30 C
Phnom Penh

តើ​មន្ត្រី​បក្ស​ប្រឆាំង​ដែល​ចេញ​ទៅ​បង្កើត​បក្ស​ថ្មី ស្ថិត​ក្នុង​យុទ្ធសាស្ត្រ​បក្ស​កាន់​អំណាច ឬ​ដើម្បី​ដួង​ព្រលឹង​សង្គ្រោះ​ជាតិ?

ដោយ ឌឹ ខេមបូឌា ដេលី

បទវិភាគ

អតីត​អគ្គលេខាធិការ​គណបក្ស​សង្គ្រោះ​ជាតិ​ក្រៅ​ប្រទេស (CNRP-O) អះអាង​ថា មន្ត្រី​ជាន់ខ្ពស់​របស់​គណបក្ស​សង្គ្រោះ​ជាតិ ដែល​បាន​បង្កើត​គណបក្ស​ថ្មី និង​អ្នក​ដែល​បាន​ចូលរួម​ទាំងអស់ ត្រូវ​អស់​សុពលភាព​ជា​មេដឹកនាំ ឬ​ជា​តំណាង​នៃ​គណបក្ស​សង្គ្រោះ​ជាតិ ដោយ​ស្វ័យប្រវត្តិ។

ការ​អះអាង​នេះ ធ្វើឡើង​បន្ទាប់ពី​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​មួយ​ចំនួន​បាន​នាំគ្នា​ទៅ​បង្កើត​គណបក្ស​នយោបាយ​ថ្មី​រៀងៗ​ខ្លួន ដែល​ក្នុង​នោះ​ក៏​មាន​ការសង្ស័យ​ថា អតីត​មេដឹកនាំ​បក្ស​ប្រឆាំង​លោក សម រង្ស៊ី ជា​ខ្នង​បង្អែក​នៃ​ការ​បង្កើត​បក្ស​ថ្មី​នោះ​ផង​ដែរ។

អតីត​អគ្គលេខាធិការ​គណបក្ស​សង្គ្រោះ​ជាតិ​ក្រៅ​ប្រទេស (CNRP-O) និង​ជា​អគ្គនាយក​អង្គការ​មជ្ឈមណ្ឌល​ប្រជាធិបតេយ្យ​កម្ពុជា (CDC) លោក ប៉ុន សៅរី បាន​សរសេរ​លើ​គណនី Facebook របស់​លោក​កាលពី​ថ្ងៃ​ទី​២៨ ខែ​មិថុនា ឆ្នាំ​២០២១ ថា ថ្នាក់​ដឹកនាំ​របស់​បក្ស​ប្រឆាំង​រូប​ណា​ក៏ដោយ​ដែល​បាន​ផ្ដួចផ្ដើម​បង្កើត និង​ចូលរួម​ក្នុង​គណបក្ស​ផ្សេង ក្រៅពី​បក្ស​សង្គ្រោះ​ជាតិ ឬ​បាន​ចូលរួម​ដើរ​កេណ្ឌ​សកម្មជន​សង្គ្រោះ​ជាតិ​នៅ​មូលដ្ឋាន ពួកគេ​មិន​ត្រូវ​បាន​ទទួលស្គាល់​ថា​ជា​ថ្នាក់​ដឹកនាំ​គណបក្ស​សង្គ្រោះ​ជាតិ​បន្ត​ទៀត​នោះ​ទេ។

លោក​អះអាង​ថា ផ្អែក​តាម​គោលការណ៍​ច្បាប់ និង​ក្រម​សីលធម៌ អ្នក​ទាំងនោះ​ត្រូវ​អស់​សុពលភាព​ជា​មេដឹកនាំ ឬ​ជា​តំណាង​នៃ​គណបក្ស​សង្គ្រោះ​ជាតិ​ជា​ស្វ័យប្រវត្តិ ពីព្រោះ​ជា​ចេតនាកម្ម និង​ជា​នីតិកម្ម គឺ​ពួកគាត់​បាន​ក្លាយ​ទៅជា​ស្ថាបនិក ជា​ថ្នាក់​ដឹកនាំ និង​ជា​សកម្មជន​នៃ​គណបក្ស​ថ្មី​នោះ​ទៅ​ហើយ។

លោក ប៉ុន សៅរី បញ្ជាក់​ថា ក្នុង​នាម​លោក​ជា​អ្នកគាំទ្រ​គណបក្ស​សង្គ្រោះ​ជាតិ​មួយ​រូប​ដែល​បាន​ចូលរួម​ការពារ និង​ពង្រីក​ការ​គាំទ្រ​បក្ស​នេះ ទាំង​ក្នុង​សហគមន៍​ខ្មែរ និង​សហគមន៍​អន្តរជាតិ នឹង​មិន​បណ្តោយ​ឲ្យ​អតីត​ថ្នាក់​ដឹកនាំ​ទាំងអស់​នេះ​រួមដៃ​ជាមួយ​លោក ហ៊ុន សែន បំផ្លាញ​គណបក្ស​សង្គ្រោះ​ជាតិ និង​បំផ្លាញ​នូវ​សេចក្តី​សង្ឃឹម​ប្រជាធិបតេយ្យ​នៅ​កម្ពុជា​បាន​ឡើយ។

ក្រោយ​តុលាការ​កំពូល ប្រកាស​រំលាយ​គណបក្ស​សង្គ្រោះ​ជាតិ មន្ត្រី​ជាន់ខ្ពស់​បក្ស​ប្រឆាំង​ចំនួន ១១៨​រូប ក៏​ត្រូវ​បាន​ហាមឃាត់​សិទ្ធិ​ធ្វើ​នយោបាយ ៥​ឆ្នាំ ផង​ដែរ។ ប៉ុន្តែ ១​ឆ្នាំ​ក្រោយ​នៃ​ការ​រំលាយ​គណបក្ស​នេះ មន្ត្រី​ជាប់​បម្រាម​មួយ​ចំនួន បាន​នាំគ្នា​ស្នើសុំ​សិទ្ធិ​ធ្វើ​នយោបាយ​ពី​ព្រះមហាក្សត្រ​ឡើងវិញ​ជាបន្តបន្ទាប់។ ក្នុង​ចំណោម​នោះ មាន​មន្ត្រី​ខ្លះ​បាន​ដាក់​ពាក្យ​ទៅ​ក្រសួង​មហាផ្ទៃ ដើម្បី​បើក​គណបក្ស​នយោបាយ​ដោយ​ខ្លួនឯង​ថែមទៀត​ផង ចាប់តាំង​ពី​ឆ្នាំ​២០១៨ មក។

បើ​គិត​មក​ទល់​នឹង​ពេល​នេះ គណបក្ស​ដែល​បង្កើត​ឡើង​ដោយ​មន្ត្រី​ជាន់ខ្ពស់​គណបក្ស​សង្គ្រោះ​ជាតិ មាន​ចំនួន ៥​គណបក្ស​ហើយ។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា បាន​ថ្លែង​នៅ​ក្នុង​កម្មវិធី Idea Talk កាលពី​រាត្រី​ថ្ងៃ​ទី​២៨ ខែ​មិថុនា ថា លោក​ទទួល​បាន​ព័ត៌មាន​ពី​សកម្មជន​បក្ស​ប្រឆាំង​នៅ​មូលដ្ឋាន​ថា មន្ត្រី​ជាន់ខ្ពស់​បក្ស​ប្រឆាំង​ប្រចាំ​ខេត្ត​បន្ទាយមានជ័យ គឺ​លោក ហុង សុជាតិ កំពុងតែ​ដើរ​អូសទាញ​អតីត​តំណាង​ស្រុក​ទាំង ៩ រួម​ទាំង​អតីត​មេឃុំ និង​ក្រុមប្រឹក្សា​ឃុំ​របស់​បក្ស​ប្រឆាំង​នៅ​ខេត្ត​បន្ទាយមានជ័យ ឲ្យ​ចូលរួម​ជាមួយ​គណបក្ស​បេះដូង​ជាតិ យ៉ាង​សស្រាក់សស្រាំ​ក្នុង​ពេល​នេះ។

លោក​ថា មន្ត្រី​បក្ស​ប្រឆាំង​ដែល​ដើរ​អូសទាញ​ទាំងអស់​នោះ បាន​អះអាង​ដោយ​ត្រង់ៗ​ទៅ​សកម្មជន​នៅ​មូលដ្ឋាន​ថា គណបក្ស​បេះដូង​ជាតិ ត្រូវ​បាន​បង្កើត​ឡើង​ដោយ​មាន​ការ​ជួយ​ជ្រោមជ្រែង​ពី​អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង អ្នកស្រី មូរ សុខហួរ និង​អតីត​សមាជិក​ព្រឹទ្ធសភា​ពី​ខាង​បក្ស​ប្រឆាំង​លោក សោ ចាន់ដេត ដែល​ធ្លាប់​ជា​តំណាង​ក្រុម​ការងារ​ខេត្ត​បន្ទាយមានជ័យ។

ជុំវិញ​ការ​បង្កើត​គណបក្ស​នយោបាយ​ថ្មីៗ​នេះ សហ​មេធាវី​ការពារ​ក្តី​ប្រធាន​គណបក្ស​សង្គ្រោះ​ជាតិ លោក ចាន់ ចេន បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃ​ទី​២៩ មិថុនា ថា ការ​បង្កើត​គណបក្ស​នយោបាយ​ថ្មីៗ​ទាំងនោះ មិនមែន​ជា​ការ​ផ្ដួចផ្ដើម ឬ​ជា​ការ​គាំទ្រ​នៅ​ពីក្រោយ​ដោយ​មេដឹកនាំ​បក្ស​ប្រឆាំង​លោក កឹម សុខា នោះ​ទេ។

ការ​អះអាង​នេះ បាន​ធ្វើឡើង​បន្ទាប់ពី​មាន​អតីត​មន្ត្រី​បក្ស​ប្រឆាំង​ដែល​បាន​ចេញ​ទៅ​បើក​គណបក្ស​ថ្មីៗ​មួយ​ចំនួន បាន​ប្រាប់​សកម្មជន​បក្ស​សង្គ្រោះ​ជាតិ​នៅ​ខេត្ត​ត្បូងឃ្មុំ និង​ខេត្ត​បន្ទាយមានជ័យ ថា​គណបក្ស​របស់​ពួកគេ គឺ​មាន​ប្រធាន​គណបក្ស​សង្គ្រោះ​ជាតិ លោក កឹម សុខា នៅ​ពីក្រោយ ក្រោម​លេស​ថា​លោក​នៅ​ជាប់​បម្រាម​នយោបាយ​នៅឡើយ ទើប​បាន​ជា​មិនទាន់​ចេញ​មុខ។

លោក ហ៊ុន សែន កាលពី​ចុង​ខែ​ឧសភា ឆ្នាំ​២០២១ បាន​អះអាង​ថា កម្ពុជា​កំពុងតែ​អនុវត្ត​លទ្ធិប្រជាធិបតេយ្យ​សេរី​ពហុ​បក្ស​បាន​យ៉ាង​ល្អ បើ​ទោះបីជា​គ្មាន​អតីត​បក្ស​សង្គ្រោះ​ជាតិ ក៏ដោយ ព្រោះ​ថា​មន្ត្រី​បក្ស​ប្រឆាំង​ដែល​បាន​សុំ​សិទ្ធិ​ធ្វើ​នយោបាយ​ឡើងវិញ បាន​នាំគ្នា​ទៅ​បង្កើត​បក្ស​ថ្មី​ដើម្បី​ចូលរួម​ប្រកួតប្រជែង​ក្នុង​ការបោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​ក្នុង​ឆ្នាំ​២០២២ ខាងមុខ។

កាលពី​ចុង​ឆ្នាំ​២០២០ ក្រសួង​មហាផ្ទៃ បាន​បង្ហាញ​របាយការណ៍​របស់​ខ្លួន​ថា កម្ពុជា​មាន​គណបក្ស​នយោបាយ​ជាង ៤០​គណបក្ស​ហើយ​ដែល​បាន​ចុះបញ្ជី​ជា​ផ្លូវការ ខណៈ​មន្ត្រី​បក្ស​ប្រឆាំង​ដែល​បាន​សុំ​សិទ្ធិ​ធ្វើ​នយោបាយ​ឡើងវិញ​មួយ​ចំនួន កំពុងតែ​ស្វះស្វែង​ដាក់​ពាក្យ​ស្នើសុំ​បង្កើត​បក្ស​នយោបាយ​បន្ថែម​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស