សមាគមវៀតណាមនៅកម្ពុជា ប្រកាសមិនឱ្យប្រជាជនខ្លួនដែលកំពុងរស់នៅប្រទេសកម្ពុជា ត្រឡប់ទៅប្រទេសកំណើតវិញទេ ក្រោមហេតុផលថា ស្ថានភាពជំងឺកូវីដ-១៩ នៅក្នុងប្រទេសវៀតណាម កំពុងរីករាលដាល។
ការប្រកាសរបស់សមាគមវៀតណាម ធ្វើឡើងបន្ទាប់ពីសាលារាជធានីភ្នំពេញបានតម្រូវឱ្យម្ចាស់ផ្ទះបណ្តែតទឹក បែចិញ្ចឹមត្រី និងសំណង់មិនរៀបរយផ្សេងទៀត រុះរើចេញពីទន្លេនៅរាជធានីភ្នំពេញ ដើម្បីរក្សាសោភណភាព និងអនាម័យ។
បើតាមទំព័រហ្វេសប៊ុកឈ្មោះ Khmer Krom Man Journalist ដែលដកស្រង់ចេញពីសេចក្ដីប្រកាសរបស់សមាគមវៀតណាមប្រចាំកម្ពុជា ចុះនៅថ្ងៃទី១៣ ខែមិថុនា ឆ្នាំ២០២១ ឱ្យដឹងថា សមាគមវៀតណាមបានប្រាប់ឱ្យជនជាតិខ្លួនដែលត្រូវផ្លាស់ទីលំនៅចំនួន ៦ខណ្ឌក្នុងរាជធានីភ្នំពេញ ត្រូវបន្តស្នាក់នៅនឹងកន្លែងដើម និងមិនត្រូវផ្លាស់ទីផ្ទះបណ្ដែតទឹក ផ្ទះទូក និងក្បួន ចេញពីកម្ពុជា ហើយក៏មិនត្រូវត្រឡប់ទៅប្រទេសវៀតណាមវិញនោះទេ។
ការប្រាប់មិនឱ្យជនជាតិខ្លួនត្រឡប់ទៅប្រទេសវៀតណាមវិញនេះ ក្រោមហេតុផលថា ច្រកទ្វារព្រំដែនវៀតណាម ត្រូវបានបិទ និងមិនអនុញ្ញាតឱ្យមនុស្សចេញចូលប្រទេសវៀតណាមឡើយ ដោយសារតែស្ថានភាពនៃការរីករាលដាលជំងឺកូវីដ-១៩ នៅក្នុងប្រទេសរបស់ខ្លួន។
បើតាមទំព័រហ្វេសប៊ុកឈ្មោះ Khmer Krom Man Journalist ដដែលថា បច្ចុប្បន្នសមាគមបានធ្វើការជាមួយអាជ្ញាធរកម្ពុជា ហើយថាអាជ្ញាធរកម្ពុជាក៏បានសម្រួលដល់ប្រជាជនវៀតណាម ដែលត្រូវបានផ្លាស់ប្ដូរលំនៅឋាននៅតាមដងទន្លេក្នុងភូមិសាស្ត្ររាជធានីភ្នំពេញនោះ។ ករណីនេះ សមាគមស្នើដល់ពួកគេត្រូវគោរពទៅតាមគោលការណ៍របស់អាជ្ញាធររាជធានីភ្នំពេញ ដោយស្ម័គ្រចិត្ត និងរើទៅចតនៅទីតាំងថ្មីដែលកំណត់ដោយអាជ្ញាធរនៅក្នុងភូមិក្រួស សង្កាត់សំរោង ខណ្ឌព្រែកព្នៅ។
កាលពីថ្ងៃទី២ ខែមិថុនា អាជ្ញាធររាជធានីភ្នំពេញឱ្យម្ចាស់បែរចិញ្ចឹមត្រី ផ្ទះបណ្ដែតទឹក និងម្ចាស់សំណង់មិនរៀបរយនៅលើផ្ទៃទន្លេ រុះរើសំណង់របស់ខ្លួនចេញពីតំបន់នោះឱ្យអស់ បើពុំនោះទេនឹងប្រឈមផ្លូវច្បាប់។
ប៉ុន្តែវិធានការនេះ ត្រូវបានរដ្ឋាភិបាល និងប្រធានសមាគមវៀតណាមនៅកម្ពុជា ប្រតិកម្មដោយចាត់ទុកការឱ្យពលរដ្ឋវៀតណាមរើផ្ទះបណ្ដែតទឹកក្នុងទន្លេប្រទេសកម្ពុជា ថាធ្វើឡើងលឿនពេកដែលធ្វើឱ្យប្រជាជនខ្លួនរៀបចំមិនទាន់។
ក្រៅពីប្រតិកម្មចំពោះវិធានការរបស់អាជ្ញាធររាជធានីភ្នំពេញហើយ រដ្ឋាភិបាលនិងប្រធានសមាគមវៀតណាម ក៏ទាមទារឱ្យរដ្ឋាភិបាលរកទីតាំងថ្មីឱ្យប្រជាជនខ្លួនរស់នៅ និងឱ្យរដ្ឋាភិបាលកម្ពុជាជួយធានាសុខុមាលភាព រួមទាំងជួយផ្ដល់ភាពស្របច្បាប់ដល់ប្រជាជនវៀតណាម ដែលកំពុងរស់នៅកម្ពុជាទៀតផង។
កាលពីឆ្នាំ២០១៨ រដ្ឋាភិបាលកម្ពុជាបានផ្ដល់ដី ៤០ហិកតារនៅខេត្តកំពង់ឆ្នាំង ក្រោយពីបានបំផ្លាស់ទីអ្នកដែលរស់នៅលើផ្ទះបណ្ដែតទឹកក្នុងទន្លេនៃខេត្តនេះ ឱ្យមករស់នៅលើគោកវិញ ហើយអ្នកដែលត្រូវបំផ្លាស់ទីមកលើគោកនោះ ក៏មានជនជាតិវៀតណាមដែរ។
យ៉ាងណា ក៏ក្រុមបញ្ញវន្តខ្មែរជំរុញឱ្យរដ្ឋាភិបាលកម្ពុជាបញ្ជូនជនអន្តោប្រវេសន៍វៀតណាមដែលរស់នៅកម្ពុជាខុសច្បាប់ ទៅប្រទេសដើមវិញ ដោយមិនត្រូវទុកឱ្យពួកគេបន្តរស់នៅក្នុងប្រទេសកម្ពុជាទៀត ហើយថាការផ្ដល់ភាពស្របច្បាប់ដល់ជនជាតិវៀតណាម ដែលមានប្រទេសជាប់របងគ្នានេះ វាគឺជាហានិភ័យសម្រាប់ប្រទេសជាតិ៕