29 C
Phnom Penh

អាជ្ញាធរ​បណ្ដេញ​ជនជាតិ​វៀតណាម​រស់នៅ​ខុសច្បាប់ ១០៦​នាក់​ចេញពី​កម្ពុជា

បទវិភាគ

ជនជាតិ​វៀតណាម​រស់នៅ​ខុសច្បាប់​ចំនួន ១០៦​នាក់​ដែល​ប្រមូល​បាន​មកពី ២​កន្លែង​ផ្សេង​គ្នា ត្រូវ​បាន​សមត្ថកិច្ច​ជំនាញ​នៃ​នាយកដ្ឋាន​ស៊ើប​អង្កេត និង​អនុវត្ត​នីតិវិធី​របស់​អគ្គនាយកដ្ឋាន​អន្តោប្រវេសន៍ បណ្តេញ​ចេញ​ពី​កម្ពុជា​នៅ​ថ្ងៃ​ទី​០១ ខែ​មិថុនា ឆ្នាំ​២០២១ ថ្មីៗ​នេះ។

អគ្គនាយកដ្ឋាន​អន្តោប្រវេសន៍​បាន​ផ្សព្វផ្សាយ​ក្នុង​បណ្ដាញ​សង្គម​ហ្វេសប៊ុក (Facebook) របស់​ខ្លួន​កាលពី​ថ្ងៃ​ទី​០១ ខែ​មិថុនា ឆ្នាំ​២០២១ ថ្មីៗ​នេះ​ថា អគ្គនាយក​អន្តោប្រវេសន៍​នាយកដ្ឋាន​ស៊ើប​អង្កេត និង​អនុវត្ត​នីតិវិធី បាន​សហការ​ជាមួយ​ស្នងការដ្ឋាន​នគរបាល​ខេត្ត​ស្វាយរៀង និង​ប៉ុស្តិ៍​នគរបាល​ច្រក​ទ្វារ​អន្តរជាតិ​បាវិត​ខេត្ត​ស្វាយរៀង និង​ចូលរួម​ពី​តំណាង​ស្ថានទូត​វៀតណាម​ប្រចាំ​កម្ពុជា បាន​បញ្ជូន និង​បណ្តេញ​ចេញ​ជនជាតិ​វៀតណាម​ចំនួន ៨៨​នាក់ (ស្រី ១៦​នាក់) តាម​ប៉ុស្តិ៍​ច្រក​ទ្វារ​អន្តរជាតិ​បាវិត​ពាក់ព័ន្ធ​នឹង​បទល្មើស​លួច​ឆ្លងដែន ស្នាក់នៅ ធ្វើ​ការងារ​ដោយ​ខុសច្បាប់។

ករណី​បណ្ដេញ​ជនជាតិ​វៀតណាម​ខុសច្បាប់​នៅ​កម្ពុជា​នេះ​ដែរ កាលពី​ម្សិលមិញ សមត្ថកិច្ច​ខេត្ត​ព្រះសីហនុ បាន​សហការ​ជាមួយ​ប៉ុស្តិ៍​នគរបាល​ច្រក​ទ្វារ​អន្តរជាតិ​ព្រែកចាក​ខេត្ត​កំពត បាន​បណ្តេញ​ជនជាតិ​វៀតណាម​ចំនួន ១៨​នាក់ (ស្រី ១១​នាក់) ចេញពី​ប្រទេស​កម្ពុជា​តាម​ប្រកាស​របស់​ក្រសួង​មហាផ្ទៃ ឱ្យ​ទៅ​ប្រទេស​ដើម​វិញ​ដោយ​ហាម​ចូល​កម្ពុជា​រយៈពេល ៣​ឆ្នាំ។

ជនជាតិ​វៀតណាម​ទាំង ១៨​នាក់​នេះ គឺ​ស្នងការដ្ឋាន​នគរបាល​ខេត្ត​ព្រះសីហនុ និង​កោះកុង ចាប់​បញ្ជូន​ឲ្យ​ស្នាក់ការ​ត្រៀម​បញ្ជូន​ចេញ​ពាក់ព័ន្ធ​បទល្មើស​លួច​ស្នាក់នៅ​ខុសច្បាប់ (គ្មាន​លិខិត​ឆ្លងដែន) និង​ឆ្លងដែន​ខុសច្បាប់ (គ្មាន​លិខិត​ឆ្លងដែន និង​មិន​ប្រថាប់ត្រា) ព្រមទាំង​ល្មើស​បម្រាម​បិទ​ខ្ទប់​របស់​រដ្ឋបាល​ខេត្ត៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស