ពលរដ្ឋស្រុកកំពង់សីលា អះអាងថា បទល្មើសទន្ទ្រានដីព្រៃឈើ និងសកម្មភាពជីកកកាយដីភ្នំដែលជាទ្រព្យសម្បត្តិរបស់រដ្ឋ មានទីតាំងក្នុងភូមិវាល ឃុំ-ស្រុកកំពង់សីលា បានកើតមានយ៉ាងអនាធិបតេយ្យ ប៉ុន្តែបែរជាអភិបាលស្រុកកំពង់សីលា និងអភិបាលខេត្តព្រះសីហនុ មិនមានវិធានការទប់ស្កាត់ទៅវិញ។
ប្រភពបញ្ជាក់ថា បទល្មើសជីកកាយដីភ្នំទៅចាក់បំពេញឲ្យបុរី លីលី ក្នុងស្រុកកំពង់សីលា រាល់ថ្ងៃនេះ គឺមានការឃុបឃិតគ្នាជាលក្ខណៈប្រព័ន្ធចាប់ពីមេឃុំរហូតដល់អភិបាលស្រុកកំពង់សីលា ហើយសកម្មភាពជីកកកាយដីភ្នំយកដីខាងលើនេះ គឺដីព្រៃភ្នំទាំងនោះស្ថិតក្នុងដែនគម្របព្រៃឈើបៃតងឆ្នាំ២០០២ ហើយក៏ទំនងជាត្រូវបំផ្លាញរលាយហិនហោចកាន់តែធ្ងន់ធ្ងរទៅៗ។
អ្នកភូមិបានបង្ហាញការព្រួយបារម្ភពីការបាត់បង់ដីព្រៃឈើ ឬព្រៃភ្នំធម្មជាតិដែលនៅសេសសល់នៅមូលដ្ឋានស្រុកកំពង់សីលា នាថ្ងៃអនាគតកាន់តែធ្ងន់ទៅៗ ហើយស្នើឲ្យលោក ហ៊ុន សែន ជួយបញ្ជូនមន្ត្រីចុះស៊ើបអង្កេតលើបទល្មើសជីកកាយដីភ្នំទាំងនេះ។
ទាក់ទិនបញ្ហានេះ លោក សម ប្រាថ្នា ប្រធានមន្ទីរឧស្សាហកម្មរ៉ែ និងថាមពលខេត្តព្រះសីហនុ បានឲ្យប្រព័ន្ធផ្សព្វផ្សាយក្នុងស្រុកដឹងកាលពីថ្ងៃទី២៣ ខែមិថុនា ថា ចំពោះសកម្មភាពប្រើគ្រឿងចក្រជីកកកាយដីភ្នំដើម្បីយកដីដឹកចាក់បំពេញឲ្យក្រុមហ៊ុន បុរី លីលី មានទីតាំងនៅស្រុកកំពង់សីលា នេះ គឺមិនទាន់មានច្បាប់នោះទេ។
ប្រភពដដែលបញ្ជាក់ថា ករណីនេះមន្ត្រីក្រសួង មន្ទីរឧស្សាហកម្ម និងមន្ត្រីស្ថាប័នពាក់ព័ន្ធ ក៏បានចុះទៅពិនិត្យជាក់ស្ដែងរួចហើយកាលពីសប្តាហ៍មុន។ លោកបន្តថា ករណីនេះ មន្ត្រីជំនាញនឹងចុះវាស់វែងរណ្ដៅដែលក្រុមហ៊ុនបានជីកដីភ្នំនាំឲ្យប៉ះពាល់ដល់បរិស្ថាននេះ ដើម្បីឈានទៅផាកពិន័យទៅតាមទំហំជាក់ស្ដែង និងតម្រូវម្ចាស់ក្រុមហ៊ុន ត្រូវទៅសុំច្បាប់អនុញ្ញាតពីអាជ្ញាធរឲ្យបានត្រឹមត្រូវ ទើបអនុញ្ញាតឲ្យដំណើរការអាជីវកម្មរបស់ខ្លួនឡើងវិញ។
ចំណែកអ្នកស្រី កែវ មុំ ប្រធានក្រុមប្រឹក្សាភិបាលនៃក្រុមហ៊ុនកំពង់សីលា (Economic Zone) អ៊ីឃើណម៉ិក ហ្សូន បានអះអាងថា សកម្មភាពជីកកកាយដីនៅភ្នំបាក់កង លើផ្ទៃដី ៥០ហិកតារនេះ គឺក្រុមហ៊ុនកំពុងរត់ច្បាប់អនុញ្ញាត។
អ្នកស្រីបន្តថា ក្រុមហ៊ុននេះបានដាក់លិខិតស្នើសុំច្បាប់អនុញ្ញាតទៅកាន់រដ្ឋបាលខេត្តព្រះសីហនុ កាលពីថ្ងៃទី៣១ ខែឧសភា ឆ្នាំ២០២១ មកម្ល៉េះ ប៉ុន្តែរហូតមកដល់ពេលនេះមិនទាន់មានការឆ្លើយតបទេ។ លោកស្រីបានបន្ទោសទៅលើមន្ត្រីស្ថាប័នជំនាញ និងច្បាប់ស្រុកខ្មែរថាធ្វើការយឺតយ៉ាវ។
យ៉ាងនេះក្តី សារព័ត៌មាន The Cambodia Daily នៅមិនទាន់អាចទាក់ទងលោក គួច ចំរើន អភិបាលខេត្តព្រះសីហនុ និងលោកអភិបាលស្រុកកំពង់សីលា ដើម្បីបំភ្លឺលើករណីមានសកម្មភាពគ្រឿងចក្រឈូសបំផ្លាញដីភ្នំ ដែលជាទ្រព្យសម្បត្តិសាធារណៈរបស់រដ្ឋ ដែលកំពុងកើតមានអនាធិបតេយ្យនៅក្នុងមូលដ្ឋានស្រុកកំពង់សីលា បានទេនៅថ្ងៃទី២៥ ខែមិថុនា ឆ្នាំ២០២១៕