នាក់អនុសេនីយ៍។
ការដកសក្តិមន្រ្តីនគរបាលទាំងពីររូបនេះធ្វើឡើង បន្ទាប់ពីកម្លាំងសមត្ថកិច្ចរបស់ក្រសួងមហាផ្ទៃឃាត់ខ្លួនមន្ត្រីនគរបាល៦រូបកាលពីថ្ងៃទី១០ខែមករា ដោយសារពួកគេបាននាំគ្នាចុះឆែកឆេរឃ្លាំងទំនិញមួយកន្លែងដែលសង្ស័យថា ផ្ទុកលាក់ទុកបារីក្លែងក្លាយ។
ពេលនោះម្ចាស់ឃ្លាំងដែលមានខ្សែធំនៅក្រសួងមហាផ្ទៃបានរាយការណ៍ជាបន្ទាន់ទៅមន្រ្តីជាន់ខ្ពស់នៃក្រសួងមហាផ្ទៃ ទើបបណ្តាលឲ្យមានការចាប់ខ្លួនដូច្នេះ៕