អតីតប្រធានគណបក្សសង្រ្គោះជាតិលោកសម រង្ស៊ីអះអាងថា លោកគឺជាមនុស្សតែម្នាក់គត់ ដែលបានជំរុញទៅសហគមន៍អន្តរជាតិយ៉ាងសកម្មឱ្យដាក់ទណ្ឌកម្មលើរដ្ឋាភិបាលលោកហ៊ុន សែន។
ការអះអាងនេះធ្វើឡើងក្រោយពេលលោកហ៊ុន សែនកាលពីថ្ងៃច័ន្ទ គំរាមថា លោកនឹងមិនអត់ឱនឱ្យក្រុមបក្សប្រឆាំងឡើយ ប្រសិនបើអន្តរជាតិដាក់ទណ្ឌកម្មសេដ្ឋកិច្ចមកលើរដ្ឋាភិបាលរបស់លោកមែននោះ។
លោកសម រង្ស៊ីបានសរសេរនៅលើគណនីហ្វេសប៊ុករបស់លោកនៅថ្ងៃអង្គារនេះប្រាប់ទៅលោកហ៊ុន សែនថា កុំខឹងគោ ហើយទៅវ៉ៃរទេះអី។ លោកសរសេរថា បើខឹងនឹងទណ្ឌកម្មពីសហភាពអឺរ៉ុប កុំទៅរករឿងអ្នកគាំទ្រគណបក្សសង្គ្រោះជាតិរាប់លាននាក់ក្នុងប្រទេសកម្ពុជាអី។ ជាងនេះទៅទៀតលោកបានទូន្មានលោកហ៊ុន សែនថា បើចង់បញ្ចៀសទណ្ឌកម្មទាំងនោះ ហើយអាណិតប្រជារាស្ត្រមែន នោះ លោកហ៊ុន សែនគ្រាន់តែបញ្ឈប់ការគាបសង្កត់មកលើប្រជារាស្ត្រ ហើយចាប់ផ្តើមចរចាជាមួយសហភាពអឺរ៉ុប ដើម្បីធ្វើឲ្យស្រុកយើងទទួលបានលទ្ធិប្រជាធិបតេយ្យវិញទៅ នោះគឺជាចប់ទៅហើយ។
ប៉ុន្តែលោកហ៊ុន សែនប្រកាសជាថ្មីថា លោកនឹងមិញចុះចាញ់ការដាក់សម្ពាធឬទណ្ឌកម្មណាមួយនោះឡើយ។ លោកអះអាងថា របប របស់លោកបានត្រៀមលក្ខណៈគ្រប់គ្រាន់ដើម្បីតតាំងជាមួយការដកហូតប្រព័ន្ធអនុគ្រោះពីសំណាក់អន្តរជាតិ។ លើសពីនេះទៅទៀត លោកបានគំរាមសហគមន៍អន្តរជាតិវិញថា ប្រសិនបើអន្តរជាតិ ដាក់ទណ្ឌកម្មសេដ្ឋកិច្ចលើកម្ពុជាមែន លោកនឹងកម្ចេចក្រុមបក្សប្រឆាំងចោលតែម្តង។
ក្រុមអ្នកឃ្លាំមើលនិយាយថា ការគំរាមរបស់លោកហ៊ុន សែនធ្វើឡើងដើម្បីចង់បង្ហាញទៅមេដឹកនាំចិនថា មានតែប្រទេសចិនប៉ុណ្ណោះដែលជាខ្នងបង្អែកចុងក្រោយក្នុងការទប់ទល់នឹងការដាក់សម្ពាធរបស់អន្តរជាតិបាន ខណៈលោកនិងក្រុមមន្រ្តីរបស់លោកកំពុងត្រៀមចេញដំណើរទៅកាន់ទីក្រុងប៉េកាំងនៅថ្ងៃទី២០ខែមករាខាងមុខនេះ៕