27.5 C
Phnom Penh

មន្ត្រី​គណបក្ស​សង្រ្គោះ​ជាតិ​នៅ​ក្រៅ​ប្រទេស​រៀបចំ​គម្រោង​ឲ្យ​លោក​សម រង្ស៊ី​វិល​ចូល​ស្រុក​វិញ​

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​គណបក្ស​ប្រឆាំង​នៅ​ក្រៅ​ប្រទេស​បាន​សម្រេច​ដាក់​ចេញ​ផែនការ​មួយ​ចំនួន​ដើម្បី​ឲ្យ​លោក​សម រង្ស៊ី​វិល​ត្រឡប់​ទៅ​កាន់​ប្រទេស​កម្ពុជា​វិញ។ ​ការ​សម្រេច​នេះធ្វើ​ឡើង​ក្នុង​កិច្ច​ប្រជុំ​គណៈ កម្មាធិការ​អចិន្ត្រៃយ៍​របស់​បក្ស​ប្រឆាំង​នៅ​ទីក្រុង​Lowell ​រដ្ឋ​ Massachusetts សហ​រដ្ឋ​អាមេរិក ​កាលពី​ថ្ងៃ​ទី​២០​ខែ​មករា។​

ក្នុង​វីដេអូ​ឃ្លីប​មួយ​ដែល​បង្ហោះ​លើ​ទំព័រ​ហ្វេសប៊ុក​លោក​សម រង្ស៊ី​នោះ​  ​លោក​អេង ឆៃអ៊ាង​អនុប្រធាន​គណបក្ស​ប្រឆាំង​មួយរូប​ក្នុង​ចំណោម​បីរូប​ដែល​និយាយ​នៅ​ក្នុង​វីដេអូ​នោះ​ថា​ គណៈ​កម្មាធិការ​របស់​គណបក្ស​នេះ​ នឹងរៀប​ចំ​ផែន​ចំនួន​៥​ចំណុច​សម្រាប់​ពលរដ្ឋ​ទាំងក្នុង​និង​ប្រទេស​ដើម្បី​រៀបចំ​ដំណើរ​វិល​ត្រឡប់​របស់​លោក​សម រង្ស៊ី​ទៅកាន់​ប្រទេស​កម្ពុជា​វិញ។​

លោក​អេង ឆៃអ៊ាង​អះអាង​ថា​ ផែនការ​ទាំង​នោះ​រួមមាន​ការ​កៀងគរ​ និង​រៀបចំ​កម្លាំង​នៅ​ក្នុង​ស្រុក​ចាំ​ទទួល​លោក​សម រង្ស៊ី​ពង្រីក​សកម្មភាព​ការទូត​ ប្រើប្រាស់​ប្រព័ន្ធ​ផ្សព្វផ្សាយ​បក​អាក្រាត​ពី​ទង្វើ​បំពាន​ច្បាប់ ​និង​រំលោភ​សិទ្ធិ​មនុស្ស​ពី​សំណាក់​រដ្ឋាភិបាល​សព្វ​ថ្ងៃ។​

ប៉ុន្តែ​លោក​អ៊េង ឆៃអ៊ាង​នៅមិន​ទាន់​បាន​កំណត់​ឲ្យ​បាន​ច្បាស់​នៅ​ឡើយ​ទេ​ថា ​តើ​លោក​សមរង្ស៊ី​នឹង​ត្រឡប់​ទៅ​កម្ពុជា​​វិញ​នៅ​ពេល​ណាជាក់​លាក់​នោះ​ទេ។​

កាល​ពី​ឆ្នាំ​២០១៦​ លោក​សម រង្ស៊ី​បាន​ចាក​ចេញពី​ប្រទេស​កម្ពុជា​ជាថ្មី​ម្ដង​ទៀត ​ក្រោយពេល​រដ្ឋាភិបាល​របស់​លោក​ហ៊ុន សែន​ចោទ​ប្រកាន់​លោកពី​បទ​បរិហារ​កេរ្តិ៍ ​និង​ញុះញង់​ ទាក់ទង​នឹង​ករណី​ឃាតកម្ម​អ្នក​វិភាគ​នយោបាយ​ល្បី​ឈ្មោះ​លោក​បណ្ឌិត​កែម ឡី។

ពេល​នោះ​លោក​សម រង្ស៊ី ​បាន​ចោទ​លោក​ហ៊ុន សែន​ត្រង់ៗ​ថា​ ជាអ្នក​នៅ​ពី​ក្រោយ​ខ្នង​នៃ​ការ​បាញ់​សម្លាប់​លោក​បណ្ឌិត​ កែម ឡី ​កាលពី​ថ្ងៃទី​ ១០​​ខែ​កក្កដា​២០១៦ ​ហើយ​ទាមទារ​ឱ្យ​លោក​ហ៊ុន សែន​ ទទួល​ខុសត្រូវ​ចំពោះ​ឃាតកម្ម​ខ្នាត​ធំ​ដ៏​កក្រើក​នេះ​ថែម​ទៀត។​

ក្រោយ​ពេល​ចេញទៅ​ក្រៅ​ប្រទេស​បាន​មួយ​រយៈ ​ លោក​សម រង្ស៊ី​បាន​ប្រកាស​វិលចូល​ស្រុក​វិញ​ដែរ​ ប៉ុន្តែ​ប៉ុន្មាន​ម៉ោង​ក្រោយ​មក​ លោក​ប្តូរ​ចិត្ត​ថា​ មិន​ទៅ​​កម្ពុជា​នោះ​ឡើយ​ ដោយសារ​គណៈ​កម្មាធិការ​អចិន្ត្រៃយ៍​របស់​ខ្លួន​មិន​អនុញ្ញាត។ ​ចំណែក​រដ្ឋាភិបាល​ក្រុង​ភ្នំពេញ​កាលពី​ឆ្នាំ​២០១៦ ​នោះ​ក៏បាន​ចេញ​បម្រាម​មិន​ឱ្យ​ក្រុមហ៊ុន​អាកាសចរណ៍​ទាំង​ឡាយ​ ដឹក​លោក​សម រង្ស៊ី​ចូលស្រុក​ជា​ដាច់​ខាត៕​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស