29 C
Phnom Penh

ពលរដ្ឋ​រិះគន់​វិធានការ​ទប់ស្កាត់​បទល្មើស​របស់​អភិបាល​ខេត្ត​កោះកុង​គ្មាន​ប្រសិទ្ធភាព

បទវិភាគ

ពលរដ្ឋ​រស់នៅ​ក្រុង​ខេមរភូមិន្ទ ខេត្ត​កោះកុង បាន​អះអាង​ថា ក្រុមហ៊ុន ឬ​ឈ្មួញ​ពុះ​ដី​ឡូត៍ បាន​ដឹក​យក​ដី​ចាក់​លុប​ចំណី​ព្រែក​ធម្មជាតិ​ដែល​ជា​ដី​សាធារណៈ​របស់​រដ្ឋ ក្នុង​ភូមិ​ស្មាច់មានជ័យ សង្កាត់​ស្មាច់មានជ័យ ក្រុង​ខេមរភូមិន្ទ ខេត្ត​កោះកុង បាន​កើតឡើង​យ៉ាង​អណាធិបតេយ្យ នាំ​ឲ្យ​ប៉ះពាល់​ដល់​បរិស្ថាន ជីវចម្រុះ ជម្រក​មច្ឆា​សមុទ្រ និង​បណ្តាល​ឲ្យ​ទឹកសមុទ្រ​តំបន់​នោះ​ប្រែ​ជា​ល្អក់។

ប្រជា​នេសាទ​នៅ​តាម​ដងព្រែក​កោះប៉ោ បាន​ឲ្យ​ដឹង​នៅ​ថ្ងៃ​សុក្រ ថា សកម្មភាព​របស់​ក្រុមហ៊ុន ឬ​ម្ចាស់​ដី​ឡូត៍​មួយ​ចំនួន បាន​ដឹក​ដី​ចាក់​លុប​ចំណី​ព្រែក ប៉ុន្តែ​មិន​ឃើញ​មាន​មន្ត្រី​ស្ថាប័ន​ជំនាញ ឬ​អាជ្ញាធរ​មូលដ្ឋាន​ចុះ​ទប់ស្កាត់​នោះ​ទេ។ ជាង​នេះ​ទៀត អាជ្ញាធរ​ហាក់​មាន​ចេតនា​លាក់បាំង​អត្តសញ្ញាណ​ម្ចាស់​ក្រុមហ៊ុន ឬ​អ្នក​ដែល​ដឹក​ដី​ចាក់​រំលោភ​លើ​ចំណី​មាត់​ព្រែក​ម្តុំ​កោះប៉ោ នោះ​ទៅវិញ។

ពលរដ្ឋ​បញ្ជាក់​ថា ចំពោះ​សកម្មភាព​ឈ្មួញ​ដី ឬ​ក្រុមហ៊ុន​អចលនទ្រព្យ​ដែល​ធ្វើ​សកម្មភាព​ទន្ទ្រាន​ដី​សាធារណៈ​របស់​រដ្ឋ​ធ្វើ​ជា​កម្មសិទ្ធិ​ខុសច្បាប់​ពី​សំណាក់​ក្រុម​ឈ្មួញ​ខិលខូច​មួយ​ចំនួន ដែល​មាន​ខ្នង​បង្អែក​ជា​មន្ត្រី​មាន​ឋានៈ​បុណ្យ​ស័ក្តិ​ធំៗ​ក្នុង​ជួរ​រាជរដ្ឋាភិបាល​បច្ចុប្បន្ន ស្ទើរ​ក្លាយ​ជា​ទម្លាប់​ទៅ​ហើយ ហើយ​ចំពោះ​សកម្មភាព​បង្ក្រាប​របស់​អាជ្ញាធរ​រដ្ឋបាល​ខេត្ត​កោះកុង វិញ ហាក់​មិន​មាន​ប្រសិទ្ធភាព​យូរអង្វែង​ទេ។

ក្រុម​អ្នកភូមិ​ក៏​បាន​សំណូមពរ​យ៉ាង​ទទូច​ដល់​អ្នកស្រី មិថុនា ភូថង អភិបាល​ខេត្ត​កោះកុង សកម្មភាព​ឈ្មួញ​ទាំងនោះ​ផង និង​វែក​មុខ​ថា​តើ​មន្ត្រី​រូប​ណា​ខ្លះ​បាន​ឃុបឃិត​ជាមួយ​ឈ្មួញ ឬ​មាន​ការ​ជាប់​ពាក់ព័ន្ធ​នឹង​សកម្មភាព​ទន្ទ្រាន​កាន់កាប់​ដី​សាធារណៈ​របស់​រដ្ឋ​ដោយ​ខុសច្បាប់ ដើម្បី​ផ្ដន្ទាទោស​ឲ្យ​បាន​ធ្ងន់ធ្ងរ។

ពលរដ្ឋ​ឲ្យ​ដឹង​ថា បច្ចុប្បន្ន​នេះ បទល្មើស​កាប់​បំផ្លាញ​ធនធាន​ធម្មជាតិ ឬ​ដី​សាធារណៈ​របស់​រដ្ឋ​នៅ​ខេត្ត​កោះកុង បាន​បន្ត​កើត​យ៉ាង​អណាធិបតេយ្យ ហើយ​ថា​បញ្ហា​នេះ វិធានការ​របស់​អាជ្ញាធរ​ខេត្ត​កោះកុង ហាក់​មិនទាន់​មាន​ប្រសិទ្ធភាព​នៅឡើយ។

ពួកគេ​សង្ស័យ​ថា ទំនង​មាន​ការ​ឃុបឃិត​ជាមួយ​មន្ត្រី​សាលា​ខេត្ត​កោះកុង ទើប​បទល្មើស​ទន្ទ្រាន​កាប់​រាន​ដី​ព្រៃ​រដ្ឋ ដឹក​ដី​ចាក់​លុប​ចំណី​អូរ ឬ​ចំណី​ព្រែក​ធម្មជាតិ ព្រៃកោងកាង និង​សកម្មភាព​ដឹក​ដី​ចាក់​ដី​រំលោភ​ចំណី​ឆ្នេរសមុទ្រ​ជាដើម អាច​ដំណើរការ​ដោយ​រលូន និង​គ្មាន​ការ​បង្ក្រាប។

សារព័ត៌មាន The Cambodia Daily នៅ​មិនទាន់​អាច​ទាក់ទង​លោក នាម យ៉ុង ចៅសង្កាត់​ស្មាច់មានជ័យ និង​ក្រុមហ៊ុន​ពុះ​ដី​ឡូត៍ ដើម្បី​បំភ្លឺ​ជុំវិញ​ការរិះគន់​របស់​ពលរដ្ឋ​បាន​នៅឡើយ​ទេ៕

© 2021, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

សេចក្ដីរាយការណ៍ពិសេស