ក្រុមសកម្មជនឃ្លាំមើលព្រៃឈើអះអាងថា ចាប់តាំងពីសកម្មជន និងសហគមន៍ការពារព្រៃឈើត្រូវបានរារាំង និងហាមឃាត់ដោយអាជ្ញាធរ និងក្រសួងបរិស្ថាន មិនឱ្យចុះល្បាតព្រៃកន្លងមកនេះ គឺស្មើនឹងបើកឱកាសពេញទំហឹងឱ្យឈ្មួញទុច្ចរិត និងមន្ត្រីពុករលួយមួយចំនួនអាចសហការគ្នាបំផ្លាញព្រៃឈើខ្មែរបានយ៉ាងរលូន។
ការអះអាងនេះ ធ្វើឡើងបន្ទាប់ពីសហគមន៍ជនជាតិភាគតិចកួយប្រចាំខេត្តព្រះវិហារ បានចេញសេចក្តីប្រកាសព័ត៌មានរបស់ខ្លួនថាមានបទល្មើសព្រៃឈើជិត ១០០ករណីបន្ថែមទៀតដែលត្រូវបានរកឃើញក្នុងដែនជម្រកសត្វព្រៃព្រះរការ ក្នុងពេលថ្មីៗនេះ។
សកម្មជនការពារព្រៃឈើលោក សាន់ ម៉ាឡា បានប្រាប់សារព័ត៌មាន The Cambodia Daily នៅថ្ងៃទី១ ខែមិថុនា ឆ្នាំ២០២១ នេះថា ដរាបណាក្រសួងបរិស្ថាននៅតែបន្តរឹតត្បិតសកម្មភាពចុះល្បាតព្រៃចំពោះសកម្មជន និងប្រជាសហគមន៍ការពារព្រៃឈើ ហើយក្រសួងបរិស្ថានខ្លួនឯងមិនមានការកែទម្រង់ក្នុងកិច្ចគាំពារព្រៃឱ្យមានប្រសិទ្ធភាពជាងសព្វថ្ងៃនេះទេ ព្រៃឈើខ្មែរដែលមានតម្លៃមហាសាលនេះ នឹងរលាយបាត់ពីទឹកដីកម្ពុជាក្នុងរយៈពេលដ៏ខ្លីខាងមុខនេះជាមិនខាន។
សកម្មជនការពារព្រៃឈើរូបនេះអះអាងថា ដើម្បីឱ្យព្រៃឈើទាំងនេះចៀសផុតពីការធ្វើទុក្ខបុកម្នេញពីឈ្មួញទុច្ចរិត និងមន្ត្រីខិលខូចមួយចំនួននោះ គឺរដ្ឋាភិបាលកម្ពុជាត្រូវតែអនុញ្ញាតឱ្យស្ថាប័នពាក់ព័ន្ធដូចជាសកម្មជនបរិស្ថាន សហគមន៍ការពារព្រៃឈើ និងអង្គការសមាគមនានាចូលរួមល្បាតព្រៃទាំងនោះគ្រប់គ្នា នោះទើបជាវិធានការដែលមានប្រសិទ្ធភាពអាចរក្សាសម្បត្តិធម្មជាតិនេះបានគង់វង្ស។
លោកបញ្ជាក់ថា អង្គការសមាគម និងសហគមន៍ដែលធ្វើការលើវិស័យបរិស្ថាន គឺជាតួអង្គឯករាជ្យដែលមិនចំណុះឱ្យស្ថាប័ននយោបាយណាមួយនោះឡើយ ដូច្នេះក៏អាចធានាបាននូវតម្លាភាពដែលមិនមានការឃុបឃិតជាមួយនឹងមន្ត្រីខិលខូច ឬឈ្មួញទុច្ចរិតបំផ្លាញព្រៃឈើកម្ពុជាក្នុងបេសកកម្មដើម្បីអភិរក្សព្រៃឈើរបស់ខ្លួននោះឡើយ។
កាលពីថ្ងៃទី៩ ខែឧសភា ឆ្នាំ២០១៦ ប្រមុខរដ្ឋាភិបាលកម្ពុជាបានចុះហត្ថលេខាលើអនុក្រឹត្យបង្កើតដែនជម្រកសត្វព្រៃព្រះរការ ដែលមានផ្ទៃដីជាង ៩ម៉ឺនហិកតារស្ថិតក្នុងភូមិសាស្ត្រខេត្តព្រះវិហារ។ អនុក្រឹត្យដដែលនេះបានបញ្ជាឱ្យក្រសួងបរិស្ថានយកចិត្តទុកដាក់អភិរក្សដែនជម្រកសត្វព្រៃព្រះរការនេះ និងប្រើប្រាស់ធនធានធម្មជាតិប្រកបដោយចីរភាព។
ទាក់ទិននឹងបញ្ហានេះ សហគមន៍ជនជាតិដើមភាគតិចកួយប្រចាំខេត្តព្រះវិហារ នៅថ្ងៃទី១ ខែមិថុនា ឆ្នាំ២០២១ បានចេញសេចក្តីប្រកាសព័ត៌មានរបស់ខ្លួនស្ដីពីបទល្មើសព្រៃឈើដែលបានកើតឡើងចំនួន ៩០ករណីបន្ថែមទៀត ដែលត្រូវបានរកឃើញក្នុងដែនជម្រកសត្វព្រៃព្រះរការក្នុងពេលថ្មីៗនេះ។
ប្រភពដដែលអះអាងថា កាលពីចុងខែឧសភា ឆ្នាំ២០២១ នេះ ពួកគេបានរកឃើញបទល្មើសកាប់បំផ្លាញព្រៃឈើនៅក្នុងដែនជម្រកសត្វព្រៃព្រះរការលើប្រភេទឈើងាយរងគ្រោះ និងមានទំហំធំៗដែលមានមុខកាត់ចាប់ពីជាង ៣តឹករហូតដល់មុខកាត់ជាង ១ម៉ែត្រកន្លះ។
សហគមន៍ដដែលបញ្ជាក់ថា ប្រភេទឈើងាយរងគ្រោះដែលត្រូវទទួលរងការកាប់បំផ្លាញភាគច្រើនមានដូចជា ដើមឈើទាល កកោះ គគីរ ស្ទៀង ផ្ដៀក ពពេល ផ្ចឹក ត្រាច ត្រសេក សុក្រំ និងដើមខ្វាវ ជាដើម។
ពួកគេថាបទល្មើសព្រៃឈើនេះបានកើតឡើងនៅចំណុចភូមិបុស្សធំ ឃុំប្រមេរុ ស្រុកឆែប ខេត្តព្រះវិហារ ដែលកំពុងរងការកាប់បំផ្លាញយ៉ាងធ្ងន់ធ្ងរបំផុតពីឈ្មួញទុច្ចរិតធំៗដែលកំពុងឈរជើងប្រមូលឈើខុសច្បាប់ក្នុងតំបន់នោះ។
យ៉ាងណាក៏ដោយ ក្រសួងបរិស្ថានកាលពីថ្ងៃទី៣១ ខែឧសភា ឆ្នាំ២០២១ បានចេញសេចក្តីជូនដំណឹងក្នុងឱកាសទិវាបរិស្ថានជាតិ និងទិវាបរិស្ថានពិភពលោក ៥ មិថុនា ក្រោមប្រធានបទ «ជីវចម្រុះ និងសុខភាពមនុស្ស» ថាក្រសួងនឹងផ្សព្វផ្សាយអំពីគោលបំណងក្នុងការលើកកម្ពស់ការយល់ដឹងជាសាធារណៈអំពីការគ្រប់គ្រង និងការប្រើប្រាស់ធនធានធម្មជាតិប្រកបដោយចីរភាព និងការអភិរក្សជីវៈបន្តទៀត។
ក្នុងសេចក្តីជូនដដែលនោះ ក្រសួងមិនបានលើកឡើងពីបទល្មើសព្រៃឈើណាមួយឡើយ ហើយក៏មិនបានលើកឡើងពីវិធានការការពារព្រៃឈើដែលកំពុងរងការធ្វើទុក្ខបុកម្នេញពីឈ្មួញដែលកំពុងកាប់បំផ្លាញព្រៃឈើខ្មែរសព្វថ្ងៃនេះដែរ។
ជុំវិញបញ្ហានេះ នៅថ្ងៃទី១ ខែមិថុនា ឆ្នាំ២០២១ អង្គការសមាគមជាង ១០ស្ថាប័នបានចេញសេចក្តីប្រកាសព័ត៌មានរួមគ្នាក្នុងឱកាសប្រារព្ធទិវាបរិស្ថានពិភពលោកឆ្នាំ២០២១ នេះ ដោយស្នើឱ្យក្រសួងបរិស្ថាន និងស្ថាប័នពាក់ព័ន្ធ បើកចំហការចូលរួមរបស់យុវជន ប្រជាពលរដ្ឋ សង្គមស៊ីវិល និងសកម្មជនបរិស្ថាន ឱ្យចូលរួមការពារបរិស្ថាន និងការពារធនធានធម្មជាតិស្របតាមបញ្ញត្តិដែលមានជាធរមាន៕