ពលរដ្ឋរស់នៅស្រុកបុទុមសាគរ បានអះអាងថា ព្រៃស្មាច់ ឬដើមស្មាច់មានផ្ទៃដីរាប់រយហិកតារនៅក្នុងបរិវេណតំបន់ដីព្រៃស្មាច់ដែលរដ្ឋបម្រុងទុក ស្ថិតក្នុងស្រុកបុទុមសាគរ ខេត្តកោះកុង ត្រូវបុគ្គលជាអ្នកមានទ្រព្យ និងមន្ត្រីមានអំណាចមួយចំនួនបានជួលមនុស្សពីខេត្តផ្សេងៗចូលទៅកាប់ទន្ទ្រាន ដើម្បីយកដីធ្វើកម្មសិទ្ធិឯកជនយ៉ាងអនាធិបតេយ្យ ដោយមិនឃើញមន្ត្រីជំនាញពិនិត្យ ឬទប់ស្កាត់នោះឡើយ។
ក្រុមអ្នកភូមិព្រលាន និងភូមិតាំកន់ ឃុំកណ្ដោល បានបញ្ជាក់ថា អ្នកនៅពីក្រោយបទល្មើសកាប់រានដីព្រៃស្មាច់ក្នុងស្រុកបុទុមសាគរ ខាងលើនេះ គឺភាគច្រើនជាអ្នកមានទ្រព្យធន និងជាមន្ត្រីមានអំណាចមកពីរាជធានីភ្នំពេញ។
ពលរដ្ឋបន្តថា ជនខិលខូចទាំងនោះបានជួលមនុស្សពីក្រៅតំបន់ ឬខេត្តផ្សេងៗឲ្យចូលទៅកាប់ដើមស្មាច់ដែលរដ្ឋបម្រុងទុកនោះ ដើម្បីរានដីធ្វើជាកម្មសិទ្ធិបុគ្គល។ ពួកគេបន្តថា ការកាប់រានដីព្រៃស្មាច់ខាងលើនេះ គឺពួកគេទាំងនោះធ្វើសកម្មភាពនៅពេលយប់ដែលអាចរំលងពីភ្នែកច្រមុះរបស់សមត្ថកិច្ច។
អ្នកភូមិបន្តទៀតថា គិតត្រឹមថ្ងៃទី០៩ ខែកក្កដា ឆ្នាំ២០២១ នេះ បរិវេណព្រៃស្មាច់ដែលជនខិលខូចកំពុងកាប់ទន្ទ្រានយ៉ាងអនាធិបតេយ្យទាំងនោះ អាចមានផ្ទៃដីច្រើនជាង ៣០០ហិកតារ។ ចំណែកឯសកម្មភាពកាប់រានព្រៃស្មាច់នេះ បានកើតឡើងជាង ២ខែមកហើយ ដោយមិនឃើញអាជ្ញាធរមូលដ្ឋានឃុំ-ស្រុក ជាពិសេសមន្ត្រីក្រសួង មន្ទីរ អង្គភាពជំនាញពាក់ព័ន្ធផ្នែកណាមួយនៃរដ្ឋបាលខេត្តកោះកុង ចុះមកពិនិត្យ ឬទប់ស្កាត់នៅឡើយទេ។
ពលរដ្ឋរស់នៅឃុំកណ្ដោល បានស្នើសុំដល់អ្នកស្រី មិថុនា ភូថង អភិបាលខេត្តកោះកុង និងលោក សាយ សំអាល់ រដ្ឋមន្ត្រីក្រសួងបរិស្ថានជាដើម បញ្ជូនមន្ត្រីជំនាញចុះទប់ស្កាត់បទល្មើសកាប់ទន្ទ្រានព្រៃស្មាច់ដោយខុសច្បាប់ទាំងនេះឲ្យទាន់ពេលវេលា និងមានប្រសិទ្ធភាព។ ពួកគាត់បន្តថា បទល្មើសកាប់រានដើមស្មាច់នៅមូលដ្ឋាននេះមានសភាពធ្ងន់ធ្ងរបំផុត ចំណែកឯមន្ត្រីឧទ្យានជាតិទីស្នាក់ការល្បាតកណ្តោល នៃតំបន់ប្រើប្រាស់ច្រើនយ៉ាងដងពែង មិនបានចុះទៅបង្ក្រាបបទល្មើសនេះឡើយ។
យ៉ាងនេះក្តី សារព័ត៌មាន The Cambodia Daily នៅមិនទាន់អាចមានប្រភពទាក់ទងអ្នកស្រី មិថុនា ភូថង អភិបាលខេត្តកោះកុង និងលោក សាយ សំអាល់ រដ្ឋមន្ត្រីក្រសួងបរិស្ថាន ដើម្បីស្នើសុំការបំភ្លឺជុំវិញបទល្មើសកាប់រានដើមស្មាច់នៅស្រុកបុទុមសាគរ បាននៅឡើយទេនៅថ្ងៃសុក្រ ទី០៩ ខែកក្កដា ឆ្នាំ២០២១៕