អ្នកកាសែតដែលស្និទ្ធនឹងលោក ហ៊ុន សែន អះអាងថា ជនជាតិវៀតណាម ដែលចូលមកកម្ពុជា លើកដំបូងគ្រាន់តែជិះទូកទៅសំចតរស់នៅក្នុងតំបន់ផ្ទៃទឹកអរិយក្សត្រ ដោយគ្រាន់តែរស់នៅលើទូកមួយរយៈប៉ុណ្ណោះ បន្ទាប់មកពួកគេនាំគ្នារស់នៅលើគោកតែម្តង ដូច្នេះសូមកុំឱ្យដានប្រវត្តិសាស្ត្ររជ្ជកាលស្តេចជ័យជេដ្ឋាទី២ វិលមកវិញម្តងទៀតលើទឹកដីកម្ពុជា។
នាយកមជ្ឈមណ្ឌលសារព័ត៌មានដើមអម្ពិល លោក សយ សុភាព បានសរសេរលើគណនី Facebook របស់លោកកាលពីថ្ងៃទី៩ ខែមិថុនា ឆ្នាំ២០២១ នេះថា ថ្មីៗនេះរដ្ឋាភិបាលវៀតណាម បានបណ្តេញពលរដ្ឋខ្មែរជាង ១០០នាក់ឲ្យត្រឡប់ទៅកម្ពុជាវិញ ដោយចោទថាពលរដ្ឋខ្មែរទាំងនោះបានចូលប្រទេសរបស់ពួកគេដោយខុសច្បាប់។
លោកអះអាងថា កម្ពុជា ត្រូវរៀនសូត្រតាមប្រទេសបិតាប្រជាធិបតេយ្យផងដែរ ដូច្នេះប្រសិនបើជនណាម្នាក់ប្រព្រឹត្តខុសច្បាប់ប្រទេស គឺត្រូវតែជាប់គុក និងបណ្តេញចេញជាដាច់ខាត ដូចជាករណីសហរដ្ឋអាមេរិក បណ្តេញពលរដ្ឋខ្មែរកន្លងមក ឬបណ្តេញជនអន្តោប្រវេសន៍ខុសច្បាប់ចេញពីប្រទេសគេដូច្នោះដែរ។
លោក សយ សុភាព បញ្ជាក់ថា បញ្ហានេះ បើនិយាយពីកម្ពុជា វិញ សូមពលរដ្ឋខ្មែរនាំគ្នាអានប្រវត្តិសាស្ត្រពីរជ្ជកាលព្រះស្រីសុរិយោព័ណ៌ និងរាជបុត្ររបស់ព្រះអង្គ ព្រះនាម ជ័យជេដ្ឋាទី២ ដែលមានមហេសីជាជនជាតិវៀតណាម ព្រះនាម ង្វៀនហ្វុក ងុកវ៉ាន់ ឬព្រះនាងអង្គចូវ ដែលធ្វើឲ្យវៀតណាម មានឥទ្ធិពលលើទឹកដីខ្មែររហូតមក។
ដូច្នេះ សូមកុំឱ្យដានប្រវត្តិសាស្ត្ររជ្ជកាលស្តេចជ័យជេដ្ឋាទី២ វិលមកវិញឲ្យសោះ ព្រោះថាការបណ្តេញវៀតណាម មិនឲ្យរស់នៅលើផ្ទៃទឹក តែបែរជាឲ្យទៅរស់នៅលើគោក គឺដូចតែគ្នាប៉ុណ្ណោះ។
ការអះអាងនេះ ធ្វើឡើងបន្ទាប់ពីសាលារាជធានីភ្នំពេញ បានចេញសេចក្តីជូនដំណឹងកាលពីដើមខែមិថុនា នេះ ឲ្យពលរដ្ឋខុសច្បាប់ វៀតណាម ដែលកំពុងរស់នៅលើផ្ទៃទឹកនៃភូមិសាស្ត្ររាជធានីភ្នំពេញ រុះរើផ្ទះបណ្ដែតទឹកទៅរស់នៅលើគោកជំនួសវិញ។
កាលពីដើមខែមិថុនា ឆ្នាំ២០២១ អាជ្ញាធរក្រុងភ្នំពេញបានចេញសេចក្តីជូនដំណឹងឲ្យពលរដ្ឋវៀតណាម កំពុងរស់នៅលើផ្ទៃទឹកនៃភូមិសាស្ត្ររាជធានីភ្នំពេញ រុះរើផ្ទះបណ្ដែតទឹក ផ្ទះទូកតូចៗចេញពីផ្ទៃទឹក តែសាលារាជធានីភ្នំពេញលើកទឹកចិត្តឲ្យពួកគេទៅនៅលើគោកជំនួសវិញ។
ជុំវិញបញ្ហានេះ អ្នកស្រាវជ្រាវអំពីការអភិវឌ្ឍន៍សង្គម បណ្ឌិត សេង សារី បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីថ្ងៃទី៩ ខែមិថុនា នេះថា ជុំវិញការអនុវត្តលើជនអន្តោប្រវេសន៍ខុសច្បាប់នៅកម្ពុជា រដ្ឋាភិបាលមិនគួរប្រើសេចក្តីជូនដំណឹង ឬប្រកាសដូចដែលបានអនុវត្តកន្លងមកនោះទេ ព្រោះថាការធ្វើបែបនេះ គឺអាចប៉ះពាល់ទៅដល់ទំនាក់ទំនងទ្វេភាគីរវាងកម្ពុជា-វៀតណាម គោលការណ៍មនុស្សធម៌ និងការរើសអើងពូជសាសន៍ផងដែរ។
លោកបញ្ជាក់ថា ដើម្បីធានានូវប្រសិទ្ធភាពលើការអនុវត្តចំពោះជនអន្តោប្រវេសន៍ខុសច្បាប់ រដ្ឋាភិបាលត្រូវតែប្រើច្បាប់អន្តោប្រវេសន៍ និងច្បាប់សញ្ជាតិ នោះទើបជារឿងត្រឹមត្រូវ។
ចំណែកអ្នកវិភាគនយោបាយ និងសង្គម បណ្ឌិត ឡៅ ម៉ុងហៃ បានសរសេរលើគណនី Facebook របស់លោកនៅថ្ងៃនេះថា កម្ពុជា មានមូលដ្ឋានច្បាប់អន្តរជាតិសម្រាប់ទាមទារឲ្យវៀតណាម ទទួលយកជនជាតិរបស់គេត្រឡប់ទៅវិញ ដូច្នេះដើម្បីឲ្យមានអធិបតេយ្យភាព កម្ពុជាត្រូវតែអនុវត្តច្បាប់នេះជាដាច់ខាត។
លោកបញ្ជាក់ថា និគមជនវៀតណាម ចូលទៅរស់នៅកម្ពុជា នៅពេលដែលកងទ័ពវៀតណាម ចូលទៅកាន់កាប់កម្ពុជា ដូច្នេះពួកគេត្រូវតែចេញទៅវិញនៅពេលកងទ័ពវៀតណាម ចេញពីកម្ពុជាវិញផងដែរ។
ចាប់ពីឆ្នាំ១៩៧៩ ដល់ឆ្នាំ១៩៩០ មហាសន្និបាតអង្គការសហប្រជាជាតិ ជារៀងរាល់ឆ្នាំ តែងតែទាមទារឲ្យកងទ័ពវៀតណាម ដកចេញពីកម្ពុជាជានិច្ច ព្រោះថាទាំងកងទ័ពវៀតណាម ទាំងនិគមជនវៀតណាម ចូលទៅកម្ពុជា គឺខុសទៅនឹងច្បាប់អន្តរជាតិទាំងស្រុង។ អ្នកលេង Facebook គ្រប់មជ្ឈដ្ឋាននាំគ្នាបញ្ចេញមតិព្រោងព្រាតគាំទ្រចំណាត់ការសាលារាជធានីភ្នំពេញ ចំពោះការអនុវត្តលើជនជាតិវៀតណាមខុសច្បាប់ដែលរស់នៅលើទឹកដីកម្ពុជា ប៉ុន្តែពួកគេជំរុញឲ្យរដ្ឋាភិបាលអនុវត្តច្បាប់អន្តោប្រវេសន៍ និងច្បាប់សញ្ជាតិលើជនបរទេសទាំងនោះ ជាជាងត្រឹមតែការរុះរើផ្ទះបណ្តែតទឹកពីក្នុងទន្លេ ឲ្យទៅរស់នៅលើគោកដូច្នេះ។
កាលពីថ្ងៃទី២៦ ខែកុម្ភៈ ឆ្នាំ១៩៨៦ លោក ហ៊ុន សែន បានចេញសារាចរណែនាំមួយស្ដីពីការអនុវត្តគោលនយោបាយចំពោះជនជាតិវៀតណាម ដែលបានចូលទៅរស់នៅកម្ពុជា ដោយផ្តល់ដីធ្លី ទីជម្រក ឧបត្ថម្ភ ផ្តល់អត្តសញ្ញាណប័ណ្ណ ថែរក្សា និងផ្គត់ផ្គង់ ជាដើម ទៅលើជនជាតិវៀតណាមទាំងនោះដោយយកចិត្តទុកដាក់ជាទីបំផុត ដែលសារាចរនេះនៅតែមានសុពលភាពរហូតដល់សព្វថ្ងៃនេះផងដែរ។
បញ្ហានេះ ត្រូវអ្នកសង្កេតការណ៍រិះគន់ថា ជនជាតិវៀតណាមខុសច្បាប់បានហូរចូលទៅក្នុងទឹកដីកម្ពុជា កាន់តែច្រើនឡើងៗ បន្ទាប់ពីលោក ហ៊ុន សែន ត្រូវបានរដ្ឋាភិបាលវៀតណាម លើកបន្តុបជានាយករដ្ឋមន្ត្រីខ្មែរកាលពីឆ្នាំ១៩៨៥ មក។ ពួកគេរិះគន់ថា សម័យស្តេចជ័យជេដ្ឋាទី២ គ្រាន់តែឲ្យដីវៀតណាម ខ្ចីប៉ុណ្ណោះ តែសម័យលោក ហ៊ុន សែន ហៅវៀតណាមឲ្យចូលស្រុកខ្មែរហើយ កាត់ដីឲ្យជនជាតិឈ្លានពានទាំងនោះរស់នៅថែមទៀត។
ទាក់ទិននឹងបញ្ហានេះ កាលពីថ្ងៃទី១០ ខែកក្កដា ឆ្នាំ២០២០ ក្រសួងមហាផ្ទៃ បានចេញលិខិតមួយស្ដីពីការគ្រប់គ្រងជនបរទេសអន្តោប្រវេសន៍នៅកម្ពុជា ថាការដោះស្រាយអំពីបញ្ហាជនអន្តោប្រវេសន៍ ត្រូវបានអូសបន្លាយ និងរាំងស្ទះដោយសារតែហេតុផលនយោបាយរបស់កម្ពុជានាពេលបច្ចុប្បន្ន៕