នៅទីបំផុត សមាគមអាស៊ានបានសម្រេចជាផ្លូវការតែងតាំងប្រធានក្រុមប្រេសិតពិសេស គឺអនុរដ្ឋមន្ត្រីការបរទេសទីពីរនៃប្រទេសព្រុយណេ គឺលោក Erywan Yusof បន្ទាប់ពីអាមេរិកព្រមានថាបើអាស៊ានពុំអាចបង្កើតក្រុមនេះបានទេ គឺអាមេរិកអាចនឹងទាញបញ្ហាប្រទេសភូមាទៅកាន់ស្ថាប័នអន្តរជាតិផ្សេងទៀត។
សេចក្ដីរាយការណ៍របស់កាសែតជប៉ុន Nikkei Asia បានចុះផ្សាយនៅថ្ងៃទី៤ ខែសីហា ថា ក្រុមរដ្ឋមន្ត្រីការបរទេសអាស៊ាន ទីបំផុតបានសម្រេចដោយមតិរួមគ្នាតែងតាំងលោក Erywan Yosof ឲ្យទៅបង្កើតការិយាល័យនៃក្រុមប្រេសិតពិសេសអាស៊ាននៅក្នុងទឹកដីភូមា ហើយបុរសនេះត្រូវដឹកនាំប្រតិភូអាស៊ានទៅកាន់ប្រទេសភូមា ដើម្បីសម្របសម្រួលឲ្យមានការចរចានយោបាយ និងឈានទៅដល់ការបញ្ចប់អំពើហិង្សា។
ប្រភពដដែលឲ្យដឹងថា របបសឹកភូមាក៏បានទទួលយកតំណាងមកពីប្រទេសព្រុយណេនេះ គឺបន្ទាប់ពីរដ្ឋមន្ត្រីការបរទេសអាស៊ាន ៩ប្រទេស បានជួបប្រជុំដាច់ដោយឡែកដោយពុំមានវត្តមានរបស់តំណាងរបបសឹក ហើយក្រោយមកក៏បានស្នើឲ្យតំណាងពួកយោធាភូមាទទួលយកលោក Erywan yousof ជាប្រធានប្រេសិតសម្រាប់អាស៊ានប្រចាំប្រទេសភូមា។
កិច្ចប្រជុំមានរយៈពេល ២ថ្ងៃហើយដោយបានប្រព្រឹត្តទៅរយៈពេល ៤ម៉ោងនៅថ្ងៃពុធ ទី៤ សីហា។
បន្ទាប់ពីធ្វើសេចក្ដីសម្រេចដូចនេះ គឺសមាគមអាស៊ានក៏បានចេញសេចក្ដីថ្លែងការណ៍រួមគ្នា គឺ ១០ប្រទេស ស្វាគមន៍ការបង្កើតក្រុមប្រេសិតពិសេសនេះ។ ក្រុមប្រេសិតពិសេសរបស់សមាគមអាស៊ានមានសមាសភាពយ៉ាងតិច ៣រូបថែមទៀត ប៉ុន្តែត្រឹមតែជាសមាជិកប៉ុណ្ណោះ។
ក្រុមប្រេសិតពិសេសនេះត្រូវអនុវត្តផែនការ ៥ចំណុចរបស់មេដឹកនាំសមាគមអាស៊ានដែលបានធ្វើកាលពីថ្ងៃទី២៤ ខែមេសា។
ផែនការទាំង៥ នោះរួមមាន ការបញ្ចប់អំពើហិង្សា ការដោះលែងអ្នកជាប់ឃុំទាំងអស់ និងបើកការចរចានយោបាយសំដៅឲ្យមានការបោះឆ្នោតឡើងវិញ។ ផែនការ ៥ចំណុចនេះក៏តម្រូវឲ្យប្រទេសភូមា បើកឲ្យមានជំនួយអន្តរជាតិទាំងអស់ចូលទៅប្រទេសនេះដើម្បីជួយប្រជាជនភូមាដែលធ្លាក់ក្នុងស្ថានភាពអត់ឃ្លាន ដោយសាររបបសឹកឡើងកាន់អំណាចតាមរយៈការធ្វើរដ្ឋប្រហារថ្ងៃទី១ កុម្ភៈ ឆ្នាំ២០២១។
នៅឆ្នាំនេះ ប្រទេសព្រុយណេ គឺជាប្រធានសមាគមអាស៊ាន។ ប្រទេសនេះត្រូវដឹកនាំកិច្ចប្រជុំរបស់អាស៊ានទាំងកិច្ចប្រជុំរដ្ឋមន្ត្រីការបរទេស កិច្ចប្រជុំកំពូលនៃប្រមុខរដ្ឋនិងនាយករដ្ឋមន្ត្រី កិច្ចប្រជុំរដ្ឋមន្ត្រីការពារជាតិ និងកិច្ចប្រជុំលើវិស័យផ្សេងៗទៀត។ ប៉ុន្តែប្រទេសព្រុយណេ ដែលអនុរដ្ឋមន្ត្រីការបរទេសរបស់ប្រទេសនេះ គឺលោក Erywan Yousof ជាប្រធានប្រតិភូប្រេសិតអាស៊ាន មានភារកិច្ចធ្ងន់ធ្ងរនៅចំពោះមុខ គឺត្រូវស្វែងរកដំណោះស្រាយឲ្យបានសម្រាប់ប្រទេសភូមា។
គេរំពឹងថា នៅសប្ដាហ៍ក្រោយនេះ ក្រុមប្រេសិតពិសេសនេះនឹងទៅកាន់ប្រទេសភូមា ហើយប្រគល់លិខិតចាត់តាំងទៅមេរដ្ឋប្រហារឧត្តមសេនីយ៍ មីង អ៊ុងឡាំង ដែលទើបលើកខ្លួនឯងឡើងជានាយករដ្ឋមន្ត្រី។
មីន អ៊ុងឡាំង បានប្រកាសថាលោកនឹងរៀបចំបោះឆ្នោតឡើងវិញនៅចុងឆ្នាំ២០២៣ ប៉ុន្តែអ្នកសង្កេតការណ៍មើលឃើញថា ក្រុមប្រឆាំងនៅក្នុងប្រទេសភូមានៃរដ្ឋាភិបាលឯកភាពជាតិ នឹងមិនយល់ព្រមការបោះឆ្នោតតាមការតម្រូវរបស់ពួកយោធានោះទេ ហើយបញ្ហានេះគឺជាភារកិច្ចសម្របសម្រួលរបស់ក្រុមប្រេសិតពិសេសរបស់សមាគមអាស៊ានដែលទើបបង្កើតបាននៅថ្ងៃនេះ។
នៅក្នុងសេចក្ដីថ្លែងការណ៍រួមរបស់រដ្ឋមន្ត្រីការបរទេសអាស៊ាន បានសម្ដែងការព្រួយបារម្ភជាខ្លាំងអំពីស្ថានការណ៍ហិង្សាដែលចេះតែបន្តនៅភូមា ដោយបានទាមទារឲ្យរកមធ្យោបាយចរចា ហើយដោះលែងអ្នកជាប់ឃុំទាំងអស់។
ចាប់តាំងពីថ្ងៃរដ្ឋប្រហារមក ពលរដ្ឋភូមាស្លាប់ដោយគ្រាប់កាំភ្លើងរបស់ពួកយោធាកើនជាង ៩០០នាក់ និងចាប់ខ្លួនជាង ៥ពាន់នាក់ ក្នុងនោះមានមន្ត្រីរបស់រដ្ឋាភិបាលឯកភាពជាតិជាង ៣០០នាក់។
សេចក្ដីថ្លែងការណ៍របស់សមាគមអាស៊ាន បានប្រាប់ទៅរបបសឹកភូមាត្រូវសហការជាមួយសមាគមអាស៊ាន ជាពិសេសតាមរយៈប្រេសិតពិសេសនេះ។
តែជាការកត់សម្គាល់ អាស៊ានឈានដល់ការបង្កើតក្រុមប្រេសិតពិសេសនេះដើម្បីប្រទេសភូមា ធ្វើឡើងនៅពេលដែលរដ្ឋមន្ត្រីការបរទេសអាមេរិក Antony Bliken បានជួបប្រជុំជាមួយក្រុមរដ្ឋមន្ត្រីរបស់សមាគមនេះកាលពីថ្ងៃចន្ទ ដោយបានប្រាប់ទៅកាន់អាស៊ានថា អាមេរិកចង់លូកដៃចូលរឿងភូមាឲ្យកាន់តែស៊ីជម្រៅ បើអាស៊ានពុំអាចបញ្ចេញសកម្មភាពឲ្យបានច្បាស់លាស់ក្នុងការបញ្ចប់របបសឹកឱ្យទាន់ពេលវេលាទេនោះ។ លោក Antony បានបញ្ជាក់ទៀតថា អាមេរិកនឹងរុញរឿងភូមាទៅកាន់ស្ថាប័នអន្តរជាតិមួយផ្សេងទៀត។ តែមើលទៅ គឺក្រុមប្រឹក្សាសន្តិសុខអង្គការសហប្រជាជាតិ ឬក៏មហាសន្និបាតអង្គការសហប្រជាជាតិ៕