រដ្ឋប្រហារនៅប្រទេសភូមា មានអាយុ ៦ខែមកហើយនៅពេលនេះ។ មេរដ្ឋប្រហារនៃប្រទេសភូមា នេះ គឺលោកឧត្តមសេនីយ៍ មីន អ៊ុងឡាំង។ មីន អ៊ុងឡាំង ជាឧត្តមសេនីយ៍ជំនាន់ក្រោយនៃមេរដ្ឋប្រហារជំនាន់មុន គឺឧត្តមសេនីយ៍ ថាន់ ស្វេ។ បុរសម្នាក់នេះមុនធ្វើរដ្ឋប្រហារ គឺត្រូវដាក់ឱ្យចូលនិវត្តន៍ពីក្របខ័ណ្ឌយោធា ដែលការពិតគាត់ត្រូវចូលនិវត្តន៍នៅខែមិថុនា ឆ្នាំ២០២១ នេះ។
ឥឡូវ គាត់ធ្វើរដ្ឋប្រហារបានសម្រេចដោយទាញអំណាចធ្លាក់មកក្នុងដៃពួកយោធាវិញ និងក្រោមការកាន់កាប់របស់ខ្លួន។ បុរសរូបនេះទោះជាដឹងថារបបសឹករបស់គាត់មានភាពអាម៉ាស់នៅលើវេទិកាអន្តរជាតិក៏ដោយ គឺលោកតែងព្យាយាមញញឹមដោយចាត់ទុកថាគ្មាននរណាក្លាហានជាងរូបគាត់។
នេះបើនិយាយអំពីវត្តមានរបស់គាត់នៅលើវេទិកាធំៗចំនួនពីរក្នុងរយៈពេលចុងក្រោយនេះ គឺនៅវេទិកាមេដឹកនាំកំពូលអាស៊ាន កាលពីថ្ងៃទី២៤ ខែមេសា ដែលបានធ្វើឡើងនៅទីក្រុងចាការតា ប្រទេសឥណ្ឌូនេស៊ី និងមួយទៀតនៅក្នុងប្រទេសរុស្ស៊ី។
ក្នុងវេទិកាអាស៊ានពេលនោះ គឺមេដឹកនាំអាស៊ានភាគច្រើនសម្លឹងគយគន់បុរសនេះដែលយ៉ាងហោចណាស់ចាត់ទុកថាជាឥស្សរជនចម្លែក និងអាក្រក់ជាងគេ។ ប៉ុន្តែបុរសនេះនៅតែព្យាយាមញញឹមទៅកាន់សមភាគីរបស់ខ្លួនទោះគេពុំចង់ស្វាគមន៍ក៏ដោយ។
មិនបានប៉ុន្មានសប្ដាហ៍ផង មេរដ្ឋប្រហារមួយរូបនេះក៏ឡើងយន្តហោះទៅកាន់ទីក្រុងមូស្គូ ដើម្បីចូលរួមកិច្ចប្រជុំអន្តរជាតិធំមួយអំពីសន្តិសុខពិភពលោកដែលក្រុងមូស្គូ ជាម្ចាស់ផ្ទះ។ លោក មីន អ៊ុងឡាំង ក៏ត្រូវបានប្រតិភូពីប្រទេសផ្សេងៗតាមសម្លឹងមើលផងដែរ ព្រោះបុរសរូបនេះត្រូវបានកត់សម្គាល់ថាជាមេរដ្ឋប្រហារថ្មីបំផុតនៅអាស៊ីអាគ្នេយ៍ ដែលបានប្លន់អំណាចពីរដ្ឋាភិបាលស៊ីវិលមួយគាំទ្រដោយប្រជាជនយ៉ាងភ្លូកទឹកភ្លូកដី។
មើលទៅភាពមិនចេះខ្មាសអៀនរបស់ជនផ្ដាច់ការម្នាក់នេះ បាននាំឱ្យបុរសនេះព្យាយាមបញ្ជូនលិខិតទៅកាន់មហាសន្និបាតអង្គការសហប្រជាជាតិ ដែលកាលពីថ្មីៗនេះគាត់បានបញ្ជូនឈ្មោះឧត្តមសេនីយ៍ចូលនិវត្តន៍ម្នាក់ដើម្បីសុំយកអាសនៈពីរដ្ឋាភិបាលលោកស្រី អ៊ុងសាន ស៊ូជី។
អាសនៈនៅអង្គការសហប្រជាជាតិបច្ចុប្បន្ននេះ គឺលោក ក្យ៉មូធុន កំពុងតែកាន់កាប់។ លោក ក្យ៉មូធុន គឺជាអ្នកការទូតតំណាងឱ្យរដ្ឋាភិបាលឯកភាពជាតិនៃគណបក្សសម្ព័ន្ធជាតិប្រជាធិបតេយ្យដឹកនាំដោយលោកស្រី អ៊ុងសាន ស៊ូជី។
របបសឹករបស់ឧត្តមសេនីយ៍ មីន អ៊ុងឡាំង បានបរាជ័យម្ដងហើយនៃការទាមទារអាសនៈនេះកាលពីចុងខែកុម្ភៈ ដោយមហាសន្និបាតទាត់ចោល។ ជាថ្មីម្ដងទៀត លិខិតសុំអាសនៈនេះត្រូវបានទីភ្នាក់ងារសារព័ត៌មាន Reuters ទម្លាយឱ្យដឹងថា របបសឹកភូមាបានបញ្ជូនទៅគណៈកម្មាធិការសាតាំងនៃមហាសន្និបាតអង្គការសហប្រជាជាតិនៅចុងខែមិថុនា ដែលរហូតមកដល់ពេលនេះ ពុំទាន់ឃើញក្រុមជំនាញនៃការត្រួតពិនិត្យសំណើនេះឆ្លើយតបនៅឡើយទេ។
តែយ៉ាងណា អគ្គលេខាធិការអង្គការសហប្រជាជាតិ អង់តូនីញ៉ូ ហ្គូតារ៉េស បានព្រមានហើយថា នឹងពុំមានប្រទេសណាគាំទ្ររបបសឹកនោះទេ ទោះជារបបសឹកនេះព្យាយាមចង់បានភាពស្របច្បាប់នៅក្នុងស្ថាប័នពិភពលោកមួយនេះក៏ដោយ។
ឥឡូវនេះ មេរដ្ឋប្រហារភូមាដែលមជ្ឈដ្ឋានជាច្រើនហៅថាជនផ្ដាច់ការមុខក្រាស់ បានលើកតម្កើងខ្លួនឯងជានាយករដ្ឋមន្ត្រី។
កាសែត The guardian បានចុះផ្សាយថា លោកឧត្តមសេនីយ៍ មីន អ៊ុងឡាំង បានប្រកាសនៅចំពោះមុខឧត្តមសេនីយ៍ក្រោមបង្គាប់របស់លោកថា លោកគឺជានាយករដ្ឋមន្ត្រីចាប់ពីពេលនេះតទៅ។
ក្នុងវេទិកានោះ មេរដ្ឋប្រហារម្នាក់នេះបានប្ដេជ្ញានៅចំពោះមុខឧត្តមសេនីយ៍របស់ខ្លួនថា ២ឆ្នាំទៀតនឹងរៀបចំឱ្យមានការបោះឆ្នោត គឺនៅចុងឆ្នាំ២០២៣។ លោកសន្យាថា ការបោះឆ្នោតនៅពេលនោះ គឺត្រូវតែត្រឹមត្រូវ និងមានភាពសេរី។
ប៉ុន្តែលោកបានព្រមានថា ការបោះឆ្នោតនៅពេលនោះគឺអាស្រ័យលើស្ថានភាពជាក់ស្ដែង ថាតើស្ថិរភាពសង្គមនិងនយោបាយដូចម្ដេច។ នៅខណៈដែលលោកដំឡើងខ្លួនឯងជានាយករដ្ឋមន្ត្រី ឧត្តមសេនីយ៍រូបនេះក៏មិនបានជម្រុះចោលឯកសណ្ឋានយោធានោះទេ ហើយបានប្រកាសថា របបសឹកភូមាបច្ចុប្បន្នត្រៀមខ្លួនដើម្បីចរចាជាមួយនឹងសមាគមអាស៊ានក្នុងដំណាក់កាលបណ្ដើរៗដើម្បីឈានទៅដល់ការយល់ព្រមឱ្យមានប្រេសិតពិសេសរបស់សមាគមអាស៊ាននៅក្នុងប្រទេសភូមា។
ប៉ុន្តែសារព័ត៌មានមួយទៀត គឺកាសែតបាងកកប៉ុស្តិ៍ បានចុះផ្សាយថា នៅថ្ងៃទី២ សីហា នេះ រដ្ឋមន្ត្រីការបរទេសអាស៊ានត្រូវជួបប្រជុំគ្នាមួយលើកទៀត ហើយធ្វើសេចក្ដីសម្រេចអំពីការបង្កើតក្រុមប្រេសិតទៅកាន់ប្រទេសភូមា។
បើតាមប្រភពដដែលនេះ ឥស្សរជនបីរូប គឺជាសមាសភាពនៃក្រុមប្រេសិតពិសេសនេះ ក្នុងនោះមានអតីតអនុរដ្ឋមន្ត្រីថៃម្នាក់ដែលពួកយោធាភូមាបង្ហើបថា ខ្លួនគេពេញចិត្តអ្នកការទូតរូបនេះ គឺលោក Virasakdi Futrakul។
ក្នុងកិច្ចប្រជុំនេះ ត្រូវគេរំពឹងថា ប្រធានសមាគមអាស៊ានឆ្នាំនេះ គឺប្រទេសព្រុយណេ នឹងដឹកនាំប្រតិភូប្រេសិតពិសេសបីរូបទៅកាន់ប្រទេសភូមា ហើយបង្កើតការិយាល័យអចិន្ត្រៃយ៍នៅទីនោះ ដើម្បីបំពេញភារកិច្ចរបស់ខ្លួនក្នុងនាមជាអ្នកសម្របសម្រួលឱ្យមានការចរចានយោបាយរវាងភាគីពាក់ព័ន្ធទាំងអស់ជាមួយនឹងរបបសឹកភូមា។ តែយ៉ាងណា ពុំឃើញមានមេដឹកនាំប្រទេសណាមួយក្នុងតំបន់ និងផ្សេងៗទៀតបញ្ជូនលិខិតអបអរសាទរមេរដ្ឋប្រហារភូមាម្នាក់នេះដែលលើកខ្លួនឯងធ្វើជានាយករដ្ឋមន្ត្រីនោះទេ។
ចាប់តាំងពីពួកយោធាប្លន់អំណាចនៅថ្ងៃទី១ ខែកុម្ភៈ ឆ្នាំ២០២១ មក ពលរដ្ឋដែលបានងើបឡើងប្រឆាំងពួកយោធាជាង ៩០០នាក់ ត្រូវបានសម្លាប់ និងចាប់ខ្លួនជិត ៥០០០នាក់ ក្នុងនោះមានមន្ត្រីរបស់គណបក្សសម្ព័ន្ធជាតិប្រជាធិបតេយ្យ ជាង ៣០០នាក់ មានទាំងអ្នកស្រី អ៊ុងសាន ស៊ូជី និងប្រធានាធិបតី Win Myint ផងដែរ៕